మాతృభాష‌లో ప‌రీక్ష‌లు రాస్తే 'క‌లెక్ట‌ర్లు' కారా?

       ప్ర‌జాస్వామ్యం విజ‌యవంతంగా మ‌నుగ‌డ సాగించాలంటే న్యాయ‌, శాస‌న వ్య‌వ‌స్థ‌ల‌తో పాటు కార్య‌నిర్వాహ‌క వ్య‌వ‌స్థ బ‌లంగా ఉండాలి. మ‌న‌దేశంలో అటువంటి కార్య‌నిర్వ‌హ‌క వ్య‌వ‌స్థ‌కు మూలాధారం సివిల్ స‌ర్వీసెస్. స‌మ‌ర్ధులైన అధికారుల‌ను త‌యారు చేసే సివిల్ స‌ర్వీసెస్ అంటే బ్రిటిష్ హ‌యాం నుంచి నాణ్య‌త‌కు, స‌మ‌ర్ధ‌త‌కు మారుపేరుగా చెప్పుకుంటారు. అయితే తాజాగా ప్ర‌భుత్వం తీసుకుంటున్న కొన్ని చ‌ర్య‌లు సివిల్ స‌ర్వీసెస్ లో వివాదాల‌ను రాజేస్తున్నాయి. ముఖ్యంగా మాతృభాష‌లో సివిల్స్ ప‌రీక్ష రాయ‌డంపై ప్ర‌భుత్వం చేయాల‌నుకుంటున్న మార్పులను చాలా మంది నిపుణులు వ్య‌తిరేకిస్తున్నారు. సివిల్ స‌ర్వీసెస్ వ్య‌వ‌స్థ అద్భుతంగా ప‌నిచేస్తోంద‌ని అందులో అన‌వ‌స‌ర మార్పులు చేసి వివాదాలు సృష్టించ‌వ‌ద్ద‌ని చెపుతున్నారు. అస‌లు సివిల్స్ మెయిన్స్ ప‌రీక్ష మాతృభాష‌లో రాస్తే ఉప‌యోగ‌మేంటి? ఇంగ్లీష్ మాధ్య‌మంలో రాస్తే వ‌చ్చే నష్టాలేంటి? 

రాజ్యాంగం ఏం చెపుతోంది? 

      సివిల్స్ మెయిన్స్  పరీక్ష‌ల‌ను మాతృభాష‌లోనే కొనసాగించాల‌నే ఆందోళ‌న క్ర‌మంగా ఊపందుకుంటోంది. మ‌న రాజ్యాంగంలోని సెక్ష‌న్ 8 ప్రకారం రాజ్యాంగంలో పొందుప‌ర్చిన అన్ని భాష‌ల్లోనూ ప‌రీక్ష‌లు రాయొచ్చు. దీని ప్ర‌కారం అభ్య‌ర్ధులు త‌మ మాతృభాష‌లోనే ప‌రీక్ష రాయొచ్చు. ఐఏఎస్, ఐపీఎస్, ఐఎఫ్ఎస్ స‌హా మొత్తం 17 విభాగాల్లో సివిల్ స‌ర్వీసులు పోస్టుల భ‌ర్తీని యూనియ‌న్ ప‌బ్లిక్ స‌ర్వీస్ క‌మీష‌న్ నిర్వ‌హిస్తుంది. సివిల్స్ ప్రిలిమినరీ పరీక్షకు డిగ్రీ ప్రధాన అర్హత. వయస్సు 21-30 సంవత్సరాలలోపు ఉండాలి. ప్రిలిమినరీ పరీక్ష పూర్తిగా ఆబ్జెక్టివ్‌. ఇందులో రెండు పేపర్లుంటాయి. మొదటి పేపర్‌ జనరల్‌ స్టడీస్‌ దీనికి 150 మార్కులు ఉంటాయి. రెండోది ఆప్షనల్‌ పేపర్‌ దీనికి 300 మార్కులు ఉంటాయి. ప్రిలిమ్స్‌లో అర్హత సాధించిన అభ్యర్థులు మెయిన్స్‌ రాయాల్సి ఉంటుంది. ఇందులో పాసైన అభ్యర్థులకు పర్సనాలిటీ టెస్ట్  ఉంటుంది. ఇంటర్వ్యూలో పాసైతే పోస్టింగ్స్ ఇస్తారు. మెయిన్స్‌ పరీక్ష డిస్క్రిప్టివ్‌ విధానంలో ఉంటుంది. ఈ రాత పరీక్షను మాతృభాషలో కూడా రాయవచ్చు. అయితే ఇక్క‌డే కొన్ని మార్పులు చేయాల‌ని ప్ర‌భుత్వం యోచిస్తోంది. ఇంగ్లీష్, హింది భాష‌ల్లోనే మెయిన్స్ రాసేందుకు అనుమ‌తించాల‌ని చ‌ర్య‌లు ప్రారంభించింది. 

