ఈ 'కెరీర్' లో కిక్కే వేర‌ప్పా!

   కార్పోరేట్ వ్య‌వ‌స్థకు గులాంగిరీ చేస్తున్న మ‌న విద్యా వ్య‌వ‌స్థ‌లో చ‌దువు అంటే ఇంజినీరింగ్, మెడిసిన్ లే. ప్ర‌పంచీక‌ర‌ణ‌లో భాగంగా ఉపాధిలో విప్ల‌వాత్మ‌క మార్పులు వ‌చ్చినా ఇప్ప‌టికీ అధిక శాతం మంది తల్లిదండ్రులు, విద్యార్ధులు ఈ మాయ‌లోనే ఉన్నారు. కానీ మ‌నం గ‌తంలో చెప్పుకున్న‌ట్టుగా ఈ డిజిట‌ల్ యుగంలో స‌రికొత్త కెరీర్ లు ఊపిరి పోసుకుంటున్నాయి. అందులో మంచి భ‌విష్య‌త్ ఉన్న కెరీర్ ల‌కు సంబంధించిన స‌మాచారాన్ని కెరీర్ టైమ్స్ ఆన్ లైన్  ఎప్ప‌టిక‌ప్పుడు మీకు అంద‌జేస్తూనే ఉంది. దేశాల‌కు డేటాయే ప్ర‌ధాన‌ ఆర్థిక వ‌న‌రుగా మారుతున్న ఈ  డిజిట‌ల్ ఎకాన‌మీలో ఓ నూత‌న కెరియ‌ర్ సంచ‌ల‌నం రేపుతోంది. నిన్న కాక మొన్న‌నే రంగ ప్ర‌వేశం చేసినా భారీ డిమాండ్ తో హాట్ కెరీర్ గా నిలుస్తున్న ఆ ఉద్యోగ‌మే డేటా సైంటిస్ట్. 

విశ్లేష‌ణా శ‌క్తి ఉంటే తిరుగులేదు

   డేటా సైంటిస్ట్ ....వినేందుకు కాస్త గంభీరంగా ఉన్న చాలా ప‌రిమితిమైన అర్హ‌త‌లతోనే డేటా సైంటిస్ట్ గా రాణించ‌వ‌చ్చు. అయితే కంప్యూట‌ర్స్ విష‌యాలు, ప్ర‌త్యేకించి స‌మాచారం సేక‌ర‌ణ‌పై అభిరుచి ఉండాల్సిందే. డిగ్రీ అర్హ‌త ఆధారంగా డేటా సైంటిస్ట్ కెరీర్ లోకి ప్ర‌వేశించ‌వ‌చ్చు. ఇప్పుడు ఈ కామ‌ర్స్ ఆధారంగానే కంపెనీలు మ‌నుగ‌డ సాగిస్తున్నాయి. స‌మాచార‌మే వాటికి ప్ర‌ధాన ముడిస‌రుకు. వినియోగ‌దారుల స‌మాచారాన్ని సేక‌రించి,వారి అవ‌స‌రాలు, అభిరుచులు ఆధారంగా వారి చెంత‌కు త‌మ ఉత్ప‌త్తుల‌ను చేర‌వేయ‌డ‌మే కంపెనీల ముందున్న స‌వాలు. అలాంటి కీల‌క స‌మాచారాన్ని విశ్లేషించి, వ‌ర్గీక‌రించి కంపెనీలకు సూచ‌న‌లు , స‌ల‌హాలు చేస్తూ నివేదిక‌ల‌ను త‌యారు చేయ‌డం డేటా సైంటిస్ట్ యొక్క ప్ర‌ధాన‌మైన విధి. మార్కెట్ పై పూర్తి అవ‌గాహ‌న‌, వినియోగ‌దారుల అల‌వాట్ల‌ను విశ్లేషించే నేర్పు, అంకెలు, విభిన్న గ‌ణాంకాల ఆధారంగా నివేదిక‌లు త‌యారు చేసే సామర్ధ్యం ఉంటే ఈ కెరీర్ లో దూసుకుపోవ‌చ్చు. 

