ఈ 'మెషిన్ భాష' మంచి కెరీర్ కు భరోసా!

 సాంకేతికత‌ మ‌న రోజువారీ జీవితంలో ఒక అంత‌ర్భాగంగా మారిపోయింది. సాంకేతిక సాయం లేకుండా అడుగు తీసి అడుగు వేయ‌లేని ప‌రిస్థితి ఏర్ప‌డిందంటే అతిశ‌యోక్తి కాదు. ఒక్క క్ష‌ణం చేతిలో స్మార్ట్ ఫోన్ లేకుంటే మ‌నం ఎంత‌లా విల‌విల‌లాడిపోతున్నామ‌న్న‌ది ప్ర‌తీ ఒక్క‌రికీ స్వీయ అనుభ‌వ‌మే. ఇలా అప‌రిమితంగా విస్త‌రిస్తున్న టెక్నాల‌జీయే కొత్త అవ‌కాశాల‌కు, ఉపాధి క‌ల్ప‌న‌కు దారులు ప‌రుస్తోంది. మ‌నం ఇప్ప‌టికే టెక్నాల‌జీ పుణ్యామ‌ని దూసుకొచ్చిన విభిన్న‌ కెరీర్ ల గూర్చి చ‌ర్చించుకున్నాం. అలాగే వ‌చ్చిన మ‌రొక కెరీరే కంప్యూటేష‌న‌ల్ లింగ్విస్టిక్స్. ఇంట‌ర్నెట్ ప్ర‌తీ ఒక్క‌రికీ చేరువ కావాల్సిన అవ‌స‌రం ఏర్ప‌డ‌టం ఈ కెరీర్ పుట్టుక‌కు కార‌ణం. ప్ర‌స్తుతం ఇంట‌ర్నెట్ లో స్థానిక భాష‌ల వినియోగం పెరుగుతోంది. దీంతో వెబ్ సైట్ల‌లోని స‌మాచారాన్ని వేరొక భాష‌లోకి అనువాదం చేయాల్సిన  అవ‌స‌రం ఏర్ప‌డింది. టెక్నాల‌జీ వినియోగంలో ఇంగ్లీష్ కు ఇత‌ర భాష‌ల‌కు మ‌ధ్య ఉన్న అంత‌రాన్ని త‌గ్గించే వ్య‌వ‌స్థ‌లో కంప్యూటేష‌న‌ల్ లింగ్విస్టిక్ ఒక కీల‌క ముందడుగు. ప్ర‌జంట్ హాట్ కెరీర్స్ లో ఒక‌టిగా నిలుస్తున్న ఈ ట్రెండీ కెరీర్ గూర్చి తెలుసుకుందాం. 

మార్కెటింగ్ లో ప్రాంతీయ భాష‌లే కీల‌కం 

టెక్నాల‌జీ వ‌రల్డ్ లో ఇంగ్లీష్ భాష‌కున్న ప్రాధాన్య‌త అంద‌రికీ తెల‌సిందే. ప్ర‌పంచంలో ఎన్నో భాష‌లు ఉన్నా కంప్యూట‌ర్స్ లో ఇంగ్లీష్ దే సింహ‌భాగం. అయితే ఇది గ‌తం. ప్ర‌స్తుతం కంప్యూట‌ర్ వినియోయ‌గంలో ప్రాంతీయ భాష‌ల వాటా పెరుగుతోంది. ముఖ్యంగా ఇంట‌ర్నెట్ వినియోగం పెరిగాక‌, వ్యాపారాలు ప్ర‌ధానంగా ఈ కామ‌ర్స్ ద్వారానే జ‌రుగుతున్నాయి. దీంతో ప్ర‌జ‌ల్లోకి నేరుగా వారికి అర్ధ‌మ‌య్యే భాష‌లో చెప్పాల్సిన అవ‌స‌రం కంపెనీల‌కు ఏర్ప‌డింది. దీంతో ఏటీఎం మెషిన్ ల ద‌గ్గ‌ర్నుంచి, అన్ని ర‌కాలు సేవ‌ల ఆధారిత వెబ్ సైట్ల‌లో  స్థానిక భాష‌ల వినియోగం అనూహ్యంగా పెరిగింది. దీంతో ఆన్ లైన్ డిక్ష‌న‌రీలు, వెబ్ సైట్ లోని స‌మాచారాన్ని వేరొక భాష‌లోకి ఆటోమేటిక్ గా త‌ర్జుమా చేసే సాఫ్ట్ వేర్ ల వినియోగం పెరిగిపోయింది. 

