ప‌రీక్ష‌ వాళ్లకు పెన్నుతో పెట్టిన విద్య‌!

       రైల్వై స్టేష‌న్ లో అనౌన్స్ మెంట్  వినిపిస్తోంది. " ట్రైన్ ఒక‌టో నెంబ‌ర్ ప్లాట్ ఫార‌మ్ మీద‌కు వ‌స్తొంద‌ని " అనౌన్స‌ర్ ప్ర‌క‌టించింది. అంతే ఆ త‌ర్వాత ఏ జ‌రిగిందో తెలుసా? ఫ‌్లాట్ మీద ఉన్న వంద మందిలో ఓ అర‌వై మంది ప‌ట్టాల‌పైకి దూకేసారు. మిగిలిన వాళ్లు ప్ర‌శాంతంగా ట్రైన్ ఎక్కారు. " ప‌రీక్ష‌ అనే ట్రైన్ విద్యార్ధుల 10 సంవ‌త్స‌రాల జీవితంలో 500 సార్లు వ‌చ్చిపోతుంది ". దానికి భ‌య‌ప‌డి అతి తొంద‌ర‌తో, తెలివిలేని వాళ్ల‌లా ప‌ట్టాల పైకి దూకేయ‌వ‌ద్దు. ఆ ట్రైన్ కింద ప‌డి న‌లిగిపోవ‌ద్దు. ప‌రీక్ష‌ అనేది ప్ర‌శాతంగా రాసే విష‌యమ‌ని విద్యార్ధులు గుర్తిస్తే మంచిది. ప‌రీక్ష అనే ట్రైన్ వ‌చ్చేవ‌ర‌కూ వేచి చూసి మ‌న బోగీ చూసుకుని సీటులో నిదానంగా కూర్చున్న‌ప్పుడే ప్ర‌యాణం సాఫీగా సాగుతుంది.  

ఈ ట్రైన్ కు 500 స్టేష‌న్లు! 

    ఒక విద్యార్ధి ఒకటో త‌ర‌గ‌తి నుంచి ప‌దో త‌ర‌గ‌తి వ‌ర‌కూ దాదాపు ఎన్నో ప‌రీక్ష‌లు రాసుంటాడు.  " ఏడాదికి 40 అసైన్స్ మెంట్లు, 6 యూనిట్ టెస్ట్ లు, ఒక త్రైమాసిక ప‌రీక్ష‌, ఒక అర్ధ సంవ‌త్స‌ర ప‌రీక్ష‌, ఒక ప్రీ ఫైన‌ల్ ప‌రీక్ష‌, ఫైన‌ల్ ప‌రీక్ష‌. అంటే ఒక విద్యార్ధి ఏడాదికి దాదాపు 50 ప‌రీక్ష‌లు రాస్తాడు. ఒక‌టో త‌ర‌గ‌తి నుంచి 10 వ త‌ర‌గ‌తికి వ‌చ్చేస‌రికి అత‌ను స‌గ‌టున 500 ప‌రీక్ష‌లు రాస్తాడు ". ఇంకా వీటికి తోడు రోజూ క్లాస్  లో పెట్టే స్లిప్ టెస్ట్, అప్పుడ‌ప్పుడు రాసే పోటీ ప‌రీక్ష‌లు, ఒలింపియాడ్ లు ఉండ‌నే ఉన్నాయి. ఇక ఇంట‌ర్ లో ఏడాది మొత్తం ఉండే ప‌రీక్ష‌లు ఉండ‌నే ఉన్నాయి.  దీనిని బ‌ట్టి మ‌న‌కు ఏం అర్ధ‌మ‌వుతోంది ? ప‌రీక్ష రాయ‌డం అనేది విద్యార్ధికి పెన్నుతో పెట్టిన విద్య‌. ఇన్ని ప‌రీక్ష‌లు రాసిన అనుభ‌వ‌మున్న విద్యార్ధికి ఉపాధ్యాయులు, త‌ల్లిదండ్రులు, స్కూల్, కాలేజీ యాజ‌మాన్యాలు లేని పోని అపోహ‌లు క‌ల్పించి, భ‌య‌పెట్టి వారి ఆత్మ‌విశ్వాసాన్ని త‌గ్గిస్తున్నారు. అలా కాకుండా ఇప్ప‌టి వ‌ర‌కూ ఇదిగో ఇన్ని ప‌రీక్ష‌లు రాసావు. ఈ ఫైనల్ ప‌రీక్ష నీకో లెక్కా అంటూ వారిని ప్రోత్సాహిస్తే వారిలో ఉత్సాహం పెరుగుతుంది. ఏడాది మొత్తం ఎంత బాగా  చ‌దివినా దాన్ని ఒత్తిడి వ‌ల‌న పేప‌ర్ లో స‌రిగ్గా రాయ‌లేని విద్యార్ధులు ఎంద‌రో. 

