దూసుకొచ్చిన సరికొత్త సూపర్ కెరియర్!

   ప్రపంచ ఆర్థిక పరిణామాలు చాలా వేగంగా మారిపోతున్నాయి. కొత్త ఆవిష్కరణలు, ఆలోచనలు నూతన అవకాశాలకు దారులు పరుస్తున్నాయి.  ఇంటర్నెట్ ఆధారిత డిజిటల్ వ్యవస్థే ఇప్పుడు ఆర్థిక వ్యవస్థలకు ఊతంగా మారిపోయింది. దీంతో  కంపెనీలు తమ వ్యూహాలు, కార్యక్రమాలను పూర్తిగా  మార్చుకున్నాయి. పూర్తిగా మారిపోయిన సాంకేతిక పరి‌జ్జానాన్ని ఉపయోగించుకోకుంటే ఏ కంపెనీ మనుగడ సాగించలేని పరిస్థితి ఏర్పడింది. ఈ డిజిటల్ యుగంలో మార్కెటింగ్ వ్యూహాలే పూర్తిగా మారిపోయాయి. తక్కువ ఖర్చుతో తమ ఉత్పత్తులను ప్రజల చెంతకు తీసుకెళ్లగలిగే సంస్థలే మనుగడ సాగించగలుగుతున్నాయి. ముఖ్యంగా సోషల్ మీడియా బాగా విస్తరించిన తర్వాత ప్రజల ఆలోచనా విధానం, కొనుగోలు అలవాట్లలో స్పష్టమైన మార్పు వచ్చింది. దీంతో తమ బ్రాండ్ ఇమేజ్ పెంచుకోవాలన్నా, తమ ఉత్పత్తులను ప్రచారం చేసుకోవాలన్నా కంపెనీలకు  సోషల్ మీడియానే ప్రధాన వేదికగా మారింది. దీంతో డిజిటల్ మార్కెటింగ్ అనే కొత్త కెరియర్ ఊపిరి పోసుకుంది.

అవకాశాల గని..డిజిటల్ మార్కెటింగ్ 

      ఈ స్మార్ట్ యుగంలో ఇంటర్నెట్ వినియోగిస్తున్న వారి సంఖ్య అనూహ్యంగా పెరిగిపోయింది. మన దేశ జనాభాలో దాదాపు సగం మంది ఇంటర్నెట్ కనెక్షన్ ఉన్న స్మార్ట్ ఫోన్లను వాడుతున్నారు. వీరిలో ప్రతీ ఒక్కరు సోషల్ మీడియాలో యాక్టివ్ గా ఉన్నారు. సరిగ్గా ఇక్కడే కంపెనీలు తమ వ్యూహాలకు పదును పెట్టాయి.   ప్రపంచంలో ఫేస్ బుక్ వాడుతున్న వారి సంఖ్య 100 కోట్లకు పైమాటే.  ఇక ట్విట్టర్ యూజర్స్ 274 మిలియన్ల మంది ఉంటే వాట్స్ యాప్ ను వినియోగిస్తున్న వారి సంఖ్య 600 మిలియన్లకు పై మాటే. వీటితో పాటు లింకిడ్ ఇన్, ఇన్ స్టా గ్రామ్, గూగుల్ ప్లస్, మీట్ అప్, మీట్ మీ, నెట్ లాగ్ వంటి ఇతర సామాజిక మాధ్యమాలను వాడుతున్న వారి సంఖ్య కూడా అధికమే. దీంతో ఈ కొత్త విప్లవాత్మక సోషల్ మీడియా వేదిక ద్వారా కంపెనీలు తమ వస్తువులను, సేవలను ప్రజల చెంతకు తీసుకెళుతున్నాయి.  ఎలాంటి ఖర్చు లేకుండానే మార్కెటింగ్ వ్యూహాలను అమలు చేయకుండానే ప్రజల్లో తమ వస్తువులకు ప్రచారం కల్పించుకోవడం అన్నది వాటికి లాభదాయకంగా మారింది. ఖర్చు భారీ ఎత్తున తగ్గిపోవడంతో డిజిటల్ మార్కెటింగ్ పైనే అగ్రశ్రేణి వస్తు ఉత్పత్తి సంస్థలు , బ్యాంకులు, బీమా కంపెనీలు, ఆహార పరిశ్రమలు, రియల్ ఎస్టేట్, హాస్పటల్స్ వంటివి డిజిటల్ మార్కెటింగ్ పై దృష్టి సారించాయి.  ప్రత్యేక ఫేస్ బుక్ ఖాతాలు, ట్విట్టర్ ఖాతాలు తెరిచి తమ బ్రాండ్ ను, తమ ఉత్పత్తులను డిజిటల్ మార్కెటింగ్ ద్వారా ప్రచారం చేసుకుంటున్నాయి.  దీంతో వీరికి డిజిటల్ మార్కెటింగ్ నిపుణుల అవసరం ఏర్పడింది.  ప్రస్తుత సర్వేల ప్రకారం రానున్న రోజుల్లో కంపెనీల అవసరాలు తీర్చాలంటే లక్షల సంఖ్యలో డిజిటల్ మార్కెటింగ్ నిపుణులు కావాల్సిందే.

