ఆ విష‌యంలో చిరంజీవి, కేసీఆర్ లే ఆద‌ర్శం!

   ఇప్పుడు ప్ర‌తీ త‌ల్లిదండ్రులు త‌మ పిల్ల‌ల‌కు త‌ర‌చుగా చెప్పే ఒకే ఒక్క మాట.. "బాగా చ‌దువుకొండి, మాలా మీరు క‌ష్టాలు ప‌డొద్దు" అని.  నిజ‌మే ప్ర‌తీ పేరెంట్స్ త‌మ పిల్లలు  ఉన్న‌త స్థానంలో ఉండాల‌ని, మంచి సుఖ‌వంత‌మైన జీవ‌నం సాగించాల‌ని కోరుకోవ‌డంలో త‌ప్పేలేదు. కానీ స‌రిగ్గా ఇక్క‌డే కొంద‌రు త‌ల్లిదండ్రులు చాలా "పెద్ద త‌ప్పు" చేస్తూ త‌మ పిల్ల‌ల భ‌విష్య‌త్ ను ప్ర‌శ్నార్ధకంలో ప‌డేస్తున్నారు. ముఖ్యంగా వృత్తి నిపుణులైన పేరెంట్స్ త‌మ పిల్ల‌ల‌కు వృత్తి మెలుకువ‌లు నేర్ప‌కుండా పొర‌పాటు చేస్తున్నారు. ఈ పనిలో ఏముంది? నేను ప‌డిన క‌ష్టాలు చాలు.. నా పిల్ల‌లు కూడా ఈ క‌ష్టాలు ప‌డాలా? అంటూ త‌మ పిల్ల‌ల‌ను ఆ ఛాయ‌ల‌కు కూడా రానివ్వ‌డం లేదు. కానీ మారిన ప్ర‌స్తుత పోటీ ప్ర‌పంచంలో అత్యంత విలువైన పాఠాల‌ను త‌మ పిల్ల‌ల‌కు నేర్ప‌కుండా వారికి ఒక విధంగా ద్రోహం చేస్తున్నారు. 

మీలా పాఠం చెప్పే టీచ‌ర్ ప్ర‌పంచంలో ఎక్క‌డా దొర‌క‌డు! 

   ప్ర‌స్తుతం మ‌న దేశంలో త‌ర‌త‌రాలుగా వార‌స‌త్వంగా వ‌స్తున్న వృత్తి నైపుణ్యాలు తీవ్ర సంక్షోభంలో చిక్కుకున్న మాట వాస్త‌వ‌మే. రైతుకు ఏడాది మొత్తం క‌ష్ట‌ప‌డినా పంట‌కు స‌రైన గిట్టుబాటు ధ‌ర రాక అప్పుపాలైన‌ప్పుడు  ఆ రైతు త‌న పిల్ల‌ల‌ను వ్య‌వ‌సాయ వృత్తి ఎంచుకోమ‌ని ఎందుకు చెపుతాడు? ఒళ్లు హునం చేసుకున్నా కుటుంబ పోష‌ణ‌కు అవ‌స‌ర‌మైన డ‌బ్బులు రాని చేనేత కార్మికుడు త‌న కొడుకును నువ్వు కూడా నాలా మ‌గ్గం ప‌ట్టు అని ఎలా చెప్ప‌గ‌ల‌డు. బాగా చ‌దువుకుని ఉన్న‌త ఉద్యోగం చేస్తూ మంచి స్థాయిలో ఉండ‌మ‌నే చెపుతాడు. కానీ ఇక్క‌డే ఒక అద్భుత‌మైన అవ‌కాశం చేజారిపోతోంది. ఆయా వృత్తి నైపుణ్యాల‌ను వారు ఎన్ని విశ్వ‌విద్యాల‌యాలు తిరిగినా, ఎంత ఖ‌ర్చు చేసినా ఎవ్వ‌రూ నేర్పించ‌రు. అలా కాకుండా వృత్తి నిపుణులైన త‌ల్లిదండ్రులు తమ పిల్ల‌ల‌కు చ‌దువుతో పాటు ఖాళీ స‌మ‌యాల్లో త‌మ వృత్తి నైపుణ్యాల‌ను కూడా నేర్పించాలి. దీని వ‌ల‌న వారు చ‌దువులో కూడా అదే స‌బ్జెక్ట్ గా తీసుకుని ఆయా రంగాల్లో పెరిగిన సాంకేతిక‌త‌తో అద్భుతాలు సృష్టించ‌గ‌లుగుతాడు. 

