'భజన' బృందాన్ని న‌మ్ముకుంటే నిమ‌జ్జ‌న‌మే!
గణపతి నిమజ్జనం పూర్తయిపోయింది. మట్టి నుంచి తయారైన గణపతి తిరిగి ప్రకృతి తల్లి ఒడిలోకి చేరిపోయాడు. గణేష్ నవరాత్రులు, నిమజ్జనం మనకు పరోక్షంగా ఎన్నో పాఠాలను నేర్పుతాయి. గణేష్ నిమజ్జనాన్ని మరో కోణంలో మనం జీవన నైపుణ్యాలకు అన్వయించుకుంటే మనకు కొత్త విషయాలు అవగతమవుతాయి. కాస్త హాస్యం జోడించి చెప్పుకోవాలంటే గణేశుడికి 9 రోజుల పాటు పూజలు, హారతులు, భజనలు చేసే భక్తులు చివరికి తీసుకెళ్లి నీళ్లలో ముంచేస్తారు. భజనపరులతో జాగ్రత్తగా లేకుంటే దేవుడు అయినా సరే నీటిలో మునిగిపోక తప్పదన్నది ఇందులోని నీతి. ప్రస్తుత సమాజంలో లేనిది ఉన్నట్టు చెప్పి పబ్బం గడుపుకునే భజనపరులకు కొదువే లేదు. తమ ఉనికిని, స్థితిని పెంచుకునేందుకు ఎల్లప్పుడు సిద్ధంగా ఉండే భజనపరులతో జాగ్రత్తగా లేకుంటే వ్యక్తులైనా, సంస్థలైనా దివాళా తీయాల్సిందే. దివంగత డా. సీ. నారాయణ రెడ్డి గారు చెప్పినట్టు భజనపరులు ఎప్పుడు తయారవుతారంటే వాళ్లలో సృజనశక్తి , కష్టపడే తత్వం ఇంకిపోయినప్పుడు. మీరు ఏం చేస్తున్నా వహ్వా..అద్భుతం..అంటూ చప్పట్టు ఎవరైతే కొడుతున్నారో వారు మీ పతనానికి దారులు పరుస్తున్నారని అర్ధం.
బయటకు రానివ్వని విష వలయం! 
మనం చాలా సినిమాల్లో చూసే ఉంటాం. ఒక వ్యక్తి ఏదైనా చెప్పడమే తరువాయి అతని కింద పనిచేస్తే భజనపరుడు అద్భుతం, అమోఘం అంటూ చప్పట్టు కొడుతూ ఉంటాడు. అసలు అతను చెప్పింది పూర్తిగా వినకుండానే, విన్నాక అది కరెక్టా కాదా అని ఆలోచించకుండానే వీళ్లు అతన్ని పొగడటం ప్రారంభిస్తారు. ఇంత మంది నేను చేస్తున్న పని కరెక్ట్ అంటున్నారు, నన్ను మెచ్చుకుంటున్నారు. అంటే నేను సరైన దారిలోనే వెళ్తున్నాను అని అతను భ్రమ పడతారు. ఆ భ్రమలో లెక్కకు మించి పొరపాట్లు చేస్తూ ఉంటాడు. అలా చేస్తూ చేస్తూ చివరికి పతనం అంచుకు చేరుకుంటారు. అప్పుడు ఇన్నాళ్లూ భజన చేసి అతని పతనానికి కారణమైనవారు ఒక్కరు కూడా కనిపించరు. వాస్తవానికి భజన, పొగడ్త అనేది ఒక విష వలయం. ఇందులో చిక్కుకోవడం ఎంత సులభమో అందులోంచి బయటకు రావడం అంత కష్టం. ఒక వ్యక్తి మనకు నిజాయితీగా సలహాలు ఇస్తున్నాడా? అతని పొగడ్తలో నిజం ఉందా? అన్న విషయాలను గమనిస్తూ ఎప్పటికప్పుడు పొరపాట్లను సరిదిద్దుకుని వాస్తవంలో జీవించినప్పుడే ఇటువంటి వలయాల నుండి బయటపడొచ్చు.
మనిషిని అంచనా వేయగలిగే సత్తా కావాలి! 