ఇంట‌ర్నెట్ వినియోగం మ‌రింత సుల‌భత‌రం 

    ప్ర‌పంచంలో అత్య‌ధికులు ఉప‌యోగించేది భాష ఇంగ్లీష్ కాదు. చైనాలో మాండ‌రిన్, అలానే మ‌న దేశంలో ఎన్నో స్థానిక భాష‌లు ఉన్నాయి. ఇంగ్లీష్ పరిజ్ఞానం లేకుంటే ఇంట‌ర్నెట్ కు దూరం అవ్వాల్సిన ప‌రిస్థితి ఏర్ప‌డుతోంది. దీంతో ఆయా దేశాల్లోని భాష‌ల‌కు అనుగుణంగా సెర్చ్ ఇంజిన్స్, ఇత‌ర కంపెనీలు స్థానిక భాష‌ల‌కే పెద్ద పీట వేస్తున్నాయి. ఫేస్ బుక్, ట్విట్ల‌ర్ వంటి సామాజిక మాధ్య‌మాల్లో ఇప్ప‌టికే ఇంగ్లీష్ లో ప‌దాల‌ను టైప్ చేస్తే అదే అర్ధంతో తెలుగులో ప‌దాలు రావ‌డం మ‌నం చూస్తూనే ఉన్నాం. ఇంట‌ర్నెట్ ను ఆయా ప్రాంతీయ భాష‌ల‌కు అనుగుణంగా మ‌ల‌చ‌డం అనే ప్ర‌క్రియ‌లో భాగంగానే ఈ మార్పులు చోటుచేసుకుంటున్నాయి. దీంతో ఇది ఇప్పుడు అతిపెద్ద కెరీర్ గా మారింది. కంప్యూట‌ర్ ప్రొగ్రామింగ్ తో పాటు భాష‌పై ప‌ట్టు ఉన్న వారికి కంప్యూటేష‌న‌ల్ లింగ్విస్టిక్స్ మంచి కెరీర్ ఆప్ష‌న్ గా మారుతోంది. మ‌నిషి రాయడానికి, మాట్లాడ‌టానికి ఉప‌యోగించే భాష ను కంప్యూట‌ర్ కు అనుసంధానం చేసి ఒక స‌రికొత్త కంప్యూట‌ర్ భాష‌ను త‌యారు చేయ‌డ‌మే కంప్యూటేష‌న‌ల్ లింగ్విస్టిక్స్. 

భాషాప‌ర‌మైన అంశాలు చాలా కీల‌కం

     కంప్యూటేష‌న‌ల్ లింగ్విస్టిక్స్ లో విభిన్న ద‌శ‌లు ఉంటాయి. వివిధ భాష‌ల్లో ఉన్న స‌మాచారాన్ని అనువాదం చేయ‌డం, గొంతును గుర్తుప‌ట్టే వాయిస్ రిక‌గ్నిష‌న్ సాఫ్ట్ వేర్ ను రూపొందించ‌డం, ఆటోమేటేడ్ ఈ మెయిల్ వంటివి ఇందులో ఉంటాయి. అదే విధంగా వాయిస్ జీపీఎస్, గూగుల్ ట్రాన్స్ లేట‌ర్ వంటి ఎన్నో సాంకేతిక విష‌యాలు ఉన్నాయి. టెర్మినాల‌జీ ప‌రంగా చూస్తే మెషిన్‌ ట్రాన్స్‌లేషన్‌, నేచురల్‌ లాంగ్వేజ్‌ ఇంటర్‌ఫేస్‌, గ్రామర్‌ అండ్‌ స్టైల్‌ చెకింగ్‌, డాక్యుమెంట్‌ ప్రాసెసింగ్‌-ఇన్ఫర్మేషన్‌ రిట్రివల్‌, కంప్యూటర్‌ అసిస్టెడ్‌ లాంగ్వేజ్‌ లెర్నింగ్‌ వంటి ప్రక్రియలు ఉంటాయి. ఒక సాఫ్ట్ వేర్ ను అభివృద్ధి ప‌రిచే క్ర‌మంలో కంప్యూట‌ర్ ప్రొగ్రామ‌ర్లు, సైకాల‌జిస్ట్ లు, గ‌ణిత శాస్త్ర నిపుణులు, భాషావేత్త‌లు క‌లిసి ప‌నిచేస్తారు. ఇందులో అప్ల‌యిడ్ లింగ్విస్టిక్, ధియ‌రాటిక‌ల్ లింగ్విస్టిక్స్ అనే రెండు విభాగాలు ఉంటాయి. స్పీచ్‌-టు-టెక్స్ట్‌ విభాగంలో మానవ భాష నుంచి మెషీన్‌ అర్థంచేసుకునే టెక్ట్స్‌ను రూపొందిస్తారు. అంతేకాకుండా ఆటోమేటిక్‌ మెషిన్‌ ట్రాన్స్‌లేషన్‌ ప్రక్రియ ద్వారా వివిధ భాషల్లో అనువాద ప్రక్రియను అభివృద్ధి చేస్తారు. సెర్చ్‌ ఇంజిన్‌కు సంబంధించిన ఇంటెలిజెంట్‌ వ్యవస్థను కూడా ఈ ప్రక్రియ ద్వారానే రూపొందిస్తారు.

పెరుగుతున్న ప్రాధాన్యత 

     స్మార్ట్ ఫోన్, కంప్యూట‌ర్స్ లో ఉప‌యోగించే వివిధ భాష‌ల‌కు సంబంధించిన విష‌యాల‌ను సుల‌భ‌త‌రం చేయ‌డం కంప్యూటేష‌న‌ల్ లింగ్విస్టిక్స్ నిపుణుల ప‌ని. ఇందులో భాగంగా మెషిన్ భాష‌లో భాషా శాస్త్ర నియమాల‌ను దృష్టిలో పెట్టుకుని ప‌ద‌కోశాల‌ను రూపొందించ‌డం, భాషా ప్ర‌క్రియ‌ల‌ను సుల‌భ‌త‌రం చేయ‌డం వంటి ప‌నులు చేయాల్సి ఉంటుంది. స్పీచ్ రిక‌ర్నిష‌న్, మెషిన్ ట్రాన్స్ లేష‌న్, గ్రామ‌ర్ చెకింగ్, టెక్స్ట్ మైనింగ్ వంటి సాఫ్ట్ వేర్ ల‌ను అభివృద్ధి చేస్తారు. అవ‌కాశాలు పెర‌గ‌డంతో ఇటీవ‌లి కాలంలో కంప్యూటేష‌న‌ల్ లింగ్విస్టిక్ కోర్సుల‌కు ఆద‌ర‌ణ పెరుగుతోంది. ఐఐటీలు, సెంట్ర‌ల్ ఇన్ స్టిట్యూట్ ఆఫ్ ఇండియ‌న్ లాంగ్వేజేస్ వంటి సంస్థ‌లు ఈ కోర్సును ఇంట‌ర్ డిసిప్లిన‌రీ కోర్సుగా అందిస్తుంటే, కొన్ని యూనివ‌ర్సీటీలు మాత్రమే ప్ర‌త్యేక కోర్సుగా అందిస్తున్నాయి. ఐఐఐటీ హైద‌రాబాద్, జెఎన్ యూ న్యూఢిల్లీ, ఢిల్లీ యూనివ‌ర్సిటీ, యూనివ‌ర్సిటీ ఆఫ్ హైద‌రాబాద్, ఇఫ్లూ లు కంప్యూటేష‌న‌ల్ లింగ్విస్టిక్స్ కోర్సుల‌ను అందిస్తున్నాయి. కంప్యూట‌ర్ పరిజ్ఞానంతో పాటు భాషా నైపుణ్యాలు ఉంటే ఈ కెరీర్ లో బాగా రాణించొచ్చు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com