బిల్ గేట్స్, జుక‌ర్ బ‌ర్గ్ ల‌ను తొక్కేస్తున్నారు..!!

    ఫేస్ బుక్ అధినేత మార్క్ జుక‌ర్ బ‌ర్గ్, రిల‌య‌న్స్ వ్య‌వ‌స్థాప‌కుడు ధీరూభాయ్ అంబానీ, మైక్రోసాఫ్ట్ అధినేత బిల్ గేట్స్ లు సృష్టించిన వ్యాపార సామ్రాజ్యాలే ఇప్పుడు ప్ర‌పంచాన్ని ఏలుతున్నాయి. ఆస‌క్తిక‌ర‌మైన విష‌యం ఏంటంటే వీళ్లంతా  డ్రాప‌వుట్ విద్యార్ధులు. పాఠ‌శాల‌ ప్రాథ‌మిక స్థాయిలో నేర్చుకున్న విష‌యాల‌తోనే ఇంత‌టి ఉన్నత స్థానాల‌కు చేరుకోగ‌లిగారు. కానీ మ‌న దేశంలో మాత్రం ప్రాథ‌మిక స్థాయిలోనే ఎందరో జుక‌ర్ బ‌ర్గ్ లు క‌నుమ‌రుగైపోతున్నారు.తాత్కాలిక ప్ర‌యోజ‌నాలే ప‌ర‌మావ‌ధిగా న‌డుస్తున్న రాజ‌కీయాలు వాటిని న‌డిపించే నాయ‌కులు విద్య‌పై శీత‌క‌న్ను వేస్తూ ప్ర‌జ‌ల‌ను ఇప్ప‌టికీ నిరక్ష్య‌రాస్యులుగానే ఉంచేశారు. అస‌లు పాఠ‌శాల ముఖ‌మే చూడ‌ని వారిని మిన‌హాయిస్తే చ‌దువును మ‌ధ్య‌లో వ‌దిలేస్తున్న విద్యార్ధుల సంఖ్య ఏయేటికాయేడు పెరుగుతూనే ఉంది. ఈ పెను స‌మ‌స్య మూలాల‌ను గుర్తించి స్కూల్ డ్రాప‌వుట్ ల‌ను యుద్ధ‌ప్రాతిప‌దిక‌న నివారించాల్సిన ప్ర‌భుత్వ యంత్రాంగాలు నిమ్మ‌కు నీరెత్తిన‌ట్టు వ్య‌వ‌హ‌రిస్తున్నాయి. తెలుగు రాష్ట్రాల్లో పాఠ‌శాల మాధ్య‌మిక స్థాయిలో డ్రాప‌వుట్ల సంఖ్య గ‌త ఏడాదితో పోల్చుకుంటే ఈ ఏడాది మరింత పెరిగింద‌ని సాక్షాత్తూ కేంద్ర ప్ర‌భుత్వ అధ్య‌య‌నాలే చెపుతున్నాయి.  విద్యా వ్య‌వ‌స్థ‌లోని ఈ నిర్ల‌క్ష్యం మ‌న‌  భావి బిల్ గేట్స్, జుక‌ర్ బ‌ర్గ్ ల‌ను ప్రాథమిక స్థాయిలోనే తుంచేయడం ఆవేద‌న క‌లిగిస్తోంది.

ప్ర‌మాద ఘంటిక‌లు మోగుతున్నాయి!

