"పాఠం" పాటలా సాగాలి!

  పాఠం...ఒక విద్యార్ధి జీవిత గమనాన్ని నిర్దేశించే అమూల్యమైన సంపద. పాఠశాల తరగతి గదిలో నేర్చుకున్న పాఠాలే ఒక పిల్లవాడి భవిష్యత్ ను నిర్ణయిస్తాయి. స్కూళ్లో టీచర్ పాఠం చెప్పే విధానమే పిల్లవాడికి చదువుపై ఆసక్తి కలిగేలా చేస్తుంది. నేను ఈ రోజు ఒక కొత్త విషయం నేర్చుకున్నానన్న భావన విద్యార్ధికి  ఉత్సాహాన్ని ఇస్తుంది. దీంతో అతనికి చదువుపై, పాఠశాలపై ఆసక్తి పెరుగుతుంది. కానీ దురదృష్టవశాత్తూ మన  దేశంలో ఇలా జరగడం లేదు. పిల్లవాడికి ఆసక్తికరంగా పాఠం బోధించడంలో టీచర్లు విఫలమవుతున్నారు. ఫలితంగా మన  దేశంలో చాలా మంది పిల్లలు స్కూళ్లు అంటేనే ఒక జైలులా భావిస్తున్నారు. దీంతో చాలా మంది మధ్యలోనే చదువును మానేస్తున్నారు. ముఖ్యంగా ప్రభుత్వ స్కూళ్లలో ఇలాంటి పరిస్థితులున్నాయి. విద్యార్ధికి ఆసక్తి కలిగించే విషయాలను,కొత్త బోధనాపద్ధతులను ప్రవేశపెట్టడంలోమన పాలకులు తీవ్రంగా విఫలమవుతున్నారు. కేవలం మార్కులు కోసమే విద్యార్ధి మీద బలవంతంగా పాఠం రుద్దితే అది సత్ఫలితాలను ఇవ్వదు సరికదా కొత్త సమస్యలకు దారి తీస్తుంది. 

విదేశాలు చాలా ముందున్నాయి
   ప్ర‌పంచ దేశాలన్ని త‌మ విద్యార్ధుల‌కు కొత్త త‌ర‌హా బోధ‌నా ప‌ద్ధ‌తుల‌ను అందుబాటులోకి తెస్తున్నాయి. ఏ విధంగా పాఠం చెప్తే విద్యార్ధులు ఆస‌క్తిక‌రంగా వింటారో అన్న‌దానిపై విదేశాల్లో నిరంత‌రం అధ్య‌య‌నం జ‌రుగుతూ ఉంటుంది. విద్యార్ధులు ఏం చేస్తే హాయిగా పాఠం వింటారో తెలుసుకుని దానికి అనుగుణంగా వారి విద్యావిధానాల్లో మార్పులు చేసుకుంటున్నారు. కొన్ని యూర‌ప్ దేశాల్లో దీని కోసం ప్ర‌త్యేకంగా ఒక విభాగ‌మే ఉంది. అయితే మ‌న దేశంలో మాత్రం ఇప్ప‌టికీ పాత మూస ప‌ద్ధ‌తుల్లో పాఠాలు చెపుతూ విద్యార్ధుల‌కు త‌ర‌గ‌తి గ‌ది అంటే ఆస‌క్తిని చంపేస్తున్నారు. ఇది ఇప్పుడు మేము చెపుతున్న‌ది కాదు చాలా రోజుల నుంచి ఈ విష‌యంపై ఎన్నో స‌ర్వే సంస్థ‌లు వెల్ల‌డించిన క‌ఠోర వాస్త‌వాలు. 

