లైఫ్ కంప్లైంట్స్ బాక్స్ కాదు 'మ్యాజిక్ బాక్స్'!!

     మీకు ఏడు చేప‌ల క‌థ గుర్తుండే ఉంటుంది. రాజుగారి ఏడుగురు కొడుకులు వేట‌కెళ్లి తెచ్చిన ఏడు చేప‌ల్లో ఒక‌టి ఎందుకు ఎండ‌లేద‌న్న దానిపై పెద్ద చ‌ర్చ జ‌రుగుతుంది. ఈ క‌థ‌లో కార‌కులు ఒక‌రిపై ఒక‌రు ఫిర్యాదులు చేసుకుంటారు త‌ప్ప పరిష్కారం ఆలోచించ‌రు . ప్ర‌స్తుతం చాలా మంది విద్యార్ధులు ఈ ఏడు చేప‌ల క‌థ మాదిరిగానే ఎంత‌సేపు ఫిర్యాదులు త‌ప్ప ప‌రిష్కార మార్గాల‌పై దృష్టిపెట్ట‌డం లేదు. మ‌న రోజువారీ జీవితంలో మ‌న‌కు తెలీకుండానే కొన్ని పొర‌పాట్ల‌ను చాలా అవ‌లీల‌గా చేసేస్తూ ఉంటాం .విచార‌క‌ర‌మైన విష‌యమేమిటంటే ఆ పొర‌పాట్ల‌ను మ‌నం గుర్తించ‌లేక, ఆ త‌ప్పుల నుంచి పాఠాలు నేర్చుకోలేక విలువైన జీవిత పాఠాన్ని కోల్పోతాం. ప్ర‌స్తుత ఆధునిక విద్యా విధానంలో విద్యార్ధులు వ్య‌క్తిత్వ వికాసంలో కీల‌క విష‌యాల‌ను నేర్చుకోక‌, త‌ప్పులు చేస్తున్నారు. ప్ర‌తీ విష‌యానికి ఫిర్యాదులు చేయ‌డం వారికి అల‌వాటుగా మారిపోయింది. స‌హ‌చ‌ర విద్యార్ధులు, ఉపాధ్యాయులు, త‌ల్లిదండ్రులు, కుటుంబం, స‌మాజం ఇలా ప్ర‌తీ దానిపైనా ఫిర్యాదు చేస్తూ మాన‌సికంగా బ‌ల‌హీనులుగా త‌యార‌వుతున్నారు. 

ఫిర్యాదుల‌తో అద్భుతాలు జ‌రగ‌వు! 

    రోడ్డుపై చెత్తా చెదారం, ఎవ‌రూ ట్రాఫిక్ రూల్స్ పాటించ‌రు. నా పేరెంట్స్ కు న‌న్ను అర్ధం చేసుకోవ‌డం రావ‌డం లేదు. నా ఫ్రెండ్ అవ‌స‌రానికే ప్రాధాన్య‌తనిస్తున్నాడు.....రోజూ ఇలా ఫిర్యాదులు చేసే వారు మ‌స్తిష్కంలో జ‌రిగే సంఘ‌ర్ష‌ణ‌తో మాన‌సికంగా త్వ‌ర‌గా అలిసిపోతారు. ఈ ఫిర్యాదుల ఎపిసోడ్ లో ఒకసారి త‌రచి చూసుకుంటూ మ‌న వ్య‌క్తిగ‌త అహంకారాన్ని శాంతింప చేసుకోవ‌డానికే ఇలా ప్ర‌వ‌ర్తిస్తున్నామ‌ని అర్ధ‌మ‌వుతుంది. ఇంటా బ‌య‌టా, విద్యాల‌యం ఇలా అన్ని చోట్లా నాకు న‌చ్చిన‌ట్టు లేదు. ఎవ‌రూ ప‌ద్ధ‌తి ప్ర‌కారం లేరు అని మ‌ధన ప‌డితే మ‌న‌కు మాన‌సిక ప్ర‌శాంత‌త దూరమ‌వుతుంది. అన్నింటి కంటే ముఖ్యంగా ప్ర‌తికూల శ‌క్తి మ‌న మ‌స్తిష్కాన్ని, ఆలోచ‌న విధానాన్ని మ‌లినం చేస్తుంది. 

ఫిర్యాదులు చేయ‌కండి.. ఆత్మ‌విమ‌ర్శ చేసుకొండి 

    ఒక విద్యార్ధికి స్కూల్ స్థాయి నుంచే ఫిర్యాదులు చేసే అల‌వాటు ఉంటే అది మరింత ఆందోళ‌న‌క‌రంగా త‌యార‌వుతుంది. బెదిరించేందుకు మొద‌లైన ఫిర్యాదు చివ‌రికి పెద్ద‌య్యాక కూడా వ‌దిలిపెట్ట‌కుండా కొన‌సాగుతుంది. కొంద‌రు చిన్న చిన్న విష‌యాల‌కే పోలీస్ స్టేష‌న్ ల‌లో ఫిర్యాదులు చేసుకునే స్థాయికి వెళ్లిపోతారు. మ‌న చుట్టూ మ‌నుష్యులు, ప‌రిస్థితులు నిజంగానే చెడ్డ‌వి కావ‌చ్చు. కానీ వాటిని ఒక విద్యార్ధి ఏ విధంగా ఎదుర్కొంటున్నాడ‌న్న‌దే అస‌లైన స‌వాలు. వ్య‌క్తుల‌ను, ప‌రిస్థితుల‌ను విమ‌ర్శిస్తూ, ఫిర్యాదులు చేసుకుంటూ పోతే మ‌నం జీవితం నుంచి ఏమీ నేర్చుకోవ‌డం లేద‌ని అర్ధం. నిజానికి ఇలాంటి అడ్డంకులు, స‌మ‌స్య‌లు ఎదురు కావ‌డాన్ని విద్యార్ధి సానుకూలంగా తీసుకోవాలి. స‌మ‌స్య‌ను ప‌రిష్క‌రించేందుకు శాయ‌శ‌క్తులా ప్ర‌య‌త్నం చేయాలి. అలా కాకుండా ఫిర్యాదులు చేస్తూ కాలం గ‌డిపితే స‌మ‌స్య తీర‌దు స‌రిక‌దా మీకు మాన‌సిక అశాంతి క‌లుగుతుంది. 