త‌ల్లిదండ్రుల‌దే కీల‌క పాత్ర 

   ప‌రీక్ష‌ల స‌మ‌యం అంటే అటు విద్యార్ధుల‌తో పాటు వాళ్ల త‌ల్లిదండ్రులకు కూడా చాలా కీల‌క‌మైన‌ది. పాఠ‌శాల‌లో టీచ‌ర్ల ఒత్తిడి, స్నేహితుల మ‌ధ్య పోటీ వాతావ‌ర‌ణం ఇలాంటి ఎన్నో ఒత్తిడిల‌తో ప‌రీక్ష‌కు స‌న్న‌ద్ధ‌మ‌య్యే పిల్ల‌ల విష‌యంలో త‌ల్లిదండ్రులు ప్ర‌ధాన పాత్ర పోషించాలి.  చాలా మంది త‌ల్లిదండ్రులు ప‌రీక్ష‌ల స‌మ‌యంలో పిల్ల‌ల‌కు ఈ విధంగా చెప్తారు. "నువ్వు ప‌రీక్ష స‌రిగ్గా రాయ‌క‌పోయావో ఇక అంతే. నీ స్కూల్ ఫీజుల‌కు ఇంత ఖ‌ర్చు అయింది" అంటూ పిల్ల‌ల ముందు లెక్క‌ల చిట్టా విప్పుతారు. దీని వ‌ల‌న పిల్ల‌లు విప‌రీత‌మైన ఒత్తిడికి, ఆందోళ‌న‌కు గుర‌వుతారు. ఒక వేళ ప‌రీక్ష స‌రిగ్గా రాయ‌లేక‌పోతే ఇంటికి రాకుండా పారిపోయే ప్రమాదం కూడా ఉంది. అలా కాకుండా నువ్వు స‌రిగ్గా రాస్తావు. నాకు తెలుసు అంటూ వాళ్ల‌ను ఉత్సాహ‌ప‌రిస్తే పిల్ల‌లు అద్భుతాలు సృష్టిస్తారు. అదే విధంగా చ‌దువుకునేందుకు పిల్ల‌ల‌కు అనువైన వాతావ‌ర‌ణం క‌ల్పించాలి. వాళ్లు చ‌దువుకునే ట‌ప్పుడు వాళ్ల‌కు ఇబ్బంది లేకుండా చూసుకోవాలి. ఇంట్లో గ‌ట్టిగా మాట్లాడ‌టం, వాదించుకోవ‌డం, టీవీ సౌండ్ పెట్ట‌డం వంటివి చేయ‌కూడ‌దు. అవ‌స‌ర‌మైతే పిల్ల‌ల ప‌రీక్ష‌లు ఉన్నంత కాలం బంధువుల‌తో చ‌ర్చ‌లు, టీవీలో కార్య‌క్ర‌మాలు క‌ట్టిపెడితే మంచిది. ఇక ఎట్టి ప‌రిస్థితుల్లోనూ పిల్ల‌ల‌ను వేరే పిల్ల‌లతో పోలుస్తూ త‌ల్లిదండ్రులు మాట్లాడ‌కూడ‌దు. సామ‌ర్ధ్యంలో ప్ర‌తీ ఒక్క‌రికి వైరుధ్యం ఉంటుంద‌ని గుర్తించాలి. ప‌రీక్ష‌ల కాలంలో పిల్ల‌ల‌కు నాణ్య‌మైన ఆహారం అందించాలి. ప‌రీక్ష హాల్లో వాళ్లు ఇబ్బందిప‌డితే అది మార్కుల‌పై ప్ర‌భావం చూపుతుంది. అదే విధంగా పిల్ల‌ల‌తో పాటు త‌ల్లిదండ్రులు కూడా ప‌రీక్ష హాల్ వ‌ర‌కూ వెళితే వారిలో అభ‌ద్ర‌తా భావం తొలిగిపోతుంది. ప‌రీక్ష బాగా రాసేందుకు వాళ్ల‌కు కొత్త ఉత్సాహం వ‌స్తుంది. 

ఇలా రాస్తేనే విజ‌యం మీ సొంతం 

    ఏడాది మొత్తం ఎంత బాగా చ‌దివినా ఫైన‌ల్ పరీక్ష మూడు గంట‌లు విద్యార్ధి పేప‌ర్ పై ఏం రాసాడ‌న్న‌దే కీల‌కం. ఎటువంటి ఒత్తిడికి లోనుకాకండా ప్ర‌శాంత చిత్తంలో ప‌రీక్ష‌కు కూర్చోవాలి. " నేను ఏదైనా సాధిస్తాను. ఈ ప‌రీక్ష కూడా అద్భుతంగా రాస్తాను " అని ఒక‌టికి ప‌దిసార్లు వ‌ల్లె వేసుకోవాలి. కొన్ని జాగ్ర‌త్త‌లు పాటించ‌డం వ‌ల‌న విద్యార్ధులు ప‌రీక్ష‌ల్లో అద్భుత ఫ‌లితాలు సాధించ‌వ‌చ్చ‌ని నిపుణులు చెపుతున్నారు. 

• జవాబు రాసే  ప్ర‌శ్న నెంబ‌రును జవాబు ప‌త్రంలో క‌చ్చితంగా రాయండి. లేకుంటే వీటిని దిద్దే అధ్యాప‌కులు గంద‌ర‌గోళానికి గుర‌య్యే అవ‌కాశం ఉంది. 
• ప్ర‌శ్న నెంబ‌రును కాకుండా రాస్తున్న వ‌రుస క్ర‌మాన్ని నెంబ‌ర్లుగా వేసుకుంటూ పోతే మార్కులు వ‌చ్చే అవకాశం ఉండ‌దు. 
• ఇంట‌ర్ విద్యార్ధులు జ‌వాబుల‌ను గీత‌లు క‌లిగిన 24 పేజీల ప్ర‌శ్నాప‌త్రంలోనే రాయాలి. ఎందుకంటే అంత‌కుమించి అద‌న‌పు ప‌త్రాలు ఇవ్వ‌రు. 
• ముందుగా బాగా తెలిసిన స‌మాధానాల‌నే రాయండి. స‌మాధానాల‌ను వ‌రుస క్ర‌మంలో రాస్తే మ‌రీ మంచిది. 
• చాలా మంది విద్యార్ధులు స్కెచ్ పెన్ ల‌ను అధికంగా వాడ‌తారు. వీటిని కొంచెం ప‌రిమితంగానే వాడితే మంచిది. రెడ్, గ్రీన్ స్కెచ్ ల‌ను పేప‌ర్ దిద్దే అధ్యాప‌కులు వాడ‌తారు. కాబ‌ట్టి వీటి వ‌ల‌న వాళ్లు చికాకుకు గుర‌య్యే అవ‌కాశం ఉంది. 
• కొంద‌రు విద్యార్ధులు జ‌వాబు ప‌త్రంలో మ‌ధ్యలో కొన్ని పేజీలు వ‌దిలేసి రాస్తున్నారు. దీని వ‌ల‌న అక్క‌డికే స‌మాధానాలు పూర్త‌య్యాయ‌ని పేప‌రు దిద్దే అధ్యాప‌కులు భావించే ప్ర‌మాదం ఉంది. 

• జ‌వాబు పత్రంలో కొంచెం ఖాళీ వ‌దిలిస్తే " బ్లాంక్ " అని రాయాలి. అదే విధంగా జ‌వాబులు రాయ‌డం ముగిసిన వెంట‌నే " ది ఎండ్ " అని రాయండి. 

• ఒకవేళ పొర‌పాటున నాలుగు లైన్ల‌కు మించి స‌మాధానాన్ని కొట్టివేస్తే " స్ట్ర‌క్ ఆఫ్ బై మీ " లేదా తెలుగులో " నాచే కొట్టివేయ‌బ‌డిన‌ది " అని రాసి ఇన్విజిలేట‌ర్ తో సంత‌కం చేయించుకోవాలి. 

• ఇటీవ‌ల కాలంలో చాలా మంది విద్యార్ధులు జ‌వాబు ప‌త్రంలో అస‌హ‌జ‌మైన విష‌యాల‌ను ప్ర‌స్తావిస్తున్నారు. " మా ఇంట్లో వాళ్ల‌కు ఆరోగ్యం బాగాలేదు. అందుకే స‌రిగ్గా రాయ‌లేదు అని. మీరు న‌న్ను పాస్ చేస్తే మీకు డ‌బ్బులు ఇస్తాను ఇదిగో నంబ‌ర్ " అంటూ కొన్ని ప‌నికిమాలిన రాత‌లు రాస్తున్నారు. ఇలాంటివి ఎట్టి ప‌రిస్థితుల్లోనూ ఫ‌లితం ఇవ్వ‌వ‌ని తెలుసుకోవాలి. ఒక రాసిన జ‌వాబుల‌తో పాస్ అయ్యే అవ‌కాశం ఉన్నా ఈ చిరాకు రాత‌ల‌తో ఫెయిల్ అయ్యే అవ‌కాశాలు కూడా ఉన్నాయి. 

కంగారు ప‌డి ఆడేందుకు ఇది టీ20 కాదు! 

   విద్యార్ధుల‌కు ఇది ప‌రీక్షా కాలం. అంటే ప‌రీక్ష‌లు వాళ్ల‌కు ఒక కొరుకుడు ప‌డ‌ని బ్ర‌హ్మ‌ప‌దార్ధం అని కాదు. పైన మ‌నం చెప్పుకున్న‌ట్టు వాళ్లు ఇప్ప‌టికే ఎన్నో వంద‌ల ప‌రీక్ష‌లు ఎదుర్కొన్నారు. కానీ త‌ల్లిదండ్రులు, స‌మాజం, ఉపాధ్యాయులు, యాజ‌మాన్యాలు వాళ్ల‌ను ప‌రీక్ష‌లు అంటే భ‌య‌ప‌డేలా చేస్తున్నారు. ముందుగా పరీక్ష‌లు అంటే వాళ్ల‌లో ఉన్న‌ భ‌యాన్ని తొలిగించాలి. ఈ విష‌యంలో త‌ల్లిదండ్రులు స‌రైన పాత్ర పోషించాలి. కంగారుప‌డి ఆడేందుకు ఇది క్రికెట్ లో  టీ20 కాదు, టెస్ట్ మ్యాచ్ అని త‌మ పిల్ల‌ల‌కు తెలియ‌జెప్పాలి. ప్ర‌శాంతంగా, ఎటువంటి తొంద‌ర లేకుండా ప‌రీక్ష‌లు రాసే విధంగా వారిని తీర్చిదిద్దాలి.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com