న‌కిలీ విద్యా సంస్థ‌లంటే అర్ధ‌మేంటి అధ్య‌క్షా..?

  ఒక వ‌స్తువు నాణ్య‌మైన‌దా?  లేక న‌కిలీదా అని నిర్ధారించేందుకు మ‌న దేశంలో బీఐఎస్ వంటి సంస్థలు ఉన్నాయి. ఆ సంస్థ‌ల్లో నాణ్య‌త‌ను ప‌రీక్షించే ప‌నిముట్లు, ప్ర‌త్యేక‌మైన ల్యాబ్ లు ఉంటాయి. వాటి ద్వారా ఏది న‌కిలీయో ఏది నిజ‌మైన‌దో ఆ సంస్థ నిర్ధారిస్తుంది. దీనిని బట్టి మ‌న‌కు అర్ధ‌మ‌వుతున్న‌దేంటి? న‌కిలీని క‌నిపెట్టాలంటే అలా నిర్ధారించే సంస్థ‌కు ఒక  నిబ‌ద్ధ‌త ఉండాలి. కానీ దుర‌దృష్ట‌వ‌శాత్తూ మ‌న దేశంలో కీల‌క‌మైన విద్యారంగంలో ఇలా నిబ‌ద్ధ‌త క‌లిగిన సంస్థ‌లు లేవు స‌రిక‌దా అడ్డ‌మైన నిబంధ‌న‌ల‌తో  ఆ సంస్థ‌లు విద్యా రంగాన్ని మ‌రింత దిగ‌జారుస్తున్నాయి. తాజాగా గుర్తింపుకు సంబంధించి ఎమ్ హెచ్ఆర్ డీ , యూజీసీ విడుద‌ల చేసిన ఓ ప్ర‌క‌ట‌న గురివింద గింజ సామెత‌ను  గుర్తుకు తెచ్చింది. గుర్తింపు లేని కాలేజీలు, యూనివ‌ర్సీటీల జాబితాల‌ను విడుద‌ల చేసిన యూజీసీ ఒక కీల‌క విష‌యాన్ని విస్మ‌రించి తాము మార్పుకు సిద్ధంగా లేమ‌ని మ‌రోసారి నిరూపించుకుంది. 

గుర్తింపు ఇచ్చేవాళ్ల‌కు గుర్తింపు ఉందా? 

  ప్ర‌పంచంలో ఉండే ఇత‌ర విశ్వ‌విద్యాల‌యాల‌తో పోల్చి చూసిన‌ప్పుడు మ‌న విశ్వవిద్యాల‌యాల స్థాయి ఎక్క‌డ ఉంటుందో ప్ర‌త్యేకంగా చెప్ప‌న‌వ‌స‌రం లేదు. మ‌న యూనివ‌ర్సిటీల ప‌రిస్థితి ఇంత‌లా దిగ‌జారడానికి  కార‌ణ‌మెవ‌రన్న‌ది అంద‌రికీ తెలిసిన విష‌య‌మే. మ‌న విద్యాల‌యాల‌ను ప్ర‌పంచ స్థాయికి తీసుకెళ్లాల్సిన యూజీసీ, ఎమ్ హెచ్ ఆర్ డీ, ఏఐసీటీఈ లు ఈ విష‌యంలో పూర్తిగా విఫ‌లమ‌య్యాయి. అలాంటి సంస్థ‌లు యూనివ‌ర్సిటీల‌కు, కాలేజీల‌కు గుర్తింపు ఇవ్వ‌డం ఏదో మొక్కుబ‌డి వ్య‌వ‌హారంలా ఉంది ఎందుకంటే ఈ సంస్థ‌లు ఎప్పుడో త‌మ నిబ‌ద్ధ‌త‌ను పొగొట్టుకున్నాయి. ఎలాగంటే మ‌న దేశంలో 60 నుంచి 70  శాతం వ‌ర‌కూ ఉన్న‌త విద్య ప్ర‌యివేట్ సంస్థ‌ల చేతుల్లోనే ఉంది. విద్య‌ను ప్ర‌జ‌ల వ‌ద్ద‌కు చేర్చాల్సిన భాధ్య‌త ప్ర‌భుత్వానిదే. కానీ త‌న భాధ్య‌త‌ను విస్మ‌రించి ప్ర‌భుత్వం విద్య‌ను ప్ర‌యివేట్ సంస్థ‌ల చేతుల్లో పెట్టింది. ఇలాంటి ప‌రిస్థితుల్లో ప్ర‌యివేట్ రంగంలో ఉన్న విద్య‌ను కూడా నిబంధ‌న‌ల పేరుతో మ‌రింత దిగ‌జార్చ‌డం ఇప్పుడు జ‌రుగుతోంది. గుర్తింపు ఇచ్చే సంస్థ‌ల‌కే స‌రైన నిబ‌ద్ధ‌త లేన‌ప్పుడు విద్యా రంగం మ‌రింత దిగ‌జార‌డం త‌ప్పించి మెరుగైన ఫ‌లితాలు అయితే ఒన‌గూర‌వు. 

అనుమతుల‌ను స‌ర‌ళం చేస్తేనే విద్య విక‌సిస్తుంది

   నిబ‌ద్ధ‌త లేకుండా నా ద‌గ్గ‌ర గుర్తింపు తీసుకోవాల్సిందే. అని చెప్ప‌డం అసమంజం అనిపించుకుంటుంది. ఎన్ని విద్యా సంస్థ‌లు అయినా ఎన్ని యూనివ‌ర్సిటీలు అయినా పెట్టుకోమ‌ని అనుమ‌తులు ఇవ్వాలి. మ‌న దేశంలో మాత్రం ఇలా జ‌ర‌గ‌డం లేదు. ఒక చిన్న కోచింగ్ సెంట‌ర్ పెట్టాల‌న్నా స‌వాల‌క్ష నిబంధ‌న‌లు, అడ్డ‌గోలు ప‌రిమితులు. ఇలాంట‌ప్పుడు విద్య అంద‌రికీ అందుబాటులోకి ఎలా వ‌స్తుంది. అమ్మ పెట్ట‌దు అడుక్కు తిన‌నియ్య‌దు అన్న చందంగా ప్ర‌భుత్వ విద్య‌ను నిర్ల‌క్ష్యం చేశారు. పోనీ ప్ర‌యివేట్ విద్య‌ను కూడా గుర్తింపుల పేరుతే కొంత మందికే అందుబాటులో ఉండేలా చేస్తున్నారు. అమెరికాలో ఒక యూనివ‌ర్సిటీ పెట్టాలంటే అనుమ‌తులు చాలా సుల‌భంగా దొరుకుతాయి. అక్క‌డి యూనివ‌ర్సీటీలు ఇచ్చే డిగ్రీల‌ను ప్ర‌భుత్వాలు కూడా గుర్తిస్తాయి. అక్క‌డ గుర్తింపును కాకుండా స‌మ‌ర్ధ‌త‌కు ఓటేస్తారు. అందుకే అక్క‌డ ప్ర‌పంచ స్థాయి యూనివర్సిటీలు ఉన్నాయి. 

కావాల్సింది గుర్తింపు కాదు నిబ‌ద్ధ‌త‌!

  ప్ర‌భుత్వం నకిలీ యూనివ‌ర్సీటీలు, క‌ళాశాల‌ల జాబితాను విడుద‌ల చేసింది. మంచిదే. కానీ ఏఐసీటీఈ గుర్తింపు ఉన్న వంద‌లాది ఇంజినీరింగ్ కాలేజీల్లో అస‌లు ఫ్యాక‌ల్టీ లేర‌ని, అర్హ‌త లేని ఫ్యాక‌ల్టీలతో కాలం వెళ్ల‌బుచ్చుతున్నార‌ని రోజూ వార్త‌లు వ‌స్తున్నాయి. మ‌రి దీని అర్ధ‌మేంటి? అస‌లు గుర్తింపు ఇచ్చే సంస్థ‌లు ఎటువంటి నిబంధ‌న‌ల‌ను పాటిస్తున్నాయి. వీటి గుర్తింపును ఎవ‌రు ర‌ద్దు చేస్తారు? అస‌లు గుర్తింపు ఇచ్చే సంస్థ‌లు మార‌కుండా ఎన్ని న‌కిలీల జాబితాలు విడుద‌ల చేస్తే ఉప‌యోగ‌మేంటి?  ఒక విద్యాల‌యాన్ని స్థాపించి నా ద‌గ్గ‌ర ఇంత సిబ్బంది ఉన్నారు. ఇలాంటి స‌దుపాయాలున్నాయి.ఈ సామ‌ర్ధ్యం ఇంత‌, నా ఫ్యాక‌ల్టీ విజ్ఞానం ఇది, నేను విద్య చెపుతున్నా. ఉత్తీర్ణ‌త సాధించిన వారికి స‌ర్టిఫికేట్స్ ఇస్తున్నా అంటున్న వాళ్ల‌ను  వాళ్ల‌ను గుర్తించి ముందుకు నెట్టాలి. స‌ర్టిఫికేట్ పొందిన స‌మ‌ర్ధుడా కాదా అన్న‌దే ఇక్క‌డ ముఖ్యం. అలా కాకుండా గుర్తింపుల పేరుతో అడ్డ‌మైన రూల్స్ ను పెట్ట‌డం వ‌ల‌న దొంగ డిగ్రీలు బ‌య‌ట‌కు వ‌స్తున్నాయి. స‌మ‌ర్ద‌త ఉన్న వాళ్లు అంద‌రూ కాలేజీలు పెట్టే అవ‌కాశం ఇస్తే ఏమ‌వుతుంది? మ‌రిన్ని కాలేజీలు, యూనివ‌ర్సీలు వ‌చ్చి అంద‌రికీ విద్య అందుబాటులోకి వ‌స్తుంది. 

విద్యా వ్య‌వ‌స్థ‌ ప్ర‌క్షాళ‌నే తార‌క‌మంత్రం

   మంచి విజ్ఞానం ఉండి విద్యా సంస్థ‌లు పెట్టేవారిని ప్ర‌భుత్వం ఎల్ల‌ప్పుడూ ప్రొత్సాహించాలి. అంతే కానీ గుర్తింపుల పేరుతో వారిని తొక్కేయ‌వ‌ద్దు. న‌కిలీ అంటే అర్ధ‌మేంటి? ప‌్ర‌భుత్వ గుర్తింపు లేక‌పోవ‌డం న‌కిలీయా లేక స‌మ‌ర్ధ‌త ఉండి గుర్తింపు లేక‌పోవ‌డం న‌కిలీయా? ఈ విష‌యాన్ని ప్ర‌భుత్వ వ‌ర్గాలు సీరియ‌స్ గా ఆలోచించాలి. ప్ర‌స్తుతం ఒక ట్రెండ్ నడుస్తోంది. ఒక విద్యార్ధి స్కూల్ స్థాయి ద‌గ్గ‌ర్నుంచి హైస్కూల్, కాలేజీ, యూనివ‌ర్సిటీ ఇలా ఎక్క‌డా ప్ర‌భుత్వ విద్యా సంస్థ‌ల్లో చ‌ద‌వ‌డు. కానీ ఉద్యోగం మాత్రం ప్ర‌భుత్వ ఉద్యోగ‌మే కావాలంటాడు. ఇలాంటి ప‌రిస్థితి పోవాలి. స‌మ‌ర్ధ‌త‌కు పెద్ద పీట వేయాలి. స‌మ‌ర్ధ‌త లేని విద్యా సంస్థ‌ల్లో చ‌దివి నైపుణ్యాలు లేని నిరుద్యోగుల‌కు నిరుద్యోగ భృతి ఇచ్చి వారు ప‌నికిరారు అని అవ‌మానించే కంటే ముందే మంచి సంస్థ‌ల‌కు అనుమ‌తులు స‌ర‌ళ‌త‌రం చేయాలి. మ‌న దేశంలో ఆక్డ్ ఫ‌ర్డ్ లు రావాలంటే, అబ్దుల్ కలాం లు పుట్టాలంటే విద్యాల‌యాల్లో స‌మ‌ర్ధ‌త‌కు ప్రాధాన్య‌త క‌ల్పించండి. అంతేకానీ గుర్తింపు పేరుతో ఉన్న‌వాటి ప్రాణం తీయ‌కండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com