చదివేది కేజీలు...మోసేది క్వింటాళ్లు..!

పుస్త‌కాల బ‌రువు మోయ‌లేక వంగిపోతున్న చిన్నారులు 

    స్కూల్ బ్యాగ్ బరువు పెరిగిపోతోంది. తమ బరువుకు మోయాల్సిన బరువు కన్నా అధిక బరువులు మోస్తూ చిన్నారులు కుంగిపోతున్నారు. అసలు ఎందుకు ఇంత బరువులు మోయించడం....? అంటే రేపు ఉద్యోగం రాకుంటే మూటలు మోసుకుని బతకొచ్చు అన్న చందంగా తయారైంది నేటి మన విద్యా విధానం.

       ఈ త‌రం పిల్ల‌ల‌పై ఇప్పుడు ఎన్నో బ‌రువు, బాధ్య‌త‌లు. ఒక‌వైపు త‌ల్లిదండ్రుల ఆకాంక్ష‌ల బ‌రువు, మ‌రోవైపు స్కూల్ యాజ‌మాన్యాల మార్కుల యావ బ‌రువు. ఈ రెండు భారీ భారాలను మెద‌ళ్ల‌లో మోస్తున్న చిన్నారులు, దానికి త‌గ్గ‌ట్టే బియ్యం బ‌స్తాల‌కు ఏ మాత్రం తీసిపోని భారీ స్కూల్ బ్యాగ్ ల‌ను భుజాల‌పై మోస్తున్నారు. త‌మ బ‌రువుకు మోయాల్సిన బ‌రువు కంటే ఎన్నో రెట్లు అధికంగా ఉన్న బ్యాగుల‌ను మోస్తూ వంగిపోతున్న న‌డుముల‌తో ఆప‌సోపాలు ప‌డుతున్నారు. పుస్త‌కాల బ్యాగులు మోయ‌లేక ప‌సివాళ్లు ప‌డుతున్న అవ‌స్థ‌ల‌ను చూసి తెచ్చిన నియ‌మ నిబంధ‌న‌లను తుంగ‌లో తొక్కుతూ స్కూల్ యాజ‌మాన్యాలు వారితో గాడిద బ‌రువుల‌ను మోయిస్తున్నాయి. త‌ర‌గ‌తి ఏదైనా కానీ టెక్ట్స్ బుక్స్, నోట్ బుక్స్, వ‌ర్క్ బుక్స్ అంటూ పిల్ల‌ల‌పై భారాన్ని పెంచుకుంటూ పోతున్నారు. భారీగా పెరిగిపోతున్న ఈ బరువుల‌ను మోయ‌లేక ముసలిత‌నంలో వ‌చ్చే డిస్క్ , వెన్నునొప్పి, మెడనొప్పి వంటి స‌మ‌స్య‌లు చిన్నారుల‌కు లేత ప్రాయంలోనే వ‌స్తున్నాయి.  

నిబంధ‌న‌లు ఏం చెపుతున్నాయి 

       పాఠ‌శాల విద్యార్ధుల బ‌రువులో పుస్త‌కాల బ‌రువు 10 శాత‌మే ఉండాల‌ని 2006 లో చిల్డ్ర‌న్ స్కూల్ బ్యాగ్ యాక్ట్ ను తీసుకొచ్చారు. అయితే ఈ యాక్ట్ ను ప‌ట్టించుకునే నాథుడే లేదు. ఏ క్లాస్ తీసుకున్నా టెక్స్ట్ బుక్స్ స‌రాస‌రి బ‌రువు 5 కిలోల వ‌ర‌కూ ఉంటోంది. దీంతో పాటు ప్ర‌తీ స‌బ్జెక్ట్ కు ఒక నోట్ బుక్, ఒక వ‌ర్క్ బుక్ అంటూ పుస్త‌కాల సంఖ్య‌ను పెంచుకుంటూ పోతున్నారు. దీంతో బ్యాగ్ బ‌రువు పెరిగి ఒక్కో విద్యార్ధి ప్ర‌స్తుతం త‌న బ‌రువులో 30 శాతం వ‌ర‌కూ ఉండే ఒక చిన్న సైజ్ బ‌స్తాను మోయాల్సి వ‌స్తోంది. ఈ భారీ బ్యాగ్ కు తోడు క్యారేజీ, వాట‌ర్ బాటిల్ వంటిని అద‌న‌పు భారాలు, ఈ భారీ బ‌రువును మోయ‌లేక చిన్నారులు ఆప‌సోపాలు ప‌డుతున్నారు. భారీగా పెరిగిపోతున్న ఈ స్కూల్ బ్యాగ్ ల బ‌రువుపై సాక్షాత్తూ కోర్టులే ఎన్నో సార్లు జోక్యం చేసుకున్నాయి. చిల్డ్ర‌న్ స్కూల్ బ్యాగ్ యాక్ట్ 2006 ను తుంగ‌లో తొక్కుతున్నారంటూ ఆగ్ర‌హం వ్య‌క్తం చేసాయి. అయితే అప్ప‌టిక‌ప్పుడు కేంద్ర, రాష్ట్ర ప్ర‌భుత్వాలు తూతూమంత్రంగా ఏవో కొన్ని చ‌ర్య‌లు తీసుకోవ‌డం త‌ర్వాత వాటిని మ‌ర్చిపోవ‌డం అన‌వాయితీగా మారిపోయింది. దీంతో త‌మ‌కు అడ్డులేద‌ని భావిస్తున్న ప్ర‌యివేట్ స్కూల్ యాజ‌మాన్యాలు పుస్త‌కాల బ‌రువును పెంచుకుంటూ పోతున్నాయి. 

ఇప్ప‌టికే ప‌లు అనారోగ్య స‌మ‌స్య‌ల‌ను ఎదుర్కొంటున్న చిన్నారులు  

      ఇటీవ‌ల అసోచామ్ నిర్వ‌హించిన ఓ స‌ర్వేలో ప‌లు ఆందోళ‌న‌క‌ర విష‌యాలు వెలుగు చూశాయి. అధిక శాతం మంది అంటే దాదాపు 68 శాతం మంది భారీ స్కూల్ బ్యాగ్ ల కార‌ణంగా ప‌లు స‌మ‌స్య‌ల‌ను ఎదుర్కొంటున్నార‌ని ఆ నివేదిక వెల్ల‌డించింది. ముఖ్యంగా పిల్ల‌ల్లో గూని ల‌క్ష‌ణాలు క‌నిపించిన‌ట్టు చెప్పింది. పుస్త‌కాల బ్యాగ్ ను మోయ‌ని స‌మ‌యంలో చాలా మంది పిల్ల‌లు వంగే న‌డుస్తున్నార‌ని ఆ నివేదిక బ‌య‌ట‌పెట్టింది. అధిక బ‌రువే ఈ దుస్థితికి కార‌ణ‌మ‌ని ఆ స‌ర్వేలో వెలుగు చూసింది. ఉదాహ‌ర‌ణ‌కి ఒక ఐదేళ్ల పిల్ల‌వాని స‌గ‌టు బ‌రువు 18 కేజీలు అనుకుంటే అత‌ను మోయాల్సిన బ్యాగ్ బరువు 1.8 కేజీల‌కు మించ‌కూడ‌దు. అయితే  దీనికి ఎన్నో రెట్ల అధిక బ‌రువును పిల్లలు మోస్తున్నారు. ఇప్ప‌టికే సిబీఎస్ఈ, స్టేట్ సిల‌బ‌స్, ప్ర‌యివేట్ స్కూళ్ల‌లో టెక్స్ట్ బుక్ ల స‌గ‌టు బ‌రువు 5 కేజీలకు పైనే ఉంది. 

బ‌రువులు త‌గ్గించ‌క‌పోతే న‌ష్ట‌మంటున్న వైద్య నిపుణులు

      చిన్న వ‌య‌సులో వెన్నుపూస పెరుగుద‌ల అధికంగా ఉంటుంద‌ని వైద్యులు చెపుతున్నారు. ఆ స‌మ‌యంలో భారీ స్కూల్ బ్యాగ్ లు మోయ‌డం వ‌ల‌న వారి వెన్నుపూస ప‌క్క‌కు వంగిపోయే ప్ర‌మాదం ఉంద‌ని, అదే విధంగా డిస్క్ లు ప‌క్క‌కు జ‌ర‌గ‌డం, గూని రావ‌డం వంటి ప్ర‌మాదాలు ఉన్నాయ‌ని అంటున్నారు. ఈ విష‌యంలో త‌ల్లిదండ్రులు అమిత‌మైన శ్ర‌ద్ధ తీసుకోవాల‌ని, పిల్ల‌వాడు బ్యాగ్ ను ఎలా త‌గిలించుకుంటున్నాడో, వీపుకి ఒత్తిడి లేకుండా పుస్త‌కాల‌ను స‌రిగ్గా అమ‌ర్చుకుంటున్నాడా లేదా అన్న విష‌యాన్ని ప‌ర్య‌వేక్షించాల‌ని వారు సూచిస్తున్నారు. పిల్ల‌వాడు భుజం నొప్పి, న‌డుం నొప్పి, మెడ‌నొప్పి అని చెప్పిన‌ప్పుడు నిర్ల‌క్ష్యం చేయ‌కుండా వారి స్కూల్ బ్యాగ్ బ‌రువు, వారు మోస్తున్న విధానంపై త‌ల్లిదండ్రులు త‌గినంత శ్ర‌ద్ధ పెట్టాల‌ని చెపుతున్నారు.

త‌ల్లిదండ్రులు ఏం చేయాలి? 

      చాలా స్కూల్స్ పిల్ల‌ల‌కు డెస్క్ సౌక‌ర్యాన్ని క‌ల్పిస్తున్నాయి. దీని ద్వారా స‌గం పుస్త‌కాల‌ను అక్క‌డే వ‌దిలేసే అవ‌కాశం ఉంటుంది. ఇలాంటి డెస్క్ లు ఉన్న స్కూళ్ల‌ను ఎంచుకోవ‌డం మంచింది. అదే విధంగా డిజిట‌ల్ క్లాస్ లు న‌డుపుతున్న స్కూళ్ల‌ను కూడా ఎంచుకుంటే బాగుంటుంది. ఎందుకంటే వాళ్లు ట్యాబ్ లోనే హోం వ‌ర్క్ , నోట్ వ‌ర్క్ అన్నింటిని చెపుతారు. అదే విధంగా టెర్మ్ ల వారీగా సిల‌బ‌స్ ను విభ‌జించి పుస్త‌కాల భారాన్ని త‌గ్గించే స్కూళ్ల‌కు ఓటేయాలి. అదే విధంగా స్కూల్ బ్యాగ్ ను స‌ర్దుకునే విష‌యంలో పిల్ల‌ల‌కు మెలుకువ‌లు నేర్పించాలి. లావుగా ఉన్న పెద్ద పుస్త‌కాల‌ను వెన‌క‌వైపు, తేలిగ్గా ఉండే చిన్న పుస్త‌కాల‌ను ముందు వైపు పెట్టుకునేలా పిల్ల‌ల‌కు త‌ర్ఫీదు ఇవ్వాలి. ఇక బ్యాగ్ త‌గిలించుకున్నాక నిటారుగా న‌డ‌వాల‌న్న విష‌యాన్ని పిల్ల‌ల‌కు ప‌దే ప‌దే చెప్పాలి. వంగి న‌డిస్తే అదే అల‌వాట‌య్యే ప్ర‌మాదం ఉంటుంది. 

పిల్ల‌ల‌పై ఈ పెను భారాన్ని త‌గ్గించాలి 

       ప‌రిమితికి మించి పెరిగిపోతున్న స్కూల్ బ్యాగ్ బ‌రువు చిన్నారుల ఆరోగ్యం పాలిట విల‌న్ గా మారుతోంది. ఎటువంటి లోపాలు లేకుండా పిల్ల‌లు ఆరోగ్యంగా ఎదిగేందుకు తల్లిదండ్రుల‌తో పాటు ప్ర‌భుత్వాలు త‌గిన‌న్ని చ‌ర్య‌లు తీసుకోవాలి. కొత్త చ‌ట్టాలు తీసుకురాలేకున్నా ఉన్న చ‌ట్టాల‌ను స‌క్ర‌మంగా అమ‌లు చేసి పిల్ల‌లు మోస్తున్న గాడిద బ‌రువును త‌గ్గించాలి. లేకుంటే ఏ అంద‌మైన భ‌విష్య‌త్ కోసం అయితే వారితో అంతలేసి బ‌రువులు మోయిస్తున్నారో అదే భ‌విష్య‌త్ అంధ‌కారంగా మారే ప్ర‌మాదం ఉంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

You can send your Educational related articles to  careertimes.online1@gmail.com