పిల్ల‌ల క‌ల‌ల లోకాన్ని కూలుస్తున్న దుర్మార్గం!

ఇరుకుగ‌దుల్లో బ‌ల‌వుతున్న‌ బాల్యం 

     విద్యాల‌యం, గ్రంధాల‌యం దేవాల‌యం, క్రీడాలయం...ఒక విద్యార్ధి యొక్క‌ భ‌విష్య‌త్ నిర్ణ‌యం జ‌రిగేది ఈ నాలుగు ఆల‌యాల్లోనే. సువిశాల‌మైన ఈ నాలుగు ప‌విత్ర స్థలాల్లో జ‌ర‌గాల్సిన విద్యార్ధి భ‌విష్య‌త్ నిర్మాణం ఇప్పుడు ఇరుకు గ‌దుల‌కు ప‌రిమిత‌మైపోయింది. అస‌లు విద్యార్ధులకు క్రీడా మైదానాలు, గ్రంధాల‌యాలు అంటే ఏంటో తెలియ‌నంత‌గా పరిస్థితి దిగజారిపోయింది. మ‌న దేశ భ‌విష్య‌త్ ఇరుకు గ‌దుల‌కే ప‌రిమితం కాకుండా ఉండాలంటే త‌క్ష‌ణ‌మే క‌ళ్లు తెర‌వాలి లేకుంటే జ‌రిగే న‌ష్టం అప‌రిమితంగా ఉంటుంది. 

ఆట స్థలాలు, గ్రంధాలయాల ఊసే లేని న‌యా విద్యా విధానం

    బాల్యం....ప్ర‌తీ మ‌నిషి జీవితంలో ఒక అందమైన, మ‌రపురాని జ్ఞాప‌కం. బాల్యంలో చేసిన అల్ల‌రి , ఆడుకున్న ఆట‌లు, చేసుకున్న చిలిపి ప‌నులు...వీటినే ప్ర‌తీ మ‌నిషి త‌న క‌ష్ట‌కాలంలో నెమ‌రువేసుకుంటాడు. బాల్య ద‌శ‌లో తాను గ‌డిపిన‌ ఆ ఆనంద స‌మ‌యాన్ని జ్ఞ‌ప్తికి తెచ్చుకుని స్వాంత‌న పొందుతాడు. అయితే ఈ అదృష్టం నిన్న‌టి త‌రం వాళ్ల‌తోనే అంత‌రించిపోతోంది. ఈ త‌రం చిన్నారుల‌కు అటువంటి తీపి అనుభూతుల‌ను అవ‌లోక‌నం చేసుకునే అదృష్టం ఉండ‌క‌పోవ‌చ్చు. ఎందుకంటే వాళ్ల జీవితంలో ఆట‌లు లేవు. మాన‌సిక ఉల్లాసం లేదు. ఉద‌యం నుంచి సాయింత్రం వ‌ర‌కూ నాలుగు గోడ‌ల మ‌ధ్య ఉడికిపోయిన బంగాళాదుంప‌ల్లా చిన్నారులు మ‌గ్గిపోతున్నారు. అంద‌మైన మ‌ధుర జ్ఞాప‌కంగా ఉండాల్సిన బాల్యం, మ‌న పోటీ విద్యా విధానంలో అత్యంత క‌ర్క‌శంగా బ‌ల‌వుతోంది. 

70% స్కూళ్ల‌లో క్రీడా మైదానాలు లేవు 

    ప‌ట్ట‌ణీక‌ర‌ణ పెరిగిపోతున్న ప్ర‌స్తుత త‌రుణంలో స్కూళ్లు పుట్ట‌గొడుగుల్లా పుట్టుకొస్తున్నాయి. అపార్ట్ మెంట్ సంస్కృతికి బీజం ప‌డ‌టంతో వీధికొక స్కూల్ వెలుస్తోంది. అయితే ఈ స్కూళ్ల‌న్నీ న‌డిచేది ఇళ్ల‌ల్లోనో లేక అపార్ట్ మెంట్ల‌లో మాత్ర‌మే. ఆ బిల్డింగ్ కు చిన్న చిన్న మార్పులు చేసి స్కూళ్లుగా మారుస్తున్నారు. ఈ స్కూళ్ల‌లో అస‌లు క్రీడా మైదానాలు అన్న ఊసే లేదు. ఉద‌యం నుంచి సాయింత్రం వ‌ర‌కూ పిల్ల‌లకు ఇరుకు గ‌దుల్లో చ‌దువులు చెపుతూ అంద‌మైన వారి బాల్యాన్ని హ‌రించివేస్తున్నారు. ఎంత‌సేపు పోటీ పోటీ అంటూ బాల్యంలో ఆట‌లు ఒక భాగ‌మ‌న్న విష‌యాన్ని మ‌ర్చిపోయేలా చేస్తున్నారు. త‌ల్లిదండ్రులు కూడా కేవ‌లం త‌మ ఇంటికి స్కూల్ ద‌గ్గ‌ర‌గా ఉంది అన్న విష‌యాన్ని చూస్తున్నారు త‌ప్పితే అక్క‌డ క్రీడా మైదానం ఉందా? లేదా? అన్నముఖ్య‌మైన విష‌యాన్ని చాలా తేలిగ్గా తీసుకుంటున్నారు. త‌మ పిల్ల‌లు మాన‌సిక ఉల్లాసానికి ఆట‌లు చాలా ఆట‌లాడిన‌ప్పుడు అత‌నిలో జ‌రిగే ర‌సాయ‌న‌క చ‌ర్య‌లు అత‌ని పెరుగుద‌ల‌కు దోహ‌దం చేస్తాయి. మంచి ఆట‌లు ఆడిన విద్యార్ధి శారీర‌కంగా చాలా దృఢంగా ఉంటాడు. దీంతో అనారోగ్యం పాలుకాకుండా చ‌దువుపై మ‌రింత శ్ర‌ద్ధ పెట్టేందుకు అవ‌కాశం క‌లుగుతుంది. అయితే ఈ శాస్త్రీయ ఆధారాలను అవ‌స‌ర‌మ‌న్న అంశాన్ని విష‌యాన్ని విస్మ‌రిస్తున్నారు. దీంతో పిల్ల‌ల బాల్యాన్ని హ‌రిస్తున్న దోషుల జాబితాలో త‌ల్లిదండ్రులు కూడా ఉన్నార‌నే చెప్పాలి. ఒక పిల్ల‌వాడు మైదానంలో శ‌రీరం మొత్తం అలిసేలా చెత్త‌బుట్ట‌లో వేసిన మ‌న విద్యా విధానం ఇరుకు గ‌దుల్లో విద్యార్ధుల బాల్యాన్ని బందీ చేస్తోంది. దీంతో ఆడుకునేందుకు మైదానాలు లేక పిల్ల‌లు కంప్యూట‌ర్స్ లోనూ, సెల్ ఫోన్ల లో ఆడుకుంటూ కొత్త ర‌కం స‌మ‌స్య‌ల్లోకి వెళ్లిపోతున్నారు. ఈ దుస్థితి నుంచి బ‌య‌ట‌ప‌డాలంటే స్కూళ్ల‌లో క్రీడా మైదానాలు ఏర్పాటు చేయ‌డ‌మే స‌రైన ప‌రిష్కారం. గ్రంధాల‌యాల  సంగ‌తే మర్చిపోయారు!

పిల్ల‌ల ఊహాశ‌క్తిని పెంచే పుస్త‌కాల ఊసేదీ? 

      పిల్ల‌లు మాన‌సిక, శారీర‌క వికాసానికి ఆట‌లు ఎంత అవ‌స‌ర‌మో అలాగే పిల్ల‌ల్లో ఊహాశ‌క్తిని పెంచేందుకు వాళ్ల జ్ఞాన ప‌రిమితిని పెంచేందుకు పుస్త‌కాలు కూడా అంతే అవ‌స‌రం. ఈ రెండు విష‌యాలు అత్యంత ముఖ్య‌మైన‌వి కాబ‌ట్టే మ‌న ప్రాచీన విద్యా విధానంలో ఈ రెండింటికి అత్యంత ప్రాధాన్య‌త‌నిచ్చేవారు. ఆట‌లు, పుస్త‌క ప‌ఠ‌నం లేకుంటే కౌమార ద‌శ మొద్దుబారిపోతుంద‌ని విద్యావేత్త‌లు ఎప్పుడో చెప్పారు. ఇంత ముఖ్య‌మైన విష‌యాన్ని ఇప్పుడు మ‌న విద్యా విధానం ఎందుకు విస్మ‌రిస్తుందో అర్ధం కాని అయోమ‌య స్థితి నెల‌కొని ఉంది. ఒక మంచి పుస్త‌కం చ‌దివితే ఒక పిల్ల‌వాని ఉహాశ‌క్తి, జ్ఞాన సంప‌ద ఎన్నో రెట్లు పెరుగుతుంది. ఎంత సేపూ క్లాస్ పుస్త‌కాలు త‌ప్పితే పిల్ల‌ల‌కు ఆస‌క్తిని క‌లిగించే క‌థ‌ల పుస్త‌కాలు, రామాయ‌ణం, మ‌హాభార‌తం వంటి ఇతిహాసాలు ఏ స్కూల్లో కూడా భూత‌ద్దం పెట్టి వెతికినా క‌నిపించ‌వు. ప్ర‌తీ స్కూల్ కు విభిన్న అంశాల‌కు సంబంధించిన పుస్త‌కాలతో నిండిన గ్రంధాల‌యం క‌చ్చితంగా ఉండాల్సిందే. అయితే ప్ర‌స్తుతం ఏ స్కూల్ లోనూ గ్రంధాల‌యం అన్న ప‌ద‌మే లేదు. ఇక త‌ల్లిదండ్రులు కూడా ఎంత‌సేపు క్లాస్ రూమ్ పుస్త‌కాలు చ‌ద‌వ‌మ‌ని ఒత్తిడి చేయ‌డ‌మే కానీ వారంలో ఒక రోజు అయినా మంచి ఆస‌క్తిక‌ర పుస్త‌కాల‌ను త‌మ పిల్ల‌ల‌తో చ‌దివించే ప్ర‌య‌త్నం చేయ‌డం లేదు. అటు స్కూల్ లోనూ ఇటు ఇంటిలోనూ మంచి జిజ్ఞాస‌ను క‌లిగించే పుస్త‌కాలు దొర‌క్క పిల్ల‌లు సెల్ ఫోన్ లో ఫేస్ బుక్, ట్విట్ట‌ర్ ల‌లో ప‌నికిమాలిన విష‌యాల‌ను చదువుతూ మానసికంగా దిగ‌జారుతున్నారు.

 నిర్ల‌క్ష్యానికి గురువుతున్న‌ విద్యా హ‌క్కు చ‌ట్టం 

       ఎంతో అర్భాటంగా కేంద్ర ప్ర‌భుత్వం అమ‌ల్లోకి తెచ్చిన విద్యా హ‌క్కు అప‌హాస్యం పాల‌వుతోంది. పిల్ల‌లు మాన‌సిక‌, శారీర‌క ఎదుగ‌ద‌ల‌ను నిర్వీర్యం చేసేలా ఉన్న ప్ర‌స్తుత విద్యా విధానం క‌చ్చితంగా విద్యా హ‌క్కు చ‌ట్టానికి వ్య‌తిరేక‌మే. విద్యా హ‌క్కు చ‌ట్టంలో ప్రతీ స్కూల్ కు క్రీడా మైదానం, గ్రంధాల‌యం ఉండాల‌ని చాలా స్ప‌ష్టంగా పేర్కొన్నారు. అయితే అది కేవ‌లం కాగితాల‌కే ప‌రిమితం కావ‌డంతో బంగారం లాంటి బాల్యం వ్యాపార విద్య మ‌ధ్య బ‌లైపోతూనే ఉంది. మ‌న దేశంలో దాదాపు 70 శాతం స్కూళ్ల‌లో అస‌లు క్రీడా మైదానాలు లేవంట‌నే అర్ధం చేసుకోవ‌చ్చు ప‌రిస్థితి ఎంత తీవ్రంగా ఉందో. గ‌డిచిన మూడు నాలుగేళ్ల‌లో ప్రారంభించిన అధిక శాతం స్కూళ్లలో అస‌లు క్రీడా మైదానం ఊసే లేదు. చాలా వ‌త్స‌రాల నుంచి న‌డుపుతున్న పాత స్కూళ్ల‌లో మాత్ర‌మే మైదానాలు, గ్రంధాల‌యాలు ఉన్నాయి. 

       చిన్నారులు అంటే మ‌రెవ‌రో కాదు వాళ్లు మ‌న దేశ భ‌విష్య‌త్. అంటే మ‌న దేశ భ‌విష్య‌త్ ను మ‌న‌మే చేజేతులా నాశనం చేస్తున్నాము. ఆహ్లాదాన్ని పంచే విద్యా విధానాన్ని విడ‌నాడి పోటీ చ‌దువుల‌కు సై అంటున్నాం. ఇది దీర్ఘ‌కాలంలో మ‌న పిల్ల‌ల‌పై తీవ్ర ప్ర‌భావాన్ని చూపిస్తుంది. ఒక‌ప్పుడు మ‌న విద్యా విధానంతో ప్ర‌పంచానికే త‌లమానికంగా నిలిచిన మ‌నం ఇప్పుడు ఎందుకు ఇలా దిగ‌జారిపోతున్నాం. ఒక పిల్ల‌వానికి బాల్యంలో త‌ను ఆడిన ఆట‌లు, తను చ‌దివిన క‌థ‌లు చెప్పుకునేందుకే ఏమీ లేవు అని అంటే అది ఏవ‌రి త‌ప్పు? 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

You can send your Educational related articles to  careertimes.online1@gmail.com