బిగ్ డేటాయే వీళ్ల‌కు ఆయువు ప‌ట్టు

    మ‌న దేశం ఇప్పుడు డిజిట‌ల్ ఇండియా అంటూ కొత్త నినాదం అందుకుంది. కొత్త‌గా ఊపిరిపోసుకుంటున్న కంపెనీల్లో అధిక శాతం కంపెనీలు ఈ కామ‌ర్స్ ను ఆధారం చేసుకునే మార్కెట్లోకి వ‌స్తున్నాయి. ప్ర‌జ‌లు ఆన్ లైన్ కొనుగోళ్ల‌కు అల‌వాటు ప‌డ‌టంతో అంతా కంప్యూట‌ర్ లోనే పూర్త‌యిపోతోంది. ఈ నేప‌థ్యంలో కంపెనీల‌కు వినియోగ‌దారులు ఏం ఆలోచిస్తున్నారు? వారి అవ‌స‌రాలేంటి?  వారు ఇప్పుడు సేవ‌ల్లో ఎటువంటి మార్పులు కోరుకుంటున్నారు? అన్న విష‌యాలు కంపెనీల‌కు తెలియ‌వు. అవి తెలుసుకోవ‌డ‌మే కంపెనీల ముందున్న సిస‌లైన స‌వాలు. అందుకే వారికి డేటా సైంటిస్ట్ ల అవ‌స‌రం భారీగా ఏర్ప‌డింది. డేటా సైంటిస్ట్ లు వినియోగ‌దారుని నాడిని ఎప్ప‌టిక‌ప్పుడు తెలుసుకుంటూ, వాళ్లు ఏం కోరుకుంటున్నారో విశ్లేషిస్తారు. అదే విధంగా చెల్లింపులు, సేవ‌లు ఏం విధంగా ఉంటే వాళ్ల‌కు సులువుగా ఉంటుంది. ఆన్ లైన్ షాపింగ్ లో వాళ్లు ఇంకా ఏం ఆశిస్తున్నారు. ఇలాంటి విషయాల‌న్నింటిపై డేటా సైంటిస్ట్ వ‌ద్ద సంపూర్ణ స‌మాచారం ఉంటుంది. దాన్ని నివేదిక రూపంలో కంపెనీల‌కు అందించాలి.

వీళ్ల అవ‌స‌రం ల‌క్ష‌ల్లో ఉంది!

   మ‌న దేశంలో గ‌డిచిన ఐదేళ్ల‌లో ఈకామ‌ర్స్ రంగం రాకెట్ వేగంతో అభివృద్ధి చెందింది. ప్ర‌జ‌లు కూడా ఆన్ లైన్ షాపింగ్ కు అల‌వాటు ప‌డిపోయారు. దీనికి తోడు ప్ర‌భుత్వం డిజిట‌ల్ ఇండియాకు శ్రీకారం చుట్టి, పెద్ద నోట్లను రద్దు చేసి, క్యాష్ లెస్ ఎకాన‌మీకి దారులు తెర‌వ‌డంతో ఈ రంగం ఆకాశ‌మే హ‌ద్దుగా దూసుకుపోతోంది. ఇది గుర్తించే ప్ర‌పంచ స్థాయి సంస్థ‌ల‌న్నీ ఇండియాలో కొలువుతీరుతున్నాయి. ఫ్లిఫ్ కార్ట్ , స్నాప్ డీల్ వంటి దేశీయ కంపెనీల‌కు తోడు అమెజాన్, ఆలీబాబా వంటి అంత‌ర్జాతీయ కంపెనీలు కూడా భారీగా విస్త‌రిస్తున్నాయి. దీంతో డేటా  సైంటిస్ట్ ల‌కు భారీ డిమాండ్ ఏర్ప‌డింది. నిపుణులు వేల‌ల్లో ఉంటే అవ‌కాశాలు ల‌క్ష‌ల్లో ఉన్నాయి. వ‌చ్చే ఏడాది నాటికి మ‌న దేశంలో 2 ల‌క్ష‌ల మంది డేటా సైంటిస్ట్ ల అవ‌స‌ర‌ముంద‌ని నివేదిక‌లు చెపుతున్నాయి. కేవ‌లం వినియోగ‌దారుల స‌మాచారం కోస‌మే కాకుండా హెచ్ఆర్, ఫైనాన్స్, మార్కెటింగ్ లో కూడా డేటా సైంటిస్ట్ అవ‌స‌ర‌ముంద‌ని నిపుణులు చెపుతున్నారు. 

