జీన్స్, టీష‌ర్ట్ .. ఓ బిగించిన పిడికిలి!

   విద్యార్ధి ....ఈ మాట‌కు తుపాకీ గుండుకు ఉన్నంత వేగం, శ‌క్తి ఉన్నాయి. ఒక దేశ భ‌విష్య‌త్ ముఖ‌చిత్రం  మొత్తం విద్యార్ధుల చేతిలోనే ఉంటుంది. ఎందుకంటే వారే ఆ దేశపు ఆశ‌లు, ఆకాంక్ష‌ల‌ను ముందుకు తీసుకెళ్లి స్వ‌ప్నాల‌ను నిజం చేయ‌గ‌ల స‌మ‌ర్ధులు.  ఇండియా వంటి ప్ర‌జాస్వామ్య దేశంలో విద్యార్ధుల‌దే కీల‌క పాత్ర‌.  వాళ్లే భావి భార‌త నిర్మాతలు. ఒక ప్ర‌భుత్వాన్ని కూల్చాల‌న్నా, ఒక ప్ర‌భుత్వాన్ని నిల‌బెట్టాల‌న్నా, ఒక స‌మ‌స్య‌పై పోరాటం చేయాల‌న్నా విద్యార్ధుల‌తోనే సాధ్యం. తాజాగా దేశ వ్యాప్తంగా మ‌రోసారి విద్యార్ధులు, రాజ‌కీయాలు అన్న అంశం హాట్ టాపిక్ గా మారింది. అస‌లు విద్యార్ధుల‌కు రాజ‌కీయాలు అవ‌స‌ర‌మా?  అన్న ప్ర‌శ్న‌లు వ‌స్తున్నాయి. ప్ర‌స్తుతం రాజ‌కీయాల‌ను శాసిస్తున్న ఎంద‌రో నాయ‌కులు విద్యార్ధి నాయ‌కులుగానే వెలుగులోకి వ‌చ్చారు.

విద్యార్ధి, రాజ‌కీయాలు క‌వ‌ల పిల్ల‌లు 

   చరిత్ర‌ను ఒక‌సారి ప‌రికించి చూస్తే విద్యార్ధి, రాజ‌కీయాలు ప‌ర‌స్ప‌రం పెన‌వేసుకుపోయిన విష‌యం చాలా స్ప‌ష్టంగా అర్ధ‌మ‌వుతుంది. 1984 లో ఆంధ్ర‌ప్ర‌దేశ్ లో ఎన్టీఆర్ అధికారం చేజిక్కించుకోవ‌డానికి విద్యార్ధులే ప్ర‌ధాన కారణం. అప్ప‌టి విశ్వవిద్యాలయాల్లోని స్టూడెంట్స్ యూనియ‌న్ మ‌ద్ధ‌తుతోనే ఆయ‌న విజ‌యం సాధించారు. ఇక ఎంద‌రో విద్యార్ధి నాయ‌కులు రాజ‌కీయ నాయ‌కులుగా ఎదిగారు. ప్ర‌స్తుత కేంద్ర మంత్రి వెంక‌య్య నాయుడు, బీహార్ సీఎం నితీష్ కుమార్, జైపాల్ రెడ్డి, రామ్ విలాస్ పాశ్వాన్, జార్జ్ రెడ్డి, ప్ర‌పుల్ల కుమార్ మ‌హంత వంటి వారు విద్యార్ధి ద‌శ‌లోనే నాయ‌క‌త్వ ల‌క్ష‌ణాల‌ను సంపాదించుకున్నారు. విద్యార్ధి నాయ‌కుడిగా ప్రాచుర్యం పొందిన ప్ర‌పుల్ల్ కుమార్ మహంత త‌ర్వాత అస్సామ్ గ‌ణ ప‌రిష‌త్  అనే పార్టీ పెట్టి అసోంకు ముఖ్య‌మంత్రి అయ్యాడు. ఇక అర్జెంటీనా విప్ల‌వ‌యోధుడు చేగువేరా కూడా విద్యార్ధి ద‌శ‌లోనే నాయ‌క‌త్వ ల‌క్ష‌ణాల‌ను పుణికిపుచ్చుకుని క‌మ్యూనిస్ట్ విప్ల‌వోద్య‌మంలో పాల్గొని క్యూబాలో ఫిడెస్ కాస్ట్రో ప్ర‌భుత్వంలో మంత్రిగా కూడా ప‌నిచేశాడు. ఇక్క‌డ చెప్పుకున్న వారే కాదు ప్ర‌పంచ వ్యాప్తంగా గొప్ప గొప్ప నాయ‌కులుగా ఎదిగిన వారు విద్యార్ధి ద‌శ‌లో రాజ‌కీయాల్లో చురుగ్గా పాల్గొన్న‌వారే. ప్ర‌పంచ రాజ‌కీయ చ‌రిత్ర‌ను ఓసారి ప‌రికించి చూస్తే విద్యార్ధిని రాజ‌కీయాల‌ను విడ‌దీసి చూడ‌టం సాధ్యం కాద‌న్న విష‌యం అర్ధ‌మ‌వుతుంది. 