భారీ సంఖ్యలో ఉద్యోగాలు 

    డిజిటల్ మార్కెటింగ్ లో అవసరమైన నిపుణుల సంఖ్యను తీసుకుంటే అది భారీగానే ఉంటుంది. డిజిటల్ మార్కెటింగ్ కు ప్రధానంగా కావాల్సింది వెబ్ డిజైనర్లు, గ్రాఫిక్ డిజైనర్లు, కంటెంట్ రైటర్లు, డేటా అనలిస్టులు.   ఇందులో కంటెంట్ రైటర్లు కంపెనీ అందించే వస్తువులు, సేవల గురించి తక్కువ పదాలతో వినియోగదారులను ఆకట్టుకునేలా సూటిగా రాయగలగాలి. అలాగే వీడియోలు, ఆకర్షణీయమైన టెంప్లెట్ లతో కంపెనీ, సేవలు, వస్తువుల ప్రత్యేకతను వివరించగలగాలి. ఇక వెబ్ డిజైనర్లు కంపెనీ వెబ్ సైట్ ను సులువుగా, సరళంగా ఉండేలా తయారు చేయాలి. ఫేస్ బుక్ లో ఏర్పాటు చేసిన ప్రత్యేక పేజీని ఒపెన్ చేస్తే అందుకు అనుగుణంగా సైట్ ను తీర్చిదిద్దాలి. డిజిటల్ మార్కెటింగ్ లో డేటా అనలిస్ట్ ల పాత్ర కూడా కీలకమే. ఎంత మంది ఏయే వెబ్ సైట్లను చూస్తున్నారు?  తమ వెబ్ సైట్ ను ఎంత మంది చూశారు? ఏయే వస్తువులను వినియోగదారులు ఇష్టపడుతున్నారు. వినియోగదారుల అలవాట్లు ఎలా ఉన్నాయి అన్న విషయాలను విశ్లేషించాల్సి ఉంటుంది. వీటితో పాటు సెర్చ్ ఇంజిన్ ఆప్టిమైజేషన్, (ఎస్ఈఓ), సెర్చ్ ఇంజిన్ మార్కెటింగ్ (ఎస్ఈఎమ్),  సోషల్ మీడియా మార్కెటింగ్, వెబ్ అనలిటిక్స్, ఎస్ఎమ్ఎస్ మార్కెటింగ్ , ఈ మెయిల్ మార్కెటింగ్, అఫిలియేట్ మార్కెటింగ్, కంటెంట్ స్ట్రాటజీ, డిజిటల్ అకౌంట్ మేనేజ్ మెంట్, డిజిటల్ కాపీ రైటింగ్, డిజిటల్ సీఆర్ఎమ్, ఈ కామర్స్, మొబైల్ కామర్స్, మొబైల్ యాప్ డెవలప్ మెంట్, మొబైల్ మార్కెటింగ్ వంటి ఎన్నో విభాగాలు ఉన్నాయి.  వీటిలో అర్హతలను బట్టి వివిధ హోదాల్లో ఉద్యోగాలు పొందే అవకాశాలున్నాయి. 

