ఆన్ లైన్ లో లేకుంటే లైన్ లో లేన‌ట్టే..!

    మారుతున్న టెక్నాల‌జీకి అనుగుణంగా రోజుకో కొత్త ఆవిష్క‌ర‌ణ పురుడు పోసుకుంటోంది. మ‌నిషి త‌న ప‌నుల‌ను మ‌రింత సౌక‌ర్యవంతం చేసుకునేందుకు, త‌క్కువ స‌మ‌యంలో ప‌నులు చ‌క్క‌బెట్టుకునేందుకు ప్ర‌య‌త్నాలు ముమ్మ‌రం చేస్తూనే ఉన్నాడు. గ‌డిచిన ఇర‌వై ఏళ్ల‌లో మ‌నం ఎన్నో మార్పుల‌ను చ‌విచూశాం. మ‌న జీవితాల‌ను పూర్తిగా మార్చివేసిన ఆవిష్క‌ర‌ణ‌ల‌కు సాక్షులుగా నిలిచాం. సెల్ ఫోన్, ఇంట‌ర్నెట్, కంప్యూట‌ర్ మ‌నిషి గ‌మ‌నాన్నే పూర్తిగా మార్చేశాయి.  ఇవ‌న్నీ మన జీవితంలో ఒక భాగంగా మారిపోయాయంటే అతిశ‌యోక్తి కాదు. ప్ర‌తికూల అంశాల‌ను ప‌క్క‌న పెడితే న‌యా టెక్నాల‌జీతో మ‌న జీవితం మ‌రింత సులువైంది. ఎన్నో అవ‌కాశాలు, అద్భుతాల‌కు ఈ టెక్నాల‌జీ దారులు ప‌రిచింది. ప్ర‌స్తుతం శిఖ‌ర స్థాయిలో ఉన్న‌ ఈ న‌యా టెక్నాల‌జీ రానున్న రోజుల్లో మ‌రిన్ని అద్భుతాలు సృష్టించేందుకు సిద్ధ‌మ‌వుతోంది. 

గ‌డిచిన రెండు ద‌శాబ్దాల్లో అనూహ్య మార్పులు 

   టెలిఫోన్ నుంచి సెల్ ఫోన్ కు  మారేందుకు టెక్నాలజీకి  ఎక్కువ సమయం తర్వాత అనూహ్యమైన వేగంతో దూసుకుపోయింది. సెల్ ఫోన్ నుంచి స్మార్ట్ ఫోన్...స్మార్ట్  ఫోన్ నుంచి ఆర్టిఫిషియల్ ఇంటెలిజెన్స్ వరకూ జరిగిన మార్పు గడిచిన పదేళ్లలోనే సాధ్యమైంది.  గ‌తంలో బ‌తికేందుకు పొట్ట చేతప‌ట్టుకుని ప‌ట్ణ‌ణాల‌కు వచ్చిన వారు ఆ మ‌హా న‌గ‌రాల్లో బతికేందుకు నానా పాట్లు ప‌డేవారు. సిటీలో నాణ్య‌మైన జీవ‌నం గ‌డిపేందుకు,  ప‌ల్లెల్లో ఉన్న త‌మ వారి ద‌గ్గ‌ర‌కు వెళ్లాల‌న్నా వారితో మాట్లాడాల‌న్నా ఎన్నో వ్య‌య ప్ర‌యాస‌లకు ఓర్చుకోవాల్సి వ‌చ్చేది. అయితే గ‌డిచిన రెండు ద‌శాబ్దాల్లో వ‌ర్ధ‌మాన దేశాల న‌గ‌రాల్లో ఉన్న మ‌నుష్యుల జీవితాలు అనూహ్య‌మైన మార్పుల‌కు లోన‌య్యాయి. టెక్నాల‌జీ వారి జీవన గ‌మ‌నాన్ని పూర్తిగా మార్చివేసింది. వారి వేత‌నాల్లో పెరుగుద‌ల‌, వారి జీవ‌న ప్ర‌మాణాల్లో నాణ్య‌త పెరిగాయి. ఇప్పుడు సొంత ఊరిలో ఉన్న‌వారితో ఏ క్ష‌ణం కావాల‌నుకుంటే ఆ క్ష‌ణంలో మాట్లాడుతున్నారు. సొంత ప్రాంతానికి వెళ్లాలంటే మెరుగుప‌డిన రవాణా వ్య‌వ‌స్థ వ‌ల‌న ఆ విష‌యం సుల‌భ‌త‌రంగా మారిపోయింది. న‌యా ఆర్థిక వ్య‌వ‌స్థ‌ల‌కు చోద‌క శ‌క్తులుగా ఎదిగిన ఈ వ‌ర్గ‌మే ఇప్పుడు టెక్నాల‌జీ గ‌మ‌నాన్ని శాసిస్తోంది. గ‌డిచిన కొన్ని నెల‌లుగా చైనాలో త‌యారీ రంగం కుంటుప‌డింది. దానికి కార‌ణం మ‌ధ్య త‌ర‌గ‌తి ప్ర‌జ‌ల జీవ‌న ప్ర‌మాణాలు మెరుగుప‌డ‌టం, వారు త‌క్కువ జీతాల‌కు ఎక్కువ గంట‌లు ప‌నిచేసేందుకు సిద్ధంగా లేరు. దీంతో కంపెనీలు ప‌నికి అంత‌రాయం క‌ల‌గుకుండా ఉండేందుకు కొత్త దారులు వెతుకుతున్నాయి. 

