90% ప్రాక్టికల్స్ ఇక్కడ..90% థియరీ అక్కడ..!

    ఉద్యోగ వాతావ‌ర‌ణం పూర్తిగా మారిపోయింది. ఒక‌ప్ప‌టిలా ఇప్పుడు నైపుణ్యం ఉంటే స‌రిపోదు. భావ‌వ్య‌క్తీక‌ర‌ణ‌తో పాటు శ‌రీర బాష, వేగంగా నిర్ణయాలు తీసుకోగ‌ల ధైర్యం కూడా కావాలి. ఇన్ని అర్హ‌త‌లు, వైవిధ్య‌భ‌రిత‌మైన నైపుణ్యాలు ఉంటేనే ఉద్యోగి త‌న కెరీర్ లో సుధీర్ఘ‌కాలం కొన‌సాగ‌గ‌లుగుతాడు. లేకుంటే అత‌ను త‌న ఉద్యోగ జీవితంలో చాలా ఇబ్బందుల‌ను ఎదుర్కోవాల్సి వ‌స్తుంది. దీంతో ఇప్పుడు మాన‌వ వ‌న‌రుల అభివృద్ధి, శిక్ష‌ణ అనేది చాలా ముఖ్య‌మైన విష‌యంగా మారింది. నైపుణ్యం, తెలివి, ధైర్యం ఉంటేనే విద్యార్ధి కెరీర్ లో ఉన్న‌త స్థితికి చేరుకోవ‌చ్చు. లేకుంటే అభివృద్ధిలో వెనుక‌బ‌డాల్సిందే. ఈ న‌యా జ‌మానాలో 90 శాతం ప్రాక్టిక‌ల్స్ ఉంటే కేవ‌లం ప‌ది శాతం మాత్ర‌మే థియ‌రీ ఉంది. 

మాన‌వ వ‌న‌రుల త‌యారీ సులువేం కాదు!

  ప్ర‌స్తుతం మానవ వ‌నరుల త‌యారీ సులువు కానప్ప‌టికీ అసాధ్య‌మైతే కాదు. ఒక ఉప‌గ్ర‌హాన్ని క‌క్ష్య‌లోకి ప్ర‌వేశ‌పెట్ట‌డం, బిడ్డ‌కు జ‌న్మ‌నివ్వ‌డం ఎంత క‌ష్ట‌మో ఇదీ అంతే క‌ష్టంగా మారింది. వెలికితీయడం అనేది మానవ వ‌న‌రుల అభివృద్ధిలో అత్యంత ముఖ్య‌మైన విష‌యం. ఒక వ్య‌క్తి జీవితంలో ఉపాధ్యాయుడు, త‌ల్లిదండ్రులు, స్నేహితులు వీరితో పాటు కాలం, వ్య‌క్తిలోని బ‌హుళ నైపుణ్యాల‌ను వెలికితీస్తుంది. ఒక ఉద్యోగికి నిరంత‌రం శిక్ష‌ణ ఇస్తేనే అత‌ను సంస్థకు ఉప‌యోగ‌ప‌డే నాణ్య‌మైన వ్య‌క్తిగా త‌యార‌వుతాడు. దీనికి ఎటువంటి షార్ట్ క‌ట్స్ లేవు. మాన‌వ వ‌న‌రుల‌ను స‌రిగా వినియోగించుకున్న‌ప్పుడే సంస్థ‌లు ఉన్న స్థితి నుంచి ఉన్న‌త స్థితికి వ‌స్తాయి. 

కెరీర్ పిర‌మిడ్ ఏం చెపుతోంది? 

    కెరీర్ అనే  పిర‌మిడ్ లో నైపుణ్యం, తెలివి, ధైర్యం అనే మూడు కోణాలు ఉంటాయి. ఇందులో న‌మ్మకం అనేది కేంద్ర బిందువు.  నైపుణ్యం, తెలివి ఉన్న‌వారు వ్యాపార‌వేత్త‌గా రాణిస్తారు. తెలివి, ధైర్యం ఉన్న‌వారు రాజ‌కీయవేత్త కావొచ్చు. ఇక నైపుణ్యం, ధైర్యం ఉన్న‌వారు ఉద్య‌మ‌కారులు అవుతారు. మ‌హాత్మా గాంధీ, అబ్ర‌హాం లింక‌న్, అన్నా హ‌జారే, నెల్స‌న్ మండేలా వంటి ఈ మూడో కోవ‌కు చెందుతారు. కేవ‌లం తెలివి ఉన్న‌వాడు టీచ‌ర్ గానో జ‌ర్న‌లిస్టుగానో స్థిర‌ప‌డిపోతాడు. నైపుణ్యం ఉన్న‌వాడు మంచి ఇంజినీరింగ్ నిపుణుడు అవుతాడు. మానవ అభివృద్ధిలో మాన‌వ వ‌న‌రుల  అభివృద్ధి కీల‌కం అన్న విష‌యాన్ని గుర్తించాలి. తెలివి కావాలి, ప‌నిచేసే నైపుణ్యం ఈ రెండింటితో పాటు ధైర్యం ఉండాలి. అన్నింటితో పాటు కేంద్ర బిందువైన విలువ‌ల‌తో కూడిన న‌మ్మ‌కం కావాలి. 

నేను లోక‌ల్ కు కాలం చెల్లింది!

   మానవ వ‌న‌రుల అభివృద్ధిలో కంపెనీల విష‌యాన్ని కాస్త ప‌క్క‌న పెడితే విద్యార్ధి ద‌శ నుంచే దీనిపై ప్ర‌త్యేక‌మైన శ్ర‌ద్ధ పెట్టాలి. దీనికి ఉపాధ్యాయులు, త‌ల్లిదండ్రులు విద్యార్ధికి స‌హ‌క‌రించాలి. అలా మానవ వ‌న‌రుల అభివృద్ధి విష‌యంలో శ్ర‌ద్ధ పెట్ట‌కుండా, నైపుణ్యం పెంచుకోకుండా నేను లోక‌ల్, నేను ఇలానే ఉంటాను అంటే ప్ర‌స్తుత ప‌రిస్థితుల్లో ఉద్యోగాలు వ‌చ్చే అవ‌కాశం లేదు. ప్ర‌పంచ విప‌ణిలో నేను లోక‌ల్ అని కాకుండా నేను గ్లోబ‌ల్ అని అంటేనే మ‌న‌గ‌డ సాధ్య‌మ‌వుతుంది. ప్ర‌స్తుత మ‌న విధ్యా విధానంలో మాస్ట‌ర్ శ్రీనివాస్ కు ఉన్న భావ‌వ్య‌క్తీక‌ర‌ణ నైపుణ్యాలు మాస్ట‌ర్స్ చేసిన శ్రీనివాస్ కు ఉండ‌టం లేదు. దీంతో ఉన్న విద్యావంతుల‌కు స‌రైన ఉద్యోగం దొర‌క్క‌ నిరుద్యోగం పెరిగిపోతోంది. అస‌లు ఏమీ చ‌దువుకోని నిర‌క్ష్య‌రాస్యుల‌కు నిరుద్యోగం అనేదే లేదు. వారు త‌మ స్థాయిలో ఏదో ఒక ప‌ని చేసుకుంటారు. ఇక ప‌దో త‌ర‌గ‌తి చ‌దువుకున్న వ్య‌క్తికి కూడా అత‌ని స్థాయిలో ఉద్యోగం దొరుకుతుంది. డిగ్రీ, ఆపైన మాస్ట‌ర్స్ చేసిన వారికే ఇప్పుడు ఉద్యోగాలు దొర‌క‌డం క‌ష్టంగా మారింది. మానవ వ‌న‌రుల అభివృద్ధి స‌రైన దిశ‌లో సాగ‌క‌పోవ‌డం వ‌ల‌నే ఈ ప‌రిస్థితి ఏర్ప‌డింది. మాస్ట‌ర్స్ చేసిన శ్రీనివాస్ మాస్ట‌ర్ బ్రెయిన్ శ్రీనివాస్ గా మారిన‌ప్పుడే అత‌ను ఈ గ్లోబ‌ల్ ఎకాన‌మీలో ఇమ‌డ‌గ‌లుగుతాడు. 

భాషా ప్ర‌యోగాన్ని భావ వ్య‌క్తీక‌ర‌ణ అనుకుంటే ఎలా? 

    మానవ వ‌న‌రుల అభివృద్దిలో భాషా ప్ర‌యోగానికి, భావ వ్య‌క్తీక‌ర‌ణకు మ‌ధ్య ఉన్న వ్య‌త్యాసాన్ని గుర్తించ‌డంలో మ‌న విద్యార్ధులు విఫ‌ల‌మ‌వుతున్నారు. ప్ర‌స్తుతం హ్యూమ‌న్ రిలేష‌న్ అనేది హార్ట్ రిలేష‌న్ గా రూపాంత‌రం చెందాలి. ఈ విష‌యంపై శ్ర‌ద్ధ పెట్టి మ‌న ప్ర‌భుత్వాలు విద్యార్ధుల‌కు మంచి శిక్ష‌ణ ఇచ్చేందుకు ప్ర‌య‌త్నాలు చేయాలి. భావ వ్య‌క్తీక‌ర‌ణ విష‌యంలో మ‌న దేశంలో ఉత్త‌రాది వారికి, ద‌క్షిణాది వారికి మ‌ధ్య కూడా చాలా తేడాలున్నాయి. క‌మ్యూనికేష‌న్ స్కిల్స్ లో ఉత్త‌రాది వారు ద‌క్షిణాది వారికంటే చాలా ముందున్నారు. అలాగే మ‌న దేశంతో పోల్చుకుంటే విదేశీయులు క‌మ్యూనికేష‌న్ లో చాలా అభివృద్ధి సాధించారు. దీని వ‌ల‌న ద‌క్షిణాది వారికంటే ఉత్త‌రాది వారు, మ‌న‌దేశంలతో పోల్చుకుంటే విదేశీయులు ఎక్కువ అవ‌కాశాల‌ను అందిపుచ్చుకుంటున్నారు. మ‌న దేశంలో అన్ని ప్రాంతాలు వారు మాన‌వ వ‌న‌రుల వినియోగంలో అభివృద్ధి చెంది విదేశాల‌తో పోటీ ప‌డేలా త‌యారు చేయాలి. చ‌దివిన చ‌దువును స‌రిగ్గా అప్లై చేయ‌గ‌లిగితే భావ వ్య‌క్తీక‌ర‌ణ‌లో మంచి ఫ‌లితాలు వ‌స్తాయి. మ‌న విద్యా విధానంలో మార్పులు చేసి మానవ వ‌న‌రుల‌ను వినియోగం, అభివృద్ధిని సరైన రీతిలో పెట్ట‌గ‌లిగిన‌ప్పుడు ఇండియా ప్ర‌పంచంలో నెంబ‌ర్ వ‌న్ గా ఎదుగుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com