ఇండియా...డిజిటల్ ఎకానమీకి గమ్యస్థానం

   మన దేశంలో ఇంటర్నెట్ ను వినియోగించే వారి సంఖ్య గడిచిన ఐదేళ్లలో ఊహించని విధంగా పెరిగిపోయింది. ముఖ్యంగా స్మార్ట్ ఫోన్ల వినియోగం పెరిగాక  ఇంటర్నెట్ తో పాటు సోషల్ మీడియా అనేది జీవితంలో ఒక భాగంగా మారిపోయింది.  ప్రస్తుతం ప్రపంచంలో ఎక్కువగా ఇంటర్నెట్ వినియోగిస్తున్న దేశాల్లో మన దేశంలో టాప్ 3 లో ఉంది. స్మార్ట్ ఫోన్ల వినియోగం పెరగడంతో ఇంటర్నెట్ వాడకం కూడా పెరిగిపోయింది. ప్రస్తుతం దేశంలో  మొబైల్ ద్వారా ఇంటర్నెట్ ఉపయోగిస్తున్నవారి సంఖ్య 130 మిలియన్లకు పైమాటే. ఇందులో 30 మిలియన్ల మంది గ్రామీణ ప్రాంతం వారే. ఇప్పటికే ప్రపంచంలో అత్యధింగా ఫేస్ బుక్ వినియోగదార్లు ఉన్న దేశం మనదే.  ఇదంతా డిజిటల్ మార్కెటింగ్ లో అపార అవకాశాలకు రాచబాట పరుస్తోంది. ఆన్‌లైన్ షాపింగ్ తో పాటు ఎంటర్‌టైన్‌మెంట్, సామాజికచర్చలు,న్యూస్ తెలుసుకోవడానికి డిజిటల్ మీడియాపైనే అధికంగా ఆధారపడుతున్నారు. ఇక సమాచార మార్పిడి, బిగ్ డేటా, ఆర్టిఫిషియల్ ఇంటెలిజెన్స్ వంటి విభాగాల్లో ఇండియా దూసుకుపోతోంది. రానున్న రోజుల్లో డేటా వినియోగమే ఆర్థిక వ్యవస్థలను శాసిస్తుందని అంచనాలు ఉన్నాయి. ముఖ్యంగా డిజిటల్ ఎకానమీ అనే కొత్త సిద్ధాంతానికి కూడా అడుగులు పడుతున్నాయి.  డిజిటల్ యుగంలో ఎవరైతే అవకాశాలను అందిపుచ్చుకుంటారో వారే ప్రపంచ శక్తులుగా ఎదుగుతారని నిపుణులు చెపుతున్నారు. 

నైపుణ్యాలను పెంచుకుంటే భవిష్యత్ మీదే

    డిజిటల్ మార్కెటింగ్ కెరియర్ లో  సాంకేతిక నైపుణ్యాలదే కీలక పాత్ర.  ఆ విషయంలో ఎప్పటికప్పుడు అప్ డేట్ కాకపోతే ఇబ్బందులు తప్పవు. కానీ సరైన ప్రతిభ కనబరిస్తే ఇది మంచి కెరియర్ అని నిపుణులు చెపుతున్నారు. ఇందులో భాగంగానే కొన్ని కాలేజీలు, యూనికవర్సిటీలు డిజిటల్ మార్కెటింగ్ కోర్సును కెరియర్ గా మలిచేందుకు రెడీ అవుతున్నాయి. సోషల్ మార్కెటింగ్ లో అభ్యర్ధులు ఎలా విజయం సాధించాలన్న దానిపై ప్రత్యేకంగా దృష్టి సారించాయి. ఇక డిజిటల్ మార్కెటింగ్ రంగంలోకి వెళ్లాలనుకుంటున్న వాళ్లు మంచి సంస్థలో శిక్షణ తీసుకోవడంతో పాటు సొంతంగా నైపుణ్యాలను పెంచుకోవడంపై దృష్టి పెట్టాలి. ఎప్పటికప్పుడు అప్ డేట్ అవ్వగలిగే సామర్ధ్యం ఉండి డిజిటల్ మార్కెటింగ్ పై ఆసక్తి ఉంటే విద్యార్ధులు ఈ సూపర్ కెరియర్ పై దృష్టి సారిస్తే మంచిది.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com