విద్యార్ధులు 2.0 లుగా మార‌కూడ‌దంటే టీచ‌ర్స్ ఏం చేయాలి?
ప్ర‌స్తుతం మ‌న విద్యా విధానం ఒక మూస ప‌ద్ధ‌తిలో కొట్టుకుపోతోంది. క్లాస్ రూమ్ లో పాఠం చెప్ప‌డం త‌ర్వాత ఆ పాఠంపై నోట్స్ , హోమ్ వ‌ర్క్ చేయ‌డం, త‌ర్వాత పరీక్ష‌కు ప్రిపేర్ కావ‌డం ప్ర‌తీ విద్యార్ధికి ఇది ఒక రోటీన్ దిన‌చ‌ర్య. దీంతో విద్యార్ధుల్లో సృజ‌నాత్మ‌క‌త అనేది లోపించి చేసిన ప‌నినే మ‌ళ్లీ మ‌ళ్లీ చేస్తూ మర యంత్రాల్లా మారిపోతున్నారు. దీర్ఘ‌కాలంలో ఇది మ‌న విద్యా వ్య‌వ‌స్థ‌ను తీవ్రంగా దెబ్బ‌తీస్తుంది. మ‌న ప్రాచీన విద్యా విధానంలో ఉన్న మూల సూత్రాల‌ను మ‌ర్చిపోవ‌డం వ‌ల‌నే ఈ దుస్థితి దాపురించింది. ఈ రోటీన్ విద్యా విధానానికి స్వ‌స్తి చెప్పి పిల్ల‌ల్లో ఉన్న సృజ‌నాత్మ‌క‌త‌ను వెలికితీసేందుకు ఉపాధ్యాయులు కొన్ని చ‌ర్య‌లు చేప‌ట్టాలి. పిల్ల‌ల్లో ఉన్న నైపుణ్యాన్ని వెలికితీసి, వారిలో మాన‌వీయ కోణాన్ని ఆవిష్క‌రించి, ప్ర‌కృతితో సాటి మ‌నిషితో ఎలా ప్ర‌వ‌ర్తించాల‌న్న దానిపై టీచ‌ర్స్ కొన్ని అసైన్ మెంట్స్ ను రూపొందించాలి. త‌క్ష‌ణం వీటిని అమ‌లు చేయ‌డం క‌ష్టసాధ్య‌మే అయినా మెల్ల‌మెల్లగా వీటిని అమ‌ల్లో పెట్టుకుంటూ వ‌స్తే దీర్ఘ‌కాలంలో మంచి ఫలితాలు వ‌స్తాయి.
సిల‌బ‌స్ రొంపిలో ప‌డిపోతున్నాం! 
ఇప్పుడు చాలా మంది విద్యావేత్త‌ల‌కు, టీచ‌ర్స్ కు మ‌న విద్యా విధానంలో ఉన్న లోపాలు చాలా స్ప‌ష్టంగా తెలుసు. కానీ వారు ఏమీ చేయ‌లేని నిస్స‌హాయ స్థితిలో ప‌డిపోయారు. పోటీతత్వం అంటూ దూసుకొచ్చిన ఈ న‌యా విద్యా విధానానికి వాళ్లు మౌనంగా అంగీకారం తెల‌పాల్సిన ప‌రిస్థితి ఏర్ప‌డింది. ముఖ్యంగా టీచ‌ర్స్ సిల‌బ‌స్ రొంపిలో ప‌డి పిల్లలకు మంచి విషయాలను, కొత్త విషయాలను చెప్ప‌లేక‌పోతున్నారు.భోధ‌న‌లో ఎక్క‌డ లోపం ఉందో చాలా స్ప‌ష్టంగా తెలిసినా ఏమీ చేయ‌లేని ప‌రిస్థితి టీచ‌ర్స్ ది. ఎందుకంటే కొండంత సిల‌బ‌స్ ను విద్యార్ధులు మెద‌డుల్లోకి ఎక్కించాల్సిన బాధ్య‌త వారిని అనుక్ష‌ణం ఒత్తిడికి గురి చేస్తూ ఉంటుంది. ఈ ప‌రిణామానికి ఎవ‌రిని బాధ్యుల‌ను చేయాలంటే ట‌క్కున స‌మాధానం చెప్ప‌లేని ప‌రిస్థితి. అయినా విద్యార్ధుల్లో పోటీతత్వాన్ని పెంచుతూనే అదే స‌మ‌యంలో వాళ్ల‌కు కొన్ని అంశాల్లో అయినా నిజ‌మైన భోధ‌న‌ను ప‌రిచ‌యం చేయాల్సిన అవ‌స‌ర‌ముంది. దీనికి స్కూల్ యాజ‌మాన్యాలు, టీచ‌ర్స్ ముందుకు వీటిని అమ‌లు చేయ‌డం అంత క‌ష్ట‌మేమీ కాదు. చిత్త‌శుద్ధి,దృఢ‌చిత్తం ఉంటే చాలు మ‌రుగున ప‌డిన అస‌లైన విద్యా విధానాన్ని పిల్లలకు కాస్తైనా నేర్పించ‌వ‌చ్చు.
చిన్న ముంద‌డుగుతో పెద్ద ఫ‌లితాన్ని సాధించొచ్చు! 
స్కూల్స్ లో టీచ‌ర్స్ చిన్న చిన్న చ‌ర్య‌లు చేప‌డితే కొంత కాలానికి పెద్ద ఫలితాలు వ‌స్తాయి. భోధ‌న‌పై, పిల్ల‌ల‌పై అంతులేని ప్రేమ, వాత్సల్యంతో పాటు చిత్త‌శుద్ధి ఉన్న టీచ‌ర్స్ , యాజ‌మాన్యాల వ‌ల్ల‌నే ఇది సాధ్య‌మ‌వుతుంది. పిల్ల‌లు రోటీన్ విద్యా విధానంలో ప‌డిపోకుండా స్కూల్ అంటే వారికి ఒక ఆడ‌విడుపుగా ఉండాలంటే టీచ‌ర్స్ కొన్ని చ‌ర్య‌లు చేప‌ట్టాలి. ఇందులో కేవలం నిస్తేజ‌మైన విద్యకు చ‌ర‌మ‌గీతం పాడ‌టం ఒక్క‌టే కాదు విద్యార్ధుల‌కు త‌మ మూలాల‌ను, నిజ‌మైన మ‌నిషి ఎలా ఉంటాడ‌న్న విలువైన పాఠాన్ని నేర్పేందుకు వీలు క‌లుగుతుంది.
- శ‌నివారం మిన‌హాయిస్తే ప్ర‌తీ రోజూ పిల్ల‌లు త‌ప్ప‌నిస‌రిగా యూనిఫామ్ ను ధ‌రిస్తారు. ఒక్కోసారి ఆ నిబంధ‌న‌ను తొలిగించి వారికి నచ్చిన దుస్తులు వేసుకుని స్కూల్ వ‌చ్చే వెసులుబాటును క‌లిగించాలి.
- అలా చేయ‌డం వ‌ల‌న రోటీన్ స్కూల్ లైఫ్ నుంచి విద్యార్ధి కాస్త రిలీఫ్ పొందిన‌ట్టు ఫీల్ అవుతాడు.
- త‌న‌కు ఇష్ట‌మైన డ్రెస్ లో వెళ్ల‌డం వ‌ల‌న ఆ రోజు త‌న‌కు న‌చ్చిన‌ట్టు ఉండ‌గ‌లిగాన‌ని భావిస్తాడు.
- ఇలా త‌న‌కు నచ్చిన ప‌నిచేయ‌డం వ‌ల‌న టీచ‌ర్స్ తో వాళ్ల అనుబంధం పెరుగుతుంది. క్లాస్ రూమ్ లో మంచి వాతావ‌ర‌ణం నెల‌కొంటుంది.
- మ‌రో రోజు చెప్పులు, షూస్ లేకుండా పిల్ల‌ల్ని స్కూల్ కు ర‌మ్మ‌ని చెప్పాలి.
- త‌గిన జాగ్ర‌త్త‌లు తీసుకుని ఆరోజు చెప్పులు లేకుండా నడిస్తే ఒట్టి కాళ్ల‌తో నడిస్తే క‌లిగే అనుభూతిని వాళ్లు ఆస్వాదిస్తారు.
- చెప్పులు లేకుండా న‌డ‌వ‌డం అనేది ప్ర‌కృతితో అనుసంధాన కావ‌డం వంటిది. దాంతో పాటు సింప్లిసిటీ అల‌వాటు అవుతుంది.
- హిందూ ధర్మంలో కొన్ని పూజ‌ల్లో చెప్పులు లేకుండా ఉండాల‌ని చెప్ప‌డంలో ఎన్నో విష‌యాలు అంత‌ర్గ‌తంగా దాగి ఉన్నాయి.
మాన‌వీయ కోణాన్ని ప‌రిచ‌యం చేయాలి!
ఈ తరం విద్యార్ధుల‌కు కొర‌వ‌డుతున్న విష‌యం ఏంటంటే మాన‌వీయ దృక్ఫ‌ధం. సాటి మ‌నిషిని, తోటి వారిని ప్రేమించే గుణాన్ని అంద‌రూ మ‌ర్చిపోతున్నారు. చిన్న‌త‌నంలో ఈ విష‌యాన్ని నేర్పించ‌క‌పోవ‌డం వ‌ల‌న పెద్ద‌య్యాక కూడా అదే విధ‌మైన వైఖ‌రికి అల‌వాటు ప‌డుతున్నారు. ప‌రిస్థితుల ఆధారంగా అవ‌త‌లి వ్య‌క్తిని అర్ధం చేసుకునే విధంగా వాళ్ల స్థాయిని బ‌ట్టి కాక సాటి మనిషిగా ప్రేమించే గుణాన్ని నేర్పించాలి. స్కూల్ స్థాయిలోనే ఈ విషయాలను నేర్పించ‌క‌పోతే పెద్ద‌య్యాక వాళ్లు ఈ విషయాలను నేర్చుకునేందుకు అవ‌కాశం ఏర్ప‌డ‌దు.
- స్కూల్ లో లంచ్ టైం పిల్ల‌లంద‌రూ లంచ్ బాక్స్ ల‌ను మార్పిడి చేసుకునేలా టీచ‌ర్స్ ప్రోత్సాహించాలి.
- దీని వ‌ల‌న త‌న తోటి పిల్ల‌ల ఆహార‌పు అల‌వాట్లు, వాళ్ల స్థాయి గురించి అవగాహన ఏర్ప‌డుతుంది. అంద‌ర్నీ గౌర‌వించే గుణం క‌లుగుతుంది.
- అదే విధంగా నోట్స్ బుక్స్ ను ఎక్ఛేంజ్ చేసుకునే విధంగా టీచ‌ర్స్, పిల్ల‌న్నిఎంక‌రేజ్ చేయాలి.
- దీని వ‌ల‌న మిగిలిన పిల్ల‌లు నోట్స్ రాయ‌డంలో ఎటువంటి ప‌ద్ధ‌తులు అవ‌లంభిస్తున్నాడు. త‌న‌కంటే నేను మెరుగ్గా ఉన్నానా? నేను ఇంకా మెరుగు ప‌ర్చుకోవాల్సిన విష‌యాలేంటి? అన్న‌దానిపై స్ప‌ష్ట‌త వ‌స్తుంది.
- అదే విధంగా త‌మ పాకెట్ మ‌నీని ఒక రోజు సేక‌రించిన సేవా కార్య‌క్ర‌మాల‌ను వినియోగించేలా విద్యార్ధుల‌ను ప్రోత్సాహించాలి. దీని వ‌ల‌న పిల్ల‌ల్లో సేవా గుణం పెరుగుతుంది.
- అంగ‌వైక‌ల్యంతో బాధ‌ప‌డుతున్న వారి ద‌గ్గ‌ర‌కు పిల్ల‌ల్ని తీసుకెళ్తే వారు ప‌డుతున్న బాధను ప్ర‌త్య‌క్షంగా చూసి వాళ్ల‌కు స‌హాప‌డేందుకు పిల్ల‌లు రెడీ అవుతారు.
- స్కూల్ లో ఒక‌రోజు గుడ్డివాళ్లుగా, మూగ‌వాళ్లుగా గ‌డ‌పాల‌న్న స్వ‌చ్ఛంద అసైన్ మెంట్స్ తో నిజ‌మైన విక‌లాంగుల క‌ష్టన‌ష్టాల‌పై అవగాహన క‌లిగి పిల్ల‌ల్లో సేవా గుణం పెరుగుతుంది.
- అదే విధంగా టీచ‌ర్స్ డే నాడు త‌మ‌కు నచ్చిన టీచ‌ర్ లా వేష‌ధార‌ణ చేసుకుని అత‌నిలా హ‌వ‌భావాలు ప్ర‌ద‌ర్శిస్తూ పాఠం చెప్ప‌డం వంటివి చేస్తే టీచ‌ర్ కు విద్యార్ధికి బ‌ల‌మైన బంధం ఏర్ప‌డుతుంది.
- వీటితో పాటు ర‌హ‌దారి భ‌ద్ర‌త, హెల్మెట్ వాడ‌కం వంటి రోడ్డు భ‌ద్ర‌తా చ‌ర్య‌ల‌పై పిల్ల‌ల‌ను భాగ‌స్వాముల‌ను చేస్తే వాళ్ల‌లో సామాజిక స్పృహ పెరుగుతుంది.
నాయ‌క‌త్వ ల‌క్ష‌ణాల‌ను పెంపొందించాలి!
స‌మాజంలో మంచి పౌరులుగా ఎదిగేందుకు, సామాజిక బాధ్య‌త‌తో మెలిగేందుకు క్లాస్ రూమ్ సిల‌బ‌స్ తో ఎటువంటి ఉప‌యోగం లేదు. అది కేవలం పోటీలో నిల‌బ‌డేలా మాత్ర‌మే చేస్తుంది. అందుకే బాగా చ‌దువుకుని మంచి ఉద్యోగాల్లో స్థిర‌ప‌డిన వారు కూడా జీవ‌న నైపుణ్యాలు లేక స‌మాజంలో త‌మ బాధ్య‌త‌ల‌ను ఎలా నిర్వ‌ర్తించాలో తెలియ‌క జీవితాల‌ను అస్త‌వ్య‌స్థం చేసుకుంటున్నారు. ఇటువంటి విప‌రిణామాలు సంభ‌వించ‌కుండా ఉండాలంటే టీచ‌ర్స్ , విద్యార్ధుల‌కు ప్రారంభం నుంచే నిజ‌మైన విద్యను నేర్పించాలి. మ‌న ప్రాచీన విద్యా విధానంలో కొన్ని విష‌యాల‌నైనా తీసుకుని వాటిని పిల్లలకు నేర్పించేందుకు ప్ర‌య‌త్నం చేయాలి. ఇందులో టీచ‌ర్స్ దే ప్ర‌ధాన పాత్ర. పోటీ విద్య నుంచి దూరం జ‌రిగే అవ‌కాశాలు లేకున్నా పైన మ‌న చెప్పుకున్న చిన్న చిన్న మార్పుల‌ను అయినా ప్ర‌వేశ‌పెట్ట‌గ‌లిగితే కొంచెమైనా మార్పు అనేది సాధ్య‌మ‌వుతుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
You can send your Educational related articles to careertimes.online1@gmail.com
Comments
Post a Comment