చూడు పిన్నమ్మా...పాడు పిల్లోడు..!

    "క్యాంప‌స్ లోన‌ చ‌దువుకుంటానంటాడు". థ‌ర్డ్ జెండ‌ర్స్ పై మూడో క‌న్ను తెరుస్తున్న ప్ర‌స్తుత స‌మాజం ఈ పాట‌ను ఇలానే మార్చేసింది. ట్రాన్స్ జెండ‌ర్ల ప్ర‌స్తుత ప‌రిస్థితిని చూస్తే..ఇంటా, బ‌య‌టా అవ‌మానాలు, హేళ‌న‌లు. క‌నీస హ‌క్కుల‌ను కూడా గుర్తించ‌కుండా వేధించే స‌మాజం. పోనీ చ‌దువుకుని ఆత్మవిశ్వాసంతో ముందడుగు వేద్దామంటే అక్కడ కూడా వివ‌క్షే రాజ్య‌మేలుతోంది. హ‌క్కుల‌కు, స‌మానత్వానికి, స్వేచ్ఛ‌కు ప్ర‌తిరూపాలైన విశ్వ‌విద్యాల‌యాల్లోనూ వారి గోడును ప‌ట్టించుకునే నాథుడు లేడు. స‌మాజంతో పాటు చ‌దువుకూ దూర‌మ‌వుతున్న‌ ఆ అభాగ్యులే ట్రాన్స్ జెండ‌ర్స్. వాళ్లు కూడా మ‌న‌లాంటి మ‌నుషులే అన్న విష‌యాన్ని గుర్తించ‌ని మ‌న వ్య‌వ‌స్థ‌లు వారి చ‌దువుకునే ప్రాథ‌మిక హ‌క్కును నిర్ద్యాక్షిణ్యంగా హ‌రిస్తున్నాయి. లింగ వివ‌క్ష,  స‌మాన‌త్వం కోసం మాట్లాడే మేధావులు కూడా చ‌దువుకునేందుకు ట్రాన్స్ జెండ‌ర్స్ ప‌డుతున్న క‌ష్టాన్నిగుర్తించ‌డం లేదు. 

యూనివ‌ర్సిటీల్లో పెరిగిపోతున్న వివ‌క్ష!

   ఒక వ్య‌క్తి జీవితాన్ని పూర్తిగా మార్చివేసే శ‌క్తి చ‌దువుకే ఉంది. అందుకే పేదవాళ్లు కూడా త‌మ పిల్ల‌ల‌ను ఎంత క‌ష్ట‌మైనా స‌రే చ‌దివించాల‌నుకుంటారు. కులం, మ‌తం, రంగు, రూపం ..ఇలా వివిధ ప‌లు రూపాల్లో వివ‌క్ష పురుడుపోసుకుంటుంది. అయితే ట్రాన్స్ జెండ‌ర్లపై చూపుతున్న వ్య‌తిరేక‌త‌, వివ‌క్ష వారిని స‌మాజం నుంచి వేరు చేసేలా ఉంది.  చ‌దువుకునేందుకు, మంచి ఉన్న‌త స్థితికి వ‌చ్చేందుకు వారు అడుగ‌డుగునా ఇబ్బందులు ఎదుర్కొవాల్సి వ‌స్తోంది. ముఖ్యంగా యూనివ‌ర్సిటీల్లో చ‌దివే ట్రాన్స్ జెండ‌ర్ల సంఖ్య చాలా త‌క్కువ‌గా ఉంది. ఉన్న‌వారిని కూడా అటు విద్యార్ధులు, ఇటు స‌మాజం చాలా చిన్న‌చూపు చూస్తోంది. వాళ్లు కూడా మ‌న‌లాంటి మ‌నుషులే క‌దా అన్న ఆలోచ‌న ఎవ‌రికీ క‌ల‌గ‌క‌పోవ‌డం విచార‌క‌రం. రోజురోజుకీ వారిని ప్ర‌త్యేక మ‌నుష్యులుగా చూస్తూ హేళ‌న చేయ‌డంతో చాలామంది ట్రాన్స్ జెండ‌ర్లు మ‌ధ్య‌లోనే చ‌దువుకు స్వ‌స్తి చెపుతున్నారు. ఇది మంచి ప‌రిణామం కాదు. వెలికితీయాలే కానీ ట్రాన్స్ జెండ‌ర్ల‌లో శ‌క్తి సామ‌ర్ధ్యాల‌కు కొదువ లేదు. అర్జునుడు అజ్ఞాత వాసంలో త‌న శ‌క్తిని, త‌న ఉనికిని దాచిపెట్టేందుకు బృహ‌న్న‌ల‌గా మారాడు. అలాగే ట్రాన్స్ జెండ‌ర్స్ లో కూడా అర్జునుడి అంత‌టి శ‌క్తి, నైపుణ్యం ఉంటాయి. 

గుర్తింపు బ‌య‌ట‌ప‌డ‌నంత‌వ‌ర‌కే...!
  
