మీ 'రిలీవింగ్ లెటరే'.. మీ 'అప్పాయింట్‌మెంట్ లెటర్'!!

      'రిలీవింగ్ లెటర్'..'అప్పాయింట్‌మెంట్ లెటర్' ఎలా అవుతుంది? అని సందేహపడుతున్నారా? కానీ మీ కెరీర్ లో విజయవంతమైన ఎత్తుగడ సరిగ్గా ఇక్కడే ఉంది. ఈ ఎత్తుగడను మీరు సరైన రీతిలో వినియోగించుకోగలిగితే మీ ఉద్యోగ జీవితం ఉన్నత శిఖరాలకు చేరుకుంటుంది.  ప్రతీ ఉద్యోగార్ధి సక్సెస్‌పుల్ గా ఇంటర్వ్యూ పూర్తి చేసాక దేని గురించి ఆలోచిస్తాడు. 'కంపెనీ పనితీరు బాగుంది'.. 'ఆఫర్ చేసిన ప్యాకేజీ ఫర్వాలేదు'.. 'లాంగ్ కమిట్‌మెంట్ కూడా ఓకే'. అయితే కొత్తగా ఒక కంపెనీలో జాయిన్ అయినప్పుడు ఆలోచించే విధానం కొంచెం వినూత్నంగా, భవిష్యత్ కు బాటలు వేసేదిగా ఉండాలి. ఇచ్చిన కమిట్‌మెంట్ ఆధారంగా ముందుగా కష్టపడి పనిచేసే తత్వాన్ని అవవర్చుకోవాలి. చేసే పనిని ప్రేమించాలి. ఇచ్చిన ప్రాజెక్ట్ ను పూర్తి శక్తి సామర్ధ్యాలు వినియోగించి పూర్తి చేయాలి. ఇవన్నీ కంపెనీకి ఉపయోగపడటంతో పాటు ఉద్యోగి కెరీర్ కు పటిష్టమైన పునాది వేసేదిగా ఉండాలి. ప్రస్తుతం కెరీర్ నిర్మాణం ప్రాథమిక దశలో విద్యార్ధులు కొన్ని పొరపాట్లు చేస్తున్నారు. ఆ పొరపాట్లు ఉద్యోగ జీవితంలో కొన్నేళ్ల పాటు వేధిస్తాయి. అలా కాకుండా కెరీర్ ఎటువంటి కుదుపులు లేకుండా సాఫీగా సాగిపోవాలంటే ప్రతీ ఉద్యోగార్ధి కొన్ని జాగ్రత్తలు తీసుకోవాల్సిందే. 

'ఆఫర్ లెటర్' ను క్షుణ్ణంగా పరిశీలించండి

   ఒక అభ్యర్ధి విజయవంతంగా ఇంటర్వ్యూ పూర్తి చేసాక ప్రస్తుతం కంపెనీలు ఆఫర్ లెటర్ ను ఇస్తున్నాయి. సరిగ్గా ఇక్కడే అభ్యర్ధి తన బుర్రకు పదును పెట్టాలి. ఆఫర్ లెటర్ లోని విషయాలను క్షుణ్ణంగా చదివి ప్యాకేజీ, భాధ్యతలు, కమిట్‌మెంట్ వంటి విషయాలపై ఒక అవగాహనకు రావాలి. అదే విధంగా ఆఫర్ లెటర్ తన సామర్ధ్యానికి తగినట్టుగా లేకుంటే ఆ ఉద్యోగంపై సరైన నిర్ణయం తీసుకోవాలి. అవసరం లేదు అనుకుంటే ఆ ఉద్యోగాన్ని వదులు కోవాలి. అభ్యర్ధి ఆఫర్ లెటర్ కు అంగీకారం తెలిపాకే కంపెనీలు అప్పాయింట్‌‌మెంట్ లెటర్ ను ఇస్తాయి. కాబట్టి ప్రతీ అభ్యర్ది ఆఫర్ లెటర్ పూర్తిగా పరిశీలించాకే తగిన నిర్ణయానికి రావాలి. ప్రస్తుతం తగిన నైపుణ్యాలు ఉన్నవారికి ఉద్యోగాలకు కొదువ లేదు. కాబట్టి కంపెనీ జాబ్ ఆఫర్ చేసినప్పుడు ఆచితూచి వ్యవహరించడం నేర్చుకోవాలి. ఇటీవలి కాలంలో కొందరు అభ్యర్ధులు ఒక కంపెనీలో ఆఫర్ లెటర్ ను తీసుకుని వేరే కంపెనీలో దాన్ని చూపించి అక్కడ ప్యాకేజీ పెంచుకునేందుకు ఉపయోగించుకుంటున్నారు. ఇది ఒక స్థాయి వరకే అయితే ఫర్వాలేదు కానీ పరిమితి దాటితే ఈ విధానం అభ్యర్ధికి చేటు చేయవచ్చు. ఎందుకంటే కంపెనీలు మీ సామర్ధ్యానికి మించి ఒక్క రూపాయి కూడా అదనంగా మీకు ఇవ్వవని గుర్తుంచుకొండి. 

