చదువుపై ఏకాగ్రత కుదరాలి అంటే ఈ '5 ప‌నులు' చేయండి చాలు!
ప్ర‌స్తుత విద్యా విధానంలో విద్యార్ధులకు క్ష‌ణం కూడా తీరిక ఉండ‌టం లేదు. ప్ర‌తీరోజూ అన్ని స‌బ్జెక్ట్ ల‌తో పాటు సందేహాలు ఉన్న స‌బ్జెక్ట్స్ పై ప్ర‌త్యేక శ్ర‌ద్ధ‌ను పెట్టాల్సి వ‌స్తోంది.వీటికి తోడు ప్ర‌త్యేక టెస్ట్ లు, ప్ర‌త్యేక త‌రగతులు ఉండ‌నే ఉన్నాయి.ఇక అప్పుడ‌ప్పుడు వ‌చ్చే సాంస్కృతిక కార్య‌క్ర‌మాలు, సెల‌వుల రోజుల్లో చ‌దువును నిర్లక్ష్యం చేయ‌కుండా చూసుకోవాలి. వీట‌న్నింటినీ నిర్వ‌హించుకోవ‌డం చిన్న విష‌య‌మేమీ కాదు. ఇంత బిజీ షెడ్యూల్ నేప‌థ్యంలో ఈ త‌రం విద్యార్ధులు తీవ్ర ఒత్తిడికి లోన‌వుతున్నారు. విద్యార్ధిపై ఒత్తిడిని పెంచే ఈ ప‌రిస్థితులున్నీ అతని ఏకాగ్ర‌త‌ను బాగా దెబ్బ‌తీస్తున్నాయి. గ‌డువు అనే క‌త్తి మెడ‌పై వేలాడిన‌ప్పుడు చాలా మంది విద్యార్ధులు ఒక ర‌క‌మైన యాంగ్జైటీకి లోన‌వుతున్నారు. ఇది నిద్ర‌లేమికి, అనారోగ్యానికి దారితీస్తోందని నిపుణులు చెపుతున్నారు. నిద్ర‌లేమి, అనారోగ్యం అనేవి ఏకాగ్రతకు ప్ర‌థ‌మ శ‌త్రువులు. ఇటువంటి పరిస్థితుల్లో ఏకాగ్ర‌త‌ను పెంచుకుని చదువులో బాగా రాణించాలంటే ఏమేం జాగ్ర‌త్తలు తీసుకోవాలో 'కెరీర్ టైమ్స్' లో ఇప్పుడు తెలుసుకుందాం.
ఏకాగ్రత ఉన్న‌ప్పుడు విద్యార్ధి ఏ విష‌యాన్ని అయినా సులువుగా గ్ర‌హించ‌గ‌లుగుతాడు. ఈ విష‌యంలో విద్యార్ధుల మధ్య తేడాలు ఉన్న‌ప్ప‌టికీ త‌మ బ‌లాలు, బ‌ల‌హీన‌త‌ల‌ను బేరీజు వేసుకుంటే ఏకాగ్ర‌త‌ను పెంచుకోవ‌డం సులువ‌వుతుంది. కొందరు విద్యార్ధులు చూసిన దాన్ని బాగా గ్ర‌హించ‌గలుగుతారు. మ‌రికొంద‌రు పుస్తకాల్లో చ‌దివితే బాగా అర్ధం చేసుకుంటారు. ఏకాగ్రత అనేది విద్యార్ధులు విష‌యాన్ని గ్ర‌హించే సామ‌ర్ధ్యం మీద ఆధార‌ప‌డి ఉంటుంది. అస‌లు ఏకాగ్రత అనేది విద్యార్ధికి ఎందుకు అంత అవ‌స‌ర‌మంటే..
- వ్యక్తిగ‌త సామ‌ర్ధ్యం పెరుగుతుంది.
- ప్ర‌తికూల ఆలోచ‌న‌ల‌ను పొగొట్టుకునేందుకు
- మ‌న‌స్సును ప్ర‌శాంతంగా ఉంచుకునేందుకు
- చేసే ప‌నిని మ‌రింత స‌మ‌ర్ధ‌వంతంగా పూర్తి చేసేందుకు
- దీర్ఘ‌కాలిక ల‌క్ష్యాల‌ను ఏర్ప‌రుచుకుని వాటికి అనుగుణంగా ప‌నిచేసేందుకు.
విద్యార్ధులు ఏకాగ్ర‌త‌ను పెంచుకునేందుకు ఇప్పుడు మ‌నం చెప్పుకుంటున్న విషయాలను జాగ్ర‌త్త‌గా ఆచ‌రిస్తే మంచి ఫ‌లితాలు ఉంటాయి.
ఒక్కోసారి చేయాల్సిన, చ‌ద‌వాల్సిన స‌బ్జెక్ట్ లు పెరిగిపోయిన‌ప్పుడు విద్యార్ధిపై ఒత్తిడి పెరుగుతుంది. పూర్తి చేయాల్సిన ప‌నులు జాబితా పెరిగిపోయిన ఆ స్థితిని హ్యండిల్ చేయడం చేయడం విద్యార్ధికి క‌ష్టంగా మారుతుంది. అలా జ‌ర‌గుకుండా చూసుకున్న‌ప్పుడు ఏకాగ్ర‌త‌గా మిలిగిన ప‌నులు చేసేందుకు అవకాశం ఏర్పడుతుంది.
- పూర్తి చేయాల్సిన విషయాలను చిన్న చిన్న యూనిట్లుగా విభ‌జించుకోండి.
- ఒక్కోక్క యూనిట్ కు నిర్దేశిత గ‌డువు పెట్టుకుని వాటిని మెల్ల‌గా పూర్తి చేయండి.
- ఇలా చేయడం వ‌ల‌న మీపై త‌క్కువ ఒత్తిడి ప‌డుతుంది.
- దీని వ‌ల‌న మీరు పూర్తిచేయ‌ని విషయాలను ప‌క్క‌న పెట్టి కొత్త విష‌యాల‌పై ఏకాగ్ర‌త‌ను నిలిపేందుకు అవకాశం క‌లుగుతుంది.
ఏ పనినైనా ప్రతీ రోజూ చేస్తే అది మీకు అలవాటుగా మారిపోతుంది. తర్వాత అది మీకు చాలా సులువైన విషయంగా తోస్తుంది. ఇదే సూత్రాన్ని చదువులో కూడా అన్వయించుకుంటే చదువుతున్నప్పుడు ఒత్తిడి దరిచేరదు.
- చేసే ప‌నిపై పూర్తి స్థాయిలో దృష్టి పెట్టండి. ప్రతీ రోజూ చేసే దాన్ని ఒక అలవాటుగా మార్చుకోండి.
- మీ దినచ‌ర్య‌లో ఒక ప‌నిని భాగంగా చేసుకున్న‌ప్పుడు దానిపై మీరు ఖ‌ర్చు చేసే స‌మ‌యం త‌గ్గిపోతుంది.
- అలానే ప్ర‌త్యేకంగా ప్ర‌ణాళిక వేసుకోవాల్సిన అవ‌స‌రం ఉండ‌దు.
- అన్నింటికంటే ముఖ్యంగా ఒక నిర్దేశిత స‌మ‌యంలో ఒక ప‌నిని పూర్తి చేయడం అల‌వాటైతే క్ర‌మ‌శిక్ష‌ణ, స‌మ‌య పాల‌న అల‌వ‌డుతుంది.
- ఏకాగ్ర‌త‌ను పెంచుకోవాలంటే స‌మ‌య‌పాల‌న, ఒత్తిడి లేకుండా ప‌నిచేయడం అన్న‌వి ముఖ్యమైన విష‌యాలు.
చదువు మ‌ధ్య‌లో చిన్న విరామం, అలాగే స్కూల్ పూర్తికాగానే ఒక 10 నిమిషాల నిద్ర ఏకాగ్ర‌త‌ను పెంచ‌డంలో ముఖ్య పాత్ర‌ను పోషిస్తాయి. అయితే వీటిపై విద్యార్ధులకు స్వీయనియంత్రణ ఉండాలి.
