విషమంగా మారిన "నిమిషం"..!

    "ఒక నిమిషం ఆల‌స్యం అయితే కొంప‌లేం మునిగిపోవులే"....మ‌నం ప్ర‌తీ రోజూ ఏదో ఒక సంద‌ర్భంలో ఈ మాట‌ను వాడుతూనే ఉంటాం. అవ‌త‌లి వ్య‌క్తి కంగారులో ఒత్తిడికి గురైన‌ప్పుడు మ‌న నోటి నుంచి ఈ మాట అనుకోకుండా వ‌చ్చేస్తుంది. కానీ ఇప్పుడు "ఒక నిమిషంతో" కొంప‌లు కావు ఏకంగా "జీవితాలే" మునిగిపోతున్నాయి. రైలు ద‌గ్గ‌ర్నుంచి ఫైలు వ‌ర‌కూ ఏదీ స‌మ‌యానికి క‌ద‌ల‌ని మ‌న దేశంలో ముక్కుపుచ్చ‌లార‌ని పిల్ల‌ల‌కు ఒక్క నిమిషం నిబంధ‌న పెట్టారు మ‌న ఇంట‌ర్ బోర్డు అధికారులు. ఒక్క నిమిషం ఆల‌స్య‌మైనా ప‌రీక్ష‌కు అనుమ‌తించేది లేద‌ని రూల్ పాస్ చేసి పారేశారు. ఈ నిబంధ‌న‌తో మ‌న తెలుగు రాష్ట్రాల్లో వేలాది మంది విద్యార్ధులు ప‌రీక్ష‌లు రాయ‌లేక‌పోయారు. పిచ్చుక‌పై బ్ర‌హ్మ‌స్త్రంలా మానసికంగా ప‌రిణితి చెంద‌ని ఇంట‌ర్ విద్యార్ధుల విష‌యంలో ఇంత క‌ఠిన నిర్ణ‌యం అవ‌స‌ర‌మా అన్న‌ది ఇప్పుడు చ‌ర్చ‌నీయాంశంగా మారింది.

విద్యార్ధుల భ‌విష్య‌త్ తో చెల‌గాటం

   ప‌రీక్ష‌ల్లో చాలా అంత‌రాలు ఉంటాయి. పోటీ ప‌రీక్ష‌ల‌కు, వార్షిక ప‌రీక్ష‌ల‌కు మ‌ధ్య స్ప‌ష్ట‌మైన తేడా ఉంటుంది. పోటీ ప‌రీక్ష‌ల‌కు సంబంధించి ఇలాంటి కఠిన నిబంధ‌న‌లు పెడితే ఇన్ని విమ‌ర్శ‌లు చెల‌రేగేవి కావు. వార్షిక ప‌రీక్ష‌ల విష‌యంలో ఒక్క నిమిషం నిబంధ‌న విద్యార్ధి భ‌విష్య‌త్ ను తారుమారు చేస్తుంది. ఒక్క నిమిషం తేడాతో అతని జీవితం త‌ల‌కిందులైపోతుంది. ఇప్ప‌టికే ఇంటా, బ‌య‌టా స‌వాల‌క్ష ఒత్తిళ్ల‌తో స‌త‌మ‌త‌మ‌వుతున్న విద్యార్ధిని ఇప్పుడు ఒక్క నిమిషం మ‌రింత ఒత్తిడిలోకి నెట్టింది.  ప్ర‌పంచంలో ఏ గ‌డియారం ఒకే స‌మయాన్ని చూపించ‌దు. మ‌రి ఏ గ‌డియారం ఆధారంగా ఈ నిబంధ‌న పెట్టారు. పరీక్షా కేంద్రం నిర్వాహ‌కులుదా? గేటు ద‌గ్గ‌ర ఉండే వాచ్ మెన్ దా? లేక ఇంట‌ర్ బోర్డు అధికారుల‌దా? ఎవ‌రి గ‌డియారాన్ని ప్రామాణికంగా తీసుకుంటున్నారు. ఈ ప్ర‌శ్న‌ల‌కు అధికారుల ద‌గ్గ‌ర స‌మాధానం ఉందా? ప‌్ర‌పంచంలో ఏ గ‌డియారాలు ఒకే స‌మ‌యాన్ని సూచించవు. ఈ ప్ర‌కారంగా చూసుకున్నా ఈ నిబంధ‌న శాస్త్రీయ‌త‌కు నిల‌బ‌డ‌దు. 

ఈ నిబంధ‌న‌లు విద్యార్ధులకేనా? 

