యూఎస్ఏ టూ యూఎస్ఏ..!

    మేధో వ‌ల‌స‌ల పునాదుల‌పై నిర్మించ‌బ‌డ్డ అమెరికా ఇప్పుడు అదే వ‌ల‌స‌ల‌పై విషం కక్కుతోంది. ప్ర‌పంచం న‌ల‌మూలల నుంచి నాణ్య‌మైన నిపుణుల త‌న మేధా శ‌క్తితో అమెరికా ఆర్థిక వ్య‌వ‌స్థ‌ను బ‌లంగా త‌యారు చేశారు. నాణ్య‌మైన నిపుణులు అని ఎందుకు అనాల్సి వ‌స్తుందంటే..బాగా తెలివైన వారు మాత్ర‌మే ఇప్ప‌టివ‌ర‌కూ అమెరికా వెళ్లారు. మ‌న దేశంలో స‌రైన గుర్తింపు, అధిక వేత‌నాలు లేక‌పోవ‌డంతో ఇక్క‌డ వివిధ స్థాయిల్లో ప్ర‌ధ‌ములుగా నిలిచిన వారే అమెరికా విమాన‌మెక్కేశారు. అలాంటి అత్యుత్త‌మ ప‌నివారు అహ‌ర్నిశ‌లు ప‌నిచేయ‌డంతో అమెరికా ప్రపంచంలో అగ్ర‌శ్రేణి ఆర్థిక వ్య‌వ‌స్థ‌గా నిలిచింది. దీంతో ఇండియా వంటి వ‌ర్ధ‌మాన దేశాలు, మేధావులు వల‌సలు పోవ‌డంతో అభివృద్ధిలో వెన‌క‌బ‌డ్డాయి. ఇండియా నుంచి వెళ్లిన‌ ఇలాంటి నిపుణులు అమెరికాలో  ల‌క్ష‌లాది మంది ఉన్నారు.  ముఖ్యంగా యూఎస్ఏ టూ యూఎస్ ఏ కి అధికంగా వ‌ల‌స‌లు జ‌రిగాయి. యూఎస్ఏ అంటే యూనిటైడ్ స్టేట్స్ ఆఫ్ ఆంధ్ర‌ప‌దేశ్ నుంచి యూనిటైడ్ స్టేట్స్ ఆఫ్ అమెరికాకు గ‌డిచిన రెండు, మూడు ద‌శాబ్దాల్లో తెలుగువారు ల‌క్ష‌ల్లో వెళ్లిపోయారు. 

అమెరికాకు ఏమైంది?  ఒక‌వైపు వివ‌క్ష‌, మ‌రోవైపు సంకుచితం

     స్వేచ్ఛా, స్వాతంత్రం, స‌మాన‌త్వాల‌కు ప్ర‌తినిధిగా చెప్పుకునే అమెరికా మాట‌లు శుద్ధ అబద్ధాల‌ని ఇప్పుడు ప్ర‌పంచానికి తేట‌తెల్ల‌మైపోయింది. గ‌డిచిన కొన్ని రోజులుగా ఆ దేశంలో జ‌రుగుతున్న జాత్యాంహ‌కార దాడులు మాన‌వ‌త్వంపై మాయ‌ని మ‌చ్చ‌గా మిగిలిపోతున్నాయి. ముఖ్యంగా అమెరికాలోని భార‌తీయులపై ఒక్క‌సారిగా దాడులు పెరిగాయి. అమెరికా అధ్య‌క్షునిగా డొనాల్డ్ ట్రంప్ ఎన్నికైన‌ ద‌గ్గ‌ర్నుంచి నివురుగ‌ప్పిన నిప్పులా ఉన్న వివ‌క్ష ఒక్క‌సారిగా ఒళ్లు విరుచుకుంది. ప్ర‌చారం ప్రారంభం నుంచి విదేశీయుల‌పై విషం కక్కుతున్న ట్రంప్, వారిపై అమెరిక‌న్ల‌లో  విద్వేషాన్ని నూరిపోశారు. స్థానికుల‌ ఉద్యోగాల‌ను విదేశీయ‌లు దోచుకుంటున్నార‌న్నట్రంప్ మాట‌లు అమెరిక‌న్ల‌లో బాగానే నాటుకుపోయాయి. ఫలితం తాజాగా జ‌రుగుతున్న విద్వేష పూరిత దాడులు.  

తెలుగు రాష్ట్రాల్లో అల‌జ‌డి  

   
  అమెరికాలో ఇటీవ‌ల‌నే జాత్యాంహకార దాడ‌కి బ‌లైపోయిన‌ కూచిభోట్ల శ్రీనివాస్ ఉదంతంలో అమెరికాలో ఉన్న భార‌తీయుల్లో ఆందోళ‌న మొదలైంది.అమెరికాలో భార‌తీయుల‌పై వ్య‌తిరేక‌త ఏ స్థాయిలో ఉంద‌న్న విష‌యాన్ని శ్రీనివాస్ హ‌త్య క‌ళ్ల‌కు క‌ట్టింది.  దీంతో ఇప్పుడు అమెరికాలోని తెలుగు వారు కోపం, భ‌యం క‌ల‌గ‌లిపిన స్థితిలో కొట్టుమిట్టాడుతున్నారు. అంద‌మైన భ‌విష్య‌త్ ను ఊహించుకుంటూ అమెరికాకు వెళ్లిన వీరికి భవిష్య‌త్ భ‌యం పుట్టిస్తోంది. ఇక‌ప్పుడు యూనిటైడ్ స్టేట్స్ ఆఫ్ ఆంధ్ర‌ప్ర‌దేశ్ నుంచి యూనిటైడ్ స్టేట్స్ ఆఫ్ అమెరికాకు వెళ్లిన వారు ఇప్పుడు స్వ‌దేశం వైపు దృష్టి సారిస్తున్నారు. అమెరికాలో రెండు తెలుగు రాష్ట్రాల నుంచి దాదాపు 10 ల‌క్ష‌ల మంది వ‌ర‌కూ తెలుగు వారు ఉన్నారు. తాజా ఘ‌ట‌న‌ల‌తో సొంత రాష్ట్రాల‌కు వ‌చ్చేయాల‌ని అధిక శాతం మంది ఆలోచిస్తున్న‌ట్టు అక్క‌డి ప్ర‌తినిధులు చెపుతున్నారు.  ఇక విద్యార్ధులు కూడా అమెరికా ఊసు మాని ఇత‌ర దేశాల వైపు దృష్టి సారిస్తున్నారు. 

వివ‌క్ష‌ను పెంచి పోషిస్తున్న ట్రంప్ 

   అమెరికా అధ్య‌క్ష అభ్య‌ర్ధిగా ఎన్నిక‌ల బ‌రిలో వివక్షపూరిత వ్యాఖ్య‌లు చేసిన ట్రంప్ ను ఎవ‌రూ పెద్ద‌గా ప‌ట్టించుకోలేదు. ఏదో ఓట్ల కోసం ఇలా అడ్డ‌మైన గ‌డ్డి క‌రుస్తున్నాడ‌ని స‌రిపెట్టుకున్నారు. అయితే ఎవ‌రూ ఊహించ‌ని విధంగా అధ్యక్ష ఎన్నిక‌ల్లో విజ‌యం ఢంకా మోగించిన ట్రంప్, అధ్య‌క్షునిగా ప్ర‌మాణ స్వీకారం చేసిన త‌ర్వాత కూడా హుందాగా న‌డుచుకోవ‌డం లేదు. హెచ్ 1 బీ వీసా నిబంధ‌న‌ల్లో మార్పులు, భార‌తీయులు అమెరిక‌న్ల ఉద్యోగాల‌ను కొల్ల‌గొడుతున్నారంటూ చేసిన వ్యాఖ్య‌లు అగ్నికి ఆజ్యం పోసాయి. ట్రంప్ వ్యాఖ్య‌ల‌తో అధిక శాతం మంది స్థానిక అమెరిక‌న్లు భార‌తీయుల‌పై విద్వేషం పెంచుకున్నారు. ఫ‌లితం ఒక నిండు ప్రాణం బ‌లైపోయింది. మంచి భ‌విష్య‌త్ ఉన్న తెలుగు కుర్రవాడు అమెరికాలో అర్ధంత‌రంగా త‌నువు చాలించాల్సి వ‌చ్చింది. అయినా శ్రీనివాస్ హ‌త్య‌పై ట్రంప్ అస‌లు స్పందించ‌క‌పోవ‌డం భార‌తీయుల్లో ఆగ్రహాన్ని అదే స‌మ‌యంలో భ‌యాన్ని కూడా క‌లిగిస్తున్నాయి. అక్కడ ఉంటే త‌మ‌కు స‌రైన భ‌ద్ర‌త ఉండ‌ద‌ని అధిక శాతం మంది భావిస్తున్నారు. 

ఇండియాకు మేధో వ‌ల‌స‌లు పెర‌గాలి

   

     మ‌న దేశం నుంచి మ‌న తెలుగు రాష్ట్రాల నుంచి మేధావులు అమెరికాకు త‌ర‌లిపోవ‌డంతో ఇక్కడ బ్రెయిన్ డ్రైయిన్  ప‌రిస్థితి ఏర్ప‌డింది. స్టాఫ్ అంతా అమెరికాకు పోయి ఇక్క‌డ స్క్రాప్ మాత్ర‌మే మిగిలింద‌నే ఆవేద‌న కూడా ఉంది. అయితే ఇప్పుడు అమెరికాలో వివ‌క్ష పూరిత దాడులు, ట్రంప్ అనుస‌రిస్తున్న విధానాలతో అక్క‌డ ఉన్న తెలుగువారు, ఇత‌ర భార‌తీయులు ఆందోళ‌న చెందుతున్నారు. అయితే వారు మాతృ దేశానికి తిరిగి రావ‌డానికి ఇదే స‌రైన స‌మ‌య‌మ‌ని నిపుణులు చెపుతున్నారు. వివ‌క్ష‌ను భ‌రిస్తూ అక్క‌డే ఉంటే కంటే ఇండియాకు తిరిగి వ‌చ్చి దేశాభివృద్ధికి పాటు ప‌డాలి. గ‌తంలో ఉన్న‌ట్టు కాదు ఇప్పుడు ఇండియాలో అవ‌కాశాల‌కు కొదువ లేదు. విదేశీ పెట్టుబ‌డిదారులే ఇండియా ఆక‌ర్ష‌ణీయ‌మైన గ‌మ్య‌స్థాన‌మ‌ని, వ‌చ్చే ద‌శాబ్దం ఇండియాదే అని చెపుతున్నారు. ఇలాంటి ప‌రిస్థితుల్లో తెలుగు వారు త‌మ సొంత దేశానికి తిరిగి వ‌చ్చి ఇక్క‌డే త‌మ మేధ‌స్సును ఉప‌యోగిస్తే అద్భుత‌మైన ఫ‌లితాలు వ‌స్తాయి. 

సానుకూల‌త‌తో స‌వాళ్ల‌ను అధిగ‌మించాలి

     అమెరికాలో స్థిర‌ప‌డిన తెలుగు వారు ఇండియా వ‌చ్చేందుకు అద్భుత‌మైన స‌మ‌యం ఆస‌న్న‌మైంది. సంకుచిత మ‌న‌స్త‌త్వాల‌తో వివ‌క్ష ఉన్న దేశంలో నివశించే క‌న్నా స్వ‌దేశానికి వ‌స్తే ఆత్మ గౌర‌వంతో బ‌తికేందుకు అవ‌కాశం ఉంటుంది. ఒక‌ప్పుడు అవ‌కాశాలు లేక స‌ప్త స‌ముద్రాలు దాటిన మేధావులు ఇప్పుడు అవే స‌ప్త స‌ముద్రాలు దాటి సొంత దేశానికి తిరిగి రావాలి. ఇండియా బ్రెయిన్ డ్రైయిన్ గా మారిన ప‌రిస్థితి నుంచి ఇండియాలో బ్రెయిన్ డ్రైయిన్ రివ‌ర్స్ ప్లో కావాలి. అయితే చాలా మంది స్వదేశం రావ‌డానికి జంకుతున్నారు. ఎందుకంటే ఇండియాలో పాతుకుపోయిన అవినీతి, జ‌వాబుదారీత‌నం లేక‌పోవ‌డం, పార‌ద‌ర్శ‌క‌త కొర‌వ‌డ‌టం, పాల‌నా వ్య‌వ‌స్థ‌లో లొసుగులు ఇవ‌న్నీ స‌వాళ్లే. కానీ సానుకూల వైఖ‌రితో వీటిని అధిగమించేందుకు సిద్ధ‌ప‌డాలి. కానీ ఒక‌టి మాత్రం వాస్త‌వం రెండు ద‌శాబ్దాల క్రితం ఉన్న‌ట్టు ఇప్పుడు ఇండియాలో ప‌రిస్థితులు లేవు. మార్పు క‌నిపిస్తోంది. అంద‌రం క‌లిసిక‌ట్టుగా ప‌నిచేస్తే అభివృద్ధికి ఆటంకంగా ఉన్న జాడ్యాల‌ను త్వ‌ర‌గానే తొలిగించుకోవ‌చ్చు. 

అమెరికా ప‌రిణామాల‌తో ఆందోళ‌న‌లో విద్యార్ధులు 

 గ‌తంలో అమెరికాలో చ‌దువుకునేందుకు అక్క‌డే ఉద్యోగం సాధించుకునేందుకు విద్యార్దులు ఆస‌క్తి చూపించేవారు.అయితే ప్ర‌స్తుత ప‌రిస్థితుల దృష్ట్యా విద్యార్ధులు ఇత‌ర దేశాల‌పై దృష్టి సారిస్తున్నారు. విదేశీ విద్య‌కు ఆస్ట్రేలియా మంచి ప్ర‌త్యామ్నాయం అని కొంద‌రు నిపుణులు చెపుతున్నారు కానీ గ‌తంలో  భార‌తీయ విద్యార్ధుల‌పై ఆస్ట్రేలియాలో దాడులు జ‌రిగిన సంద‌ర్భాలున్నాయి. ఇప్పుడు కాస్త కుదుట‌ప‌డింది కానీ గ‌తంలో భార‌తీయుల‌పై అక్క‌డ కూడా ఉద్దేశ‌పూర్వ‌క దాడులు జ‌రిగాయి. అయితే ఇక్క‌డ విద్యార్ధులు అయినా ఉద్యోగులు అయినా గుర్తించాల్సిన విష‌యం ఒక‌టే. ప్ర‌స్తుతం మ‌నదేశంలోనే ఎన్నో అవ‌కాశాలు ఉన్నాయి. ప్ర‌పంచంలో వేగంగా వృద్ధి చెందుతున్న ఆర్థిక వ్య‌వ‌స్థల్లో ఇండియా కూడా ఒక‌టి. ఆత్మ‌గౌర‌వం చంపుకుని విదేశాల్లో ప‌నిచేసే కంటే ఇక్క‌డే ప‌నిచేస్తే మ‌న ఆర్థిక వృద్ధిలో భాగం అయ్యామ‌న్న ఆత్మ సంతృప్తి కూడా దొరుకుతుంది. పురాణాల్లో చెప్పిన ప్ర‌కారం భార‌త‌దేశం అనేది పుష్ప‌క విమానం లాంటిది. ఎంత మంది దానిలోకి ఎక్కినా అందులో ఇంకా చోటు ఉంటూనే ఉంటుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com