ఇవి ప‌రీక్ష హాళ్లా? సెంట్ర‌ల్ జైళ్లా?

      ఇప్ప‌టికే మ‌న దేశ విద్యా వ్య‌వ‌స్థ నాణ్య‌తా ప్ర‌మాణాలు నానాటికీ తీసిక‌ట్టు అన్న చందంగా ఉన్నాయి. దీనికి తోడు ఇప్పుడు ప‌రీక్షలను నిర్వ‌హిస్తున్న విధానంతో అధికారులు ఉన్న కాస్త పరువుకు కూడా పాత‌రేస్తున్నారు. విద్యా వ్య‌వ‌స్థ ప్ర‌క్షాళ‌న‌లో చూపించాల్సిన ప్ర‌తాపాన్ని. ప‌రీక్షా కేంద్రాల్లో విద్యార్ధుల‌పై చూపిస్తూ వాళ్ల బంగారు భ‌విష్య‌త్ తో ఆట‌లాడుకుంటున్నారు. రోజుకో అడ్డ‌గోలు నిబంధ‌న‌తో విద్యార్ధుల‌ను, త‌ల్లిదండ్రుల‌ను మాన‌సిక క్షోభ‌కు గురిచేస్తున్నారు. తాజాగా జ‌రిగిన నీట్  ప‌రీక్ష‌లో అధికారులు, భ‌ద్ర‌తా సిబ్బంది  చేసిన ఓవ‌ర్ యాక్ష‌న్ తీవ్ర విమ‌ర్శ‌ల పాలైంది. విద్యార్ధుల‌ను టెర్ర‌రిస్టుల్లా ట్రీట్ చేసి వాళ్ల చిన్ని మ‌నసుల‌ను గాయ‌ప‌రిచారు. 10 నెల‌ల పాటు చ‌దివిన చ‌దువును 3 గంట‌ల్లో రాయాల్సిన ఒత్తిడిని మోసుకుంటూ భ‌విష్య‌త్ పై గంపెడాశ‌ల‌తో వ‌చ్చిన విద్యార్ధుల‌ను స‌వాల‌క్ష నిబంధ‌న‌ల‌తో  అడ్డ‌గోలు రూల్స్ తో, వాళ్ల మాన‌సిక సైర్ధ్యం దెబ్బ‌తినేలా వ్య‌వ‌హ‌రించ‌డం ఇప్పుడు చ‌ర్చ‌నీయాంశంగా మారింది. 

భ‌ద్ర‌తా చ‌ర్య‌లంటే సంప్ర‌దాయాల‌ను దెబ్బ‌తీయ‌డ‌మా? 

      ప‌రీక్షా హాళ్ల‌లో విద్యార్ధుల మాస్ కాపీయింగ్ కు పాల్ప‌డ‌కుండా, హైటెక్ మోసాలు జ‌ర‌గ‌కుండా, ప్ర‌శ్నాప‌త్రాలు లీక్ కాకుండా త‌గిన భ‌ద్ర‌తా చ‌ర్య‌లు తీసుకోవ‌డం త‌ప్పేమీ కాదు. ఇందులో ఎవ‌రికీ ఎటువంటి అభ్యంత‌రాలు ఉండ‌వు. కానీ భ‌ద్ర‌తా చ‌ర్య‌ల పేరుతో సంప్ర‌దాయాల‌ను, ఆత్మ‌గౌర‌వాన్ని దెబ్బ‌తీసేలా వ్య‌వ‌హ‌రించ‌డం మాత్రం క్ష‌మార్హం కాదు. అమ్మాయిలు చెవుల‌కు పోగులు పెట్టుకోకూడ‌దు, చీర‌లు ధ‌రించ‌కూడ‌దు, చుడీదార్ లు వేసుకోకూడ‌దు. ముక్కుపుడ‌క పెట్టుకోకూడ‌దు. చేతుల‌కి గాజులు వేసుకోకూడ‌దు. అని చెప్ప‌డం ఎటువంటి భ‌ద్ర‌తా చ‌ర్య‌లో వాళ్ల‌కే తెలియాలి. సంప్ర‌దాయానికి విరుద్ధంగా ఉండేందుకు అంద‌రూ ఇష్ట‌ప‌డ‌క‌పోవ‌చ్చు. చిన్న‌త‌నం నుంచి ఉన్న చెవి రింగుల‌ను, ముక్కు రింగుల‌ను తొలిగించాలంటే ఆడ‌పిల్ల‌లు ఎంత‌టి వేద‌న‌కు గురిఅవుతారో అధికారుల‌కు తెలియ‌దా? పైపెచ్చు వాళ్ల‌కు జీన్స్, టీష‌ర్ట్స్ వేసుకోవాలంటూ ఉచిత స‌ల‌హాలు ఇవ్వ‌డం భార‌తీయ సంప్రదాయాల‌ను దెబ్బ‌తీయ‌డ‌మే అవుతుంది. 