కెరీర్ లో కుదురుకుంటే భారీ వేత‌నాలు 

   మ‌న‌దేశంలో డేటా సైంటిస్ట్ కెరీర్ పై ఇప్పుడిప్పుడే అవ‌గాహ‌న పెరుగుతోంది. అవ‌సరాల‌కు త‌గినంత మంది నిపుణులు లేక‌పోవ‌డంతో కంపెనీలు కూడా వీళ్ల‌ను త‌యారు చేసుకోవ‌డంపై దృష్టి పెట్టాయి. మ‌రోవైపు మ‌న దేశంలో ఐఐఎమ్ రాంచీ, ఐఐఎమ్ కోల్ క‌తా, ఐఎస్ బీ హైద‌రాబాద్, వెల్లూరు ఇన్ స్టిట్యూట్ ఆఫ్ టెక్నాల‌జీ వంటి ప్ర‌తిష్టాత్మక విద్యాల‌యాలు డేటా సైంటిస్ట్, అన‌లిస్ట్ కోర్సుల‌ను అందిస్తున్నాయి. డిగ్రీ అర్హ‌త‌తో మ్యాథ్ మేటిక్స్ లో కాస్త ప‌ట్టు ఉన్న‌వారికి ఈ కోర్సుల్లో చేర‌డం సుల‌భం. ప్రారంభం లోనే 8 ల‌క్ష‌ల నుంచి వార్షిక వేత‌నం, డేటా సైంటిస్ట్ కెరీర్ ను మరింత ఆక‌ర్ష‌ణీయ‌గా మారుస్తోంది. మంచి ప‌నితీరు క‌న‌బ‌రిస్తే అనుభ‌వంతో పాటు రూ.20 ల‌క్ష‌ల వర‌కూ వార్షిక వేతనం పొందే అవ‌కాశం ఉంది. 

భ‌విష్య‌త్ ను ఊహించ‌డ‌మే అస‌లైన విజ‌యం 

   విద్యార్ధులు ఎంత‌సేపూ కార్పోరేట్ కాలేజీలు రుద్దిన ఇంజినీరింగ్, మెడిసిన్ వ‌ల‌యాన్ని దాటుకుని కొత్త కెరీర్ ల‌పై దృష్టి సారించాలి. మారుతున్న టెక్నాల‌జీ, ఆర్థిక వ్య‌వ‌స్థ‌ల‌కు అనుగుణంగా త‌న‌ను తాను తీర్చిదిద్దుకున్న‌ప్పుడే పోటీ ప్ర‌పంచంలో మ‌నుగ‌డ సాగించ‌గ‌లుగుతాడు. ఈ విష‌యంలో విద్యార్ధులు ఈనాడు అధినేత రామోజీరావు గారిని ఆద‌ర్శంగా తీసుకోవాలి. ఇప్ప‌టి మీడియా ఎదుగుద‌ల‌ను ముందుగానే గుర్తించి ఆయ‌న భారీ సంఖ్య‌లో సినిమాల‌ను త‌క్కువ ధ‌ర‌కే కొనుగోలు చేసి ఇప్పుడు మీడియా రారాజుగా వెలుగొందుతున్నారు. అలానే విద్యార్ధులు కూడా సంప్ర‌దాయ కోర్సుల ప్ర‌వాహంలో కొట్టుకుపోకుండా రంగ‌ప్ర‌వేశం చేస్తున్న కొత్త కోర్సుల‌ను, కొత్త టెక్నాల‌జీని అధ్య‌య‌నం చేయాలి. అలా ఎప్ప‌టిక‌ప్పుడే మెరుగ‌వుతూ, దూసుకుపోవ‌డ‌మే అస‌లైన విజ‌యం.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com