వేలిముద్ర‌ల నుంచి వేలిముద్ర‌ల వ‌ర‌కూ..!

     నాగ‌రిక‌త అంత‌గా అభివృద్ధి చెంద‌క ముందు మ‌న స‌మాజంలో 'వేలిముద్ర‌'లే కీల‌క పాత్ర పోషించేవి. అప్పులు తీసుకోవాల‌న్నా, ఆస్తి లావాదేవీలు జ‌ర‌పాల‌న్నా వేలిముద్ర‌ల ద్వారానే ప‌ని జ‌రిగేది. పురాత‌న కాలంలో తాళ‌ప‌త్ర గ్రంధాల‌ను తెరిచేందుకు కూడా వేలిముద్ర‌ల‌ను వాడేవారు. మ‌న భార‌తీయ స‌మాజంలో 6 ద‌శాబ్దాల క్రితం బ్యాంక్ లావాదేవీల్లో కూడా వేలిముద్ర‌ల‌దే ప్ర‌ధాన పాత్ర‌. మ‌న వేలిముద్ర‌ల లావాదేవీల‌పై హేళ‌న చేసిన పాశ్చాత్య స‌మాజం ఇప్పుడు తిరిగి వేలిముద్ర‌ల ద్వారా జ‌రుగుతున్న కార్య‌క‌లాపాల‌కే మొగ్గుచూపుతోంది. ప్ర‌స్తుతం హాజ‌రు న‌మోదు చేసేందుకు పెద్ద పెద్ద ఐటీ కంపెనీలు కూడా వేలిముద్ర‌ల టెక్నాల‌జీనీ వాడుతున్నాయి. ఇక ప‌రీక్ష‌ల నిర్వ‌హణలో వీటి పాత్ర‌ను ప్ర‌త్యేకంగా చెప్పాల్సిన ప‌నిలేదు. ఇప్పుడు  మ‌న ప్ర‌భుత్వం తీసుకొచ్చిన డిజిట‌ల్ లావాదేవీల్లో భాగంగా ఇక అన్ని ప‌నులు వేలిముద్ర‌ల ద్వారానే సాగుతున్నాయి. ఇప్ప‌టికే రేష‌న్ షాపుల్లో, ఇత‌ర ప్ర‌భుత్వ ప‌థ‌కాల్లో ఆధార్ ను అనుసంధానం చేయ‌డం వ‌ల‌న ఒక్క వేలిముద్ర‌తోనే అన్ని ప‌నులు పూర్త‌వుతున్నాయి. రాబోయే రోజుల్లోభార‌త‌దేశ ఎన్నిక‌లు కూడా ఈ వేలిముద్ర‌ల ద్వారానే జ‌రుతాయ‌న‌డంలో ఎటువంటి సందేహం లేదు. అదే విధంగా ఆధార్ అనుసంధాన బ్యాంక్ లావాదేవీలు కూడా బ‌యో మెట్రిక్ ద్వారానే పూర్తికానున్నాయి. డిజిట‌ల్ లావాదేవీల‌ను షురూ చేసిన నేప‌థ్యంలో గ్రామీణ ప్రాంతాల్లో డిజిట‌ల్ అక్ష‌రాస్య‌త‌ను పెంచ‌డానికి కూడా నాటి వేలిముద్ర‌లే నేడు తొలి పాద‌ముద్ర‌లు అవుతున్నాయి.

డిజిట‌ల్ అక్ష‌రాస్య‌త‌...క‌ష్ట‌మే కానీ అసాధ్యం కాదు!

    ప్ర‌పంచం గ్లోబ‌ల్ విలేజ్ గా మారిపోయిన ప్ర‌స్తుత త‌రుణంలో పోటీలో ముందువ‌రుస‌లో నిల‌బ‌డాలంటే సాంకేతికంగా అభివృద్ధి సాధించాల్సిన అవ‌స‌రం ఏర్ప‌డింది. ఒక‌ప్పుడు ఒక దేశం యొక్క నిజ‌మైన అభివృద్ధిని  విద్యారంగంలో సాధించిన ప్ర‌గ‌తి ఆధారంగా అంచ‌నా వేసేవారు. కానీ ఇప్పుడు విద్య తో పాటు సాంకేతికంగా ఎంత ప్ర‌గ‌తి సాధించారన్న విష‌యం కూడా ముఖ్యంగా మారిపోయింది.  వాస్త‌వానికి నిజ‌మైన అభివృద్ధి అంటే సాంకేతిక అభివృద్ధే అన్న‌ది న‌యా ఆర్థిక వేత్త‌ల మాట‌. కాస్త ఆల‌స్య‌మైనా మ‌న దేశం కూడా ఇప్పుడు సాంకేతిక‌ను అందిపుచ్చుకోవ‌డానికి డిజిట‌ల్ అక్ష‌రాస్య‌త దిశ‌గా అడుగులు వేస్తోంది. 

గ్రామీణ ప్రాంతాల్లో డిజిట‌ల్ అక్ష‌రాస్య‌త‌ శూన్యం

     మ‌న దేశంలోని న‌గ‌రాల్లోనూ, ప‌ట్ట‌ణాల్లోనూ డిజిట‌ల్ అక్ష‌రాస్య‌త ఫ‌ర్వాలేద‌నిపించే స్థాయిలో ఉంది. అయితే గ్రామీణ ప్రాంతాల్లో మాత్రం ఇప్ప‌టికీ ఇంట‌ర్నెట్ అనేది అందుబాటులో లేని విష‌య‌మే. అస‌లు చాలా రాష్ట్రాలు సంపూర్ణ అక్ష‌రాస్య‌త‌కు ఆమ‌డ దూరంలో ఉన్న త‌రుణంలో డిజిట‌ల్ అక్ష‌రాస్య‌త సాధించ‌డ‌మ‌నేది అతిపెద్ద స‌వాలు. అయితే ఈ అతిపెద్ద స‌వాలును సంపూర్ణ‌మైన నిబ‌ద్ధ‌త ద్వారా సాధిస్తామ‌ని ప్ర‌భుత్వం చెపుతోంది. ప్ర‌స్తుతం మ‌న దేశానికి డిజిట‌ల్ అక్ష‌రాస్య‌త అత్య‌వ‌స‌ర‌మైన విష‌యం. రానున్న ప‌దేళ్ల‌లో సూప‌ర్ ప‌వ‌ర్ గా ఎద‌గాల‌ని క‌ల‌లు కంటున్న దేశానికి ఇప్ప‌టికీ చాలా ప్రాంతాల‌కు ఇంటర్నెట్ క‌నెక్ట‌విటీ లేక‌పోవ‌డం అన్న‌ది ఆందోళ‌న క‌లిగించే విష‌య‌మే. ఆ విష‌యంలో గ‌ణ‌నీయంగా మెరుగుప‌డితే త‌ప్ప ఇప్ప‌టికే 20 ఏళ్లు ముందున్న చైనాను ఢీకొట్ట‌డం సాధ్యం కాదు. 

డిజిట‌ల్ అక్ష‌రాస్య‌త‌కు భారీ నిధులు 

      తాజాగా కేంద్ర ప్ర‌భుత్వం దేశంలో డిజిటల్ అక్ష‌రాస్య‌త‌ను పెంచేందుకు రూ.2,351 కోట్ల‌ను విడుద‌ల చేసింది. గ్రామీణ ప్రాంతాలో దాదాపు 6 కోట్ల మంది ప్ర‌జ‌ల‌కు డిజిట‌ల్ అక్ష‌రాస్య‌త‌ను అందించేందుకు ఈ నిధుల‌ను కేటాయించిన‌ట్టు కేంద్ర కేబినెట్ వెల్ల‌డించింది. ప్ర‌ధాన‌మంత్రి గ్రామీణ డిజిట‌ల్ సాక్ష‌ర‌త అభియాన్ పేరుతో ఈ ప‌థ‌కాన్ని అమ‌లు చేయ‌నున్నారు. ఈ ప‌థ‌కం ద్వారా రాబోయే రెండు సంవ‌త్స‌రాల్లో దాదాపు 6 కోట్ల మందిని డిజిట‌ల్ అక్ష‌రాస్యులుగా చేయాల‌ని నిర్ణ‌యించారు. దీని కోసం దేశ‌వ్యాప్తంగా 2.50 ల‌క్ష‌ల గ్రామ పంచాయితీల్లో గ్రామాల వారీగా అభ్య‌ర్ధుల‌ను నియ‌మించుకుని గ్రామ‌స్తుల‌కు ఇంట‌ర్నెట్, మొబైల్ వినియోగంపై అవ‌గాహ‌న క‌ల్పించ‌నున్నారు. ఈ ప‌థ‌కంలో ముఖ్యంగా మొబైల్ ఫోన్ల ద్వారా న‌గ‌దు ర‌హిత లావాదేవీలు, ఆధార్ ఆధారిత చెల్పింపులు, మొబైల్ బ్యాంకింగ్, డిజిట‌ల్ వ్యాలెట్ ల‌పై అవ‌గాహ‌న క‌ల్పించి నిర్దేశించిన ల‌క్ష్యాల‌ను చేరుకోవాలని ఆశిద్దాం.

గ్రామీణ ప్రాంత విద్యార్ధుల‌కు లాభమే 

      ఈ డిజిట‌ల్ అక్ష‌రాస్య‌త కార్య‌క్ర‌మంతో పెద్ద వాళ్లు నేర్చుకునే విష‌యాల‌ను కాస్త ప‌క్క‌న పెడితే విద్యార్ధుల‌కు మాత్రం ఇది క‌చ్చితంగా మేలు చేస్తుంది. ప్ర‌స్తుతం డిజిట‌ల్ అక్ష‌రాస్య‌త లేక‌పోవ‌డంతో గ్రామీణ ప్రాంత విద్యార్ధులు పోటీలో వెన‌క‌బ‌డిపోతున్నారు. ఇప్ప‌టికే చాలా అర్హ‌త ప‌రీక్ష‌లు ఆన్ లైన్ విధానంలో ఉండ‌టంతో ఇబ్బందులు ప‌డుతూ ప‌ట్ట‌ణ ప్రాంత విద్యార్ధుల‌తో పోటీ ప‌డ‌లేక‌పోతున్నారు. ఈ డిజిట‌ల్ అక్ష‌రాస్య‌త ప‌థ‌కంతో గ్రామాల‌కు ఇంట‌ర్నెట్ అందుబాటులోకి వ‌స్తే వారిలో విశ్వాసం పెరుగుతుంది. దీంతో పాటు ప్ర‌భుత్వం ప్రోత్సాహిస్తున్న న‌గ‌దు ర‌హిత లావాదేవీల‌ను సులువుగా అర్ధం చేసుకునేందుకు భ‌విష్య‌త్ లో మిగ‌తా వారిని చైతన్యం చేసేందుకు కూడా ఈ ప‌థ‌కం ఉప‌యోగ‌ప‌డుతుంది. 

ఇదే ఊపును కొన‌సాగించాలి 

     స‌రైన ప్ర‌ణాళిక లేకుండా న‌రేంద్ర మోడీ ప్ర‌భుత్వం తీసుకున్న న‌గదు ర‌హిత స‌మాజం  అన్న నిర్ణ‌యం ఆదిలో కాస్త బెడిసికొట్టింద‌న్న‌ది వాస్త‌వం. అయితే ఇప్పుడు తీసుకుంటున్న న‌ష్ట నివార‌ణ చ‌ర్య‌ల‌తో ఆ త‌ప్పును పూడ్చుకోవాల‌ని కేంద్ర ప్ర‌భుత్వం భావిస్తోంది. త‌ద్వారా తాము స‌రైన నిర్ణ‌య‌మే తీసుకున్నామ‌ని చాటి చెప్పాల‌ని వారు ప‌ట్టుద‌ల‌గా ఉన్నారు. అందుకే దేశంలో డిజిట‌ల్ అక్ష‌రాస్య‌త‌ను పెంచేందుకు కొత్త ప‌థ‌కాల‌తో ముందుకు వ‌స్తున్నారు. ఏది ఏమైనా డిజిట‌ల్ అక్ష‌రాస్య‌త పెరిగితే అది దేశాభివృద్ధిని ఉర‌క‌లెత్తిస్తుంద‌న‌డంలో ఎటువంటి సందేహం లేదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                       You can send your Educational related articles to  careertimes.online1@gmail.com