కృత్రిమ మేధ‌..రేప‌టి ముఖ‌చిత్రం

    ఇప్పుడు టెక్నాల‌జీ ప్ర‌పంచంలో ఎక్కువ‌గా వినిపిస్తున్న పేరు ఆర్టిఫిషియ‌ల్ ఇంటెలిజెన్స్ ( కృత్రిమ మేధ‌స్సు). రానున్న రోజుల్లో మ‌నిషి జీవ‌న గ‌మ‌నాన్ని పూర్తిగా మార్చేసే శ‌క్తి కృత్రిమ మేధ సొంతం. దీని పేరులోనే మొత్తం విష‌యం నిబిడీకృత‌మై ఉంది. మ‌నిషి చేయ‌లేని, చేయ‌ని ప‌నుల‌ను కృత్రిమ మేధ ద్వారా న‌డిపించేందుకు చ‌ర్య‌లు ముమ్మ‌రమ‌వుతున్నాయి. ఇప్ప‌టికే గూగుల్ వంటి కంపెనీలు ఆర్టిఫిషియ‌ల్ ఇంటెలిజెన్స్ ను పూర్తి స్థాయిలో వినియోగించుకునేందుకు చ‌ర్య‌లు ప్రారంభించేశాయి. డ్రైవ‌ర్ అవ‌స‌రం లేని గూగుల్ డ్రైవ‌ర్ లెస్ కార్ ప్ర‌యోగాలు పూర్తి చేసుకుని రంగంలోకి దిగేందుకు రెడీగా ఉంది. అదే విధంగా వెబ్ సైట్ల‌లో అభ్యంత‌ర‌క‌ర‌మైన విష‌యాల‌ను, అభిప్రాయాల‌ను తొలిగించేందుకు కూడా గూగుల్ ప్ర‌యోగాత్మకంగా కృత్రిమ మేధ‌ను వినియోగిస్తోంది. ఇప్ప‌టికే కొన్ని కంపెనీలు మనుష్యుల స్థానంలో రోబోల‌ను వినియోగిస్తున్నాయి. రానున్న రోజుల్లో కృత్రిమ మేధ‌తో ప‌నిచేసే రోబోలు హ‌ల్ చ‌ల్ చేయ‌వ‌చ్చు.  

ఊహ‌కు అంద‌ని మార్పులు ఇంకా ఉన్నాయి 

  గ‌డిచిన రెండు ద‌శాబ్దాల్లో చోటు చేసుకున్న మార్పులు అస‌లు ఊహ‌కు కూడా అంద‌నివి. ప‌దేళ్ల క్రితం  తిండి ద‌గ్గ‌ర్నుంచి షాపింగ్ వ‌ర‌కూ బ్యాంక్ లావాదేవీల నుంచి బిజినెస్ వ‌ర‌కూ అన్నీ ప‌నులు స్మార్ట్ ఫోన్ లో సెక‌న్ల‌లో చేస్తామ‌ని ఎవ‌రూ ఊహించి కూడా ఉండ‌రు. 2007 లో ట్విట్ట‌ర్ ప్రారంభ‌మైన‌ప్పుడు అస‌లు ఇలాంటివి మ‌నుగ‌డ సాగిస్తాయా అన్న‌వారు ఇప్పుడు ల‌క్ష‌లాది స్టార్ట‌ప్ ల‌ను చూసి నోరు వెళ్ల‌బెడుతున్నారు. అదే విధంగా వ‌చ్చే ప‌దేళ్ల‌లో టెక్నాల‌జీలో ఎటువంటి మార్పులు చోటుచేసుకుంటాయో అన్న‌ది ఊహించ‌డం కాస్త క‌ష్ట‌మే. అయితే రానున్న ద‌శాబ్దంలో కృత్రిమ మేధ అనేది క్రీయాశీల‌క పాత్ర పోషిస్తుంద‌న‌డంలో ఎటువంటి సందేహం లేదు. 

విద్యార్ధులు కొత్త ఆలోచ‌న‌ల‌తో సిద్ధంగా ఉండాలి

   వ‌చ్చే ద‌శాబ్దంలో చోటుచేసుకోబోయే ఈ అనూహ్య మార్పుల‌ను, అవ‌కాశాల‌ను అందిపుచ్చుకునేందుకు విద్యార్ధులు సిద్ధంగా ఉండాలి. కొత్త త‌ర‌హా ఆలోచ‌న‌ల‌తో ఈ స్మార్ట్ యుగంలో మ‌నుగ‌డ సాగించేందుకు స‌మాయుత్తం కావాలి. స‌రిగ్గా గ‌మ‌నిస్తే టెక్నాల‌జీని స‌రిగ్గా వినియోగించుకుని చాలా మంది యువ‌త త‌మ క‌ల‌ల‌ను సాకారం చేసుకున్నారు. మార్క్ జుకెర్ బ‌ర్గ్ లాంటి ఎంద‌రో యువ‌కులు బ‌డా వ్యాపార సామ్రాజ్యాల‌ను నిర్మించారు. మ‌న దేశంలో కూడా యువ‌త ఆద్వ‌ర్యంలో ఎన్నో స్టార్ట‌ప్ లు ఊపిరిపోసుకున్నాయి.  కొత్త టెక్నాల‌జీ అవ‌కాశాల గ‌ని.  అందుకే ఎప్పుడే అప్ డేట్ అవుతూ ముందుకు సాగితే విద్యార్ధుల‌కు తిరుగుండ‌దు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com