'రెండు క‌ళ్ల సిద్ధాంతం' ఇక్క‌డ వ‌ర్క‌వుట్ అయిద్ది!
యువ‌త అనే పునాది పైనే ఒక దేశ భ‌విష్య‌త్ నిర్మాణం ఆధార‌ప‌డి ఉంటుంది. పునాది నిర్మాణం ధృఢంగా ఉండాలంటే నాణ్య‌మైన సిమెంట్, ఇసుక ఎంత అవ‌స‌ర‌మో, దేశ నిర్మాణానికి విజ్ఞాన‌వంతులైన యువ‌త కూడా అంతే ముఖ్యం. ఇందులో ఏ మాత్రం తేడా వ‌చ్చినా దేశ పునాదులు క‌దిలిపోతాయి. ఈ బ‌ల‌మైన పునాదులను నిర్మించే బృహ‌త్త‌ర భాధ్య‌తలో ఉపాధ్యాయుడిదే కీల‌క పాత్ర. ఒక నిర్మాణ రంగ నిపుణుడిలా దేన్ని ఎంత మోతాదులో వాడాలో అంతే వాడుతూ, అత్యంత శ్ర‌ద్ధ‌తో త‌న ప‌ని చేసిన‌ప్పుడే బ‌ల‌మైన పునాదులు త‌యార‌వుతాయి. అభివృద్ధి సాధించిన ఏ దేశాన్ని చూసినా మ‌న‌కు ఇదే విష‌యం స్ప‌ష్ట‌మ‌వుతుంది.ఒక మంచి విద్యార్ధి త‌యారుకావ‌డంలో ఉపాధ్యాయునిలోని మాన‌వ‌తా కోణం ప్ర‌ధాన పాత్ర పోషిస్తుంది. విద్యార్ధులను టీచర్ చూసే దృక్కోణంలో మార్పు వ‌చ్చిన‌ప్పుడు అద్భ‌త‌మైన ఫ‌లితాలు వ‌స్తాయి.
విభిన్న ప్ర‌వాహాల సంగ‌మం త‌ర‌గ‌తి గ‌ది
వ‌ర్షాకాలంలో వ‌ర‌ద వ‌చ్చిన‌ప్పుడు న‌దిలోకి ర‌క‌ర‌కాల ప్ర‌వాహాలు వ‌చ్చి క‌లుస్తుంటాయి. వాటి వాటి మార్గాల‌ను అనుస‌రించి అందులో కొన్ని ప్ర‌వాహాలు మురికిగానూ, కొన్ని అత్యంత స్వ‌చ్ఛంగానూ ఉంటాయి. అయితే ఎటువంటి ప్ర‌వాహం వ‌చ్చినా న‌దీమ‌త‌ల్లి అక్కున చేర్చుకుంటుంది. మురికి నీళ్ల‌ని అసహ్యించుకోకుండా, మంచి నీళ్ల‌ని నెత్తిన పెట్టుకోకుండా అన్నింటిని ఒకేలా చూస్తూ త‌న‌లో క‌లిపేసుకుంటుంది. త‌ర‌గ‌తి గ‌దిలో కూడా విభిన్న నేప‌థ్యాలున్న విద్యార్ధులు ఉంటారు. అందులో ధ‌న‌వంతులు, పేద‌వారు, తెలివైన‌వారు, తెలివిత‌క్కువ‌వారు ఇలా ర‌క‌ర‌కాల స్థాయి క‌లిగిన విద్యార్ధులు ఉంటారు. వీరంద‌ర్ని ఎటువంటి భేధ‌భావం లేకుండా చూస్తూ అంద‌రికీ స‌మాన‌మైన విద్య‌ను అందించాల్సిన భాధ్య‌త ఉపాధ్యాయుని మీద ఉంది.
ప్ర‌స్తుత ప‌రిస్థితుల్లో అది క‌ఠిన స‌వాలు
గ‌తంలో మ‌న‌దేశంలో అంట‌రానిత‌నం, అస్పృశ్య‌త, అస‌మాన‌త‌లు ఉండేవి. స‌మాజంలోనే కాక త‌ర‌గ‌తి గ‌దిలో కూడా ఇవి రాజ్య‌మేలేవి. ప్ర‌స్తుతం ఈ ప‌రిస్థితి మెల్ల‌గా మారినా, ఇప్పుడు కొత్త ర‌కం స‌మ‌స్య ఉపాధ్యాయునికి స‌వాలు విసురుతోంది. ముఖ్యంగా ప్ర‌భుత్వ పాఠ‌శాల‌ల్లో చాలా మంది విద్యార్ధులను వాళ్ల త‌ల్లిదండ్రులు మ‌ధ్య‌హ్న భోజ‌నం కోస‌మే స్కూల్ కు పంపిస్తున్నారు. పేదరికం మూలాన వారి ప‌రిస్థితిని అంచ‌నా వేస్తూనే అటువంటి విద్యార్ధుల‌కు మెరుగైన విద్య‌ను అందించ‌డం టీచర్ ముందున్న స‌వాలు. స‌వాలు అని ఎందుకు అనాల్సి వ‌స్తుందంటే హోమ్ వ‌ర్క్ ఇచ్చి చేసుకురా? ఈ పాఠం చ‌దువు ...అని చెప్పిన వెంట‌నే గ్రామీణ ప్రాంతాల్లో చాలా మంది విద్యార్ధులు పాఠ‌శాల‌కు రావ‌డం మానేస్తున్నారు. విద్యార్ధిని పాఠ‌శాల‌కు దూరం చేయ‌కుండా వారికి చ‌దువును చేరువ చేయ‌డం క్లిష్ఠ‌త‌ర‌మైన భాధ్య‌త ఇప్పుడు టీచర్ ముందు ఉంది. దీనికోసం అత‌నికి క్లాస్ రూమ్ లో పాఠాలు చెప్పే నైపుణ్యం ఉంటే స‌రిపోదు. స‌మాజంలోని స‌మ‌స్య‌ల‌ను అర్ధం చేసుకోగ‌లిగే సామాజిక దృక్ప‌ధం కూడా ఉండాల్సిందే.