   విద్యా సంవ‌త్స‌రం మొద‌లైన ద‌గ్గ‌ర్నుంచీ ప్ర‌భుత్వాలు, అధికారులు ఎన్నో విష‌యాల‌పై శ్ర‌ద్ధ పెట్టాలి. కానీ దుర‌దృష్ట‌వ‌శాత్తూ అలా ఎప్పుడూ జ‌ర‌గ‌డం లేదు. టీచ‌ర్లు స్కూల్ కి టైం కి రారు. పాఠ్య‌ పుస్త‌కాలు స‌మ‌యానికి అందించ‌రు. ఇక ప‌రీక్ష‌ల టైం టేబుల్ ను అయితే ఇష్టం వ‌చ్చిన‌న్ని సార్లు మార్చి ప‌డేస్తారు. ప్ర‌శ్నాప‌త్రం త‌యారు చేసేది బోర్డు అధికారులే క‌దా? మ‌రి పేప‌ర్స్ ఎందుకు లీక్  అవుతున్నాయి? దానికి ఎవరు భాద్యులు? అధికారులు చేసిన త‌ప్పుల‌కు విద్యార్ధులు శిక్ష అనుభ‌వించాల్సి వ‌స్తోంది. మొద‌టి సారి ఎంతో ప్రిపేర్ అయ్యి విద్యార్ధి ప‌రీక్ష రాస్తాడు. మ‌ళ్లీ రెండో సారి ప‌రీక్ష అంటే విద్యార్ధి ప్రిప‌రేష‌న్ దెబ్బ‌తింటుంది. ఆత్మ‌విశ్వాసం స‌న్న‌గిల్లిపోతుంది. ఇవ‌న్నీ విద్యార్ధికి న‌ష్టం క‌లిగించే విష‌యాలే. ఈ త‌ప్పుల‌న్నీ చేసింది ఒక శిక్ష మాత్రం విద్యార్ధుల‌కు. విద్యార్ధుల‌కేనా ఈ క‌ఠిన నిబంధ‌న‌లు? అధికారుల‌కు, పాల‌నా వ్య‌వ‌స్థ‌ల‌కు ఉండ‌వా? అన్న ప్ర‌శ్న‌లు రేకెత్తుతున్నాయి. ఈ ఏడాది విద్యార్ధులు ఎంసెట్ మూడు సార్లు రాసారు. ఆ ప‌రిస్థితికి బాధ్య‌త‌ను ఎవ‌రు తీసుకుంటారు? 

నీవు నేర్పిన విద్యయే నీర‌జాక్ష‌! 

  స్కూల్ లో అయినా కాలేజీలో అయినా విద్యార్ధి ఎప్పుడూ చెబితే నేర్చుకోడు. చూసే నేర్చుకుంటాడు. మ‌రి ఇక్క‌డ ఏం జ‌రుగుతోంది? టీచ‌ర్లు ద‌గ్గ‌ర్నుంచి, అధికారుల వ‌ర‌కూ ఎవ‌రూ నిబంధ‌న‌లు పాటించ‌రు. కానీ విద్యార్ధిని పాటించాల‌ని శాసిస్తారు. ఇది ఎట్టి ప‌రిస్థితుల్లోనూ స‌త్ఫ‌లితాల‌ను ఇవ్వ‌దు. అన్నీ నిబంధ‌న‌ల ప్ర‌కారం జ‌రిగేలా చేసి అప్పుడు ఎన్ని నిబంధ‌న‌లు పెట్టినా విమ‌ర్శులు రావు. అలా కాకుండా మేం న‌చ్చిన‌ట్టు ఉంటాం. మీరు మాత్రం అలానే ఉండండి అంటూ అది కుద‌రదు. ఎందుకంటే టీచ‌ర్ల‌ను చూసే విద్యార్ధులు ఏ విష‌య‌మైనా నేర్చుకుంటారు. మ‌రి టీచ‌ర్లు, మ‌న అధికారులు అలా ఉంటున్నారా? లేదు క‌దా అలాంట‌ప్పుడు విద్యార్ధుల భవిష్య‌త్ ను దెబ్బ‌తీసే ఇలాంటి నిబంధ‌న‌ల‌ను ఎటువంటి స‌మీక్ష చేయ‌కుండా అమ‌లు చేయ‌డ‌మే అస‌లు స‌మ‌స్య‌. 

ఇండియాలో అన్నీటైంకి జ‌రుగుతాయా? 

  మాస్ కాపీయింగ్ ను అరిక‌ట్టేందుకే ఒక్క నిమిషం నిబంధ‌న పెట్టామ‌ని అధికారులు చెపుతున్నారు. ఒక్క అర‌గంట ముందుగా ప‌రీక్షా కేంద్రానికి చేరుకుంటే స‌మ‌స్య‌లు ఉండ‌వు క‌దా అని చెపుతున్నారు. బాగుంది. కానీ మ‌న దేశంలో అన్నీ స‌మ‌యానికి జ‌రుగుతాయా? ట‌్రైన్ లు స‌మ‌యానికి రావు. "ఈ రైలు జీవిత కాలం లేటు" వంటి మాట‌లు అయితే ఏకంగా స్థిర‌ప‌డిపోయాయి. ఇక హైద‌రాబాద్ లాంటి మ‌హా న‌గ‌రాల్లో ట్రాఫిక్ ఎలా ఉంటుందో తెలియ‌నిది కాదు. ప‌బ్లిక్ ట్రాన్స్ పోర్ట్  విష‌యం చెప్ప‌నే అక్క‌ర్లేదు. ఇంటి నుంచి ప‌రీక్షా కేంద్రానికి రావాలంటే విద్యార్ధులు ఎన్నో ప‌ద్మ‌వ్యూహాల‌ను దాటుకుని రావాల్సి ఉంటుంది. ఒక్కోసారి ఎంత ముందు బ‌య‌లుదేరినా ట్రాఫిక్ వంటి స‌మ‌స్య‌ల‌తో ప‌రీక్ష కేంద్రానికి ఆల‌స్యం కావ‌చ్చు. ముఖ్యంగా ప‌బ్లిక్ ట్రాన్స్ పోర్ట్ ను న‌మ్ముకునే మ‌ధ్య‌త‌ర‌గ‌తి విద్యార్ధులు ఒక్క నిమిషం నిబంధ‌న‌కు బ‌లైపోతున్నారు. ఉద‌యం బ‌స్తీల్లో నీళ్లు స‌రిగా రావు. రోడ్డుపై ట్రాఫిక్ గంట‌ల కొద్దీ నిలిచిపోతుంది. ఇలాంటి ప్ర‌తికూల ప‌రిస్థితుల్లో విద్యార్ధి ఒక్కో రోజు ఒక ఐదు, ప‌ది నిమిషాలు ఆల‌స్యం కావ‌చ్చు. కానీ మ‌న అధికారుల‌కు ఇవేమీ క‌నిపించ‌డం లేదు. అవ‌న్నీ మాకు తెలియ‌దు. మేం రూల్స్ పాటించం. మీరు మాత్రం రూల్స్ పాటించాల్సిందే అని మొండిగా వ్య‌వ‌హ‌రించి విద్యార్ధుల భ‌విష్య‌త్తుతో ఆట‌లాడుకుంటున్నారు. 

విద్యార్ధుల‌ను కుంగ‌దీసే నిబంధ‌న‌లు అవ‌స‌రం లేదు

     ఒక్క నిమిషం నిబంధ‌న‌తో 3,652 మంది విద్యార్ధులు ఇంట‌ర్మీడియట్ ప‌రీక్ష రాయ‌లేక‌పోయారు. సొంత త‌ప్పు లేకున్నా ప‌రీక్ష రాసే అవ‌కాశం కోల్పోయిన విద్యార్ధులు ఎంత మానసిక క్షోభ, వ్య‌ధ‌ను అనుభ‌విస్తారో మాటల్లో చెప్ప‌లేం. ఒక్క సంవ‌త్స‌రం వృధా అయింద‌న్న ఆలోచ‌న వాళ్ల‌ను మాన‌సిక సంఘ‌ర్ష‌ణ‌కు గురి చేస్తుంది. వాళ్లు ఆత్మ‌న్యూన‌త‌కు గురై ఆత్మ విశ్వాసాన్ని కోల్పోతారు. ఇది ఎంత‌మాత్రం అభిల‌ష‌ణీయం కాదు. ఇటువంటి నిరంకుశ నిబంధ‌న‌ను అధికారులు వెంట‌నే ఎత్తివేయాలి. విద్యార్ధుల‌కు క్ర‌మ‌శిక్ష‌ణ అవ‌స‌ర‌మే కానీ మ‌న స‌మాజంలో ఉన్న ప‌రిమితుల‌ను, అవ‌రోధాల‌ను ప‌రిగ‌ణ‌న‌లోకి తీసుకుని ఈ నిబంధ‌న‌లో మార్పులు చేస్తే బాగుంటుంది. అలా కాకుంటే మొండిగా ఇదే అమ‌లు చేస్తామంటే మంచి భ‌విష్య‌త్ ఉన్న విద్యార్ధులు కూడా ఆత్మ విశ్వాసాన్ని కోల్పోయి జీవితంలో దిగజారే అవ‌కాశం ఉంది. ఇది మ‌న విద్యా రంగానికి, దేశానికి ఎన్న‌డూ మేలు చేయ‌దు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com