ఇలా చేస్తే రిక్రూటర్లు మీకు పిలిచి ఉద్యోగం ఇస్తారు!

      ఈ జెట్ స్పీడ్ జనరేషన్ లో తమను తాము విభిన్నంగా ప్రమోట్ చేసుకున్న వాళ్లే విజయవంతమవుతారు. ఉద్యోగం కోసం అన్వేషిస్తున్న అభ్యర్ధులకు కూడా ఇదే సూత్రం వర్తిస్తుంది. మీ కరికులమ్ వీటే (సీవీ) మొదలుకుని మీ ఆహార్యం వరకూ ప్రతీ దాంట్లోనూ ప్రొఫెషనల్ అప్రోచ్ ఉన్నప్పుడే రిక్రూటర్స్ మిమ్మిల్ని ఇష్టపడతారు. ముఖ్యంగా సీవీలో అర్ధం కాని పదాలు వాడి ఎక్కడో కాపీ కొట్టినట్టుగా తయారు చేసుకుంటే మీపై మొదటే నెగెటివ్ ఇంప్రెషన్ పడుతుంది. అందుకే అభ్యర్ధులు సీవీని రూపొందించుకున్నప్పుడు చిన్న చిన్న జాగ్రత్తలు తీసుకోవాలి. అదే విధంగా కెరీర్ బ్రేక్ లను దాచేందుకు అబద్దాలు ఆడటం, తప్పుడు సమాచారాన్ని ఇవ్వడం కూడా మీకు ఉద్యోగాన్ని దూరం చేస్తుంది. అలాగే బ్యాడ్ రిఫరెన్స్ లు కూడా మీకు జాబ్ రాకుండా అడ్డుకుంటాయి. సరైన సమయంలో స్పందించని వ్యక్తుల రిఫరెన్స్ తీసుకోకుండానే ఉంటేనే మంచిది. సీవీ దగ్గర్నుంచి సోషల్ నెట్ వర్కింగ్, రిఫరెన్స్ వరకూ విభిన్న విషయాలను తీర్చిదిద్దుకుని రిక్రూటర్స్‌ను ఆకట్టుకునే విషయాలు తెలుసుకుందాం. 

నైపుణ‌్యం వేరు, ప్రతిభ వేరు!

     ఈ విషయంపై చాలా మంది అభ్యర్ధులు కన్ఫ్యూజన్ కు గురవుతూ ఉంటారు. దీంతో చాలా మంది తమ సీవీలో స్కిల్స్ ను టాలెంట్ ను ఒకటే విష‍యంగా పేర్కొంటారు. ఇది చాలా తప్పు. ఇవి రెండు వేరు వేరు విషయాలు. ఉదాహరణకు మీకు కంప్యూటర్ లాంగ్వేజేస్ అయిన జావా, హెచ్‌టీఎమ్‌ఎల్ వంటి వాటిలో మంచి పట్టు ఉండటాన్ని స్కిల్ అంటారు. అయితే అవే లాంగ్వేజేస్ ను యూజ్ చేస్తూ ప్రొగ్రామ్స్ రాసే సామర్ద్యం ఉంటే దాన్ని ప్రతిభగా చెప్పుకోవచ్చు.  కాబట్టి ఈ రెండింటిని ఒకే అంశంగా సీవీ లో ప్రజంట్ చేయకుండా వేరు వేరుగా చూపించాలి. ఆ సమాచారాన్ని చాలా క్లుప్తంగా రాయాలి. అంతేకానీ పేరాల కొద్దీ రాస్తే రిక్రూటర్లు వాటిని చదవకుండా పక్కన పడేస్తారు. దీని వలన మీ ప్రతిభ వాళ్లకు తెలిసే అవకాశం లేకుండా పోతుంది.

కెరీర్ బ్రేక్స్ పై అబద్దాలు అస్సలు చెప్పొద్దు! 

       ప్రస్తుతం కెరీర్ లో గ్యాప్ రావడం అన్నది పెద్ద విష‍యం ఏం కాదు. ఎందుకంటే ఇప్పుడు చాలా మంది సొంతంగా బిజినెస్ చేయడమో లేక ఉన్నత చదువులు చదవడం కోసమో కొన్నాళ్లు ఉద్యోగం మానేస్తున్నారు. ఇలాంటి పరిస్థితి వలన అనుభవం విషయంలో గ్యాప్ వస్తుంది. సీవీలో మీ అనుభవాన్ని వివరించే కాలమ్ లో వరుసగా సంవత్సరాలను పేర్కొంటూ రిక్రూటర్ కు క్లియర్ గా అర్ధమయ్యేలా చూపించాలి. ఒకవేళ మీకు కెరీర్ గ్యాప్ వస్తే, ఆ విషయాన్ని చాలా స్పష్టంగా పేర్కొనాలి. ఆ గ్యాప్ కు గల కారణాన్ని ప్రభావవంతంగా రిక్రూటర్ కు వివరించాలి. ముందుగా ఆ గ్యాప్ విషయంలో స్పష్టత చాలా ముఖ్యం.  చాలా మంది అభ్యర్ధులు కెరీర్ గ్యాప్ వలన రిక్రూటర్ దగ్గర ఎక్కడో నెగెటివ్ ఇంప్రెషన్ పడుతుందో అని భయపడుతూ దాన్ని దాచిపెట్టే ప్రయత్నం చేస్తారు. ఇది మంచి పద్ధతి కాదు. ప్రస్తుతం చాలా వరకు కంపెనీలు కెరీర్ గ్యాప్ ను పెద్ద నెగెటివ్ విష‍యంగా పరిగణించడం లేదు. 