ఈ కృత్రిమ ప్రపంచంలో ఎవరు మంచివారు? ఎవరు చెడ్డవారు ? అన్న విషయం తెలుసుకోవడం చాలా కష్టం. చాలా మంచిగా ప్రవర్తిస్తూనే వెన్నుపోటు పొడిచే వ్యక్తులకు సమాజంలో కొదువలేదు. ఇది వ్యక్తులకే కాదు వ్యవస్థలకు కూడా వర్తిస్తుంది. ఒక వ్యక్తిని ఉద్యోగంలోకి తీసుకుని కొన్ని బాధ్యతలను అప్పగించినప్పుడు అతని పనితీరును, వ్యవహారశైలిని, నిజాయితీని నిశితంగా గమనించాల్సిందే. ఉదాహరణకు చాలా సంస్థల్లో బాస్ దగ్గర సన్నిహితంగా ఉండే వ్యక్తులు అతన్ని వక్రమార్గం పట్టిస్తూ ఉంటారు. ఫలానా పని తక్కువకే అయిపోతుంది. మీరెందుకు అంత మొత్తం చెల్లిస్తున్నారు? అని చెప్తారు. బాస్ సరే తక్కువకే చేయండి అనగానే ఆ పనిని అసలు నాణ్యత లేకుండా తయారు చేసిన సంస్థ ప్రతిష్ట మంటగలుపుతారు. అయితే ఈ విషయాన్ని తెలుసుకునేసరికి కాస్త సమయం పడుతుంది. ఈ సమయంలో భజనపరులు బాస్ పై పొగడ్తల వర్షం కురిపిస్తూ తమ పబ్బం గడుపుకుంటూ, సంక్షోభం వచ్చినప్పుడు అక్కడి నుంచి జారుకుంటారు. ఇలా జరగొద్దు అంటే వాస్తవికతతో ఆలోచించే శక్తిని సంపాదించుకోవాలి. అది ఉన్నప్పుడు ఇటువంటి వ్యక్తులను ప్రారంభంలోనే దూరం పెట్టేందుకు అవకాశం కలుగుతుంది.
భజనకు, ప్రశంసకు తేడా గుర్తించగలగాలి!
తన పై స్థానంలో ఉన్న వ్యక్తులను పొగుడుతూ మనుగడ సాగించే వ్యక్తుల వలన దీర్ఘకాలంలో సంస్థ ఇబ్బందుల్లోకి జారుకుంటుంది. వాస్తవానికి ఇది పెద్ద సమస్య కాకున్నా, భజనకు అలవాటుపడే వ్యక్తులు పెరిగినప్పుడు ఇది పెను సమస్యగా మారుతుంది. మనం ముందు చెప్పుకున్నట్టు ప్రారంభంలో దీన్ని గుర్తించి వాస్తవికతతో ఆలోచించి ఇటువంటి భజన కార్యక్రమాలకు చెక్ పెట్టాలి. అయితే ఇక్కడ ఓ కీలక విషయాన్ని గుర్తించాల్సి ఉంటుంది. భజనకు, ప్రశంసకు మధ్య వ్యత్యాసాన్ని సంస్థలు గుర్తించాలి. అతిశయోక్తి, పొగడ్తలు అనేవి మనిషిని పతనం చేస్తే ప్రశంస అనేది టానిక్ లా పనిచేస్తుంది. ఒక మంచి పనిని నిజాయితీగా చేసినప్పుడు మన కింద వాళ్లు మనల్ని మనస్పూర్తిగా ప్రశంసిస్తే దాన్ని భజన అనుకోరాదు. ఈ రెండింటికి మధ్య ఉన్న వ్యత్యాసాన్ని, మనుషుల్ని అంచనా వేయగలిగే సామర్ధ్యమున్నప్పుడే సంస్థ ఉన్నత స్థితికి చేరుకుంటుంది. లేకుంటే భజన పరులు వలన సంస్థలు ఎంత నష్టం వాటిల్లుతుందో నిజాయితీగా పనిచేసే వాళ్లను దూరం పెట్టడం వలన కూడా అంతే నష్టం వాటిల్లుతుంది.
నిజమైన నాయకుడు భజనకు దూరంగా ఉంటాడు! 
అతిగా పొగిడి, సంస్థలను, వ్యక్తులను వక్రమార్గం పట్టించే వాళ్లను దూరం పెట్టాలంటే నాయకుడికి అన్ని విషయాలపై సంపూర్ణ అవగాహన, పట్టు ఉండాలి. ఒక వ్యక్తి మనల్ని ఎప్పుడు వక్రమార్గం పట్టించగలడు? ఆ విషయంపై మనకు అవగాహన లేకపోవడం వలన. ఇటువంటి సందర్భాల్లో నాయకుడు చాలా ఆచితూచి వ్యవహరించగలగాలి. తన కింద స్థాయి వ్యక్తులు తనను తప్పుదారి పట్టిస్తున్నారేమో అన్నదాన్ని ఒకటికి రెండు సార్లు చెక్ చేసుకోవాలి. తన కింద పనిచేసే వ్యక్తులపై వాళ్ల పనితీరుపై, వ్యక్తిత్వంపై సంపూర్ణ అవగాహన, నమ్మకం ఉన్నప్పుడు ఇది అవసరం లేదు. అలా కాకుండా ఒక పనిలో తనను వక్రమార్గం పట్టిస్తున్నారని అనుమానం రాగానే నష్టనివారణ చర్యలు చేపట్టాలి. భజన బ్యాచ్ ను దూరంగా పెట్టాలి. నిజాయితీగా పనిచేసే వ్యక్తులను నియమించుకోవాలి. వాళ్లు సంస్థ కోసం ఏ విధంగా పనిచేస్తున్నారో ఎలా పనిచేస్తున్నారో నిశితంగా పరిశీలించాలి. వాస్తవిక దృక్ఫధంతో ఆలోచించే వ్యక్తులను ప్రొత్సాహించి, పొగడ్తలతో పబ్బం గడుపుదాం అనుకునే వాళ్లను తొలిగించాలి. అప్పుడే ఒక సంస్థ విజయవంతమైన, అత్యున్నతమైన సంస్థగా ఎదగగలుగుతుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment