కెరీర్ లో పెను విప‌త్తు...డౌట్ సిండ్రోమ్!!

      మీరు అత్యున్న‌త  స్థాయికి చేరుకున్నారు..మీకు పెద్ద ప‌దోన్న‌తి ల‌భించింది..ఎంత‌మందో పోటీప‌డుతున్న‌ మంచి యూనివ‌ర్సిటీలో మీకు సీటు దొరికింది..ప‌రీక్ష‌ల్లో మంచి మార్కులు వ‌చ్చాయి. ఇలాంటి సంతోష‌క‌ర‌మైన సంద‌ర్భాల్లో చాలా మంది ఆనంద‌ప‌డ‌తారు. మ‌రికొంద‌రు త‌మ సామ‌ర్ధ్యం వ‌ల్ల‌నే ఇవన్నీ సాధ్య‌మ‌య్యాయ‌ని గ‌ర్వం ఒల‌క‌బోస్తారు. అయితే వీటికి భిన్నంగా నేనే ఇవన్నీ చేసానా? నాకు అంత సత్తా ఉందా? ఈ విజ‌యం ఏదో గాలివాటంలా వ‌చ్చింది త‌ప్ప నేను చేసిందేమీ లేదు! నేను ఇంత పెద్ద బాధ్య‌త‌ల‌ను తీసుకోగ‌ల‌నా? ఇలాంటి సందేహాలు మీకు వ‌స్తున్నాయంటే క‌చ్చితంగా జాగ్ర‌త్త ప‌డాల్సిందే. ఎందుకంటే ఈ ల‌క్ష‌ణాలు ఒక మాన‌సిక రుగ్మ‌త‌కు సంబంధించిన‌వి. విద్యార్ధులు, ఉద్యోగుల ఆత్మ‌విశ్వాసాన్ని దెబ్బ‌తీసే ఈ పెను ప్ర‌మాదం నుండి చిన్న చిన్న జాగ్ర‌త్త‌ల‌తో బ‌య‌ట‌ప‌డొచ్చు.

విజ‌యం కూడా భ‌య‌పెడుతోందా?

     మీరు ఏదైనా పెద్ద విజ‌యం సాధించినప్పుడు మీపై అభినంద‌న‌ల వ‌ర్షం కురుస్తుంది. మీరు చేసిన హార్డ్ వ‌ర్క్ వ‌ల‌నే ఇది సాధ్య‌మైంద‌ని స‌హ‌చ‌రులు మీతో అన్న‌ప్పుడు మీరు ఏం చేస్తారు? మీ సామ‌ర్ధ్యంపై, ప‌నితీరుపై కూసింత గ‌ర్వ‌ప‌డ‌తారు. అవునా..? కానీ ఇది నేను సాధించ‌డం ఏంటి? ఏదో అదృష్టం క‌లిసివ‌చ్చింది? అని మిమ్మ‌ల్ని మీరు త‌క్కువ చేసుకుంటున్నారంటే ఇది కొంచెం దృష్టి పెట్టాల్సిన విష‌య‌మే. ఎందుకంటే 'ఇంపోస్ట‌ర్ సిండ్రోమ్' గా పిలిచే మానసిక రుగ్మ‌త ఉన్న‌వాళ్ల‌ని విజ‌యం కూడా భ‌య‌పెడుతుంది. మీ స‌క్సెస్ పై మీకే న‌మ్మ‌కం క‌లగ‌క‌పోవ‌డం లేదా మీ సామ‌ర్ధ్యంపై మీకే సందేహాలు క‌ల‌గ‌డం ఈ సిండ్రోమ్ ల‌క్ష‌ణాలు. 1970 లో వెలుగులోకి వ‌చ్చిన ఈ  సిండ్రోమ్ ఇటీవ‌లి కాలంలో ఎక్కువ మందిలో క‌నిపిస్తున్న‌ట్టు సైకాల‌జిస్ట్ లు చెపుతున్నారు. వాస్త‌వానికి ఆత్మ‌విశ్వాసం లోపించ‌డ‌మే ఈ మాన‌సిక రుగ్మ‌త పెరిగిపోవ‌డానికి ప్ర‌ధాన కార‌ణం.

అన్నింటా 'మిస్ట‌ర్ ఫ‌ర్‌పెక్ట్' కావ‌డం కుద‌ర‌దు!

        అమెరికా మాజీ  అధ్యక్షుడు  అబ్రహాం లింకన్ తన కొడుక్కి ఉత్తరం రాస్తూ అందులో ఒక అద్భతమైన విషయాన్ని ప్రస్తావించారు. "కొన్ని విజయాలు అపజయం కంటే హీనమైనవి. కొన్ని అపజయాలు విజయం కంటే మహోన్నతమైనవి". అబ్రహాం లింకన్ అప్పట్లో చెప్పిన ఈ మాటలు ఈ తరానికి కూడా మార్గదర్శకమే. పని యొక్క విలువ తెలుసుకుంటే విజయం దానంతట అదే మన చెంతకు వస్తుందని, అనుభవం వెలకట్టలేని విలువైన పాఠమని లింకన్ చెప్పారు. అయితే ఈ విజయ ప్రయాణానికి ఆత్మవిశ్వాసమే చుక్కాని. ఒక విద్యార్ధికి అయినా, అభ్య‌ర్ధికి అయినా ఆత్మ‌విశ్వాసం అనేది చాలా ముఖ్యం. విద్యార్ధి అర్హ‌త‌ల కంటే ఆత్మ‌విశ్వాస‌మే మీద‌నే అత‌ని భ‌విష్య‌త్ ఆధార‌ప‌డి ఉంటుంది. అయితే ఈ క్ర‌మంలో చాలా మందికి త‌మ సామ‌ర్ధ్యంపై ఏదో ఒక సంద‌ర్భంలో అనుమానం రాక మాన‌దు. అయితే ఇలా వ‌చ్చిన అనుమానం, అలా వెళ్లిపోతే బాగుంటుంది కానీ చాలా రోజుల పాటు ఉంది అంటే సైకాల‌జిస్ట్ ల‌ను సంప్ర‌దించాల్సిందే. ఎందుకంటే ఇలాంటి ప‌రిస్థితి 'ఇంపోస్టర్ సిండ్రోమ్' కు దారితీయొచ్చు. ఈ ల‌క్ష‌ణాలు ఉన్న వ్య‌క్తులు అన్ని ప‌నుల‌ను ఒక ప‌ద్ధ‌తి ప్ర‌కారం చేయాల‌ని భావిస్తూ, దానికోసం క‌ష్ట‌ప‌డుతూ ఉంటారు. ఈ క్ర‌మంలో ఎవ‌రి స‌హాయం తీసుకోరు. ఇలా స‌హాయం తీసుకోవ‌డం వ‌ల‌న త‌మ‌కు ప‌ని రాద‌ని వాళ్లు భావిస్తారేమోన‌ని వీళ్లు భ‌య‌ప‌డుతూ ఉంటారు. దీని వ‌ల‌న కొత్త కొత్త విష‌యాల‌ను స్వేచ్ఛ‌గా చేసేందుకు ఒక‌టికి ప‌దిసార్లు ఆలోచిస్తూ ఉంటారు. దీని వ‌ల‌న చాలా మంచి  అవ‌కాశాల‌ను చేజార్చుకుంటూ ఉంటారు. అదే విధంగా వాళ్ల‌కు నిజంగా సామ‌ర్ధం ఉన్న రంగాల్లో కూడా ఇలాంటి సందేహాల‌తో ఎదుగుద‌ల లేకుండా ఉండిపోతూ ఉంటారు.

జాగ్ర‌త్త‌లు తీసుకోకుంటే అస్త‌వ్య‌వ్థ‌మే!

     'ఇంపోస్టర్ సిండ్రోమ్'  అనేది సాధార‌ణ వైద్య ప‌రీక్ష‌ల్లో వెల్లడ‌య్యే స‌మ‌స్య కాదు. ఎవ‌రికి వారు విశ్లేషించుకుని త‌మ‌కు ఈ సిండ్రోమ్ ల‌క్ష‌ణాలు క‌నిపిస్తే ఎవ‌రికి వారే వాటిని స‌రిచేసుకునే వీలుంది. అవ‌స‌ర‌మ‌నుకుంటే సైకాల‌జిస్ట్ స‌హాయం తీసుకోవ‌చ్చు. ఈ ల‌క్ష‌ణాలు క‌నిపించిన వెంట‌నే కొన్ని జాగ్ర‌త్తలు తీసుకుంటే స‌మ‌స్య స‌మిసిపోతుంది.

• మీరు ఏయే విష‌యాల్లో స‌మ‌ర్ధులో ఒక పేప‌ర్ పై రాసుకొండి. గ‌డిచిన కొన్నేళ్లలో మీరు సాధించిన విజ‌యాల‌ను ఒకసారి గుర్తుకుతెచ్చుకోండి. ఆయా సంద‌ర్భాల్లో మీకు ఎదురైన అనుభ‌వాల‌ను, మీకు స‌హాయ‌ప‌డిన వ్య‌క్తులను మ‌న‌నం చేసుకొండి.

• స‌హాయం పొంద‌డంలో ఒపెన్ గా ఉండండి.  ఒక వ్య‌క్తి మీకంటే చాలా విష‌యాల్లో నిపుణుడైన‌ప్పుడు అత‌న్ని అడిగి తెలుసుకోవ‌డంలో త‌ప్పేమీ లేదు. అంద‌రూ అన్ని విష‌యాల్లోనూ నిపుణులుగా ఉండ‌లేరు క‌దా?

• మిమ్మ‌ల్ని వేరే వ్య‌క్తుల‌తో ఎప్పుడూ పోల్చుకోకండి. కొంద‌రికి కొన్ని విష‌యాల్లో మంచి ప‌నిత‌నం ఉండ‌వ‌చ్చు. అంత‌మాత్రాన వాళ్లకు బ‌ల‌హీన‌త‌లు ఉండ‌వ‌ని కాదు. మీకు బాగా నైపుణ్యం ఉన్న విష‌యాలు వారికి అస్స‌లు తెలిసుండ‌క‌పోవ‌చ్చు. ఈ విష‌యాల‌ను గుర్తిస్తే ఇత‌రుల‌తో పోల్చుకోవ‌డం మానేసి ఆత్మ‌విశ్వాసాన్ని పెంపోదించుకోవ‌చ్చు.

• ఎవ్వ‌రూ అన్ని విష‌యాల్లోనూ గొప్ప‌వాళ్లుగా ఉండ‌లేరు. మీకు చేస్తున్న ప‌నిలో పూర్తి స్థాయిలో ఫ‌ర్ పెక్ష‌న్ సాధించేందుకు మీరు ప్ర‌య‌త్నిస్తున్నప్పుడు ఒత్తిడి క‌ల‌గ‌డం స‌హ‌జం. అంత‌మాత్రాన మీరు అస‌మ‌ర్ధులు అని భావించ‌కండి.

• ఎప్పుడూ సానుకూల ఆలోచ‌న‌లే చేయండి.ప్ర‌తికూల ఆలోచ‌న‌లు ఉన్న‌ప్పుడే 'ఇంపోస్టర్ సిండ్రోమ్' మిమ్మల్ని వేధిస్తుంది. 

సానుకూల ఆలోచ‌న‌లే శ్రీరామ‌ర‌క్ష‌!

     ప్ర‌స్తుతం చ‌దువులోనూ, ఉద్యోగంలోనూ ఎన్నో ఒత్తిళ్లు మ‌రెన్నో స‌వాళ్లు. ఇలాంటి స్థితిని ఎదుర్కోవ‌డానికి తిరుగులేని బ్ర‌హ్మ‌స్త్రం పాజిటివ్ థింకింగ్. ఎప్పుడూ సానుకూల ఆలోచ‌న చేయ‌డం వ‌ల‌న ఆత్మ‌విశ్వాసం పెరిగి ఇంపోర్ట‌ర్ సిండ్రోమ్ లాంటి మాన‌సిక రుగ్మ‌త‌ల‌ను ఎదుర్కొనే స‌త్తా సాధించ‌గ‌లుగుతారు. కృష్ణుడు భ‌వ‌ద్గీత‌లో చెప్పిన‌ట్టు చ‌దువులో అయినా కెరీర్ లో అయినా ఫ‌లితాన్ని ప‌క్క‌న పెట్టి ఆత్మ‌విశ్వాసంతో ప‌నిని శ్ర‌ద్ధ‌గా చేస్తే మీకు ఎదురే ఉండ‌దు. సంక్షోభం ఎదురైన సంద‌ర్భంలో కూడా మీరు క‌ష్టాల నుంచి గ‌ట్టేక్కేందుకు ఇది ఉప‌యోగ‌ప‌డుతుంది. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com