పిల్లలు ఆసక్తితో నేర్చుకోవాలి

   వంద మంది పిల్ల‌ల‌ను ఒక క్లాస్ రూమ్ లో పెట్టి టీచ‌ర్ ఏదో పాఠం చెప్పుకుంటూ పోతే వినే పిల్లాడికి అది ఏమాత్రం ఆస‌క్తిక‌రంగా అనిపించ‌దు. పైపెచ్చు ఆ పాఠంపై క్ర‌మంగా విర‌క్తి పెంచుకోవ‌డం మొద‌లు పెడ‌తాడు. ప్ర‌స్తుతం మ‌న దేశంలో చాలా స్కూళ్ల‌లో జ‌రుగుతున్న త‌తంగం ఇదే. దీంతో పిల్ల‌లు మార్కుల కోసం ఏదో మొక్కుబ‌డిగా ప‌రీక్ష‌ల ముందు చ‌దువుతున్నారు త‌ప్పించి ఒక ఆస‌క్తితో నేర్చుకోవాల‌న్న జిజ్ఞాస‌తో చ‌దవ‌డం లేదు. ఈ ప‌రిస్థితి ఇలానే కొన‌సాగితే రానున్న రోజుల్లో మ‌న విద్యా వ్య‌వ‌స్థ‌లో ప‌రిస్థితులు మ‌రింత దిగ‌జారే అవ‌కాశం ఉంది. ఇప్ప‌టికే ఒక క్లాస్ దాటి వెళ్లిన పిల్లాడిని గ‌త ఏడాది ఏం నేర్చుకున్నావు అని అడిగితే క‌నీసం రెండు ముక్క‌లు కూడా చెప్ప‌లేని ప‌రిస్థితి. పిల్ల‌ల్లో మాన‌సిక వికాసం పెంచేందుకు మ‌న పాఠ్యాంశాల్లో ఎన్నో విష‌యాల‌ను ప్ర‌భుత్వాలు పొందుప‌రుస్తున్నాయి. అయితే అవి పిల్ల‌ల మెడ‌ళ్ల‌లోకి వెళ్తున్నాయా లేదా అన్న విష‌యాన్ని మాత్రం మ‌న పాల‌కులు విస్మ‌రిస్తున్నారు.

పాఠంలో విద్యార్ధులను భాగస్వామ్యులను చేయాలి

    తాజాగా మ‌న తెలుగు రాష్ట్రాల్లో ప‌ర్య‌టించిన హార్వ‌ర్డ్ ప్రొఫెస‌ర్ వెనిజాబిజోల్ పాఠ‌శాలల్లో విద్యార్ధుల‌కు బోధ‌న ఎలా ఉండాల‌న్న‌దానిపై అద్భుత‌మైన సూచ‌న చేశారు. పాఠం చెపుతున్న‌ప్పుడు అందులో విద్యార్ధుల‌ను భాగస్వాముల‌ను చేయాల‌ని అప్పుడు వారికి దానిపై ఆస‌క్తి క‌లుగుతుంద‌ని చెప్పారు. విద్యార్ధుల‌ను చిన్న గ్రూపులుగా విడ‌దీసి, వారి మ‌ధ్య చ‌ర్చ‌కు అవ‌కాశ‌మివ్వాల‌ని సూచించారు. ఈ విధానం ద్వారా మంచి ఫ‌లితాలు వ‌స్తాయ‌ని వెనిజా వెల్ల‌డించారు. ఇలా బృందాలుగా విడిపోయి చ‌ర్చించ‌డం మూలాన వారు ప్ర‌శ్నించ‌డం నేర్చుకుంటార‌ని , దీని ద్వారా ఆ పాఠం వాళ్ల‌కు చాలా రోజులు మ‌న‌స్సులో ఉండిపోతుంద‌ని ఆమె వివ‌రించారు. 

మొక్కుబడి చర్యలు జాతికే నష్టం తెస్తాయి 

  ఇలాంటి ప్రొఫెస‌ర్లు చెప్పిన‌ప్పుడు మ‌న విద్యా శాఖ అధికారులు ఏదో మొక్కుబ‌డిగా వినడం త‌ర్వాత మ‌ర్చిపోవ‌డం చేస్తున్నారు. ఈ ప‌రిణామం మ‌న విద్యా వ్య‌వ‌స్థ‌కు మేలు చేయ‌దు. విద్యార్ధుల‌కు స‌రైన రీతిలో విద్య అంద‌న‌ప్పుడు అది మొత్తం మ‌న జాతికే న‌ష్టంగా ప‌రిణ‌మిస్తుంది. దేశాన్ని ముందుకు తీసుకెళ్లే భావి శాస్త్ర‌వేత్తలు, మేధావులు పాఠ‌శాల నుంచే త‌యారు కావాలి. అలాంటి పాఠ‌శాల‌లోనే ప‌రిస్థితులు ఇంత ఘోరంగా ఉంటే మ‌న విద్యా రంగాన్ని, మ‌న దేశ భ‌విష్య‌త్ ను ఎవ‌రు బాగు చేస్తారు. ఈ విష‌యంపై మ‌న ప్ర‌భుత్వాలు స‌రైన శ్ర‌ద్ధ తీసుకుంటేనే మంచి ఫ‌లితాలు వ‌స్తాయి. లేకుంటే ఎప్ప‌టిలానే ఎక్క‌డి గొంగ‌డి అక్క‌డే అన్న చందంగా మ‌న పిల్ల‌కు తెలివితేట‌ల స్థాయి అక్క‌డే ఉంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com