ఒకటికి రెండు సార్లు చెక్ చేసుకోండి! 

    సీవీ లో ఎటువంటి పరిస్థితుల్లోనూ తప్పులు దొర్లకుండా చూసుకోవాలి. ఎందుకంటే సీవీ అనేది మీ ప్రొఫెషనల్ అప్రొచ్ కు ప్రతిబింబం లాంటిది. అందులో కనుక తప్పులు ఉంటే రిక్రూటర్ కు మొదటే మీపై నెగెటివ్ ఇంప్రెషన్ కలుగుతుంది. అర్హతలు, స్కిల్స్ ,అనుభవం, అచీవ్‌మెంట్స్ వంటి కీలక విషయాలను ఒకటికి రెండుసార్లు చెక్ చేసుకుని సీవీని ఎర్రర్ ప్రూఫ్ చేసుకోవాలి. ఇన్ని జాగ్రత్తలు ఎందుకంటే ఒక సీవీ యే మీకు ఉద్యోగానికి గుండెకాయ లాంటిది. అందులో ఉన్న విషయాల ఆధారంగానే మీకు ఉద్యోగం వస్తుందా? రాదా ? అన్న విషయం తేలిపోతుంది. అలాగే మీరు గతంలో సాధించిన అచీవ్‌మెంట్స్ ను కూడా సీవీలో సంవత్సరాల ప్రకారం ఒక క్రమ పద్ధతిలో చూపించాలి. అడ్డదిడ్డంగా చూపిస్తే మీరు కష్టపడి సాధించిన అచీవ్‌మెంట్స్  రిక్రూటర్స్ ఆకట్టుకోలేకపోవచ్చును. వాస్తవానికి రిక్రూటర్లు బాగా పరిశీలించేది అచీవ్‌మెంట్స్ నే. కాబట్టి ఈ విష‍యంలో చాలా అప్రమత్తంగా ఉండండి. 

సోషల్ నెట్‌వర్కింగ్, రిఫరెన్స్ పై దృష్టి పెట్టండి! 

     మనం గతంలో చెప్పుకున్నట్టు ప్రస్తుతం హెచ్‌ఆర్ పాలసీల్లో చాలా మార్పులు వచ్చాయి. మీరు ఒక ఉద్యోగానికి అప్లై చేస్తే రిక్రూటర్స్ మిమ్మల్ని ఇంటర్వ్యూకి పిలవడానికి ముందే మీ గురించి సమాచారాన్ని ఆరా తీస్తారు. దీని కోసం సోషల్ నెట్‌వర్కింగ్ సైట్స్ ను యూజ్ చేసుకుంటారు. మీ వ్యక్తిత్వం దగ్గర్నుంచి మీ అభిరుచులు, మీ నైపుణ్యాలు ఇలా అన్నింటిని మీ సోషల్ మీడియా అకౌంట్  ద్వారా మదింపు చేస్తారు. కాబట్టి మీ సోషల్ నెట్‌వ‌ర్కింగ్ ప్రొఫైల్స్ ను ఎప్పుడూ క్లీన్ గా ఉంచుకొండి. మీరు జాబ్ లేదా ఇండస్ట్రీకి సంబంధించిన విషయాలను షేర్ చేయడం , అప్‌డేట్స్ ను ఇవ్వడం చేస్తూ  ఉండండి. అప్పుడు మీపై రిక్రూటర్లకు నమ్మకం కలుగుతుంది. అలాగే సీవీ లో కొందరు అభ్యర్ధులు రిఫరెన్స్ ను చూపిస్తారు. ఇది మంచి పద్ధతే అయినా కొన్నిసార్లు బెడిసి కొడుతుంది. ఎందుకంటేరిఫరెన్స్ ను రిక్రూటర్లు క్రాస్ చెక్ చేసుకుంటారు. కాబట్టి వాళ్లు ఫోన్ చేయగానే స్పందించే వ్యక్తుల రిఫరెన్స్ మాత్రమే ఇవ్వండి. ఒకవేళ రిక్రూటర్ ఫోన్ చేస్తే స్పందించని వ్యక్తుల రిఫరెన్స్ మీకు బ్యాడ్ రిఫరెన్స్ గా మారే ప్రమాదముంది. ఇప్పుడు మనం చెప్పుకున్న ఈ జాగ్రత్తలను పాటిస్తే మీకు జాబ్ రావడం ఏమంత కష్టం కాదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                           You can send your Educational related articles to  careertimes.online1@gmail.com