'మతి' పోగొడుతున్న విజ్ఞాన సర్వస్వం!

   శాస్త్ర సాంకేతిక విజ్ఞానం కొత్త పుంత‌లు తొక్కుతోంది. కొన్నాళ్ల క్రితం కంప్యూట‌ర్ల ద్వారా ఇంటిలోకి వ‌చ్చిన ఇంట‌ర్నెట్, ఇప్పుడు స్మార్ట్ ఫోన్ పుణ్య‌మాని ఏకంగా మ‌న‌ జేబుల్లోకే వ‌చ్చేసింది. ఒక్క క్లిక్ తో అన్ని ప‌నులు చ‌క‌చ‌కా జ‌రిగిపోతున్నాయి. షాపింగ్ ద‌గ్గ‌ర్నుంచి బ్యాంకింగ్, టిక్కెట్ బుకింగ్స్, ఫుడ్, ఎంట‌ర్ టైన్ మెంట్ ఇలా అన్నీ ప‌నులు చిటికెలో పూర్త‌వుతున్నాయి. ఇక ఏ స‌మాచారం కావాల‌న్నా ట‌క్కున గూగుల్ త‌ల్లి ప్ర‌త్య‌క్ష‌మైపోతోంది. రెండు లైన్ల ప‌దం టైప్ చేస్తే చాలు వేల కొద్ది పేజీల స‌మాచారం మీ ముందు రెడీ. అంతా బాగానే ఉంది గూగుల్ మూలాన ఏ మాత్రం క‌ష్ట ప‌డ‌కుండా బుర్ర‌కు ప‌దును పెట్ట‌కుండా స‌మాచారాన్ని సేక‌రించ‌డం ఇప్పుడు కొత్త స‌మ‌స్య‌ల‌కు దారితీస్తోంది. అతిగా గూగుల్ పై ఆధార‌ప‌డ‌టం వ‌ల‌న ఇప్పుడు విద్యార్ధుల్లో జ్ఞాప‌క‌శ‌క్తి స‌న్న‌గిల్లిపోతోంది.  యువ‌త‌లో పెరిగిపోతున్న‌ ఈ అతి ఇంట‌ర్నెట్ వాడ‌కం రానున్న రోజుల్లో కొత్త స‌మ‌స్య‌ల‌కు దారితీసే ప్ర‌మాదాలు క‌నిపిస్తున్నాయి. 

సాంకేతిక‌త రెండు వైపులా ప‌దునున్న క‌త్తి 

   అతి ఎప్పుడైనా అన‌ర్ధ‌దాయ‌క‌మే. మ‌నిషికి జీవ‌నాధార‌మైన ఆహారాన్ని మితంగా తింటే అమృతం, అదే అతి తింటే అది విష‌యంగా మారుతుంది. సాంకేతిక‌త విష‌యంలో కూడా ఇది అతికిన‌ట్టు స‌రిపోతుంది. టెక్నాల‌జీకి వినియోగానికి ప‌రిమితులు విధించుకుని అవ‌స‌రం ఉన్నంతవ‌ర‌కే వాడితే అది మ‌న‌కు ఉప‌యోగ‌ప‌డుతుంది. లేకుంటే అదే టెక్నాల‌జీ మ‌నల్ని పాతాళానికి తొక్కేస్తుంది. అయితే ఈ ప‌రిమితులు తెలియ‌క ప్ర‌స్తుతం అంద‌రూ త‌మ‌కు తెలియ‌కుండానే ఒక విష వ‌ల‌యంలోకి జారిపోతున్నారు. మనిషి తన‌ సౌక‌ర్యం కోసం సృష్టించుకున్న విజ్ఞాన సృష్టిలో త‌నే కొట్టుకుపోతున్నాడు. బుర్ర‌కు ప‌దును పెట్ట‌కుండా ప్ర‌తీ దానికీ గూగుల్ సెర్చ్ ను క్లిక్ చేస్తూ విద్యార్ధులు కొత్త స‌మ‌స్య‌ల‌ను కొని తెచ్చుకుంటున్నారు. ప‌రిస్థితి ఇలానే కొన‌సాగితే ఇది విద్యా వ్య‌వ‌స్థ‌లో కొత్త స‌మ‌స్య‌కు దారితీయ‌వ‌చ్చ‌ని నిపుణులు అందోళ‌న వ్య‌క్తం చేస్తున్నారు. 

పెరిగిపోతున్న మతిమ‌రుపు

   తాజాగా గూగుల్ వాడ‌కంపై  యువ‌తీయువ‌కుల‌పై చేసిన ఓ స‌ర్వేలో ఆందోళ‌న‌క‌ర విష‌యాలు వెలుగు చూసాయి. ఈ స‌ర్వేలో అధిక శాతం మంది విద్యార్ధులు త‌మ స‌హ‌జ‌సిద్ధ‌మైన బుర్ర‌ను ఉప‌యోగించ‌కుండా ప్ర‌తీ చిన్న విష‌యానికి గూగుల్ పైనే ఆధార‌ప‌డుతున్నార‌ట‌. దీంతో వారికి చిన్న వ‌య‌సులోనే మ‌తిమ‌రుపు స‌మ‌స్య త‌లెత్తుతున్న‌ట్టు స‌ర్వే వెల్ల‌డించింది. అతి సుల‌భంగా డేటా ల‌భ్యం కావ‌డంతో ప్రాజెక్టుల్లోనూ ఇత‌ర విష‌యాల్లోనూ వారు త‌మ బుర్ర‌కు ప‌దును పెట్ట‌డం లేదు. దీంతో గ‌తంలో చేసిన ప్రాజెక్ట్ ల వివ‌రాలు సులువుగా గూగుల్ సెర్చ్ లో దొర‌క‌డంతో వాళ్లు కాపీ కొట్టేందుకు త‌ప్ప , సొంతంగా త‌మ‌ ప్ర‌య‌త్నాల‌ను మానుకుంటున్నారు. దీని వ‌ల‌న మ‌న విద్యా విధానంలో కొత్త స‌మ‌స్య ఉత్ప‌న్న‌మ‌య్యే సంకేతాలు కనిపిస్తున్నాయి. గూగుల్ పై అతిగా ఆధార‌ప‌డే ఈ అల‌వాటును మానుకోక‌పోతే విద్యార్ధులు తమ స‌హ‌జ‌సిద్ధ‌మైన సృజ‌నాత్మ‌క‌త‌ను కోల్పోయే ప్ర‌మాదం ఉంది. 

