సాఫ్ట్ వేర్ అంటే ఫ్యూచ‌ర్ "హార్డ్" అయిపోద్ది..!

     "ఏరా..ఏం ఉద్యోగం చేయాల‌నుకుంటున్నావు?" అని మ‌న‌ స్నేహితుల్లో ఓ ప‌దిమందిని అడిగి చూడండి. అందులో దాదాపు 8 మంది చెప్పే స‌మాధానం "సాఫ్ట్ వేర్ ఇంజినీర్". డాక్ట‌ర్స్ వంటి వృత్తి విద్య‌ను చ‌దివిన వారిని ప‌క్క‌న పెడితే ఇంజినీరింగ్ లో ఏ బ్రాంచ్ చేసినప్ప‌టికీ ప్ర‌తీ స్టూడెంట్ అంతిమ ల‌క్ష్యం సాఫ్ట్ వేర్ ఇంజినీర్ కావ‌డ‌మే. మెకానిక‌ల్,సివిల్ వంటి కోర్సులు చేసిన వారూ ఐటీ ఉద్యోగ‌మే చేయాల‌నుకుంటున్నారంటే సాఫ్ట్ వేర్ జాబ్ కు ఉన్న క్రేజ్ అర్ధ‌మ‌వుతుంది. ఆక‌ర్ష‌ణీయ‌మైన జీతాలు, వారానికి ఐదు రోజులే ప‌నిదినాలు అన్న విష‌యాన్నే ప్రాతిప‌దిక‌గా తీసుకుని చ‌దువు పూర్తయిన వెంట‌నే సాఫ్ట్ వేర్ ఇంజినీర్ అయిపోవాల‌ని విద్యార్ధులు క‌ల‌లు కంటున్నారు. స‌రిగ్గా ఇక్క‌డే మాన‌వ వన‌రుల విష‌యంలో మ‌న దేశం పెద్ద విప‌త్తును ఎదుర్కోబోతోంది. అంద‌రూ సాఫ్ట్ వేర్ బాట ప‌ట్టడంతో కీల‌క‌మైన త‌యారీ రంగంతో పాటు ఇత‌ర రంగాల‌కు నిపుణుల కొర‌త ఏర్ప‌డుతోంది. మ‌రోవైపు ఆటోమేష‌న్ తో ఐటీ రంగంలో ఉద్యోగాలు కుదింపు జ‌రిగితే సాఫ్ట్ వేర్ ఉద్యోగుల ప‌రిస్థితి ఏంటి? మాన‌వ వ‌న‌రులు వినియోగంలో మ‌న ప్ర‌భుత్వాల అనాలోచిత విధానాన్ని ఇది క‌ళ్ల‌కు క‌డుతోంది. 

ఆర్థిక వ్య‌వ‌స్థ‌ల‌కు చోద‌క శ‌క్తి మాన‌వ వ‌న‌రులే

    ప్ర‌పంచంలో ఇప్పుడున్న కొత్త‌ ఆర్థిక వ్య‌వ‌స్థ‌ల్లో మానవ వ‌న‌రుల‌దే కీల‌క పాత్ర‌. ఈ న‌యా జ‌మానాలో ప్ర‌పంచ ఆర్థిక శ‌క్తిగా ఎద‌గాలంటే ఒక దేశానికి కావాల్సింది భారీ సైన్య‌మో, అణ్వాయుధాలో కాదు నిపుణులైన, ఆరోగ్య‌వంత‌మైన ప్ర‌జ‌లు. ప్ర‌పంచ వ్యాప్తంగా వేగంగా మారిపోతున్న రాజ‌కీయ ప‌రిణామాలు, టెక్నాల‌జీ మార్పులు, కొత్త ఆవిష్క‌ర‌ణ‌లు ఇదే విష‌యాన్ని స్ప‌ష్టం చేస్తున్నాయి. ఒక‌ప్పుడు భారంగా భావించిన అధిక జనాభాను ఇప్పుడు సంప‌ద‌గా ప‌రిగ‌ణిస్తున్నారు. ప‌శ్చిమ దేశాలు, యూర‌ప్ స‌మాజం ఇప్పటికే ఈ విష‌యాన్ని అంగీకరించింది. భారంగా మారిన‌ అధిక జ‌నాభానే ఆర్ధిక వ్య‌వ‌స్థ‌కు చోద‌క శ‌క్తిగా మార్చుకుని చైనా సాధించిన ప్ర‌గ‌తి ఆర్థిక నిపుణులను ఆలోచ‌న‌లో ప‌డేసింది. నిపుణులైన మాన‌వ వ‌న‌రుల‌నే ఆయుధంగా మలుచుకుని ప్ర‌పంచంలోనే అతిపెద్ద ఆర్థిక శ‌క్తిగా చైనా అవ‌త‌రించ‌డం ఆర్థిక విధానాల్లో కొత్త మార్పుల‌కు తెర‌లేపింది. త‌యారీ రంగంలో ల‌క్ష‌లాది నిపుణుల‌ను త‌యారు చేసుకుని త‌న ఉత్ప‌త్తుల‌తో ప్ర‌పంచాన్ని ముంచెత్తింది. 

ఉద్యోగం అంటే సాఫ్ట్ వేర్ మాత్ర‌మేనా? 

    "అన్నీ ఉన్నా అల్లుడి నోట్లో శ‌ని" అన్న‌ట్టు ఉంది మ‌న దేశ ప‌రిస్థితి. చైనా లానే మ‌న‌కు కూడా మాన‌వ వ‌న‌రుల‌కు కొద‌వ‌లేదు. 35 సంవ‌త్స‌రాల లోపు ఉన్న యువ‌త‌రం మ‌న దేశంలో దాదాపు 45 కోట్ల మంది వ‌ర‌కూ ఉన్నారు. అయితే వీరిని స‌రైన ప‌ద్ధ‌తిలో ఉప‌యోగించుకోవ‌డంలో కొన్ని పొర‌పాట్లు జ‌రుగుతున్నాయి. మ‌లి విడ‌త‌ ఆర్థిక సంస్క‌ర‌ణ‌ల్లో భాగంగా ఐటీ ఉత్ప‌త్తుల అభివృద్ధి, ఎగుమ‌తుల‌పై మ‌న దేశం అధికంగా దృష్టి సారించింది. అందులో విజ‌యం సాధించింది కూడా. ఐటీ ఎగుమ‌తుల్లో మ‌న దేశానిదే అగ్ర‌స్థానం. ఫ‌లితంగా ల‌క్ష‌లాది మంది నిపుణుల ఐటీ రంగంలో ఉపాధి పొందారు . అక్కడ వ‌ర‌కూ బాగానే ఉంది. కానీ ఒక్క ఐటీ రంగంపైనే దృష్టి సారించి మ‌న దేశం కీల‌క‌మైన త‌యారీ రంగంపై నిర్ల‌క్ష్యం ప్ర‌ద‌ర్శించింది. కాలేజీ నుంచి బ‌య‌ట‌కు వ‌స్తున్న ఇంజినీర్లు ఐటీ రంగంవైపు దృష్టి సారిస్తున్నారు కానీ ఇత‌ర రంగాల‌వైపు క‌న్నెత్తి చూడ‌టం లేదు. దీంతో ఇప్పుడు త‌యారీ రంగం నిపుణుల కొర‌త‌ను ఎదుర్కొంటోంది. పాల‌క వ‌ర్గాల్లో దూర‌దృష్టి లోపించ‌డం ఈ ప‌రిస్థితికి కార‌ణం. మ‌రోవైపు ఐటీ రంగంలో నిపుణులు ప‌రిమితికి మించి పెరిగిపోవ‌డంతో ఇప్పుడు కంపెనీలు ఖ‌ర్చు త‌గ్గింపు చ‌ర్య‌ల‌ను చేప‌డుతున్నాయి. ఆటోమేష‌న్ తో వేలాది మంది ఉద్యోగుల‌ను తొలిగించాల‌ని కంపెనీలు ప్ర‌ణాళిక‌లు రచిస్తున్నాయి. అప్పుడు ఉద్యోగం కోల్పోయిన నిపుణుల ప‌రిస్థితి ఏంటి అన్న ప్ర‌శ్న‌లు ఉత్ప‌న్న‌మ‌వుతున్నాయి. వీళ్ల మ‌ళ్లీ త‌మ కెరీర్ ను పున‌ర్ నిర్మించుకునేందుకు తీవ్రంగా శ్ర‌మించాల్సి ఉంటుంది. రానున్న రోజుల్లో ఇటువంటి ప‌రిస్థితులు ఉత్ప‌న్నమ‌య్యే ప్ర‌మాదం క‌నిపిస్తోంది. 

అతి ఎప్పుడూ అన‌ర్ధ‌దాయ‌క‌మే..!

   చైనా అంత కాకపోయినా గ‌డిచిన ద‌శాబ్ద కాలంలో మ‌న దేశం కూడా వేగ‌వంత‌మైన ఆర్థిక వ్య‌వ‌స్థల్లో ఒక‌టిగా నిలిచింది. దీనిలో ఐటీ రంగం పాత్ర కూడా ఉంది. మ‌న‌కు విలువైన విదేశీ మార‌క ద్ర‌వ్యాన్ని తెచ్చిపెట్ట‌డంలో ఐటీ ఎగుమ‌తుల‌దే కీల‌క పాత్ర. మ‌న‌తో పోల్చుకుంటే సాఫ్ట్ వేర్ అభివృద్ధి, ఎగుమ‌తుల్లో చాలా వెనుక‌బడి ఉంది. అయినా వృద్ధి రేటు వాళ్లు మ‌న‌క‌న్నా ముందుండ‌డానికి కార‌ణం ఇత‌ర రంగాల‌పై వాళ్ల కున్న ప‌ట్టు. మ‌నం మాత్రం ఐటీని ప‌ట్టుకుని కీల‌క‌మైన త‌యారీ రంగాన్ని నిర్ల‌క్ష్యం చేస్తున్నాం. ఐఐపీ ఇండెక్స్ లో ప్ర‌ధాన వెయిటేజీ కలిగిన త‌యారీ రంగం పుంజుకుంటేనే మ‌నం రెండంకెల వృద్ధి రేటును సాధించ‌గ‌లం. లేకుంటే ఎన్ని ఐటీ ఎగుమ‌తులు చేసినా మ‌నం ప్ర‌పంచ ఆర్థిక శ‌క్తిగా ఎద‌గ‌లేం. 

సాఫ్ట్ వేర్ అంటూ కూర్చుంటే క‌ష్ట‌మే!

    మ‌న దేశంలో మాన‌వ వ‌న‌రుల‌కు కొర‌త లేదు. ప‌నిచేసే స‌త్తా ఉన్న యువ‌త‌రం అధికంగా ఉంది. అయితే ఇంజినీర్లు అంతా సాఫ్ట్ వేర్ బాట ప‌ట్ట‌కుండా ప్ర‌భుత్వం చ‌ర్య‌లు చేప‌ట్టాలి. అదే విధంగా సాంకేతిక విద్యలో స‌మూల మార్పులు చేయాలి. పాఠ‌శాల స్థాయి నుంచే వారి నాణ్య‌మైన శిక్ష‌ణ‌, మంచి పౌష్టికాహారం అందించాలి. అదే విధంగా సాంకేతిక విద్య‌లో పారిశ్రామిక రంగాన్ని భాగ‌స్వాముల‌ను చేసి వారికి అవ‌స‌ర‌మైన నిపుణుల‌ను త‌యారు చేయాలి. త‌యారీ రంగానికి అవ‌స‌ర‌మైన నిపుణుల త‌యారీని వేగ‌వంతం చేయాలి. నైపుణ్యం ఉన్న మెకానిక‌ల్  రంగ నిపుణులు ఐటీ రంగం బాట ప‌ట్ట‌కుండా వారికి భ‌రోసా క‌ల్పించాలి. కార్మిక సంస్క‌ర‌ణ‌లు తీసుకొచ్చి ఆక‌ర్ష‌ణీయ‌మైన జీతాలు, సామాజిక భ‌ద్ర‌త క‌ల్పిస్తే రానున్న రోజుల్లో నిపుణుల కొర‌త‌ను అధిగ‌మించి త‌యారీ రంగం కొత్త పుంతలు తొక్కుతుంది. విద్యార్ధులు కూడా సాఫ్ట్ వేర్ అంటూ అంద‌రూ ఒకే రంగంపై దృష్టి పెట్ట‌కుండా మంచి భ‌విష్య‌త్ ఉన్న ఇత‌ర రంగాల‌పై దృష్టి సారించాలి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com