  చాలామంది ట్రాన్స్ జెండ‌ర్లు త‌మ లింగ గుర్తింపును ర‌హ‌స్యంగా దాచిపెడుతున్నారు. అలా దాచిఉన్నంత కాలం వారికి ఎటువంటి ఇబ్బందులు ఉండ‌టం లేదు. అమ్మాయిగానో, అబ్బాయిగానో మ‌నుగ‌డ సాగిస్తున్నారు. స్నేహితుల ద్వారానో లేక వేరే వ్య‌క్తుల ద్వారానో వీరు ఫ‌లానా అని తెలియ‌గానే వీరికి సమ‌స్య‌లు మొద‌లవుతున్నాయి. కాలేజీ యాజ‌మాన్యం ద‌గ్గ‌ర్నుంచి, విద్యార్ధుల వ‌ర‌కూ ప్ర‌తీరోజూ వారిని అవ‌హేళ‌న చేస్తూ ఆత్మ‌విశ్వాసాన్ని, ఆత్మ‌గౌర‌వాన్ని దెబ్బ‌తీస్తున్నారు. మ‌న దేశంలో కులం, మ‌త‌, లింగ వివ‌క్ష‌ను నిరోధించేందుకు చ‌ట్టాలున్నాయి. కానీ దుర‌దృష్ట‌వ‌శాత్తూ వీరికి ఏ చ‌ట్టం కూడా ర‌క్ష‌ణ క‌ల్పించ‌దు. విద్యార్ధికి చ‌దువు చాలా ముఖ్యం అది ఏ ఆటంకం లేకుండా సాగేందుకు విద్యాల‌యాలు అన్ని చ‌ర్య‌లు చేప‌ట్టాలి. కానీ మ‌న దేశంలో అటువంటి ప‌రిస్థితులు లేవు. ఈ విష‌యంలో విదేశాలు మ‌న కంటే చాలా ముందున్నాయి.  

అడ్మిష‌న్లు నిరాక‌రిస్తున్న విద్యాసంస్థ‌లు 
    
   త‌ల్లిదండ్రులు, స‌మాజంతో పాటు ప్ర‌భుత్వాలు కూడా ట్రాన్స్ జెండ‌ర్ల స‌మ‌స్య‌ను అర్ధం చేసుకోవ‌డం లేదు. మ‌న దేశంలో చాలా విద్యాసంస్థ‌లు, యూనివ‌ర్సిటీలు ట్రాన్స్ జెండ‌ర్ల‌కు అడ్మిష‌న్ల‌ను తిర‌స్కరిస్తున్నాయి. దీంతో బాగా చ‌దువుకుని మంచి వృత్తిలో స్థిర‌ప‌డ‌దామ‌నుకున్న వీరి క‌ల‌లు క‌ల్ల‌ల‌వుతున్నాయి. ఏవో మ‌ణిపాల్ యూనివ‌ర్సిటీ లాంటి ఒక‌టి రెండు సంస్థ‌లు మిన‌హా చాలా యూనివ‌ర్సిటీలు ట్రాన్స్ జెండ‌ర్ల‌ను చేర్చుకునేందుకు నిరాక‌రిస్తున్నారు. దీంతో చాలా మంది త‌మ లింగ గుర్తింపును దాచిపెట్టి అడ్మిష‌న్ల‌ను పొందుతున్నారు. ఆడ‌, మ‌గ త‌ప్ప వీరికి ఎటువంటి హ‌క్కులు లేవ‌న్న‌ట్టుగా ప‌రిస్థితి తయారైంది. దీంతో ట్రాన్స్ జెండ‌ర్ల‌లో అస‌హ‌నం పెరిగిపోతోంది. ఇది మ‌న స‌మాజానికి ఎన్న‌డూ మంచి చేయ‌దు. క‌నీసం అప్లికేష‌న్ల‌లో ఆగ‌, మగ తో పాటు థ‌ర్డ్ జెండ‌ర్ కు కూడా అవ‌కాశం ఉండేలా మార్పులు చేయాలి. కొన్ని రాష్ట్రాల్లో ట్రాన్స్ జెండ‌ర్స్ కు ఓటు హ‌క్కుతో పాటు ఉద్యోగాలు కూడా కల్పిస్తున్నారు. మిగ‌తా రాష్ట్రాలు కూడా ఆ దిశ‌గా ప్ర‌య‌త్నం చేయాలి. 

ప్ర‌భుత్వాలు త‌క్ష‌ణ చ‌ర్య‌లు చేప‌ట్టాలి 
     
     ఇండియా లాంటి ప్రజాస్వామ్య దేశాల్లో చ‌దువు కోవ‌డం  అనేది పౌరుని యొక్క అతి ముఖ్య‌మైన హ‌క్కు. కేవ‌లం చ‌దువు ద్వారానే తెలివైన, ఆరోగ్య‌వంత‌మైన స‌మాజం  త‌యార‌వుతుంది. ఇప్పుడు మ‌న దేశంలో ఆ హ‌క్కు అప‌హ‌స్యం పాలవుతోంది. ఎటువంటి లింగ గుర్తింపు లేని మూడో శ్రేణి వ్య‌క్తులుగా జ‌మ‌క‌ట్టి ట్రాన్స్ జెండ‌ర్ల‌ను చిన్న‌చూపు చూడ‌టం త‌గ‌దు. ముఖ్యంగా వాళ్ల‌ను విద్య నుంచి దూరం చేయ‌డం నాగ‌రిక స‌మాజం చేసే ప‌ని కాదు. విజ్జ్ఞానాన్ని భోధించే విద్యాల‌యాలు సంకుచిత మ‌న‌స్త‌త్వాల‌తో, అర్ధం లేని భ‌యాల‌తో ట్రాన్స్ జెండ‌ర్ల‌కు ప్ర‌వేశాలు క‌ల్పించ‌క‌పోవ‌డం విచార‌క‌రం. మ‌న ప్ర‌భుత్వాలు వీరికి స‌మాజంలో స‌మాన హ‌క్కులు క‌ల్పించ‌క‌పోయినా క‌నీసం వాళ్ల  చ‌దువుకునే హ‌క్కును అయినా కాపాడితే బాగుంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com