క‌నీస అర్హ‌త‌లు లేనివాళ్లు భ‌ద్ర‌తాధికారులా?

      ప‌రీక్షా కేంద్రాల్లో భ‌ద్ర‌తా సిబ్బందిగా ఉన్న‌వాళ్ల అతి చేష్ఠ‌లు చూస్తుంటే ఒళ్లు జ‌ల‌దరించ‌క‌మాన‌దు. చ‌దువులు మ‌ధ్య‌లో వ‌దిలేసిన, క‌నీస జ్ఞానం లేని, మ‌నుష్యుల‌తో ఎలా వ్య‌వ‌హ‌రించాలో తెలియ‌ని వ్య‌క్తుల‌ను భ‌ద్ర‌తా సిబ్బందిగా నియ‌మిస్తున్నారు. వీళ్లు అత్యంత మొర‌టుగా, క‌నీస మర్యాద లేకుండా విద్యార్ధుల‌ను చెక‌ప్ చేస్తున్నారు. దీని వ‌ల‌న కొంద‌రు సున్నిత మ‌న‌స్కులైన విద్యార్ధులు మాన‌సిక క్షోభ‌కు గురవుతున్నారు. స్వ‌చ్ఛ‌మైన మ‌నస్సుతో ప‌రీక్షా కేంద్రానికి వ‌స్తున్న విద్యార్ధులు వీళ్ల ఓవ‌ర్ యాక్ష‌న్ తో మాన‌సికంగా కొంచెం డిస్ట్ర‌బ్ అవుతున్నారు. ఇది వాళ్ల ప‌రీక్ష ఫ‌లితంపై ప్ర‌భావం చూపుతుంది. ఈ ప‌రిస్థితికి ఎవ‌రు భాద్య‌త వ‌హిస్తారు? ఇక విద్యార్ధుల‌తో పాటు ప‌రీక్షా కేంద్రాల‌కు వ‌స్తున్న త‌ల్లిదండ్రుల‌పై కూడా వీళ్లు ఝులుం చూపిస్తున్నారు. మొర‌టుగా నెట్టివేయ‌డం, లాఠీచార్జీ చేయ‌డం వంటి సంద‌ర్భాలు కూడా ఉన్నాయి. ప్ర‌శాంతంగా జ‌ర‌గాల్సిన ప‌రీక్షల‌ను భ‌ద్ర‌త పేరిట ఇంత భీభ‌త్సంగా మారుస్తుంటే విద్యా శాఖాధికారులు ఏం చేస్తున్నార‌న్న‌దే ఇక్క‌డ ప్ర‌శ్న‌? 

భద్ర‌త్ ఫుల్..సౌక‌ర్యాలు నిల్..!

