మీలో ఎవరు కోటీశ్వరుడు..?

  డ‌బ్బు సంపాదించ‌డం జీవితంలో చాలా ముఖ్య‌మైన విష‌యంగా మారిపోయింది. మార్పు చెందిన‌ కొత్త స‌మాజంలో, దూసుకుపోతున్న‌ గ్లోబ‌ల్ ఆర్థిక వ్య‌వ‌స్థ‌ల్లో మ‌నుగ‌డ సాగించాలంటే, మంచి సౌక‌ర్యాలు అనుభ‌వించాలంటే చేతినిండా డ‌బ్బు ఉండాల్సిందే. ఈ విష‌యాన్ని ఎవ‌రైనా ఒప్పుకోవాల్సిందే. ఆనందానికి డ‌బ్బే ప‌ర‌మావ‌ధి కాక‌పోయినా అవ‌సరానికి, మ‌నుగ‌డ‌కు డ‌బ్బు కావాలి.  రూపాయి సంపాదించడం ఆర్ధికంగా ఎదిగినట్టు కాదు, ఆ సంపాదించిన రూపాయిలో 10 పైసలు తక్కువగా ఖర్చు పెట్టినప్పుడే ఆర్ధికంగా ఎదిగినట్టు.  కానీ  ఇంత ముఖ్యమైన ఆర్థిక విషయాలపై మన దేశంలో సరైన అవగాహన లేకపోవడం ఇప్పుడు పెద్ద లోపంగా మారింది.  బాగా చదువుకున్న వారికి కూడా ఆర్ధిక పరమైన విషయాలు తెలియక ఆర్థిక నిరక్ష్య రాస్యులుగా ఉన్నారు.   మ‌న దేశంలో ఎవ‌రూ పెద్దగా దృష్టి పెట్ట‌ని ఈ ఆర్థిక నిర‌క్ష్యరాస్య‌త‌  ఇప్పుడు పెద్ద మ‌హ‌మ్మారిగా మారుతోంది. మ‌న దేశ విద్యా విధానంలో విద్యార్ధుల‌కు లైఫ్ స్కిల్స్ నేర్పించ‌డంలో చాలా లోపాలున్నాయ‌ని ఇదివ‌ర‌కే మ‌నం చ‌ర్చించుకున్నాం. ఒక విద్యార్ధి వ్య‌క్తిగ‌త జీవితానికి అవ‌స‌ర‌మైన నైపుణ్యాల‌ను అందించ‌లేన‌ప్పుడు ఆ విధానం విఫ‌ల‌మైనద‌నే భావించాలి. ఈ స‌రికొత్త ప్ర‌పంచ ఆర్ధిక వ్య‌వ‌స్థ‌లో వ్య‌క్తిగ‌త ఆర్ధిక ప్ర‌ణాళిక తెలీకుంటే ఒక విద్యార్ధి జీవితంలో స‌వాళ్ల‌ను ఎదుర్కొవాల్సి ఉంటుంది.   

డబ్బు అస‌లు స్వ‌రూపం తెలీకుంటే న‌ష్టాలే..!

  పాఠ్య పుస్త‌కాల్లో దీని గురించి ప్ర‌స్తావ‌న ఉండ‌దు. త‌ర‌గ‌తి గ‌దిలో ఆ విష‌యం భోధించే ఉపాధ్యాయుడు ఉండ‌డు. కానీ ఆ విష‌యం తెలుసుకోకుంటే జీవితం త‌ల‌కిందులైపోతుంది. జీవితంలో సౌక‌ర్య‌వంత‌మైన జీవనం గ‌డ‌పడం దీని ద్వారా మాత్ర‌మే సాధ్యం. ఇంత‌లా చెపుతున్న ఆ విష‌యం ఏంటి అని అనుకుంటున్నారా? అదేనండీ ఆర్థిక అక్ష‌రాస్య‌త‌. జీవ‌న నైపుణ్యాల్లో అత్యంత ముఖ్య‌మైన‌దిగా ప్ర‌పంచం గుర్తించినా మ‌న దేశంలో మాత్రం ఆర్ధిక నిర‌క్ష‌రాస్యులు సంఖ్య‌కు లోటేం లేదు. పెద్ద పెద్ద చ‌దువులు చ‌దివి, పెద్ద స్థాయిల్లో ఉన్న‌వారు కూడా ఆర్ధిక నిర‌క్ష్యరాస్యులుగానే ఉన్నారు. కాలేజీ చదువులు పూర్తి చేసుకుని వస్తున్న చాలామంది విద్యార్ధులకు  అసలు పాన్ కార్డు అంటే ఏమిటో కూడా తెలియడం లేదు. ఒకవేళ పాన్ కార్డు కోసం విన్నా పాన్ ఫుల్ ఫామ్ తెలియని వాళ్లు ఎంతో మంది.   వ్య‌క్తిగత ప‌న్ను స్లాబ్ రేట్లలో ఎన్ని ర‌కాలున్నాయి? బ‌్యాంకు పొదుపు ఖాతాలో ఎంత వ‌డ్డీ వ‌స్తుంది? ఫిక్స్ డ్ డిపాజిట్, రిక‌రింగ్ డిపాజిట్ కు తేడా ఏంటి? మ‌్యూచువ‌ల్ ఫండ్స్ ఎలా ప‌నిచేస్తాయి?  అని అడిగితే చాలా మంది చదువుకున్న వాళ్లు కూడా తెల్ల మొఖాలేస్తున్నారు. పెద్ద పెద్ద జీతాలు సంపాదిస్తున్నా వ్య‌క్తిగ‌త ఆర్థిక ప్ర‌ణాళిక‌పై అవ‌గాహ‌న లేక తీవ్రంగా న‌ష్ట‌పోతున్నారు. ఆర్థిక అక్షరాస్యతతో పాటు ఆర్థిక క్రమశిక్షణ కూడా చాలా అవసరమన్న విష‍యం వీరికి తెలీకుండా పోతోంది. 