మాన‌వీయ కోణ‌మే ప్ర‌ధాన అర్హ‌త
విద్యార్ధి ఆలోచ‌న ఎప్పుడూ త‌ర‌గ‌తి గ‌దిలోంచి ఎప్పుడు బ‌య‌ట‌ప‌డ‌దామా అనే ఉంటుంది. విద్యార్ధిని ఇటువంటి ఆలోచ‌నా ప‌రిధిలోంచి ఉపాధ్యాయుడు బ‌య‌ట‌కు తీసుకురావాలి. త‌ర‌గ‌తి అంటే పాఠాలు అంటే వాళ్ల‌కు ఆస‌క్తి క‌లిగేలా చేయాలి. విద్యార్ధులు క్లాస్ రూమ్ వదిలివెళ్లేట‌ప్పుడు భాధ‌ప‌డితే టీచర్ భోధ‌న‌లో క‌చ్చితంగా విజ‌యం సాధించిన‌ట్టే. గ‌తంలో విద్యార్ధి స్కూల్ కు రాక‌పోయినా, క్లాస్ కు గైర్హాజ‌రైనా టీచర్ వాళ్లింటికి వెళ్లి వాక‌బు చేసేవారు. ఇప్పుడు అటువంటి ప‌రిస్థితులు లేవు. టెక్నాల‌జీ ప‌రంగా మారిన ప‌రిస్థితుల్లో స్మార్ట్ ఫోన్లు, ఇంట‌ర్నెట్ కూడా ప్ర‌భావం చూపుతోంది. దాని దుష్ప్ర‌భావం విద్యార్ధుల‌పై ప‌డ‌కుండా కాపాడాల్సిన భాద్య‌త కూడా ఉపాధ్యాయునిదే. నేను కేవ‌లం పాఠం భోధించే టీచర్ నే అని అనుకుంటే ఇన్ని భాధ్య‌త‌ల‌ను నిర్వ‌ర్తించడం క‌ష్టం. సామాజిక కోణంలో ఆలోచించి దానికి మాన‌వీయ కోణాన్ని జోడించి విద్యార్ధిని స‌క్ర‌మ‌మైన దారిలో పెట్టేందుకు కృషి చేయాలి. ఇప్ప‌టి కాల‌మాన ప‌రిస్థితుల‌కు అనుగుణంగా విద్యార్ధుల మ‌న‌స్సును చ‌దివి వాళ్ల దృష్టి కోణం నుంచి ఆలోచిస్తే చాలా విష‌యాల‌కు ప‌రిష్కారం దొరుకుతుంది. వాళ్ల‌లో క‌లిసిపోయి వాళ్ల‌లో బెరుకును పొగొట్టిన‌ప్పుడు వాళ్లు పాఠం వినేందుకు ఆస‌క్తి చూపిస్తారు. ముఖ్యంగా ఆడ‌పిల్ల‌ల విష‌యంలో వాళ్ల అధైర్యాన్ని పొగొట్టి వాళ్లు ఎందులో తీసిపోర‌ని చెప్తూ వాళ్ల‌తో స్నేహితుడిలా ఉంటే ఆడ‌పిల్ల‌కు చ‌దువుకు దూరం కారు.
స్వ‌చ్ఛ‌మైన గంగా ప్ర‌వాహంగా మార్చాలి
ఒక ఎల్ కేజీ క్లాస్ రూమ్ లో పిల్ల‌ల్ని... నీకు డాన్స్ వ‌చ్చా? నీకు పాట‌లు వ‌చ్చా? అని అడిగితే అంద‌రూ చేతులెత్తుతారు. అదే మూడో త‌ర‌గ‌తి క్లాస్ రూమ్ కి వెళ్లి ఇలా అడిగి చూడండి. స‌గం మందే చేతులు పైకి లేపుతారు. కార‌ణ‌మేంటి?వయ‌స్సు పెరిగే కొద్ది ప్రొత్సాహించే వారు లేక‌పోవ‌డంతో వారు ఆస‌క్తులు, అభిరుచులు మ‌రుగున ప‌డిపోతాయి. స‌రైన ఉపాధ్యాయుడు ఉన్న‌ప్పుడు ఇలా ఎప్ప‌టికీ జ‌ర‌గ‌దు. ఎందుకంటే అత‌ను నిరంత‌రం త‌న విద్యార్ధుల అభిరుచుల‌ను ప్రొత్సాహిస్తూ ఉంటాడు. వాళ్ల స్థాయిలు ఏమైనా అత‌ని దృష్టిలో అంద‌రూ ఒక్క‌టే. మురికి నీరు అయినా స్వ‌చ్ఛ‌మైన నీరు అయినా దాన్ని పుణ్య లోక ప్రాప్తిని క‌లిగించే ప‌విత్ర గంగాజ‌లంలా మార్చే సామ‌ర్ధ్యం ఉపాధ్యాయునికే ఉంది. అందుకు అత‌ను చేయాల్సింది ఒక‌టే. ప్ర‌స్తుత ప‌రిస్థితుల‌కు అనుగుణంగా భోధ‌న‌కు మాన‌వీయ కోణాన్ని జోడించి సామాజిక దృక్కోణంతో మంచి భావి భార‌త పౌరుల‌ను త‌యారు చేయ‌డ‌మే.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment