'ఆట‌'విడుపులో ఆట‌వికం!

     ప్ర‌స్తుత మ‌న విద్యా విధానం విద్యార్ధుల‌పై తీవ్రమైన ఒత్తిడిని క‌లిగిస్తోంది. నిరంత‌రం పోటీ పోటీ అంటూ ఇటు ఉపాధ్యాయులు, అటు త‌ల్లిదండ్రులు వారి లేత జీవితాల‌ను మానసిక సంఘ‌ర్ష‌ణలోకి నెట్టేస్తున్నారు. ప్ర‌తీ రోజూ పోటీ ప‌రీక్ష‌లు, ప్ర‌త్యేక త‌ర‌గ‌తులు, ప‌క్క విద్యార్ధుల‌తో పోలిక‌లు..ఇలా ఒక‌టా రెండా..నిండా ప‌దేళ్లు నిండ‌కుండానే త‌ల్లిదండ్రుల క‌ల‌ల భారాన్ని మోయ‌లేక వాళ్ల భుజాలు వంగిపోతున్నాయి. ఈ భార‌మైన చ‌దువు ప‌రుగు పందెంలో వాళ్లు కాస్త సేద‌తీరే స‌మ‌యం వేస‌వి సెల‌వులే. అయితే మ‌న కార్పోరేట్ పోటీ విద్యా వ్య‌వ‌స్థ ఆ కొద్ది రోజుల ఆట‌విడుపును కూడా చిన్నారుల నుంచి నిర్దాక్షిణ్యంగా లాగేసుకుంటోంది. వేస‌వి శిక్ష‌ణా త‌ర‌గ‌తులు, స‌మ్మ‌ర్ క్యాంప్స్ ...పేర్లు ఏమైతేనేం పిల్లల‌కు వేస‌వి సెల‌వులు అనేవి లేకుండా చేసి వాళ్ల హ‌క్కుల‌ను కాల‌రాస్తున్నారు. 

ఒత్తిడి వ‌దిలించుకోకుంటే చిత్తే!

     పాఠ‌శాల విద్యా విధానం యొక్క ప్ర‌ధాన ల‌క్ష్యం విద్యార్ధి యొక్క మాన‌సిక ప‌రిణితిని పెంచ‌డం. ఈ ద‌శ‌లో కొత్త వ‌స్తువుల ప‌ట్ట శ్ర‌ద్ధ‌, కొత్త ప‌నుల‌పై ఆక‌ర్ష‌ణ‌, అద్భుత‌మైన మార్పుల‌తో అల‌రించే ప్ర‌కృతి ప‌ట్ల ఆస‌క్తి  పిల్ల‌వానిలో క‌లుగుతాయి. ఇది స‌హ‌జ‌సిద్ధంగా జ‌రిగే ప్ర‌క్రియ‌. అయితే మ‌న కార్పోరేట్ విద్యావ్య‌వ‌స్థ మార్కులు, పోటీ అంటూ ఈ స‌హ‌జ సిద్ధ ప్ర‌క్రియ‌కు సమాధి క‌డుతోంది. ఏడాది మొత్తం చ‌దువుతూనే ఉంటే ఇక విద్యార్ధి రిలాక్స్ అయ్యే స‌మ‌య‌మేదీ? పిల్ల‌ల‌పై ఇలా ఒత్తిడిని త‌గ్గించాల‌నే ఉద్దేశ్యంతోనే 9 నెల‌లు స్కూళ్లు పెట్టి 3 నెల‌లు సెల‌వులు ప్ర‌క‌టిస్తున్నారు.  ఇలా సెల‌వులు రావ‌డం వ‌ల‌న ఆ స‌మ‌యంలో విద్యార్ధి ఆట‌పాట‌ల‌తో ఒత్తిడి నుంచి బ‌య‌ట‌ప‌డ‌తాడు. సెల‌వుల్లో కొత్త ఆట‌ల‌ను, స‌రికొత్త విష‌యాల‌ను నేర్చుకుని ఒత్తిడిని వ‌దిలించుకుని మ‌ళ్లీ పాఠ‌శాల‌కు నూత‌న‌ శ‌క్తితో వెళ‌తాడు. అయితే ప్ర‌స్తుత మ‌న విద్యా విధానం ఆ 3 నెల‌ల కాలాన్ని కూడా వారి నుంచి లాగేసుకునేందుకు కొత్త ప‌ద్ధ‌తుల‌ను అనుస‌రిస్తోంది. స‌మ్మ‌ర్ క్యాంప్స్, స్పెష‌ల్ కోచింగ్ లు అంటూ వారి అంద‌మైన బాల్యాన్ని పీడ‌క‌ల‌గా మారుస్తున్నారు. ఎప్పుడూ ఆటవిడుపు అన్న‌దే లేకుండా నిరంతరం చ‌దువు అంటూ వాళ్ల‌ను సతాయించ‌డం వ‌ల్ల‌నే ఇటీవ‌ల కాలంలో పిల్ల‌ల ఆత్మ‌హ‌త్య‌లను పేప‌ర్ల‌లో చ‌ద‌వాల్సిన దుస్థితికి దిగ‌జారిపోయాం.  