ఆందోళ‌న క‌లిగిస్తున్న ఆర్థిక నిర‌క్ష‌రాస్య‌త..!

   ప్ర‌స్తుతం మ‌న దేశం ప్ర‌పంచంలోనే వేగ‌వంత‌మైన ఆర్థిక వ్య‌వ‌స్థ‌ల్లో ఒక‌టి నిలుస్తోంది. దేశంలోని ప్ర‌ధాన రంగాలు పురోగ‌తి దిశ‌గా ప‌య‌నిస్తున్నాయి. అయితే ఆర్థిక వ్య‌వ‌స్థ‌ల్లో ప్ర‌భుత్వాలు, వ్య‌వ‌స్థ‌లే కాదు ప్ర‌జ‌లు కూడా భాగ‌స్వాములుగా నిల‌వాలి. స‌రిగ్గా ఇక్క‌డ మ‌న దేశం ఇబ్బందుల‌ను ఎదుర్కొంటోంది. ఆర్థిక వ్య‌వ‌స్థ మ‌రింత‌ చురుగ్గా మారాలంటే ప్ర‌జ‌లు ఆర్థిక విష‌యాల‌పై అవ‌గాహ‌న క‌లిగి ఉండాలి. అస‌లు ద్ర‌వ్యోల్బ‌ణం అంటే ఏంటి? ఎక్క‌డ మ‌దుపు చేస్తే ద్ర‌వ్యోల్బ‌ణాన్ని అధిగ‌మించి రాబ‌డులు పొంద‌వ‌చ్చు అన్న విష‌యంపై ఎవ‌రికీ స‌రైన ప‌రిజ్ఞానం ఉండ‌టం లేదు. దీంతో ప్ర‌జ‌లు పెట్టుబ‌డులు ఒకచోటే కేంద్రీకృత‌మై ఉండిపోయి ఆర్థిక వ్య‌వ‌స్థ‌కు ప‌నికిరాకుండా పోతున్నాయి. ఇంజినీరింగ్ , డాక్ట‌ర్ వంటి పెద్ద చ‌దువులు చ‌దివినా మంచి జీతం వ‌స్తున్న ఉద్యోగంలో స్థిర‌ప‌డిన వారికి కూడా ఆర్థిక విష‌యాల‌పై అవ‌గాహ‌న ఉండ‌టం లేదు. దీంతో ఎక్కువ వ‌డ్డీ ఆశ చూపుతున్న మోస‌గాళ్ల చేతిలో మోస‌పోవ‌డ‌మో లేక బ్యాంకుల్లో అతి త‌క్కువ వ‌డ్డీకి డ‌బ్బును అలా ముర‌గ‌పెట్ట‌డ‌మో చేస్తున్నారు. దీని వ‌ల‌న మ‌న ఆర్థిక వ్య‌వ‌స్థ అనుకున్న వేగం పుంజుకోవ‌డం లేదు.  

మ‌న విద్యా విధానంలో మార్పులు చేయాల్సిన త‌రుణం వ‌చ్చింది!
   

    విదేశాలు ఆర్థిక అక్ష‌రాస్య‌త విష‌యంలో మ‌న‌కంటే ఎంతో ముందున్నాయి. ఆర్థిక వ్య‌వ‌స్థ గ‌మ‌నంలో ప్ర‌జ‌ల‌ను భాగ‌స్వాముల‌ను చేయ‌డంలో అక్క‌డి ప్ర‌భుత్వాలు ముందుచూపుతో వ్య‌వ‌హ‌రిస్తున్నాయి. పాఠ‌శాల స్థాయి నుంచే విద్యార్ధుల‌కు పొదుపు, మ‌దుపు విష‌యంలో అవ‌గాహ‌న‌ను పెంచుతున్నారు. దీని వ‌ల‌న వారికి అస‌లు స్టాక్ మార్కెట్లు అంటే ఏమిటి? షేర్లు అంటే ఏమిటి? వ‌డ్డీ ఎలా లెక్క‌క‌డ‌తారు. దీర్ఘ‌కాలంలో చ‌క్ర‌వ‌డ్డీ ఎలాంటి అద్భుతాలు చేస్తుంది అన్న విష‌యాలు తెలుస్తున్నాయి. అవ‌గాహ‌న ఉండ‌టంతో మంచి ప‌థ‌కాల్లో మ‌దుపు చేస్తూ భ‌విష్య‌త్ ను భ‌ధ్రంగా త‌యారు చేసుకుంటున్నారు. ఏవో  ఒక‌టి ఆరా కోర్సుల్లో త‌ప్పించితే మ‌న దేశ ఆర్థిక వ్య‌వ‌స్థ‌, స్టాక్ మార్కెట్లు ఎలా ప‌నిచేస్తాయి. అన్న విష‌యాలు  ఎక్క‌డా చెప్ప‌డం లేదు. దీంతో మ‌న విద్యార్ధుల‌కు, ఉద్యోగుల‌కు ఇది ఒక అర్ధం కాని బ్ర‌హ్మ‌ప‌దార్ధంగా మారిపోయింది. తెలిసీ తెలియ‌ని త‌నంతో స్టాక్ మార్కెట్ల‌ను, షేర్ల కొనుగోళ్లను జూదంగా భావిస్తున్నారు. అస‌లు అక్క‌డ షేర్లు కొనుగోళ్లు అమ్మ‌కాల‌తో పాటు మ్యూచువ‌ల్ ఫండ్స్ , నేష‌న‌ల్ పెన్ష‌న్ స్కీమ్, ప‌న్ను మిన‌హాయింపు ప‌థ‌కాలు ఉంటాయ‌న్న విష‌యం చాలామందికి తెలీకుండా పోతోంది. దీని వ‌ల‌న ఆర్థిక ప్ర‌ణాళిక త‌యారు చేసుకోవ‌డంలో ఇబ్బందులు ప‌డుతున్నారు. 

ఆర్ధిక విష‌యాల‌ను పాఠ్యాంశంలో భాగంగా చేయాలి. 

    ఆర్థిక విష‌యాల‌పై అవ‌గాహ‌న లేక‌పోవ‌డం వ‌ల‌న మ‌న దేశంలో ఆర్ధిక మోసాల‌కు అంతూ పొంతూ లేకుండా పోతోంది. ఎక్కువ వ‌డ్డీ ఆశ చూపి అటు అస‌లు చ‌దువుకోని నిర‌క్ష‌రాస్యుల‌తో పాటు అన్ని చ‌దువువున్న ఆర్ధిక నిర‌క్ష్య‌రాస్యుల‌ను కూడా మోస‌గాళ్లు మోసం చేస్తున్నారు. మ‌రోవైపు కొత్త‌గా ఉద్యోగం సాధించిన ఉద్యోగి త‌న వ్య‌క్తిగ‌త ఆర్ధిక ప్ర‌ణాళిక‌పై స్ప‌ష్ట‌మైన అవ‌గాహ‌న క‌లిగి ఉండాలి. దుర‌దృష్ట‌వ‌శాత్తూ మ‌న దేశంలో అలా జ‌ర‌గ‌డం లేదు. విద్యార్ధి ద‌శ నుంచి ఉద్యోగి ద‌శ‌కు చేరుకున్నాక ఆర్ధిక విష‌యాల‌పై క‌చ్చితంగా ప‌ట్టు సంపాదించుకోవాలి. లేకుంటే కెరీర్ లో చాలా ఇబ్బందులు ప‌డాల్సి ఉంటుంది. మ‌న ఆర్ధిక వ్య‌వ‌స్థ‌లో యువ‌త‌ను భాగ‌స్వామ్యం చేసిన‌ప్పుడు వేగ‌వంత‌మైన వృద్ధి సాధ్య‌మ‌వుతుంది. అలా జ‌ర‌గాలంటే కళాశాల స్థాయి నుంచి విద్యార్ధుల ఆర్థికప‌ర‌మైన విషయాల‌పై అవ‌గాహ‌న పెంచేందుకు ప్ర‌భుత్వాలు మ‌న విద్యా విధానంలో మార్పులు చేయాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com