వృత్తి నైపుణ్యాల‌తో అద్భుతాలు ఆవిష్కృతం 

    ఒక రైతు కొడుకు త‌న ఖాళీ స‌మ‌యాల్లో వ్య‌వ‌సాయ రంగంలో మెళుకువ‌లు నేర్చుకుంటే అత‌ను త‌ర్వాత వ్య‌వ‌సాయ ఆధారిత కోర్సులు చేసి త‌క్కువ పెట్టుబ‌డి ఎక్కువ దిగుబ‌డి సాధించే ప‌ద్ధ‌తుల‌ను సులువుగా ఒంటబ‌ట్టించుకుంటాడు. యాద‌వులు త‌మ పిల్ల‌ల‌కు ప‌శుపోష‌ణ‌లో ఉన్న నైపుణ్యాల‌ను నేర్పిస్తే అత‌ను బాగా చ‌దువుకుని చిన్న‌ప్ప‌టి నుంచి తన‌కు బాగా ప‌రిచ‌యం ఉన్న డెయిరీ రంగంలో అద్బుతాలు సృష్టించ‌గ‌లుగుతాడు. వృత్తి నిపుణులైన త‌ల్లిదండ్రులు త‌మ పిల్ల‌ల‌కు త‌మ వృత్తితో పాటు చ‌దువును కూడా చెప్పిస్తే...నాయీ బ్రాహ్మ‌ణుల పిల్ల‌లు గొప్ప సౌంద‌ర్య నిపుణులుగా, కార్పెంట‌ర్ల పిల్ల‌లు మంచి ఇంటీరియ‌ర్ డిజైన‌ర్స్ గా , కుమ్మరి, కంసాలి వృత్తుల్లోని పిల్లలు గొప్ప క‌ళాఖండాలు త‌యారు చేసే ఆర్టిస్ట్ లుగా త‌యార‌వుతారు. మ‌నం పైన చెప్పుకున్న రంగాల‌న్నీ ప్ర‌స్తుతం మంచి డిమాండ్ ఉన్న రంగాలు. కొత్త‌గా ఆయా వృత్తుల‌ను నేర్చుకునే వారి కంటే చిన్న‌త‌నం నుంచే ఆ వృత్తుల‌పై ప‌ట్టున్న వారు త్వ‌రగా అందులో ఇముడుకుంటారు. 

వృత్తి నైపుణ్యాలు లేకుంటే చెల్ల‌ని రూపాయే! 

   ప్ర‌స్తుతం చాలామంది విద్యార్ధులు చ‌దివేది ఒక‌టి చేసేది మ‌రొక‌టి. దీని వ‌ల‌న ఆత్మ సంతృప్తి క‌రవై చేసే ప‌నిలో స‌రైన ఉత్పాద‌క‌త‌ను సాధించ‌లేక‌పోతున్నారు. అమెరికాలో చ‌దువుకునేందుకు వెళ్లిన చాలా మంది విద్యార్ధులు అక్క‌డ పెట్రోల్ బంకుల్లోనూ, హోట‌ల్స్ లోనూ, సూప‌ర్ మార్కెట్ల‌లోనూ అతి చిన్న ఉద్యోగాలు చేస్తూ కాలం వెళ్ల‌దీస్తున్నారు. అదే ముందునుంచి తాము ఎంచుకున్న రంగంలో కానీ త‌న తండ్రి నుంచి నేర్చుకున్న వృత్తిలో కానీ శ్రద్ధ చూపించి దానికి సంబంధించిన కోర్సు చ‌దివితే అందులో అత‌ను చాలా సుల‌భంగా సెటిల్ అవుతాడు. మ‌న‌సుకు న‌చ్చ‌ని ప‌నిచేసిన‌ప్పుడు అది ఆత్మ సంతృప్తిని ఇవ్వ‌దు స‌రిక‌దా నిరాశ‌, నిశ్ఫృహ‌ల‌ను క‌లిగిస్తుంది. ఒక తాపీ మేస్త్రీ కొడుకు చిన్న‌ప్ప‌టి నుంచి తండ్రితో పాటు ప‌నికి వెళ్లి నిర్మాణ రంగంలో మెళుకువ‌లు నేర్చుకుంటే అత‌ను పెద్ద‌య్యాయ బీటెక్ సివిల్ చ‌దివి త‌న వృత్తి మిగ‌తా వారికంటే చాలా వేగంగా ప‌ట్టు సాధిస్తాడు. అలానే అత‌ను కోరుకున్న ఇష్ట‌మైన ప‌నిని చేస్తున్నాను అన్న ప‌ని సంతృప్తి దొరుకుతుంది.

ప్ర‌ముఖుల‌ను చూసి మ‌నం నేర్చుకోవాలి 

    సినీ, రాజ‌కీయ రంగాల్లో ఇదే ఫార్ములాను అనుస‌రిస్తూ చాలా మంది ప్ర‌ముఖులు ఇప్ప‌టికే విజ‌యం సాధించారు. ప్ర‌ముఖ సినీ న‌టుడు చిరంజీవి త‌న కొడును సినిమాల్లోకి తీసుకురావ‌డానికి ముందు త‌న‌తో పాటు షూటింగ్ ల‌కు తీసుకెళ్లి అందులోని క‌ష్ట‌న‌ష్టాల‌ను వివ‌రించాడు. దీని వ‌ల‌న అత‌ని కొడుకు సినిమాల్లో కుదురుకునేందుకు పెద్ద స‌మ‌యం ప‌ట్ట‌లేదు. అదే విధంగా తెలంగాణా సీఎం కేసీఆర్ కూడా త‌న కొడుకు, కూతురును రాజ‌కీయాల్లోకి తీసుకొచ్చారు. నేను  ఫ‌లానా రంగంలో స‌క్సెస్ అయ్యాను. నా ద‌గ్గ‌ర పాఠాలున్నాయి. అది చూసి నేర్చుకొండి. ముందుకు వెళ్లండి అని వాళ్లు చెపుతున్నారు. అనుభ‌వాల‌ను వాళ్లు విట‌మిన్ కాప్స్యూల్స్ లా అందించ‌గ‌లుగుతారు. అది బ‌య‌టి వాళ్ల ద‌గ్గర నుండి ఎట్టి ప‌రిస్థితుల్లోనూ దొర‌క‌దు. విజ‌య‌వంత‌మైన వ్య‌క్తుల‌ను ప‌రిగ‌ణ‌న‌లోకి  తీసుకుంటే వాళ్ల పిల్ల‌ల‌ను వారు రాణించిన వృత్తిలోకే తీసుకొస్తున్నారు. ధీరూభాయ్ అంబానీ, చంద్ర‌బాబు, సునీల్ మిట్ట‌ల్ వంటి వ్య‌క్తుల సంతానం వాళ్ల తండ్రులు రాణించిన రంగంలోనే త‌మ అదృష్టాన్ని ప‌రిక్షించుకుంటున్నారు. ఇదే ట్రెండ్ కింద స్థాయిలో ఎందుకు రాకూడ‌దు? త‌ల్లిదండ్రులూ ఆలోచించండి. మీ పిల్ల‌ల‌కు మీ వృత్తి విద్యను నేర్పించి వాళ్ల బంగారు భ‌విత‌కు బాట‌లు వేయండి. అంతేకానీ కాగితాల‌కు ప‌రిమితమైన డిగ్రీల‌ను మాత్ర‌మే చేతికందించి కార్పోరేట్ కూలీలుగా మార్చ‌కండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com