మాతృభాష‌లో రాస్తేనే ఉప‌యోగాలు 

      మ‌న దేశంలో అధిక శాతం మంది విద్యార్ధులు గ్రామీణ ప్రాంతాల‌కు చెందిన వారే. వీరికి మిగ‌తా భాష‌ల కంటే మాతృభాష‌పైనే ఎక్కువ ప‌ట్టు ఉంటుంది. మిగ‌తా భాష‌ల‌పై వారికి అవ‌గాహ‌న ఉంది కానీ సివిల్స్ వంటి అత్యుత్త‌మ ప‌రీక్ష‌లు ఆ భాష‌ల్లో రాసే స‌త్తా ఉండ‌టం లేదు. వీరు మాతృభాష‌లోనే ప‌రీక్ష రాయ‌డం వ‌ల‌న వారికి భావ వ్య‌క్తీక‌ర‌ణ సులువ‌వుతుంది. దీంతో మిగ‌తా వారితో ప‌రీక్ష‌ల్లో పోటీ ప‌డే వీలు చిక్కుతొంది. చిన్న‌ప్ప‌టి నుంచి త‌న మాతృభాష‌లోనే చ‌ద‌వ‌డం, రాయ‌డం చేయ‌డం వ‌ల‌ను సివిల్స్ ప్రిప‌రేష‌న్ లో కాస్త ఎక్కువ క‌ష్ట‌ప‌డితే మంచి ఫ‌లితాల‌ను సాధించ‌గ‌లుగుతాడు. అలా కాకుండా వేరే మాధ్య‌మంలో రాయ‌డం వ‌ల‌న అత‌నికి స‌బ్జెక్ట్ తెలిసిన‌ప్ప‌టికీ స‌రైన విధంగా ప్ర‌జెంట్ చేయ‌డంలో విఫ‌లం కావ‌చ్చు. అందుకే సివిల్స్  స‌ర్వీస్ ప‌రీక్ష‌ల్లో మాతృభాష‌కు అంత‌టి ప్రాధాన్యం ఉంది. 

ఇంగ్లీష్ పరిజ్ఞానం లేకుండా ఇంత దూరం ఎలా వ‌స్తాడు? 

      సివిల్స్ ప‌రీక్ష‌లో మాతృభాష‌లో ప‌రీక్ష రాయ‌డాన్ని వ్య‌తిరేకిస్తున్న వారి వాద‌న మ‌రోలా ఉంది. అత్యుత్త‌మ స‌ర్వీస్ కు అర్హ‌త సాధించాల‌నుకుంటున్న వ్య‌క్తి మాతృభాష‌లోనే ప‌రీక్ష రాస్తే రేపు విధుల్లో ఇంగ్లీష్ తో ఇబ్బందులు ప‌డ‌తాడు క‌దా అన్న‌ది వారి వాదన‌. కానీ వీరి వాద‌న చ‌ర్చ‌కు నిల‌బ‌డ‌దు. ఎందుకంటే ప్రిలిమ్స్ లో ఇంగ్లీష్ పేప‌ర్ ను విజ‌య‌వంతంగా పూర్తి చేస్తేనే క‌దా అత‌ను మెయిన్స్ వ‌ర‌కు వ‌చ్చింది. అత‌నికి ఇంగ్లీష్ ప‌రిజ్ఞానం ఉండ‌దు అని అన‌డం ఎంత‌వ‌ర‌కు స‌బ‌బు? అత‌నికి పూర్తిగా ఇంగ్లీష్ ప‌రిజ్ఞానం లేదు అనుకుంటే అస‌లు క‌ఠిన‌మైన మెయిన్స్ వ‌చ్చే అవ‌కాశమే లేదు. చైనా, జ‌పాన్ లాంటి దేశాల్లో సివిల్ స‌ర్వీస్ అభ్య‌ర్ధులు మాతృభాష‌లోనే ప‌రీక్ష‌లు రాస్తారు. వాళ్లకు ఇంగ్లీష్ లో క‌నీస ప‌రిజ్ఞానం కూడా ఉండ‌దు క‌నుక వారి సింగ‌పూర్ లో శిక్ష‌ణ ఇప్పిస్తున్నారు. వాళ్ల‌తో పోల్చుకుంటే మ‌న విద్యార్ధులు ఇంగ్లీష్ లో మంచి ప్రావీణ్యాన్నే క‌లిగి ఉంటున్నారు. మ‌న దేశంలో 43.9 శాతం పాఠ‌శాల‌లు ఇంగ్లీష్ మాధ్య‌మంలోనే న‌డుస్తున్నాయి. మ‌న విద్యార్ధుల ఇంగ్లీష్ పరిజ్ఞానం తీసిపారేయ‌త‌గింది కాదు. కానీ అత్య‌త్తుత పోటీ ప‌రీక్ష‌ను మాతృభాష‌లో రాస్తే కాస్త వెసులుబాటుగా ఉంటుంద‌ని చాలా మంది విద్యార్ధులు భావిస్తున్నారు. ఈ అవ‌కాశాన్ని కూడా వాళ్ల‌కు దూరం చేసే ప్ర‌య‌త్నాలు చేయ‌డం స‌మంజ‌సం కాదు. 