ప్ర‌కృతి నియామాల‌ను గుర్తు పెట్టుకొండి

    సాంకేతిక‌త ఎంత పెరిగినా మ‌నిషి ప్ర‌కృతి నియమాల‌ను ఉల్లంఘించ‌లేడు. ప్ర‌కృతి కొన్ని ధ‌ర్మాల‌ను ముందుగానే సిద్ధం చేసి పెడుతుంది. వ‌ర్షాకాలంలో వాన‌, చ‌లికాలంలో చ‌లి, ఎండాకాలంలో ఎండ‌లు ఇవ‌న్నీ క్ర‌మం త‌ప్ప‌కుండా వ‌చ్చి త‌మ ప‌ని తాము చేసుకుపోతాయి. అలానే మ‌నిషి కూడా ప్ర‌కృతిలో ఒక భాగం. దాని నియ‌మాల‌కు విరుద్ధంగా అత‌ను ఎట్టి ప‌రిస్థితుల్లోనూ ప్ర‌వ‌ర్తించ‌లేడు. ప్రకృతి ధ‌ర్మం ప్ర‌కారం ఒక వ‌స్తువును దాని సామ‌ర్ధ్యం మేర వాడ‌టం మానేస్తే కొంత‌కాలానికి అది ప‌నికి రాకుండా పోతుంది. ఇప్పుడు మ‌నిషి త‌న మేధ‌స్సును త‌న సామ‌ర్ధ్యం మేర వాడ‌టం మానేసి, సాంకేతిక‌తకు బానిస‌గా మారాడు. ఇది ఇలానే కొన‌సాగితే కొన్ని రోజుల‌కు మ‌నిషి కూడా సొంతంగా ఆలోచించే త‌న శ‌క్తిని కోల్పోయే అవ‌కాశం ఉంది. ఇలా జ‌ర‌గ‌కూడ‌దు అనుకుంటే టెక్నాల‌జీ వినియోగాన్ని త‌గ్గించి త‌న బుర్ర‌కు  ప‌దును పెడితేనే మ‌నిషి మ‌నుగ‌డ సాగించ‌గ‌ల‌డు. ప్ర‌తీ చిన్న విష‌యానికి గూగుల్ ను వెత‌క‌డం మానేసి స‌ద‌రు విష‌యాన్ని వేరే మార్గాల్లో సంపాదించేందుకు ప్ర‌య‌త్నించాలి. 

సాంకేతిక‌త‌కు బానిస కావొద్దు 

     ఒక మంచి ఉద్దేశ్యంతో వ‌చ్చిన సోష‌ల్ మీడియాని స‌మ‌ర్ధ‌వంతంగా వినియోగించుకుంటున్న వారు ఎంత మంది?  ఈ శ‌క్తివంత‌మైన మాధ్య‌మాల‌ను ప‌నికిమాలిన ఫోటోల‌ను షేర్ చేసుకునేందుకే అధిక శాతం మంది ఉప‌యోగించుకుంటున్నారు. ఇక గూగుల్ సెర్చ్ ఇంజిన్ యొక్క ఉద్దేశ్యం కూడా మంచిదే. దానిని స‌రైన ప‌ద్ధ‌తి ఉప‌యోగించుకున్న‌ప్పుడే దాని ఉద్దేశ్యం విజ‌య‌వంత‌మవుతుంది. నిజంగా మ‌న‌కు తెలియ‌ని విష‌యాల‌ను గూగుల్ లో త‌ప్ప‌కుండా వెతికి తెలుసుకోవాల్సిందే. కానీ కాస్త బుర్ర పెట్టి ఆలోచిస్తే అర్ధ‌మ‌య్యే విష‌యాల‌కు కూడా గూగుల్ పైనే ఆధార‌ప‌డితే ఇక విద్యార్ధుల‌ను ఎవ‌రు కాపాడుతారు?  విద్యార్ధి ద‌శ‌లో మెద‌డు అద్భుత‌మైన ప‌ని సామ‌ర్ధ్యాన్ని క‌లిగి ఉంటుంది. దాన్ని పూర్తి స్థాయిలో వినియోగించుకునేందుకు విద్యార్ధులు ప్ర‌య‌త్నించాలి. లేకుంటే భ‌విష్య‌త్ లో కొత్త స‌మ‌స్య‌లు ఉత్ప‌న్న‌మ‌వుతాయి. కాబ‌ట్టి సాంకేతిక‌త మ‌న సౌక‌ర్యం కోసం సృష్టించుకున్నాం అలాంటి సాంకేతిక‌త‌కు మ‌న‌మే బానిస‌లుగా మారితే నిజ‌మైన విజ్ఞానానికి అర్ధం లేకుండా పోతుంది.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com