జీవిత‌మే అతి పెద్ద టీచ‌ర్!

   త‌ర‌గ‌తి గ‌దిలో ఏ టీచ‌ర్, ఏ టెక్స్ట్ బుక్ చెప్ప‌ని విష‌యాన్ని జీవితం మ‌న‌కు నేర్పుతుంది. క‌ఠిన ప‌రిస్థితులుతో, విభిన్న మ‌న‌స్త‌త్వాల‌తో ఎలా వ్య‌వ‌హ‌రించాల‌న్న విలువైన పాఠం అది. దాన్ని విద్యార్ధి రెండు చేతుల‌తో ఒడిసిప‌ట్టుకోవాలి. ప‌రిస్థితుల‌ను, స‌మాజాన్ని, ప్ర‌భుత్వాన్ని ఇలా స‌మ‌స్య‌ల‌ను తిట్ట‌డం మాని ప‌రిష్కారం కోసం ఆలోచిండండి. కేవ‌లం ఫిర్యాదుల‌తో స‌మ‌స్య‌లు ప‌రిష్కారం కావు. కొన్ని మ‌నం మార్చ‌లేని విష‌యాల‌పై రాజీ ప‌డి దాన్ని అంగీక‌రించ‌డం నేర్చుకోవాలి. గ‌తంలో మ‌న పాఠ‌శాల‌లో విద్యార్ధుల‌లో నాట‌కాలు వేయించే వారు. ఆ నాట‌కంలో నిజ జీవిత సంఘ‌ట‌న‌లు ఉండేవి. ఒక విష‌యాన్ని ఏయే కోణాల నుంచి చూడాల‌న్న విష‌యంపై విద్యార్ధుల‌కు అవ‌గాహ‌న వ‌చ్చేది. ఇప్పుడు అలాంటివి లేక‌పోవ‌డం విద్యార్ధుల‌కు కొన్నింటిని అంగీక‌రించాలి అన్న విష‌యం తెలియ‌కుండా పోతోంది.  స‌మ‌స్య‌పై ఫిర్యాదులు మాని అది త‌లెత్త‌డానికి కార‌ణాలేంటి అన్నదాన్ని తెలుసుకోవాలి. దీని వ‌ల‌న ఆవేశం, మాన‌సిక ఆందోళ‌న త‌గ్గి పరిష్కార మార్గాలకు మార్గం దొరుకుతుంది.

మీరేం చేస్తున్నారు? 

   బెంగ‌ళూరులో కొంద‌రు యువ‌కులు ఒక గ్రూప్ గా ఏర్ప‌డి న‌గ‌రంలో ఎక్క‌డ చెత్తా చెదారం పేరుకుపోయిందో ఆ ప్రాంతానికి వెళ్లి దాన్ని శుభ్రం చేస్తారు. ఫిర్యాదు చేసినా ఎవ‌రూ ప‌ట్టించుకోలేద‌న్న‌ స‌మాచారం తెలిస్తే చాలు ఆ యువ‌కులు అక్క‌డికి వెళ్లి శుభ్రం చేసేస్తారు. ఇందులో ఎవ‌రికీ వ్య‌క్తిగ‌త గుర్తింపుతో పాటు ఎటువంటి ఎజెండా లేదు. కేవ‌లం స‌మ‌స్య ప‌రిష్కారం కావాల‌న్న త‌ప‌న త‌ప్ప‌. ఫిర్యాదులు చేస్తూ కూర్చునే వాళ్ల క‌న్నా ఇలాంటి యువ‌కులే ఇప్పుడు దేశానికి అవ‌స‌రం. మూడు కోతుల బొమ్మ మ‌న‌కు ఏమి నీతి చెపుతుంది. చెడు విన‌వ‌ద్దు, చెడు చూడ‌వ‌ద్దు, చెడు మాట్లాడ‌వ‌ద్దు. ప్ర‌స్తుత సామాజిక ప‌రిస్థితుల‌కు అనుగుణంగా ఇందులో కొంచెం మార్పులు చేసుకోవాలి. మంచితో పాటు చెడును కూడా వినాలి. అది ఎందుకు చెడు అయిందో తెలుసుకుని విడిచిపెట్టాలి. చెడు చూడాలి ఎందుకంటే ఆ చెడును చూసి అలాంటి చెడు ఇక‌పై జ‌ర‌గుకుండా ఆపాలి. అలాగే చెడును ఖండించేందుకు చెడును మాట్లాడాలి.    మీకు ఫిర్యాదులు చేసే అలవాటు ఉంటే ఒక స‌మ‌స్యపై మీ ఫిర్యాదును ప‌రిశీలించండి. మీరైతే ఏమి చేయ‌గ‌లుగుతారో ఆలోచించండి. ఏమైనా చేయ‌గ‌లిగేది ఉంటే వెంట‌నే చేయండి. లేదు అంటే ఆ ప‌రిస్థితిని త‌ప్ప‌నిస‌రిగా అంగీక‌రించ‌డం నేర్చుకొండి. అంతే కానీ ఎప్పుడూ ఫిర్యాదులు చేస్తూ కూర్చోకండి. అది మీ భ‌విష్య‌త్ కు మంచిది కాదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com