స‌మ‌ర్ధ‌త‌కు పెద్ద పీట వేయాలి..కానీ..!

      సివిల్స్ అభ్య‌ర్ధులు మాతృభాష‌లోనే ప‌రీక్ష రాసే అవ‌కాశాన్ని ఎప్ప‌టిలానే కొన‌సాగించాలి. ఇందులో ఎటువంటి మార్పులు చేసినా అవి స‌త్ఫ‌లితాల‌ను ఇవ్వ‌వు. ఇప్ప‌టికే ఉన్న కేడ‌ర్ నిబంధ‌న బాగానే ప‌నిచేస్తుంది. ఒక ఐఏఎస్ అధికారి ఎదైనా రాష్ట్ర కేడ‌ర్ కు ఎంపికైతే ఆ కేడ‌ర్ భాష‌ను త‌ప్ప‌నిస‌రిగా నేర్చుకోవాలి. మాట్లాడ‌టంతో పాటు రాయ‌డం, చ‌ద‌వ‌డం కూడా నేర్చుకోవాల్సి ఉంటుంది. స్థానిక ప్ర‌జ‌ల క‌ష్ట న‌ష్టాల‌తో మ‌మేకం అయ్యేందుకు ఈ నిబంధ‌న‌ను పెట్టారు. ఏ రాష్ట్ర అభ్య‌ర్ధుల‌ను ఆ రాష్ట్రంలోనే నియ‌మించాల‌న్న డిమాండ్ కూడా ఉంది. అలా చేయ‌డం వ‌ల‌న  అత‌నికి స్థానిక స‌మ‌స్య‌ల‌పై పూర్తి స్థాయిలో దృష్టి సారించ‌డానికి వీలువుతుంద‌న్న‌ది కొంద‌రి అభిప్రాయం. ఇలాంటి డిమాండ్లు ఉన్న‌ప్పుడు ఇప్పుడు కొత్త‌గా మెయిన్స్ ను ఇంగ్లీష్, హిందీల‌లో మాత్ర‌మే రాయాల‌ని చెప్ప‌డం హిందీయేత‌ర రాష్ట్రాల అభ్య‌ర్ధుల‌ను ఆందోళ‌న‌కు గురిచేస్తోంది. సివిల్స్ అభ్య‌ర్ధుల‌కు ఇంగ్లీష్ లో ప్రావీణ్యం ఉండాల‌ని చెప్ప‌డాన్ని ఎవ‌రూ త‌ప్పుప‌ట్ట‌రు కానీ ఇదే కార‌ణంతో వాళ్లు మాతృభాష‌లో ప‌రీక్ష రాసే అవ‌కాశాన్ని దూరం చేయ‌డం మాత్రం క‌చ్చితంగా అన్యాయ‌మే. ఈ వివాదాస్ప‌ద ప్ర‌తిపాద‌న‌ను ప్ర‌భుత్వం ముందుకు తీసుకొద్దామ‌నుకుంటున్న క‌మిటీ త‌న నిర్ణ‌యంపై పున‌రాలోచించుకోవాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com