ఉద్య‌మాల‌ను నిర్మించేది విద్యార్ధులే! 

   ప్ర‌పంచంలో ఏ గొప్ప ఉద్య‌మాల‌ను తీసుకున్నా అవి విద్యార్ధి ఉద్య‌మాలుగానే మొద‌లవుతాయి. వివ‌క్షకు, అవినీతికి వ్య‌తిరేకంగా, హ‌క్కుల సాధన‌కై విద్యార్ధులు సాగించిన ఉద్యమాలు కోకొల్ల‌లు.  ఓ ఫ్రెంచ్ రాజ‌కీయ వేత్త ఆలోచ‌న‌ల ప్ర‌కారం ఉత్సావంతులైన‌, రాజ‌కీయ ప‌రిణితి సాధించిన విద్యార్ధులు ఉన్న దేశం వేగంగా అభివృద్ధి బాట ప‌డుతుంది. తెలంగాణా ఉద్య‌మంలో విద్యార్ధుల పోషించిన పాత్రను ఎవ‌రూ మ‌ర్చిపోలేరు. రాజ‌కీయ జేఏసీ లు ఎన్ని పోరాటాలు చేసినా విద్యార్ధి జేఏసీలు చేసిన పోరాట‌మే తెలంగాణా రాష్ట్ర సాధ‌న‌కు ప్ర‌ధాన కారణం. ఉస్మానియాలో విద్యార్ధుల ఉద్య‌మ గొంతు ఢిల్లీలో పాల‌కుల‌ను క‌దిలించింది. తెలంగాణా ఉద్య‌మ‌మే కాదు ఏ ఉద్య‌మం అన్నా విజ‌యం సాధించాలంటే విద్యార్థికి రాజ‌కీయ చైత‌న్యం ఉండాలి. లేకుంటే న‌యా రాజ‌కీయ వ్య‌వ‌స్థ‌లో మ‌న కుహానా రాజ‌కీయ‌ పాల‌కులు ప్ర‌జ‌ల‌కు అన్యాయాలు చేస్తూనే ఉంటారు. 

పోరాటాల్లో పార‌ద‌ర్శ‌క‌తే కీలకం

    విశ్వ విద్యాల‌యాల్లో విద్యార్ధి ఉద్య‌మాలు చురుగ్గా ఉన్న‌ప్పుడే రాజ‌కీయ వ్య‌వ‌స్థ‌కు వార‌సులు త‌యార‌వుతున్న‌ట్టు. హైద‌రాబాద్ సెంట్ర‌ల్ యూనివ‌ర్సిటీ లో రోహిత్ వేముల ఆత్మ‌హ‌త్య త‌ద‌నంత‌ర ప‌రిస్థితుల్లో విద్యార్ధుల న‌డిపిన పోరాటం ఢిల్లీ పాల‌కులకే కంగారు పుట్టించింది. ఇక ఢిల్లీలో జ‌వ‌హ‌ర్ లాల్ నెహ్రూ యూనివ‌ర్సిటీలో విద్యార్ధి నాయ‌కుడు క‌న్హ‌య్య కుమార్ నేతృత్వంలో సాగిన విద్యార్ధి పోరాటం కూడా దేశ‌వ్యాప్తంగా చ‌ర్చ‌నీయాంశంగా మారింది. పెను సంచ‌ల‌నం సృష్టించిన ఈ రెండు విద్యార్ధి ఉద్య‌మాలపై కొన్ని విమ‌ర్శ‌లు చేల‌రేగ‌డం విశేషం. తాజాగా ఢిల్లీ యూనివ‌ర్సిటీలో గుల్ మెహ‌ర్ కౌర్ ఉదంతంలోనూ విద్యార్ధులు రెండు వ‌ర్గాలుగా విడిపోయి క్యాంపస్ ల‌ను సిస‌లైన రాజ‌కీయ గోదాలుగా మార్చివేసారు. విద్యార్ధులు వ్య‌వ‌స్థ‌లో పాతుకుపోయిన అన్యాయాల‌ను, అక్ర‌మాల‌కు వ్య‌తిరేకంగా పోరాటాలు చేయాలి. ఈ విష‌యంలో కుల‌, మ‌త‌, పార్టీలు,  ప్రాంతీయ భావ‌న‌ల‌కు చోటివ్వ‌కూడ‌దు. ఇక వ్యక్తిగ‌త భావాలు, న‌మ్మ‌కాలు విద్యార్ధి ఉద్య‌మాల‌ను నీరుగారుస్తాయి. 

విద్యార్ధి రాజ‌కీయాలు స‌రిహ‌ద్దులు దాటొద్దు! 

