టోకున టోక‌రా తిన‌కండి!

   విద్యార్ధుల‌కు టోక‌రా....నిరుద్యోగుల‌కు కుచ్చు టోపీ....ఇటీవ‌ల కాలంలో న్యూస్ పేప‌ర్ల‌లో ఎక్కువ‌గా క‌నిపిస్తున్న వార్తలు ఇవే. జాబ్ మేళాలు, స‌రికొత్త ఉద్యోగ అవ‌కాశాలు అంటూ మోస‌గాళ్లు కొత్త త‌ర‌హా ఆలోచ‌న‌ల‌తో విద్యార్ధుల స‌మ‌యాన్ని, డ‌బ్బును దోచుకుంటున్నారు. ఎప్ప‌టి క‌ప్పుడు కొత్త రూపాలు ధ‌రిస్తూ కొత్త త‌ర‌హా మోసాలు వ‌రుస‌గా బ‌య‌ట‌ప‌డుతున్నాయి. ఉద్యోగం సాధించాల‌న్న ఆత్రంలో విద్యార్ధులు వెనకా ముందూ చూడ‌కుండా వెళ్లి ఈ మోస‌గాళ్ల చేతిలో ద‌గా ప‌డుతున్నారు. స్వీయ అప్ర‌మ‌త్త‌త‌, కాస్త వాస్త‌విక‌త ఉంటే విద్యార్ధులు ఇలాంటి మోసాల నుంచి త‌మ‌ను తాము కాపాడుకునేందుకు వీలుంటుంది. సరైన నైపుణ్యాలు లేకుండా టాప్ క్లాస్ జాబ్ సంపాదించేద్దాం అనుకుంటే ఎడారిలో బోరు బావి తవ్వినట్టే ఉంటుంది.  

మోస‌గాళ్ల వ‌ల‌లో చిక్కుకోకండి 

   తాజాగా విద్యార్ధుల‌ను మోస‌పుచ్చేందుకు కేటుగాళ్లు కొత్త త‌ర‌హా విధానాల‌తో రెచ్చిపోతున్నారు. ఆన్ లైన్ ప్ర‌క‌ట‌న‌లు, టాప్ కంపెనీల‌తో జాబ్ మేళాలు అంటూ విద్యార్ధుల‌ను బుట్ట‌లో ప‌డేస్తున్నారు. అస‌లు నిర్వాహ‌కులు ఎవ‌రు? వాళ్లు నిజంగా పెద్ద కంపెనీ ప్ర‌తినిధుల‌తో ఇంట‌ర్వ్యూలు ఏర్పాటు చేయ‌గ‌లుగుతారా? అన్న విష‌యాల‌ను ఆలోచించ‌కుండా విద్యార్ధులు, కేటుగాళ్ల‌కు రిజిష్ట్రేష‌న్ పీజులు స‌మ‌ర్పించుకుంటున్నారు. తాజాగా ఉప్ప‌ల్ ఓ సంస్థ  బ‌డా కంపెనీల‌తో ఇంట‌ర్వ్యూలు నిర్వ‌హిస్తామ‌ని చెప్పి ప్ర‌తీ విద్యార్ధి నుంచి రూ.200 రిజిష్ట్రేష‌న్ ఫీజు వ‌సూలు చేసింది. ఆక‌ర్షణీయమైన ఆ ప్ర‌క‌ట‌న‌తో వేలాది మంది విద్యార్ధులు రిజిష్ట్రేష‌న్ చేయించుకున్నారు. తీరా జాబ్ మేళా ఉంద‌ని చెప్పిన రోజు ఆ సంస్థ ప‌త్తా లేకుండా పోయింది. కేవ‌లం ఒక్క రోజులోనే విద్యార్ధుల నుంచి ల‌క్షలాది రూపాయ‌లు దండుకుని ఉడాయించింది. ఇదో కొత్త ర‌క‌మైన మోసం. ఇలాంటి ఘ‌ట‌న‌లు ప్ర‌తీ రోజూ జ‌రుగుతూనే ఉన్నాయి. ఇక కొత్త కోర్సులు పూర్తి చేసిన విద్యార్ధుల డేటా బేస్ ను సంపాదిస్తున్న హైటెక్ మోసగాళ్లు , విద్యార్ధులను ఫోన్ ద్వారా, మెయిల్ ద్వారా సప్రదించి ఫలానా కంపెనీలో ఉద్యోగం ఉంది. కానీ నీకు దొడ్డిదానిన ఉద్యోగం కల్పిస్తున్నందుకు ఇంత మొత్తం మా బ్యాంక్ అకౌంట్ జమ చేయండి అని చెపుతున్నారు. కొందరు గుడ్డిగా ఆ కేటుగాళ్లు చెప్పిన విధంగా చేసిన లబోదిబోమంటున్నారు. 

ఉద్యోగానికి డ‌బ్బులెందుకు? 