       భ‌ద్ర‌తా చ‌ర్య‌లంటూ తెగ హ‌డావుడి చేస్తున్న అధికారులు ప‌రీక్షా కేంద్రాల్లో క‌నీస సౌక‌ర్యాల‌పై మాత్రం నోరు మెద‌ప‌డం లేదు. తాజాగా జ‌రిగిన నీట్ ప‌రీక్ష‌లో చాలా కేంద్రాల్లో విద్యార్ధులు తాగేందుకు మంచినీళ్లు కూడా లేవు. వాళ్లు సొంతంగా వాట‌ర్ బాటిల్ తెచ్చుకున్నా అనుమ‌తించ‌లేదు. ఇదేక్క‌డి చోద్య‌మో త‌ల్లిదండ్రుల‌కు అంతుప‌ట్ట‌లేదు. విద్యార్ధులు ఒక్క చిన్న పొర‌పాటు చేసినా, ఒక్క నిమిషం ఆల‌స్య‌మైనా స‌హించమ‌ని చెపుతున్న అధికారులు త‌మకు మాత్రం త‌ప్పులు, పొర‌పాట్లు చేసేందుకు సంపూర్ణ హ‌క్కులు ఉన్నాయ‌ని ప‌రోక్షంగా చెపుతున్నారు. ఇటీవ‌ల ఆన్ లైన్ లో నిర్వ‌హించిన ఓ ప్రవేశ ప‌రీక్ష నిర్వ‌హ‌ణ బాధ్య‌త‌ల‌ను  ప్ర‌ఖ్యాత సంస్థ‌కు అప్ప‌గించారు. కానీ ఉద‌యం 9 గంట‌ల‌కు జ‌ర‌గాల్సిన ప‌రీక్ష రాత్రి ప‌దిన్న‌ర‌కు జ‌రిగింది. స‌ర్వ‌ర్ డౌన్, సిస్ట‌మ్ డౌన్ అంటూ ఏవో అడ్డ‌గోలు కార‌ణాలు చెప్పి సదరు సంస్థ త‌ప్పించుకుంది. ఇలాంటి సిల్లీ కార‌ణాల‌నే విద్యార్ధులు చెపితే ఊరుకుంటారా? ఒక్క నిమిషం నిబంధ‌నతో ప‌రీక్ష రాయ‌లేక జీవితాల‌ను పొగొట్టుకున్న విద్యార్ధులు ఎంత మంది ఉన్నారు? వాళ్ల‌కు ఇప్పుడు అధికారులు ఏమ‌ని స‌మాధానం చెపుతారు? వాళ్ల జీవితాన్ని తిరిగి ఇస్తారా?  కోల్పోయిన సంవ‌త్స‌రాన్ని భర్తీ చేస్తారా? 

విద్యార్ధి మానసిక సైర్ధ్యాన్ని దెబ్బ‌తీయొద్దు!

     ప‌రీక్షా కేంద్రాల బ‌య‌ట భ‌ద్ర‌తా సిబ్బంది చేస్తున్న హంగామా చూస్తుంటే ప‌రీక్ష రాయ‌డానికి వ‌చ్చిన విద్యార్ధులు, వాళ్ల‌తో పాటు వ‌చ్చిన త‌ల్లిదండ్రులు ఏమైనా టెర్ర‌రిస్టులా అన్న అనుమానం రాక‌మాన‌దు. స్మ‌గ్లింగ్ చేసేవాళ్ల‌ని, తీవ్ర‌వాదుల‌ను క‌ట్ట‌డి చేయ‌డం ప్ర‌భుత్వానికి ఎలానూ చేత‌కాలేదు. అందుకే నూనూగు మీసాల వ‌య‌స్సున్న పిల్ల‌ల‌పై త‌మ ప్ర‌తాపాన్ని చూపిస్తున్నారా అని కొంద‌రు బాహాటంగానే విమ‌ర్శలు గుప్పిస్తున్నారు. గ‌తంలో ఓ కేంద్రం వ‌ద్ద 144 సెక్ష‌న్ ను కూడా విధించారు. ఇవ‌న్నీ చూస్తుంటే మ‌న దేశంలో ప‌రీక్ష‌ల నిర్వ‌హ‌ణ విధానం ఎటు పోతుంద‌న్న ఆందోళ‌న క‌లుగుతోంది. బ‌య‌ట ఇంత హ‌డావుడి చేస్తున్న ప‌రీక్షా కేంద్రాల లోప‌ల మాత్రం అర‌కొర సౌక‌ర్యాల‌తో విద్యార్ధుల‌కు న‌ర‌కం చూపిస్తున్నారు. ప‌రీక్షా కేంద్రాల్లో ఒక విద్యార్ధికి మ‌రో విద్యార్ధికి మ‌ధ్య క‌నీసం 3 అడుగుల దూరం ఉండాలి. కానీ ఒకే బెంచీపై న‌లుగుర్నీ కూర్చొబెట్టి ప‌రీక్ష రాయిస్తున్నారు. ఇలాంటి ఇబ్బందిక‌ర ప‌రిస్థితుల్లో విద్యార్ధి ప‌రీక్ష ఎలా రాయ‌గ‌లుగుతాడు? ఏడాది పాటు అష్ట క‌ష్టాలకొర్చి చ‌దివిన చ‌దువును జీవితంపై కోటి ఆశ‌ల‌తో పేప‌ర్ పై పెట్టేందుకు వ‌స్తున్న విద్యార్ధి మానసికంగా ఏ చిన్న దెబ్బ త‌గిలినా త‌ట్టుకోలేడు. ఈ విష‌యం మ‌న తోలు మందం అధికారుల‌కు ఎందుకు అర్ధం కావ‌డం లేదో..!!

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com