          ఇటీవ‌ల కాలంలో తెలంగాణా రాష్ట్రంలో మ‌ధ్య‌లోనే స్కూల్ మానేస్తున్న విద్యార్ధుల సంఖ్య‌ను చూస్తే ఆందోళ‌న క‌ల‌గ‌క మాన‌దు. రాష్ట్ర ఆర్థిక గ‌ణాంకాల శాఖ విడుద‌ల చేసిన నివేదిక‌లు ఈ క‌ఠిన వాస్త‌వాల‌ను క‌ళ్ల‌కు క‌డుతున్నాయి. స్కూల్ కు వెళ్లే వ‌య‌స్సున్న పిల్ల‌ల్లో 96 శాతం మంది బ‌డిలో చేరుతున్నా వారిలో నాలుగింట ఒక వంతు మంది పిల్ల‌లు క‌నీసం పాఠ‌శాల స్థాయి విద్య‌ను కూడా పూర్తి చేయ‌కుండానే చ‌దువుకు ముగింపు ప‌లుకుతున్నారు. క‌నీసం 8 వ త‌ర‌గ‌తి వ‌ర‌కూ కూడా వాళ్ల చ‌దువు సాగ‌డం లేదు. ఐదో త‌ర‌గ‌తి లోపు 20 శాతం మంది, ఎనిమిదో త‌ర‌గ‌తి లోపు 31 శాతం మంది మ‌ధ్య‌లోనే చదువు మానేస్తున్నారు. ఇటీవ‌ల గ‌ణాంకాల ప్రకారం తెలంగాణాలోని గ్రామాల్లో 40 శాతం మంది నిర‌క్ష‌రాస్యులు ఉన్న‌ట్టు తేలింది. అయితే మిగిలిన 60 శాతం మంది సంపూర్ణ అక్ష‌రాస్యులు అని అనుకుంటే మ‌నం ప‌ప్పులో కాలేసిన‌ట్టే. జ‌నాభా లెక్క‌ల స‌మ‌యంలో అధికారులు అడిగిన‌ప్పుడు ఐదు,ఎనిమిదో త‌ర‌గ‌తి వ‌ర‌కూ చదువుకున్న వారు తాము అక్ష‌రాస్యుల‌మే అని చెపుతున్నారు. కానీ వీరికి దిన‌ప‌త్రిక‌లు చ‌ద‌వ‌డం, సొంతంగా రాయ‌డం, వ్య‌వ‌హారాలు నిర్వ‌హించ‌డం చేత కావ‌డం లేదు. వీరిని అక్ష‌రాస్యులుగా ఎలా ప‌రిగ‌ణించాలి?  ప్ర‌భుత్వం ఈ  తీవ్ర స‌మ‌స్య‌ను గుర్తించ‌డం లేదో లేక గుర్తించినా ఎందుకు ఉదాసీన‌త ప్ర‌ద‌ర్శిస్తుందో అర్ధం కాని విష‌యం. 'అవుటాఫ్ స్కూల్' అంటే అస‌లు స్కూల్ ముఖ‌మే చూడ‌ని పిల్ల‌ల్ని ఎలాగూ స్కూల్ కు ర‌ప్పించ‌లేక‌పోయిన ప్ర‌భుత్వాలు స్కూల్ కు వ‌చ్చి  బాగా చ‌దువుతున్న స‌మ‌యంలో చిన్నారులు బ‌డికి దూర‌మ‌వుతుంటే చోద్యం చూడ‌టమే బాధాక‌రం.

స‌మ‌స్య‌కు 'మూలం' ఏంటి?

    విద్యార్ధులు బ‌డి మ‌ధ్య‌లో మానేయ‌డానికి ఎన్నో కార‌ణాలున్నాయి. ఆర్ధిక‌, సామాజిక కార‌ణాలు పిల్లలు చదువుకు మ‌ధ్య‌లోనే ఫుల్ స్టాప్ ప‌డేలా చేస్తున్నాయి. ప్ర‌భుత్వ నిర్ల‌క్ష్యంతో పాటు వ్య‌వ‌స్థ‌లోని లోపాలతో స‌రస్వ‌తి కృప లేకుండా పోతోంది.

• ముఖ్యంగా పేద‌రికం,  విద్యార్ధుల‌ను విద్య‌కు దూరం చేస్తోంది. పేదరికం కార‌ణంగా చాలా మంది త‌ల్లిదండ్రులు పిల్ల‌ల్ని మ‌ధ్య‌లోనే బ‌డి మాన్పించి వ్య‌వ‌సాయం, కూలీ ప‌నులు చేయిస్తున్నారు.

• క‌రువుతో వ‌ల‌స‌లు పెర‌గ‌డం కూడా చిన్న‌పిల్ల‌ల పాలిట శాపంగా మారింది. ప‌ల్లెల్లో కూలీ ప‌నులు దొరక్క‌పోవ‌డంతో చాలా కుటుంబాలు ప‌ట్ట‌ణాల‌కు వ‌ల‌స పోతున్నాయి. త‌ల్లిదండ్రుల‌తో పాటు ప‌ట్ట‌ణాల‌కు చేరుకుంటున్న చిన్నారులు భ‌వన నిర్మాణ కార్మికులుగా, హోట‌ల్స్ స్వీప‌ర్స్ గా ప‌నిచేస్తూ బాల కార్మికులుగా మారిపోతున్నారు.

• ప‌ట్ట‌ణాల్లో బాల‌కార్మికుల‌ను గుర్తించి వారికి చ‌దువు చెప్పించే వ్య‌వ‌స్థ లేక‌పోవ‌డమే ఇప్పుడు శాపంగా మారింది.

• కొంత మంది ఉపాధ్యాయులు బాధ్య‌తారాహిత్యంగా వ్య‌వ‌హ‌రించ‌డం కూడా స్కూల్ డ్రాప‌వుట్స్ కు కార‌ణ‌మ‌వుతోంది. పిల్ల‌ల్ని క‌ఠినంగా దండించ‌డం, హ‌ద్దులు మీరి భ‌య‌పెట్ట‌డంతో చాలా మంది పిల్ల‌లు స్కూల్ మ‌ధ్య‌లోనే మానేసి ప‌నులు చూసుకుంటున్నారు.

• స్కూల్ లేట్ గా వ‌స్తేనో లేక ఏదైనా త‌ప్పు చేస్తే చాలా మంది ఉపాధ్యాయులు విద్యార్ధుల‌ను కాస్త క‌ఠినంగా దండిస్తున్నారు. వెళ్లి నీ మీ నాన్న‌ను లేదా మీ అమ్మ‌ను తీసుకురా అని పాఠ‌శాల నుంచి వెళ్ల‌గొడుతున్నారు. రోజంతా ప‌నుల‌కు పోయే పేద పిల్ల‌వాడి త‌ల్లిదండ్రులు స్కూల్ కి ఎలా వ‌స్తారు?  టీచ‌ర్ల చూపిస్తున్న ఈ అతి కాస్త పెరిగిపోవ‌డం కూడా పిల్ల‌ల డ్రాప‌వుట్స్ కు కార‌ణ‌మ‌వుతోంది.

• త‌ర‌గ‌తి గ‌దిలో పేద పిల్ల‌లు ఎదుర్కొంటున్న వివ‌క్ష కూడా స్కూల్ డ్రాప‌వుట్స్ కు దారితీస్తున్న‌ట్టు స‌ర్వేలు చెపుతున్నాయి. నువ్వు ప‌రిశుభ్రంగా లేవు, నీ బ‌ట్ట‌లు మురికిగా ఉన్నాయి, నీకు చ‌దువు స‌రిగ్గా రాదు అంటూ తోటి విద్యార్ధులు చేసే హేళ‌న వ‌ల‌న కూడా చాలా మంది పిల్ల‌లు స్కూల్ కు వెళ్లేందుకు సుముఖ‌త చూపించ‌డం లేదు.

ప‌రిష్కారం 'ప్రాథ‌మిక' స్థాయిలోనే ఉంది!

      ఒక విద్యార్ధి త‌న జీవితంలోని అతి ముఖ్య‌మైన విష‌యాల‌ను ప్రాథమిక స్థాయిలోనే నేర్చుకుంటాడు. అక్క‌డ నేర్చుకున్న విష‌యాలే అత‌ని జీవిత గ‌మ‌నాన్నినిర్దేశిస్తాయి. ఫేస్ బుక్ అధినేత జుక‌ర్ బ‌ర్గ్, మైక్రోసాఫ్ట్ అధిప‌తి బిల్ గేట్స్ , రిల‌య‌న్స్ వ్య‌వ‌స్థాప‌కుడు ధీరూభాయ్ అంబానీల జీవితాల‌ను క్షుణ్ణంగా గ‌మ‌నిస్తే వీళ్లంతా డ్రాప‌వుట్ విద్యార్ధులే అయినా  పాఠ‌శాల‌లో ప్రాథ‌మిక స్థాయిలో నేర్చుకున్న విష‌యాలతోనే  అద్భుతాలు చేసారు. కానీ మ‌న దేశంలో ఎంద‌రో బిల్ గేట్స్, జుక‌ర్ బ‌ర్గ్ లు క‌నీసం ప్రాథ‌మిక విద్య‌ను కూడా పూర్తి చేయ‌కుండానే విద్య‌కు దూర‌మ‌వుతున్నారు. ఎన్ని స‌మ‌స్య‌లున్నా క‌నీసం ప్రాథ‌మిక స్థాయి విద్యను అయినా విద్యార్ధుల‌కు అందించ‌లేక‌పోవ‌డం క‌చ్చితంగా ప్ర‌భుత్వ వైఫ‌ల్య‌మే. కొన్ని త‌క్ష‌ణ ప‌రిష్కార మార్గాల‌ను చేప‌డితే డ్రాప‌వుట్ల సంఖ్య‌ను త‌గ్గించ‌వ‌చ్చు.