 ఇప్పుడు కొంద‌రు మోస‌గాళ్లు మాకు ఇంత చెల్లించండి...ఉద్యోగం మీ సొంతం. అంటూ ఆక‌ర్ష‌ణీయ‌మైన ప్ర‌క‌ట‌న‌ల‌తో ఆక‌ట్టుకుంటున్నారు. ఉద్యోగం సాధించాల‌న్న తొంద‌ర‌లో కొంద‌రు విద్యార్ధులు వీరి బుట్ట‌లో సులువుగా ప‌డుతున్నారు. వారికి భారీ మొత్తాలు చెల్లించి త‌ర్వాత లబోదిబోమంటున్నారు. వీటికి తోడు ఈ మ‌ధ్య ఇంకో కొత్త త‌ర‌హా మోసాలు బ‌య‌ట‌ప‌డుతున్నాయి. మా కంపెనీలో ఉద్యోగాలున్నాయి. కానీ వాటిని పొందాలంటే ముందుగా మీరు మాకు ఇంత మొత్తం చెల్లించాలి అని చెపుతున్నారు.ఇలాంటి సమయంలోనే విద్యార్ధులు తమ విచక్షణను ఉపయోగించాలి. ఉద్యోగికి జీతం కూడా ఇవ్వలేని సంస్థ కంపెనీని ఎలా నడుపుతుంది? ఇలా మోసపూరిత ప్రకటనలు చేసే కంపెనీల విషయంలో అప్రమత్తంగా ఉండాలి.   చ‌దువు పూర్తి చేసుకున్న ప్ర‌తీ విద్యార్ధికి త్వ‌ర‌గా ఉద్యోగం సాధించి జీవితంలో స్థిర‌ప‌డాల‌న్న ఆశ‌, ఆకాంక్ష ఉంటాయి. అయితే  ఆ ఆత్రంతో చిక్కుల్లో ప‌డ‌టం మాత్రం విద్యార్ధి స్వీయ త‌ప్పిదమే. మోస‌పోయే వాళ్లు ఉన్న‌ప్పుడే మోస‌గాళ్లు పుట్టుకొస్తార‌న్న విష‌యాన్ని విద్యార్ధులు గుర్తించాలి. మోసాల విషయంలో అప్రమత్తంగా ఉండి కాస్త వాస్తవికతను జోడించి ఆలోచిస్తే మోసగాళ్ల బుట్టలో పడకుండా ఉండే వీలుంది. 

క‌ష్టప‌డితేనే ఉద్యోగాలు వ‌స్తాయి 

ప్రపంచానికి ఏ విషయానికి అడ్డదారులు ఉండవు. అలాగే ఉద్యోగం సాధించేందుకు కూడా. కష్టపడి తమను తాము నిరూపించుకున్నప్పుడే ఉద్యోగాలు విద్యార్ధిని వెతుక్కుంటూ వస్తాయి. ఎప్పటికప్పుడు అప్ డేట్ అవుతూ కంపెనీలకు కావాల్సిన విషయాలను నేర్చుకుంటే ప్రస్తుతం ఉద్యోగం ఇచ్చేందుకు చాలా సంస్థలు రెడీగా ఉన్నాయి. సరైన నైపుణ్యం లేని విద్యార్ధులే అడ్డదారుల్లో, సులువుగా ఉద్యోగం సాధించాలని భావిస్తారు. అలాంటి వారే మోసం పోయేందుకు ఎక్కువ అవకాశాలుంటాయి. కష్టపడి సంస్థలకు అవసరమైన నైపుణ్యాలు సంపాదించుకున్నప్పుడు మోసగాళ్ల బారిన పడే ఛాన్స్ ఉండదు.

నైపుణ్యం ఉంటే మీరే రారాజు

ప్రస్తుతం మన దేశంలో చాలా కంపెనీలను నిపుణుల కొరత పట్టిపీడిస్తోంది. లక్షలాది మంది నిరుద్యోగులు ఉన్నా ఆయా సంస్థలకు అవసరమైన నిపుణులు మాత్రం దొరకడం లేదు. ప్రస్తుతం మన దేశంలో ఉన్న ప్రధానమైన లోపం ఇదే. ఒక సర్వే ప్రకారం ఇంజినీరింగ్ పూర్తి చేసిన 90 శాతం మంది విద్యార్ధులకు సరైన నైపుణ్యాలు లేవని తేలింది. నైపుణ్యం  లేకుండా ఉద్యోగం సాధించడం అసాధ్యం. ఈ విషయంపై విద్యార్ధులు వాస్తవాలను గుర్తించాలి. మార్కెట్లో డిమాండ్ ఉన్న కోర్సులను నేర్చుకుని, ప్రతీ రోజు మారుతున్న టెక్నాలజీకి అనుగుణంగా తనను తాను అప్ డేట్ చేసుకున్నప్పుడు విద్యార్ధులకు కంపెనీలు రెడ్ కార్పెట్ పరుస్తాయి. రెడ్ కార్పెట్ మీద ఆత్మ విశ్వాసంతో నడుచుకుంటూ వెళ్తారో లేక మోసగాళ్ల చేసిలో మోసపోయి మూలన కూర్చుంటారో మీ ఇష్టం. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com