- చదువు మ‌ధ్య‌లో చిన్న విరామం తీసుకుంటే విద్యార్ధికి నూత‌నోత్తేజం క‌లుగుతుంది.
- ప్రతీ 45 నిమిషాల‌కు ఒక‌సారి 5 నుంచి 10 నిమిషాలు విరామం తీసుకుంటే మెడ‌దు మ‌రింత చురుగ్గా ప‌నిచేస్తుంది.
- బాగా చ‌దివేయాల‌న్నఒత్తిడితో విరామం తీసుకోకుండా చ‌దివితే ఏకాగ్రత దెబ్బ‌తింటుంది.
- విద్యార్దులు త‌ప్ప‌నిస‌రిగా రాత్రి 8 గంట‌లు నిద్ర‌పోవాలి.
- సాయింత్రం లేదా మ‌ధ్య‌హ్నం స్కూల్ లేదా కాలేజీ అయిపోయాక చిన్న‌గా 10 నిమిషాలు కునుకు తీస్తే మెద‌డు చురుగ్గా ప‌నిచేస్తుంది.
ఏకాగ్ర‌త‌ను పెంచుకునేందుకు ధ్యానాన్ని మించిన ప్ర‌త్యామ్నాయం లేదు. ఎటువంటి ఆలోచ‌న‌లు లేకుండా ఒకే అంశంపై దృష్టి పెట్టి చేసే ధ్యానం విద్యార్ధులకు ఎంత‌గానో ఉప‌యోగ‌ప‌డుతుంది.
- ప్రతీ రోజూ ఉద‌యం లేదా సాయింత్రం ఎటువంటి శ‌బ్దాలు రాని చోట ఒక 10 నిమిషాలు ప్ర‌శాంతంగా ధ్యానం చేయండి.
- ధ్యానం చేయడం వ‌ల‌న మ‌న‌స్సు ప్ర‌శాంతంగా మారి చదువుపై మ‌రింత శ్ర‌ద్ధ పెట్టేందుకు అవకాశం ఏర్పడుతుంది.
- ఒక్కోసారి చదువు వ‌ల‌న అధిక ఒత్తిడి ఏర్ప‌డినా ప్రతీ రోజూ ధ్యానం చేయడం వ‌ల‌న దాన్ని ధీటుగా ఎదుర్కోవ‌చ్చు.
- శ‌రీరాన్ని చెమ‌ట ప‌ట్టేలా శ్రమ పెట్ట‌డం ఎంత అవ‌స‌ర‌మో అలాగే మెదడును కూడా చురుగ్గా ఉంచుకునేందుకు ధ్యానం ఉప‌యోగ‌ప‌డుతుంది.
శారీరక శ్రమ చేయడం అంటే మెదడును మరించ చురుగ్గా ఉంచుకోవడమే. విద్యార్ధులు ప్రతీ రోజూ కొంత సమయాన్ని వ్యాయామం చేసేందేకు, ఆటలు ఆడేందుకు కేటాయిస్తే చదువుపై ఏకాగ్రత సాధించేందుకు అవకాశం ఏర్పడుతుంది.
- స్కూల్ / కాలేజీలో ఆటల సమయాన్ని పూర్తిగా ఆటలకే వినియోగించుకునేలా చూసుకొండి.
- ఎటువంటి శారీరక శ్రమ లేకుండా కేవలం చదువు అంటే ఏకాగ్రత కుదరదు అని గుర్తించండి.
- కాలేజీ విద్యార్ధులు కళాశాల ప్రాంగణంలో ఉండే జిమ్ లను సద్వినియోగం చేసుకూంటూ రోజుకు అరగంట అయినా వ్యాయామం చేసేందుకు ప్రయత్నించాలి.
- ఏకాగ్రతకు, శారీరక శ్రమకు సంబంధం ఉందని ఇప్పటికే అధ్యయనాలు నిరూపించాయి. కాబట్టి వ్యాయామాన్ని నిర్లక్ష్యం చేయకండి.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment