అక్ష‌రాభ్యాస‌మా..? విద్యాభ్యాస‌మా..?

విద్యా వ్య‌వ‌స్థ‌లోని లోపాలు నైతిక‌త‌ను చంపుతున్నాయా? 

      అక్ష‌రాభ్యాసానికి విద్యాభ్యాసానికి ఒక స్ప‌ష్ట‌మైన తేడా ఉంది. ఆ నిర్దిష్ట‌మైన తేడాను గుర్తించడంలో విఫ‌లం కావ‌డం వ‌ల్ల‌నే ఇప్పుడు విద్యా వ్య‌వ‌స్థ‌లోని లోపాలు ఒక్కొక్క‌టిగా బ‌య‌ట‌ప‌డుతున్నాయి. ప‌దో త‌ర‌గ‌తి చ‌దువుకున్నా, ఇంట‌ర్ చ‌దివినా, డిగ్రీ చ‌దివినా, పోస్ట్ గ్రాడ్యుయేష‌న్ పాసైనా, పీహెచ్ డీ చేసినా వీట‌న్నింటిని అక్ష‌రాభ్యాసంగానే ప‌రిగ‌ణించాలి. మ‌రి విద్యాభ్యాసం అంటే ఏంట‌నే క‌దా సందేహం. విద్యాభ్యాసం చేయాలంటే అందులో విద్య తో పాటు అభ్యాసం కూడా ఉండాలి. విద్యాభ్యాసంలో చ‌దువుతో పాటు మాన‌వీయ కోణాలు, విలువ‌లు, నైతిక‌త‌, గౌర‌వ మ‌ర్యాద‌లు, స్థిత ప్ర‌జ్ఞ‌త వంటి విష‌యాలు ఉంటాయి. ఒక్క ముక్క‌లో చెప్పాలంటే విద్యాభ్యాసంలో విద్య‌తో పాటు సంస్కారం కూడా నేర్పుతారు. దుర‌దృష్ట‌వ‌శాత్తు ఇప్పుడు మ‌న విద్యావిధానంలో అదే క‌ర‌వైంది.

విలువ‌లు లేని విద్య వ‌లువ‌లు విప్పుతోంది! 

       ఇటీవ‌లికాలంలో మ‌న దేశంలో వ‌రుస‌గా జ‌రుగుతున్న కొన్ని దుర‌దృష్ట‌క‌ర సంఘ‌ట‌న‌లు మ‌న దేశ సంస్కృతీ, నైతిక విలువ‌ల‌పై సందేహాల‌ను ముసిరేలా చేశాయి. ఒక‌ప్పుడు విద్యకు, ఎన్నో మ‌తాల పుట్టుక‌కు, విలువ‌ల‌కు నిలువ‌ట్టంగా ఉన్న భార‌త‌దేశంలో ఇప్పుడు క‌నీస విలువ‌ల‌కు తిలోద‌కాలు ఇవ్వ‌డం ఆందోళ‌న రేకెత్తిస్తోంది. ముఖ్యంగా స్త్రీల‌కు గౌర‌వం ఇవ్వాల‌ని ప్ర‌పంచానికి చాటిచెప్పిన మ‌న దేశం ఇప్పుడు అబ‌ల‌ల‌పై అత్యాచారాల‌కు కేరాఫ్ అడ్ర‌స్ మారిపోయింది. చ‌దువులేని వ్య‌క్తులే ఇలాంటి దుశ్చ‌ర్య‌ల‌కు పాల్ప‌డుతున్నార‌ని కొంచెం స‌ర్ది చెప్పుకుందామ‌నుకున్నా, తాజాగా జ‌రిగిన ఘ‌ట‌న‌ల్లో నిందితులు బాగా చ‌దువుకున్న వారే కావ‌డం విశేషం. అస‌లు ఎందుకు ఇలా జ‌రుగుతోంది? లోపం ఎక్క‌డ ఉంది? మ‌న విద్యా వ్య‌వ‌స్థ‌లో ఉందా?లేక‌ స‌మాజంలో ఉందా?

మ‌నిషి వ్య‌క్తిత్వాన్ని తీర్చిదిద్దేది విద్యే! 

         ఒక మ‌నిషి వ్య‌క్తిత్వం, అత‌ని నైతిక‌లు విలువ‌లు అన్నీ పాఠ‌శాల స్థాయి నుంచే రూపుదిద్దుకుంటాయి. అందుకే పాఠ‌శాల‌ను ఒక దేశ భ‌విష్య‌త్ ను త‌యారుచేసే క‌ర్మాగారాలుగా పిలుస్తారు. ఒక మ‌నిషి చెడ్డ‌వాడుగా కానీ మంచివాడుగా కానీ త‌యారు కావ‌డానికి త‌ల్లిదండ్రుల బాధ్య‌త‌ స‌గ భాగం అయితే  స్కూల్ ది స‌గ‌భాగం. అయితే లోపం ఎక్క‌డ జ‌రుగుతుందో తెలియ‌దు కానీ తాజాగా కొన్ని ఘ‌ట‌న‌లు మ‌న విద్యా వ్య‌వ‌స్థ‌లోని లోపాల‌ను బ‌హిర్గతం చేస్తున్నాయి. దేశంలో మ‌హిళ‌ల‌పై జ‌రుగుతున్న అఘాయిత్యాల‌కు ఇటీవ‌లికాలంలో అదుపు లేకుండా పోతోంది. ఇలాంటి దుర్మార్గాల‌కు పాల్ప‌డున్న‌వారిలో అధిక శాతం మంది విద్యావంతులు ఉండ‌టం కొత్త చ‌ర్చ‌కు దారితీస్తోంది. స్త్రీల‌ను గౌర‌వించాల‌న్న విష‌యాన్ని పాఠ‌శాల స్థాయిలో నేర్చుకున్న మ‌నిషి దాన్ని స‌మాజంలో ఎందుకు అమ‌లు చేయ‌లేక‌పోతున్నాడు అన్న‌దే ప్ర‌శ్న‌. 

అక్ష‌రాస్య‌త‌లో మిన్న‌...నైతిక‌త‌లో సున్నా! 

      మ‌న‌దేశంలో అధిక శాతం మంది అక్ష‌రాస్యులు ఉన్న రాష్ట్రం కేర‌ళ‌. దేశంలోని మిగ‌తా రాష్ట్రాల‌తో పోల్చుకుంటే కేర‌ళలో చ‌దువుకున్న వాళ్లు అధికం. అయితే ఆ నేర్చుకున్న చ‌దువులో  స‌రైన సంస్కారం కొర‌వ‌డింద‌న్న వాద‌న ఇప్పుడు బ‌ల‌ప‌డుతోంది. ఆ రాష్ట్రంలో వ‌రుస‌గా జ‌రుగుతున్న అత్యాచార ఘ‌ట‌న‌లు అక్క‌డి ప్ర‌జ‌ల ప‌రువును తీస్తున్నాయి. తాజాగా కేర‌ళ‌లో ఓ సినీ హీరోయిన్ పై జ‌రిగిన లైంగిక దాడి, అఘాయిత్యం దేశ వ్యాప్తంగా పెద్ద చ‌ర్చ‌నీయాంశంగా మారింది. స‌మాజంలో మంచి స్థాయిలో ఉన్న సినీ హీరోయిన్ కే ర‌క్ష‌ణ లేన‌ప్పుడు మిగ‌తా మ‌హిళ‌ల సంగ‌తి ఏంటి అన్న వాద‌న బ‌య‌లుదేరింది. చ‌దువులో, సంస్కృతిలో, అభివృద్ధిలో ముందున్న కేర‌ళ‌, ఆడ‌వాళ్ల‌కు గౌర‌వం ఇవ్వాల‌న్న విష‌యంలో ఎందుకు వెనుక‌బ‌డింది? దీనికి నిపుణులు చెపుతున్న మాట ఒక‌టే ...విద్యా విధానంలో నైతిక విలువ‌లు కొర‌వ‌డ్డాయి అని. 

పోటీ విద్యలో వ్య‌క్తిత్వ నిర్మాణం మ‌రిచామా! 

       ఒకప్పుడు న‌లంద, విక్ర‌మ్ శిల‌, వార‌ణాసి వంటి విశ్వ‌విద్యాల‌యాలు. ప్ర‌పంచ జ్ఞాన సంప‌ద‌కు దిక్సూచిగా ఉండేవి. ప్ర‌పంచం న‌లుమూల‌ల నుంచి వ‌చ్చిన విద్యార్ధులు మ‌న విశ్వ‌విద్యాల‌యాల్లో విద్యాభ్యాసం చేసేవారు. కేవ‌లం చ‌దువే కాకుండా వ్య‌క్తిత్వ నిర్మాణం అప్ప‌టి విద్యా విధానంలో ఒక భాగంగా ఉండేది. అందుకే ఆ విద్యాల‌యాల్లో చదువుకున్న విద్యార్ధులు మంచి పౌరులుగా , పాల‌నా ద‌క్షులుగా ఎదిగేవారు. కానీ ప్ర‌స్తుతం మ‌నం అనుస‌రిస్తున్న విద్యా విధానంలో కేవ‌లం అవ‌స‌రాలు, మార్కులు త‌ప్ప ఇంకేమీ లేవు. దీంతో త‌ల్లిదండ్రుల‌ను, పెద్ద‌ల‌ను, స్త్రీల‌ను గౌర‌వించాల‌న్న ప్రాథ‌మిక సూత్రాల‌ను నేటి త‌రానికి చెప్పే నాథుడు లేడు. దీంతో విన‌యం లేని విద్య శోభించ‌ద‌న్న‌నానుడి మాదిరిగా ఎంత చ‌దువుకున్నాస‌రైన నైతిక విలువలు లేని వ్య‌క్తిత్వం ఉండ‌టం మూలాన స‌మాజంలో ఎలా మ‌సులుకోవాల‌న్న విష‌యాన్ని విస్మ‌రిస్తున్నారు. ఇది ఇలానే కొనసాగితే రానున్న రోజుల్లో మ‌రిన్ని విప‌రిణామాలు సంభ‌వించ‌వ‌చ్చ‌ని విద్యావేత్త‌లు ఆందోళ‌న వ్యక్తం చేస్తున్నారు. మ‌న పాత విద్యా విధానాన్ని ఆక‌లింపు చేసుకుని పోటీ విద్య‌తో పాటు విద్యార్ధి వ్య‌క్తిగ‌త‌ నిర్మాణాన్ని పెంపొందించే విధంగా మ‌న విద్యావ్య‌వ‌స్థ‌లో మార్పులు చేయాలి. లేకుంటే ఇలాంటి సంఘ‌ట‌న‌లు పున‌రావృతం అవుతూనే ఉంటాయి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                       You can send your Educational related articles to  careertimes.online1@gmail.com