జీతో దునియా ముట్టి మే !

    ఒకప్పుడు ఊళ్లలో రచ్చబండ దగ్గర చెప్పుకునే ఊసుపోలు మాటలను గాలి కబుర్లుగా కొట్టిపారేసేవారు. అక్కడ అలా జరిగింది. ఇక్కడ పరిస్థితి ఇలా ఉంది. అని చెప్పేవాడిని గాలి దుమారం గాడని గేలి చేసేవారు. కానీ కాలం గిర్రున తిరిగింది. ఎంతగా అంటే మన ఊహకు కూడా అందని మార్పులు ప్రపంచంలో చోటు చేసుకున్నాయి. అప్పుడు గాలి కబుర్లుగా కొట్టివేసినవే ఇప్పుడు లక్షల కోట్ల విలువ చేస్తున్నాయి. సమచారం, బిగ్ డేటా రూపంలో దేశాల ఆర్ధిక వ్యవస్థలను శాసిస్తున్నాయి. ఎవరి దగ్గర ఎక్కువ సమాచారం ఉంటే వాళ్లే హీరోలు. ఇంకా వివరంగా చెప్పాలంటే నెట్ వర్క్ ఉన్నవాడి దగ్గర  నెట్ వర్త్ ఉన్నట్టే.

సమాచార బదిలీ..అవకాశాల గని

    ఇప్పుడు  డేటా ఆధారంగానే సమస్త వ్యవస్థలు నడుస్తున్నాయి. ఈ నేపథ్యంలో కేవలం సమాచారాన్ని సేకరిస్తే అది విజ్జానానికి సంబంధించిన విషయంగానే మిగిలిపోతుంది. సేకరించిన సమాచారాన్ని ఎలా ఉపయోగించాలో తెలిసినప్పుడే అది తెలివైన పనిగా రూపాంతరం చెందుతుంది. ప్రస్తుతం అగ్రదేశాలు సంకుచిత విధానాలతో తీసుకుంటున్న నిర్ణయాలు  ఇండియా వంటి వ‌ర్ధ‌మాన దేశాల‌కు కొత్త అవ‌కాశాలను సృష్టిస్తున్నాయి. మారిన నయా ఆర్థిక వ్యవస్థలో అగ్రదేశాలు తీసుకునే నిర్ణయాలతో  వ‌ర్ధ‌మాన దేశాలు న‌ష్ట‌పోయే అవ‌కాశ‌మే లేదు. పైపైచ్చు కొత్త అవ‌కాశాల‌కు క్రొంగొత్త దారులు ప‌రుచుకుంటాయి. ఇంట‌ర్నెట్ దాని అనుబంధ విభాగాలే ఇప్పుడు ఆర్థిక వ్య‌వ‌స్థ‌ల‌ను శాసిస్తున్నాయి. ముఖ్యంగా స‌మ‌చార బ‌దిలీయే ఇప్పుడు అతిపెద్ద అవ‌కాశాల గ‌ని. ఈ అవ‌కాశాన్ని ఎవ‌రు ముందుగా అందిపుచ్చుకుంటారో వారే ప్ర‌పంచ ప్ర‌బ‌ల శ‌క్తిగా ఎదుగుతారు. 

స‌రిహ‌ద్దుల‌ను చెరిపేస్తున్న డిజిట‌ల్ విప్ల‌వం 

     ప్రస్తుతం డిజిటల్ విప్లవం ప్రపంచ ఆర్థిక వ్యవస్థకు చోదక శక్తిగా ఉంది.  దేశాల మ‌ధ్య స‌రిహ‌ద్దుల‌ను చెరిపేస్తున్న డిజిట‌ల్ విప్ల‌వాన్ని మనం ఏ మేర అందిపుచ్చుకుంటామ‌న్న దానిపై మ‌న విజ‌యం ఆధారప‌డి ఉంటుంది. ఇంట‌ర్నెట్ , స‌మాచారం, క‌మ్యూనికేష‌న్ సాంకేతిక‌త‌  ( ఐసీటీ) ప్ర‌స్తుతం దేశాల మ‌ధ్య స‌రిహ‌ద్దుల‌ను చెరిపేస్తోంది. ఒక విధంగా డిజిట‌ల్ ఆర్థిక వ్య‌వ‌స్థ అంటే ఇంట‌ర్నెట్ ఆధారిత ఆర్థిక వ్య‌వ‌స్థ‌.  డిజిట‌ల్ ఇండియా, క్యాష్ లెస్ ఎకాన‌మీ, స్టార్టప్ లు, స్మార్ట్ సిటీలు ఇవ‌న్నీ డిజిట‌ల్ ఆర్థిక వ్య‌వ‌స్థ‌లే భాగ‌మే. రానున్న రోజుల్లో ఇందులో ఉన్న అపార అవ‌కాశాల‌ను ముందుగా అంచ‌నా వేసే బడా బడా కంపెనీలు  ల‌క్ష‌ల కోట్ల రూపాయ‌ల పెట్టుబ‌డి పెట్టి ఇంట‌ర్నెట్ ఆధారిత సేవ‌ల‌ను విస్త‌రిస్తున్నాయి. 

ఇకపై ఆర్థిక వ్య‌వ‌స్థ‌ల‌ను శాసించేది డేటానే

     ప్ర‌స్తుతం దేశాల ఆర్థిక వ్య‌వ‌స్థ‌ల‌ను చ‌మురు శాసిస్తోంది. అయితే రానున్న రోజుల్లో మాత్రం స‌మాచారం (డేటా) దేశాల ఆర్థిక వ్య‌వ‌స్థ‌ల‌ను శాసిస్తుంద‌ని నిపుణులు అంచ‌నా వేస్తున్నారు. 2008 త‌ర్వాత ప్ర‌పంచ దేశాల మ‌ధ్య ఎగుమ‌తులు, దిగుమ‌తులు, నిధుల ప్ర‌వాహం భారీగా త‌గ్గిపోతుంటే అదే స‌మ‌యంలో గ‌డిచిన ప‌దేళ్ల‌లో స‌మాచార బ‌దిలీ రేటు 45 రెట్లు పెరిగింది. రానున్న రోజుల్లో ఆటోమేష‌న్ ఊపందుకోవ‌డం వ‌ల‌న దేశాల మ‌ధ్య ఎగుమ‌తులు, దిగుమ‌తులు భారీగా త‌గ్గిపోనున్నాయి. 2014 లో ప్ర‌పంచవ్యాప్తంగా దేశాల మ‌ధ్య వ‌స్తు సేవ‌లు, స‌మాచారం, మాన‌వ నైపుణ్యాలు ఇత‌ర కార్య‌క్ర‌మాల మొత్తం విలువ 7.8 ల‌క్ష‌ల కోట్ల డాల‌ర్లు. అందులో స‌మాచార బ‌దిలీ వాటాయే 2.8 ల‌క్ష‌ల కోట్ల డాల‌ర్ల‌ని ఒక నివేదిక వెల్ల‌డించింది. అంత‌ర్జాతీయంగా డీల‌ర్లు, కొనుగోలుదార్ల‌తో ప్ర‌స్తుతం ఇంట‌ర్నెట్ ద్వారా చాలా సుల‌భంగా మాట్లాడే అవ‌కాశం క‌లిగింది. ఫేస్ బుక్, వాట్సాప్ వంటి మాధ్య‌మాల ద్వారా త‌క్కుక ఖ‌ర్చుతోనే వారితో మాట్లాడి లావాదేవీలు న‌డ‌పొచ్చు. దీని వ‌ల‌న చిన్న చిన్న సంస్థ‌ల‌కు పెద్ద అవ‌కాశాలు క‌లుగుతున్నాయి. 

క్లౌడ్ కంప్యూటింగ్ తో ఉద్యోగాలే ఉద్యోగాలు

   ప్ర‌స్తుతం ఈ కామ‌ర్స్ కు క్లౌడ్ కంప్యూటింగ్, ఆర్టిఫిషియ‌ల్ ఇంటిలిజెన్స్, బిగ్ డేటా, మొబైల్ వెబ్ స‌ర్వీసెస్, సోష‌ల్ మీడియాలు వెన్నుముక‌గా ఉన్నాయి. ఈ విభాగాల్లో కాస్త నైపుణ్య‌త సాధిస్తే మ‌న యువ‌త ఉద్యోగాల‌కు ఢోకా ఉండ‌దు. ప్ర‌స్తుతం మొబైల్ అప్లికేష‌న్ల రూప‌క‌ల్ప‌న ద్వారానే భారీ సంఖ్యలో కొత్త ఉద్యోగాలు పుట్టుకొస్తున్నాయి. అమెరికాలో 2015 లో మొబైల్ అప్లికేష‌న్ల రంగంలో 5 ల‌క్ష‌ల కొత్త ఉద్యోగాలు వ‌చ్చాయి. మ‌న దేశంలో కూడా ఇది క్ర‌మంగా ఊపందుకుంటోంది. ఇప్ప‌టికే డిజిటల్ బాట ప‌ట్టిన కంపెనీలు భారీ లాభాల‌ను సాధిస్తుండ‌టంతో మిగ‌తా కంపెనీలు క్ర‌మంగా డిజిటల్ వైపుకు అడుగులు వేస్తున్నాయి. ఒక్క క్లౌడ్ కంప్యూటింగ్ ద్వారానే ఇండియాతో పాటు ప‌లు యూర‌ప్ దేశాల్లో ల‌క్ష‌ల సంఖ్య‌లో కొత్త ఉద్యాగాలు వ‌స్తాయ‌న్న‌ది నిపుణుల అంచ‌నా. 

సరైన ప్రణాళిక ఉంటే మనదే అగ్రస్ణానం

       ఈ మొత్తం డిజిట‌ల్ ఆర్థిక వ్య‌వ‌స్థ‌లో స్మార్ట్ ఫోన్ల‌దే కీల‌క పాత్ర‌. కేవ‌లం సెక‌న్ల వ్య‌వ‌ధిలోనే అన్ని ప‌నులు నిలుచున్న చోట‌నే చేసే విధంగా త‌యారు చేయ‌డం ఇందులో మొద‌టి మెట్టు. డిజిట‌ల్ ఆర్థిక వ్య‌వ‌స్థ‌కు ఇండియాలో ఉన్న అవ‌కాశాల‌ను బ‌ట్టే బ‌డా బ‌డా కంపెనీలు కూడా ఇక్క‌డ త‌మ త‌యారీ కేంద్రాల‌ను నెల‌కొల్పుతున్నాయి. వీటి ద్వారా వేలాది ఉద్యోగాలు ల‌భిస్తాయి. ప్ర‌భుత్వం స‌రైన విధంగా ప్ర‌ణాళిక‌లు సిద్ధం చేస్తే వ‌చ్చే ఐదేళ్ల‌లో ఇండియా డిజిట‌ల్ ఆర్థిక వ్య‌వ‌స్థ‌లో తిరుగులేని శ‌క్తిగా ఎద‌గ‌డం ఖాయం. అప్పుడు విదేశీయులే ఇండియాకు ఉపాధి కోసం రావ‌డం త‌థ్యం.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com