  దేశ భ‌విష్య‌త్ నిర్మాత‌గా వ‌ర్త‌మానంలో రాజ‌కీయాల‌పై అవ‌గాహ‌న పెంచుకోవ‌డం, అన్యాయాన్ని ప్ర‌శ్నించ‌డం విద్యార్ధికి చాలా అవ‌స‌రం. అయితే అదే స‌మ‌యంలో విద్యార్ధి జాగ్ర‌త్త‌గా ఆచితూచి అడుగులు వేయాలి. ఆవేశమే విద్యార్ధికి ఆయుధం కాబ‌ట్టి ఆ ఆయుధానికి కాస్త విచ‌క్ష‌ణ జోడించి ఉప‌యోగిస్తే తిరుగుండ‌దు. అలా కాకుండా కేవ‌లం ఆవేశంతో వెన‌కా ముందూ చూడ‌కుండా వ్య‌క్తిగ‌త అభిప్రాయాలు, భావాల‌కు ప్రాధాన్య‌తనిస్తూ ముందుకు వెళ్తే భ‌విష్య‌త్ అంధ‌కారంలో ప‌డే ప్ర‌మాదం ఉంది. హ‌క్కులు గురించి మాట్లాడుతూనే అదే స‌మ‌యంలో బాధ్య‌త‌ల‌ను కూడా గుర్తెరిగి క్యాంప‌స్ లో ఉద్య‌మాలు నిర్మిస్తే అనుకున్న ల‌క్ష్యాలు నెర‌వేరుతాయి. అలా కాకుండా సొంత అజెండాతో సొంత భావాల‌ను ప్ర‌చారం చేసుకునేందుకు విద్యాల‌యాల‌ను వాడుకోకూడ‌దు. ఇలా చేస్తే రాజ‌కీయ నాయకుల ఉచ్చులో ప‌డి ప‌రోక్షంగా పార్టీల‌కు, అవినీతి నాయ‌కుల‌కు ల‌బ్ది చేకూర్చే విధంగా ప్ర‌వ‌ర్తించ‌కూడ‌దు. స‌మాజంపై త‌న బాధ్య‌త‌ను విస్మ‌రించ‌కుండా స‌మ‌స్య‌ల‌పై పోరాటాలు చేస్తూనే అదే స‌మ‌యంలో మ‌న‌కై అహ‌ర్నిశ‌లు క‌ష్ట‌ప‌డే త‌ల్లిదండ్రుల ఆకాంక్ష‌ల‌ను నెర‌వేర్చేందుకు ప్ర‌య‌త్నించాలి. అలా కాకుండా చ‌దువును నిర్ల‌క్ష్యం చేసి క్యాంప‌స్ రాజకీయాలు అంటూ తిరిగితే భ‌విష్య‌త్ అంధ‌కారంగా మారుతుంది. శివ సినిమాలో చూపించిన విధంగా బ్యాచ్ లు క‌ట్ట‌డాలు,  వ‌ర్గాలుగా విడిపోయి క్యాంప‌స్ పోరాటాలు చేసుకుంటే విద్యార్ధులు తీవ్రంగా న‌ష్ట‌పోతారు. 

విశ్వ‌విద్యాల‌యాలు రాజ‌కీయ చైత‌న్యానికి ప్ర‌తీక‌లు

   ప‌విత్ర‌మైన విశ్వ‌విద్యాల‌యాల్లో విద్యార్దులు విద్యతో  పాటు ప్ర‌జ‌ల జీవితాల‌ను శాసించే రాజ‌కీయాల‌ను కూడా ఔపోస‌న ప‌ట్టాలి. అవ‌స‌ర‌మైతే ఉద్య‌మాల‌ను నిర్మించాలి. అన్యాయంపై, వివ‌క్ష‌పై గ‌ళ‌మెత్తాలి. అదే స‌మ‌యంలో రాజ‌కీయ పార్టీలు విసిరే వ‌ల‌లో చిక్కుకోకుండా మ‌సులుకోవ‌డం చాలా ముఖ్యం. చ‌దువును నిర్ల‌క్ష్యం చేసి కేవ‌లం కొంద‌రి రాజ‌కీయ ల‌బ్ది కోసం పోరాటాలు చేస్తే భ‌విష్య‌త్ లో ఇబ్బందులు ప‌డాల్సి వ‌స్తుంది. ఈ రెండు  విష‌యాల‌ను విద్యార్ధులు చాలా జాగ్ర‌త్త‌గా స‌మ‌న్వ‌యం చేసుకుంటూ ముందుకు వెళ్తే , స‌మాజంలో బాధ్య‌తాయుత‌మైన‌, ప్ర‌శ్నించే పౌరులు త‌యార‌వుతారు. ఇప్పుడు మ‌న దేశానికి కావాల్సింది ఇలాంటి ఉర‌క‌లెత్తే యువ‌త‌ర‌మే.   

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com