• స్కూల్ కు రాని పిల్ల‌ల ఇంటికి ఉపాధ్యాయులు వెళ్లి, స‌మ‌స్య‌ను తెలుసుకుని, వాళ్ల త‌ల్లిదండ్రుల‌ను ఒప్పించి స్కూల్ కు తీసుకురావాలి.

• ఉపాధ్యాయుల‌కు తోడు ఎంఈఓ, డిప్యూటీ ఈఓలు స్కూల్ డ్రాప‌వుట్స్ పై ఎప్ప‌టిక‌ప్పుడు స‌మీక్ష చేయాలి.

• విద్యార్ధుల‌కు మ‌ధ్యహ్న భోజ‌నంతో పాటు సాయింత్రం ఇంటికి వెళ్లేట‌ప్పుడు ఏదైనా పోష‌ణ‌తో కూడి చిరు తిండి పెట్టాలి.

• పేద కుటుంబాల్లోని విద్యార్ధులు, బాల కార్మికుల కోసం ప్ర‌త్యేక రెసిడెన్షియ‌ల్ స్కూళ్ల‌ను ఏర్పాటు చేస్తే బాగుంటుంది.

• ప్ర‌భుత్వం డ్రాప‌వుట్స్ ను నివారించేందుకు ప్ర‌త్యేక వ్య‌వ‌స్థ‌ను ఏర్పాటు చేసి, అది స‌క్ర‌మంగా ప‌నిచేసేలా చూడాలి.

త‌క్ష‌ణ చ‌ర్య‌లు చేప‌ట్ట‌కుంటే 'మిడిల్ డ్రాప్' త‌థ్యం!

   ప్ర‌పంచంలో శ‌క్తివంత‌మైన దేశంగా అవ‌త‌రించాల‌ని ఆశ‌ప‌డుతున్న దేశం ముందుగా సంస్థాగ‌త లోపాల‌ను అధిగమించాల్సి ఉంటుంది. కీల‌క‌మైన విద్యారంగంలో అద్భుతాలు చేస్తేనే కానీ బ‌ల‌మైన వ్య‌వ‌స్థ‌గా రూపుదాల్చ‌లేం. కానీ ఈ చిన్న లాజిక్ ను మిస్ అయిన మ‌న ప్ర‌భుత్వ యంత్రాంగం ప్రాథ‌మిక విద్య‌లో ఉన్న లోపాల‌ను స‌వ‌రించలేక‌పోతోంది. స్కూల్ డ్రాప‌వుట్లను యుద్ధ ప్రాతిప‌దిక‌న నిలువ‌రించ‌క‌పోతే నిపుణులైన‌, నాణ్య‌మైన యువ‌త‌ను, పౌరుల‌ను మ‌నం ఎన్న‌టికీ త‌యారు చేసుకోలేం. ప్ర‌జ‌ల్లో పేద‌రికాన్ని త‌గ్గిస్తే స‌గం స‌మ‌స్య తీరుతుంది. అలాగే డ్రాప‌వుట్స్ దారితీస్తున్న ఇత‌ర కార‌ణాలను కూడా అన్వేషించి ప్రాథ‌మిక విద్య‌లో అద్భుతాలు చేస్తున్న దేశాల విధానాల‌ను అమ‌లు చేయాలి. ఇలా చేసి ప్రాథ‌మిక విద్య‌ను బ‌లోపేతం చేసిన రోజున మ‌న ద‌గ్గ‌ర కూడా బిల్ గేట్స్ లు, జుకర్ బ‌ర్గ్ లు వంద‌లాది మంది త‌యారవుతారు.

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com