అమ్మాయిల భ‌యానికి వాళ్లే కార‌ణం..!

  ఆకాశంలో స‌గం అంటాం. ఆకాశానికి ఎగురుతా అంటే ఇంట్లో కూర్చోమంటాం. పోటీ ప్ర‌పంచంలో దూసుకుపోవాలంటాం. ప‌క్క‌వాడితో మాట్లాడేందుకు ఆంక్ష‌లు పెడ‌తాం. మ‌హిళా సాధికార‌త  ఉప‌న్యాసాలు క‌ట్టిపెట్టి ముక్కుసూటిగా మాట్లాడుకుంటే ఆడ‌వాళ్లు అభివృద్ధి చెందేందుకు కుటుంబాల్లోనే కాదు మ‌న వ్య‌వ‌స్థ‌లోనే ఎన్నో అడ్డంకులు ఉన్నాయి. ముఖ్యంగా మ‌న విద్యా విధాన‌మే ప‌రోక్షంగా ఆడవాళ్ల అభివృద్ధిని కుంటుప‌రుస్తోంది. చిన్న‌ప్ప‌టి నుంచి ప్ర‌తీది ప్ర‌త్యేకం అంటూ వారిలో వాళ్ల‌లో క‌లుపుగోలు త‌నాన్ని, ధైర్యాన్ని చంపేస్తున్నారు. ప్ర‌తీదాన్ని భ‌యంభ‌యంగా చూసిన‌ప్పుడు పోటీ ప్రపంచంలో దూసుకుపోవ‌డం అమ్మాయిల వ‌ల్ల ఏ విధంగా సాధ్య‌మ‌వుతుంది?  బ‌య‌ట ఆడ‌పిల్ల‌ల‌కు  ప్ర‌మాదాలు ఉన్నాయి కానీ  ప్ర‌మాదాల కోసం భ‌య‌ప‌డుతూ కూర్చుంటే అభివృద్ధి ఎలా సాధ్యం? 

మ‌హిళ‌ల్లో పిరికిత‌నానికి కార‌ణ‌మెవ‌రు?
     
      ఈ 21 వ శ‌తాబ్దంలో అమ్మాయిలు కూడా అబ్బాయిల‌తో స‌మానంగా అన్ని రంగాల్లోనూ రాణిస్తున్నారు. చ‌దువు లోనూ కెరీర్ లోనూ నైపుణ్యంలోనూ మేం ఎవ‌రికీ తీసిపోమ‌ని నిరూపిస్తున్నారు. అయితే ఇప్ప‌టికీ స్త్రీల‌పై వివ‌క్ష‌, చిన్న‌చూపు క‌నిపిస్తూనే ఉన్నాయి. గ‌డిచిన రెండు మూడు ద‌శాబ్దాల్లో స్త్రీలు విద్య‌, ఉపాధి ప‌రంగా మంచి అభివృద్ధి సాధించిన‌ప్ప‌టికీ ఇప్ప‌టికీ చాలా రంగాల్లో పురుషుల‌దే పైచేయి. మ‌గ‌వాడితో స‌మానంగా ప‌నిచేయ‌గ‌ల సామ‌ర్ధ్యం ఉంద‌ని నిరూపించుకున్నా స‌మాజం ఇంకా వాళ్ళ‌ను వంటింటి కుందేళ్లుగానే చూస్తోంది. కేవ‌లం విద్య ద్వారా మాత్ర‌మే మ‌హిళ‌లు అభివృద్ధి సాధించ‌గ‌ల‌ర‌ని చెపుతున్నా ఇప్ప‌టికీ చాలా మంది త‌ల్లిదండ్రులు అమ్మాయిల‌ను పూర్తి స్థాయిలో చ‌దివించేందుకు ఇష్ట‌ప‌డ‌టం లేదు. అయితే గ‌తంతో పోల్చుకుంటే ఇప్పుడు కొంచెం మార్పు క‌నిపిస్తోంది. 

ధైర్యం ఎందుకు స‌న్న‌గిల్లుతోంది? 

    ప్ర‌స్తుతం మంచి చ‌దువులు చ‌దివిన‌ప్ప‌టికీ చాలా మంది అమ్మాయిల‌కు బ‌య‌ట‌కు వెళ్లి స్వ‌తంత్రంగా వ్య‌వ‌హ‌రించే ధైర్యం కొర‌వ‌డుతోంది. ప్ర‌తీ దానికి ఆందోళ‌న ప‌డుతూ, భ‌య‌ప‌డుతూ ఆత్మ విశ్వాసాన్ని కోల్పోతున్నారు. ఇంట‌ర్వ్యూకు వెళ్లాల‌న్నా, ఉద్యోగానికి వెళ్లాల‌న్నా ఎవ‌రో ఒక‌రి సాయాన్ని కోరుతున్నారు. ఇది ఒక విధంగా వారి స్వ‌తంత్రంగా వ్య‌వ‌హ‌రించే అవ‌కాశాన్ని చేజార్చుకునేలా చేస్తోంది. త‌ల్లిదండ్రులు, కుటుంబ స‌భ్యులు, స్నేహితులు కొన్ని రోజులు మాత్ర‌మే సాయం చేయ‌గ‌లుగుతారు. ఆ త‌ర్వాత త‌మంత‌ట తాముగానే నిర్ణ‌యాలు తీసుకోవాలి. బ‌య‌ట తిరగాలి. స‌మ‌స్య‌ల‌ను ప‌రిష్క‌రించుకోవాలి. అలా సొంతంగా మ‌స‌ల‌గ‌ల‌గ‌డం అల‌వాటు చేసుకోక‌పోతే పురుషుల‌తో స‌మానంగా అభివృద్ధి సాధించ‌డ‌మ‌నేది అసాధ్యంగా మారుతుంది. ఒక మ‌హిళ‌గా త‌న భ‌ద్ర‌త‌కు సంబంధించి త‌గిన జాగ్ర‌త్త‌లు తీసుకుంటూనే అదే స‌మ‌యంలో ధైర్యంగా స‌మాజంలో తిర‌గ‌గ‌లిగే ఆత్మ విశ్వాసాన్ని సొంతం చేసుకోవాలి. 

ఇంట్లో కూర్చుంటే ఓడిపోయిన‌ట్టే! 

     ఇటీవ‌ల కాలంలో స‌మాజంలో మ‌హిళ‌ల‌పై దారుణాలు పెరిగిపోయాయి. ఇది అంద‌రూ ఒప్పుకునే విష‌య‌మే. దారుణాలు జ‌రుగుతున్నాయ‌ని భ‌య‌ప‌డి ఇంట్లో కూర్చుంటే మ‌హిళా సాధికార‌త ఎలా సాధ్య‌మ‌వుతుంది. స‌మ‌స్య‌ను ధైర్యంగా ఎదుర్కొన్న‌ప్పుడు ఫ‌లితాలు వ‌స్తాయి. బ‌య‌ట‌ జ‌రుగుతున్న దారుణాలు వ‌ల‌న అమ్మాయిలు భ‌య‌ప‌డుతున్నార‌ని స‌ర్ది చెప్పుకోవ‌డానికి ప్ర‌య‌త్నించినా, ధైర్యంగా వ్య‌వ‌హ‌రించ‌క‌పోతే కెరీర్ లో ఉన్న‌త స్థితికి వెళ్ల‌డం అసాధ్యం. సవాళ్ల‌ను, సంక్లిష్టత‌ల‌ను ఎదుర్కోలేక‌పోతే మ‌హిళా సాధికార‌త సాధ్యం కాదు. ప్ర‌తీ క్ష‌ణం అప్ర‌మ‌త్త‌త‌తో వ్య‌వ‌హ‌రించి జాగ్ర‌త్త‌గా ఉంటూనే త‌ను నిర్దేశించుకున్న ల‌క్ష్యాల‌ను సాధించేందుకు ప్ర‌య‌త్నం చేయాలి. 

పాఠ‌శాల స్థాయి నుంచే ధైర్యాన్ని నూరిపోయాలి 

   మ‌నం గ‌తంలో చ‌ర్చించుకున్నట్టు మ‌న విద్యా విధానంలో చాలా లోపాలున్నాయి. అందులో ఒకటి అమ్మాయిల ప‌ట్ల అనుస‌రించే తీరు. త‌ల్లిదండ్రుల ద‌గ్గ‌ర్నుంచి, టీచ‌ర్ల వ‌ర‌కూ వాళ్లేదో ప్ర‌త్యేక గ్ర‌హం నుంచి వ‌చ్చిన‌ట్టు ప్ర‌వ‌ర్తిస్తారు. వాళ్ల హావభావాలు, స్వేచ్ఛ‌, న‌డ‌వ‌డిక‌కు కొన్ని హ‌ద్దులు నిర్ణ‌యిస్తారు. మ‌గ పిల్ల‌ల‌తో క‌ల‌వ‌ద్దు అంటూ ఆంక్ష‌లు విధిస్తారు. ఇన్ని ఆంక్ష‌ల మ‌ధ్య రేప్పొద్దున ఒక అమ్మాయి పోటీ ప్ర‌పంచంలో ఎలా నెగ్గుకు రాగ‌లుగుతుంది. ఉద్యోగ భాద్య‌త‌ల్లో భాగంగా మ‌గ‌వాళ్లు, విభిన్న మ‌న‌స్త‌త్వాలు ఉన్న మ‌నుష్యుల‌తో వ్య‌వ‌హ‌రించాల్సి ఉంటుంది. త‌మ ప‌ట్ల చెడుగా ప్ర‌వ‌ర్తించే, వేధించే వ్య‌క్తులకు ఎలాంటి స‌మాధానం ఇవ్వాలి? వారి బారి నుంచి ఎలా భ‌ద్రంగా బ‌య‌ట‌ప‌డాలి? అన్న‌ది కార్య‌రంగంలోనే నేర్చుకోవాలి. ఇంట్లో కూర్చుంటే ఇది అల‌వ‌డ‌దు.  చిన్న‌ప్ప‌టి నుంచి అలాంటి వాతావ‌ర‌ణం లేన‌ప్పుడు అంద‌రితో క‌లిసిపోగ‌లిగే నేర్పు ఎలా అబ్బుతుంది?  అమ్మాయిలు రానున్న రోజుల్లో మ‌రింతగా సాధికార‌త సాధించాలంటే వారిపై ఆంక్ష‌లు ఎత్తేయండి. ఒక మ‌హిళ‌గా ఆమెకున్న బాధ్య‌త‌లను త‌ల్లిదండ్రులు జాగ్ర‌త్త‌గా వివ‌రిస్తే  చాలు  మ‌హిళ‌లు ఆకాశ‌మే హ‌ద్దుగా అభివృద్ధిలో దూసుకుపోతారు. 

మ‌న‌సుల్లోంచి ఆ తేడాను తీసేయండి! 

    మ‌న ప్ర‌భుత్వాలు మ‌హిళా సాధికార‌త అంటూ గొప్ప‌లు చెపుతున్న‌ప్ప‌టికీ ఆ దిశ‌గా స‌రైన చ‌ర్య‌లు మాత్రం తీసుకోవ‌డం లేదు. ముఖ్యంగా మ‌న విద్యా విధానంలో కొన్ని మార్పులు చేసి పాఠ‌శాల, క‌ళాశాల స్థాయిలో స్త్రీ , పురుష స‌మానత్వాన్ని సాధించేందుకు ప్ర‌య‌త్నించాలి. మ‌గ‌వాళ్లు, ఆడ‌వాళ్లు అంటూ తేడాను చూపించ‌డం అన్ని స్థాయిల్లోనూ దానిని అమ‌లు చేయ‌డం స‌మ‌స్య‌కు మూల‌కార‌ణంగా క‌నిపిస్తోంది. ప్ర‌త్యేక బాలిక‌ల పాఠ‌శాల‌లు, క‌ళాశాల‌లు పెడితే స్త్రీ అభివృద్ధి సాధ్యం కాదు. ఇలా చేయ‌డం వ‌ల‌నే మ‌హిళ‌లు ఎక్క‌డికి వెళ్లినా ఎవ‌రినో ఒక‌రిని సాయం తీసుకెళ్లాల్సిన ప‌రిస్థితి వ‌స్తోంది. ఉద్యోగ జీవితంలో మ‌గ‌వాళ్ల‌తో పాటు అంద‌రితోనూ వ్య‌వ‌హ‌రించాలి. అలాంట‌ప్పుడు ప్ర‌త్యేక బాలికా విద్యాల‌యాల వ‌ల‌న ఉప‌యోగమేంటి? 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com