విద్యార్ధి 'క్షేమం' పట్టని సంక్షేమం!

    ప్రభుత్వ హాస్టళ్లు...పేద విద్యార్ధుల సంక్షేమానికి పట్టుగొమ్మల్లా ఉండాల్సిన ఈ దేవాలయాలు ఇప్పుడు నరక కూపాలను తలపిస్తున్నాయి. గతంలో ఎన్నో సార్లు చర్చించిన విషయమే అయినా పరిస్థితిలో ఎటువంటి మార్పు లేకపోవడంతో మా వంతు భాధ్యతగా దీనిపై స్పందించాల్సి వస్తోంది. సంక్షేమ హాస్టల్స్ లో రోజురోజుకీ దిగజారుతున్న పరిస్థితులు ఎందుకు మెరుగుపడటం లేదు? ముక్కు పచ్చలారని చిన్నారుల గోడును వినే నాథుడేడి? పేదవాళ్లుగా పుట్టడమే వారు చేసిన పాపమా? తినే తిండిలో పురుగులు..గదులకు కిటీకీలుండవు. కప్పుకునేందుకు దుప్పట్లు ఉండవు. సౌకర్యాల లేమిపై వార్తలు వచ్చిన రోజు హడావుడి చేసే ప్రభుత్వ యంత్రాంగం, తర్వాత వీరివైపు చూస్తే ఒట్టు. నేరం చేసి శిక్ష అనుభవిస్తున్న ఖైదీకి కూడా ప్రస్తుతం నిబంధనల ప్రకారం సౌకర్యాలు కల్పిస్తున్నారు. కానీ అభం శుభం తెలియని పేద విద్యార్ధుల పాలిట ఎందుకీ వివక్ష. మన విద్యా వ్యవస్థ, విద్యా విధానంలోని డొల్లతనాన్ని, విద్యార్ధుల సంక్షేమంపై ప్రభుత్వాలకు నిజంగా ఎంత ప్రేమ ఉందన్న విషయాన్ని ప్రభుత్వ హాస్టల్స్ అనుక్షణం మనకు గుర్తు చేస్తూనే ఉంటాయి. 

శాపంగా మారిన పర్యవేక్షణ లోపం

     ముఖ్యంగా బడుగు, బలహీన వర్గాల ప్రజలను విద్యకు చేరువ చేసేందుకు సంక్షేమ హాస్టల్స్ ను ప్రభుత్వం ఏర్పాటు చేసింది. అట్టడుగు స్థాయిలో  ఉండే ప్రజలకు వాళ్ల ఇళ్లల్లో చదువుకోవడానికి అనువైన పరిస్థితులు ఉండవు. వాళ్ల ఇంటి వాతావరణం కూడా అందుకు సహకరించదు. అలాంటి పరిస్థితుల్లో పేద విద్యార్ధి చదువుకు దూరం కాకూడదన్న ఉద్దేశ్యంతో ప్రభుత్వ వసతి గృహాలను నెలకొల్పారు. లక్ష్యం మంచిదే అయినా ఆచరణలో చోటుచేసుకుంటున్న పరిస్థితులు పేద విద్యార్ధికి నరకాన్ని చూపిస్తున్నాయి. పేద తల్లిదండ్రులు తమ పిల్లలను హాస్టల్స్ లో జాయిన్ చేయడానికి ఆర్థిక పరిస్థితులతో పాటు క్రమశిక్షణ అలవడుతుందని, తన పనులను తాను చేసుకునే పరిస్థితి ఉంటుందని, తన వస్తువులను భధ్రంగా దాచుకోవడం, తోటి విద్యార్ధులలతో, ఇతరులతో ఎలా మెలగాలి? వ్యక్తిగత పరిశుభ్రతను సొంతంగా నిర్వహించుకునే సామర్ధ్యం వస్తుందని.  కానీ ప్రభుత్వ హాస్టల్స్ లో విద్యార్ధి మనోవికాసానికి అవసరమైన ఒక్క పని కూడా జరగడం లేదు. పైగా హాస్టల్స్ లో పర్యవేక్షణ లోపం పెరిగిపోవడంతో విద్యార్ధులు లేని పోని చెడు అలవాట్లకు బానిసలవుతున్నారు. కొన్ని ప్రభుత్వ బాలికల  హాస్టల్స్ లో బాలికలు గర్భం దాల్చిన వార్తలు మనం చదివే ఉన్నాం. హాస్టల్ వార్డెన్ లు హాస్టల్స్ లో అసాంఘిక కార్యకలాపాలకు పాల్పడటం, మద్యం తాగడం వంటి వార్తలకైతే లోటే లేదు. ఇన్నీ జరుగుతున్నా ఏదో తాత్కాలిక హడావుడి తప్పించి ప్రభుత్వాలు శాశ్వత చర్యలు తీసుకున్న దాఖలాలు అయితే లేవు. కొన్ని హాస్టల్స్ లో కనీసం కిటీకీలు, తలుపులు కూడా లేవు. ఇక చలికాలంలో విద్యార్ధులు కప్పుకునేందుకు దుప్పట్టు కూడా లేవంటేనే పరిస్థితి ఎంత దారుణంగా ఉందన్న విషయం అర్ధం చేసుకోవచ్చు. 

సరైన తిండి లేకుంటే చదువు వంటబడుతుందా?

  సర్కారీ హాస్టల్స్ లో తిండి కోసం ఎంత తక్కువ మాట్లాడుకుంటే అంత మంచిది. మనం ప్రతీ రోజూ ఏ న్యూస్ పేపర్ తిరగేసినా హాస్టల్ లో భోజనంలో పురుగులు, పాచిపోయిన అన్నం ఇవే వార్తలు. విద్యార్ధులకు నిబంధనల ప్రకారం సరైన తిండి పెట్టడం లేదు. వారంలో ఒక రోజు గుడ్డు, మాంసాహారం, మిగతా రోజుల్లో వివిధ రకాల కూరగాయలతో భోజనం పెట్టాలి. కానీ అది ఇప్పటి వరకూ ఎప్పుడూ జరగలేదు. నేరాలు చేసి జైళ్లలో శిక్ష అనుభవిస్తున్న ఖైదీలకు నిబంధనల ప్రకారం మంచి నాణ్యమైన భోజనం పెడుతున్నారు. మానవ హక్కుల కమీషన్ దీనిని పర్యవేక్షణ చేస్తుంది. మరి విద్యార్ధుల సరైన భోజనం పెట్టనప్పుడు విద్యా హక్కుల కమీషన్ కానీ చట్టం కానీ ఏమీ చేయలేక చేతులు ముడుచుకు కూర్చొవడం మినహా మరేమీ చేయలేకపోతున్నాయి. సరైన తిండి లేకపోవడం వలన విద్యార్ధి మెదడులో మనో వికాసం జరగదు. మనోవికాసం జరగనప్పుడు చదివిండి వాడికి గుర్తుండదు. ఇక పరిశుభ్రత విష‍యంలో ప్రభుత్వ హాస్టల్స్ చాలా అధ్వాన్నమైన పరిస్థితిలో ఉన్నాయి. పిల్లలకు పరిశుభ్రమైన తాగునీరు అందుబాటులో ఉండటం లేదు. వర్షాకాలంలో అంటు వ్యాధులు, చర్మవ్యాధులు ప్రబలుతున్నాయి. ఇక ఆడపిల్లలు సరైన లైంగిక పరిశుభ్రత పాటించేందుకు అనువైన పరిస్థితులు ప్రభుత్వ హాస్టల్స్ లో అసలు కానరావు. తల్లిదండ్రులను వదిలి హాస్టల్స్ ఉంటున్న పిల్లలను వార్డెన్ లు తల్లిదండ్రుల్లా కాపాడాల్సి ఉంటుంది. కానీ ఇటీవలి కాలంలో కొందరు వార్డెన్లు చేస్తున్న చర్యలు సభ్యసమాజాన్ని తలదించుకునేలా చేస్తున్నాయి. పిల్లలతో మద్యం , సిగరెట్లు తెప్పించుకోవడం, పిల్లల ముందు పార్టీలు చేసుకోవడం, అసభ్యంగా ప్రవర్తించడం వంటి వార్తలుగా వస్తున్నాయి. 

ప్రభుత్వ స్కూళ్లలో ఫలితాలు రాకుంటే కేసులా?

   'వెనకటికి ఎవడో రెండు అంగుళాల కత్తి ఇచ్చి రెండు వేల పరగణాలు గెల్చుకు రమ్మన్నాడట'...ఇప్పుడు మన ప్రభుత్వాల తీరు , విద్యా వ్యవస్థ పనితీరు కూడా ఇలానే ఉంది. సరైన తిండి పెట్టండి మహాప్రభో అని పేద విద్యార్ధులు అల్లాడుతుంటే  ఫలితాలు ప్రయివేటు సంస్థలకు ధీటుగా ఉండాలని విద్యా శాఖ చెప్పడం హాస్యాస్పదంగా ఉంది. ముందు ప్రభుత్వ హాస్టల్స్ లో విద్యార్ధులకు నాణ్యమైన తిండి పెట్టి, మంచి సౌకర్యాలు కల్పించి అప్పుడు ఫలితాలు గురించి ఆలోచిస్తే సమంజసంగా ఉంటుంది. అలా కాకుండా అడ్గగోలు నిబంధనలు తీసుకొస్తే నవ్వుల పాలు కావడం తప్పించి మరేమీ ఉండదు. ముందుగా సోషల్ వెల్ఫేర్ అధికారులు హాస్టల్స్ లో పర్యటించి సౌకర్యాల మెరుగుకు కృషి చేయాలి. లోపం ఎక్కడ జరుగుతుందో గుర్తించి దిద్దుబాటు చర్యలు చేపట్టాలి. విద్యార్ధులకు కేటాయిస్తున్న నిధులు ఎలా పక్కదారి పడుతున్నాయో తెలుసుకుని అలా జరగకుండా ప్రతీ పైసా పేద విద్యార్ధికి అందేలా అది వారి బంగారు భవిష్యత్ కు బాటలు వేసేలా ప్రభుత్వం చర్యలు చేపట్లాలి.  

ప్రభుత్వ హాస్టల్స్ ను యుద్ధప్రాతిపదికన ప్రక్షాళన చేయాలి

  ప్రభుత్వ సంక్షేమ హాస్టల్స్ నరక కూపాలుగా మారడానికి దారితీసిన కారణాలను విశ్లేషించి అత్యవసరంగా ప్రక్షాళన చర్యలు చేపట్టాల్సి ఉంది. ప్రభుత్వం కేటాయిస్తున్న నిధులు పక్కదారి పట్టకుండా పకడ్బందీ పర్యవేక్షణను ఏర్పాటు చేయాలి. అన్నింటికంటే ముఖ్యంగా వార్డెన్ల నియామకంలో నియమాలు పాటించాలి. ప్రేమతో పిల్లలను తల్లిదండ్రుల్లా చూసే వ్యక్తులను నియమించాలి. ఎప్పటికప్పుడు తనిఖీలు నిర్వహిస్తూ విద్యార్ధులకు బట్టలు, తిండి, వస్తువులు అందుతున్నాయా లేదా అన్నది చూస్తూ ఉండాలి. అదే విధంగా హాస్టల్స్ లో ఉండే విద్యార్ధులకు ఉపాధ్యాయులు ప్రత్యేక తరగతులను నిర్వహించి వారి మెరుగైన మార్కులు సాధించేలా చర్యలు చేపట్టాలి. బాలికల సంక్షేమానికి పెద్ద పీట వేసి వారికి రక్షణ కల్పించాలి. అన్ని హాస్టల్స్ లో పరిశుభ్రమైన తాగునీరు, నాణ్యమైన ఆహారం, పరిసరాల పరిశుభ్రత ను ప్రాధాన్యంశాలుగా చేసుకుని ప్రక్షాళన చర్యలు చేపడితే సంక్షేమ హాస్టల్స్ ఏర్పాటు యొక్క అసలు లక్ష్యం సిద్ధిస్తుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com