స‌మ్మ‌ర్ క్యాంప్స్ పేరిట కొత్త దందా!

     గ‌డిచిన కొన్ని సంవ‌త్స‌రాలుగా ఏప్రిల్, మే నెల‌లు వ‌చ్చాయంటే ఎక్క‌డ చూసినా స‌మ్మ‌ర్ క్యాంప్స్, స్పెష‌ల్ కోచింగ్ ల హ‌డావుడి మొద‌లైపోతోంది. ఇక కార్పోరేట్ స్కూళ్ల సంగ‌తి చెప్ప‌నే అక్క‌ర్లేదు. ప్ర‌భుత్వాలు ఎన్ని నిబంధ‌న‌లు పెట్టినా వేస‌వి సెల‌వులు అనేవి లేకుండా ప్ర‌త్యేక త‌ర‌గ‌తులను బాహాటంగానే నిర్వ‌హిస్తున్నారు. పిల్ల‌ల ఒత్తిడి, మాన‌సిక స్థితితో సంబంధం లేకుండా కేవ‌లం మార్కులు, ర్యాంకులు అంటూ వాళ్ల‌ను ప‌ట్టి పీడిస్తున్నారు. స్కూల్ యాజ‌మాన్యాల అత్యాశ‌కు తోడు త‌ల్లిదండ్రులు కూడా ఈ ప్ర‌త్యేక త‌ర‌గ‌తుల‌కు మ‌ద్ధ‌తు తెల‌ప‌డంతో చిన్నారుల భాధ అర‌ణ్య‌రోద‌నే అయిపోతోంది. గ‌తంలోలా ఆడుకునే ప‌రిస్థితులు, బంధువుల‌తో, తోబుట్టువుల‌తో స‌మ‌యం గ‌డిపే స‌మ‌యం లేక‌పోవ‌డంతో పిల్లలు మానసిక ఒంట‌రిత‌నం అనుభ‌విస్తున్నారు. ఈ ప‌రిణామం భ‌విష్య‌త్ లో వాళ్ల వ్య‌క్తిత్వ నిర్మాణం, సాటి వారితో వ్య‌వ‌హ‌రించే తీరుపై ప్ర‌తికూల ప్ర‌భావం చూపే అవ‌కాశం ఉంద‌ని మానసిక నిపుణులు హెచ్చ‌రిస్తున్నారు. 

పిల్ల‌ల్ని ప్ర‌కృతికి, బంధాల‌కు దూరం చేయ‌కండి

      త‌ల్లిదండ్రులు ముఖ్యంగా గ‌మ‌నించాల్సింది ఏంటంటే..పిల్ల‌ల‌కు మార్కులు కంటే మంచి వ్య‌క్తిత్వం ముఖ్యం. వేస‌వి సెల‌వుల్లో పిల్ల‌ల్ని వారిదైన ప్ర‌పంచంలో వారిని విహ‌రించేలా, రిలాక్స్ అయ్యేలా చేయడం పేరెంట్స్ విధి. పుస్తకాలు, త‌ర‌గ‌తి గ‌ది వ‌దిలి బ‌య‌ట ప్ర‌పంచంలోకి అడుగుపెట్టిన‌ప్పుడే విద్యార్ధిలో నిజ‌మైన మానసిక వికాసం క‌లుగుతుంది. వేస‌వి సెల‌వుల్లో మ‌నిషికి మ‌నిషికి మ‌ధ్య ఉన్న రిలేష‌న్ ను ప్ర‌కృతికి మ‌నిషికి మ‌ధ్య ఉన్న రిలేష‌న్ ని పిల్ల‌ల‌కు తెలియ‌జేయాలి. త‌ల్లిదండ్రులు వాళ్ల‌ను న‌గ‌రాల‌కు దూరంగా ప్ర‌కృతి ప‌ర‌వ‌శించే ప్ర‌దేశాల‌కు తీసుకెళ్లాలి. ఇది ఒక పిల్ల‌వాడి మానసిక ఎదుగుద‌ల‌కు అత్యంత ముఖ్య‌మైన విష‌యం. అదే విధంగా బంధువుల ఇళ్ల‌కు తీసుకెళ్లి వాళ్ల‌తో కొంత స‌మ‌యం గ‌డిపితే అనుబంధాలు, బంధుత్వాలు మొద‌లైన విష‌యాలు పిల్ల‌ల‌కు తెలుస్తాయి. దీని వ‌ల‌న త‌న చుట్టూ ఎంత అద్భుత‌మైన‌ ప్ర‌పంచం ఉందో విద్యార్ధి గుర్తిస్తాడు. అలా గుర్తించిన నాడు చ‌దువుతో పాటు ప్ర‌పంచాన్ని కూడా ప్రేమించ‌డం నేర్చుకుంటాడు. నిజ‌మైన చ‌దువుకోవ‌డం అంటే ఇలా ఉండాలి. విద్యార్ధుల త‌ల్లిదండ్రులు ఈ విష‌యాల‌ను గుర్తించి ఈ వేస‌వి సెల‌వుల్లో స్పెష‌ల్ కోచింగ్స్, క్యాంప్స్ అంటూ స‌తాయించ‌డం మాని మీ పిల్ల‌ల‌కు నాణ్య‌మైన స‌మ‌యాన్ని కేటాయించి వారిలో మాన‌సిక ప‌రిణితిని పెంచండి. 

పసి మ‌న‌సుల్లోకి తొంగి చూడండి 

   ప్ర‌స్తుత ప్ర‌పంచంలో పోటీత‌త్వం ఉందన్న విష‌యం అంద‌రూ ఒప్పుకుంటారు. పిల్ల‌ల్ని ఏ విష‌యాన్నైనా ఛాలెంజింగ్ తీసుకునే విధంగా త‌యారు చేయాలి కానీ అక్క‌డ నుంచి పారిపోయే విధంగా త‌యారు చేయ‌కండి. మంచి ఆహారం తీసుకున్న‌ప్పుడే ఒక వ్య‌క్తి శారీర‌కంగా బ‌లంగా త‌యార‌వుతాడు. అలాగే మాన‌సిక ఉల్లాసం ఉన్న‌వాడే మాన‌సికంగా బ‌లంగా ఉంటాడు. మానసికంగా పిల్ల‌ల్ని బ‌ల‌హీనుల్ని చేసి పోటీలో నెగ్గుకురావాలంటే ఎలా సాధ్యం? ఈ విష‌యాన్ని టీచ‌ర్స్ , పేరెంట్స్ గుర్తించాలి. శారీర‌క శ‌క్తి కోసం మంచి ఆహారం ఇచ్చిన‌ట్టే మానసిక శ‌క్తి కోసం వాళ్ల‌కు ఏడాదిలో కొన్ని రోజులు మానసిక ఉల్లాసాన్ని ఇవ్వండి. పిల్లలు మాన‌సికంగా బ‌లంగా ఉన్న‌ప్పుడు వాళ్లు ఎటువంటి అద్భుతాలు అయినా చేయ‌గ‌లుగుతారు. అంతేకానీ స‌మ్మ‌ర్ క్యాంప్, స్పెష‌ల్ కోచింగ్స్ అంటూ వారి స్వేచ్ఛ‌ను హ‌రిస్తే వారు ఎప్ప‌టికీ బ‌ల‌హీనులుగానే ఉండిపోతారు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com