'పని'ని ప్రేమించండి

     ఒక్కసారి అప్పాయింట్‌మెంట్ లెటర్ తీసుకుని కంపెనీలో జాయిన్ అయ్యాక మీ పూర్తి శక్తి సామర్ధ్యాలను ఉపయోగించి పనిచేయండి. ఉద్యోగాన్ని సాధించడం కంటే పనిచేస్తున్న కంపెనీ పాలసీలు, పని వాతావరణం, సహచరులు ఇలా అన్నింటిని సమన్వయపర్చుకుని పనిచేయడం అలవర్చుకోవడం అతిపెద్ద సవాలు. ఆ సవాలును స్వీకరించి కంపెనీలో మంచి ఉద్యోగి అనిపించుకునేలా ప్రవర్తించండి. మీకు అప్పగించిన పనిని 100% నిజాయితీతో, నిబద్ధతతో పూర్తి చేయడం అలవర్చుకోవడం చాలా ముఖ్యం. ఎందుకంటే రానున్న మీ ఉద్యోగ జీవితానికి ఈ అలవాటే రాచబాట వేస్తుంది. ఈ క్రమంలో ఉద్యోగాన్ని మాత్రమే అమితంగా ప్రేమించండి కానీ కంపెనీని కాదని గుర్తుంచుకోవడం చాలా ముఖ్యం. ఎందుకంటే కంపెనీ కూడా మీ పనినే కోరుకుంటుంది కానీ వ్యక్తిగతంగా మిమ్మల్ని కాదు. పనిని ప్రేమించడం వలన మీరు ఏ కంపెనీలో అయినా ఇమిడిపోగలుతారు. కానీ పని చేసినంత కాలం సంస్థకు ఉపయోగపడే విలువైన ఉద్యోగి అని కంపెనీ గుర్తించేలా చూసుకొండి. వివాదరహితుడిగా, పనిని ప్రేమించే క్రమశిక్షణ కలిగిన ఉద్యోగిగా కంపెనీ మిమ్మల్ని గుర్తిస్తే మీరు కెరీర్ లో ఉన్నత శిఖరాలకు చేరుకునేందుకు తొలి అడుగు పడినట్టే.

'ది బెస్ట్' అనిపించుకొండి! 

      కెరీర్ లో ఉన్నతికి కంపెనీ మారాలనుకున్నప్పుడు ప్రస్తుతం పనిచేస్తున్న కంపెనీ యొక్క పాలసీల ప్రకారం నడుచుకోవడం చాలా ముఖ్యం. రాజీనామా చేసేముందు కంపెనీ ఇచ్చిన నోటీస్ పీరియడ్ ను అంగీకరించి, వాళ్ల పాలసీలకు విలువనివ్వడం తప్పనిసరి. కంపెనీని వదిలేటప్పుడు కంపెనీ హెచ్‌ఆర్ నుండి 'లాస్ట్ పే సర్టిఫికేట్', 'సర్వీస్ సర్టిఫికేట్', పీపీఎఫ్ ఖాతా వివరాలు వీటన్నింటితో పాటు 'రిలీవింగ్ లెటర్' ను తీసుకోవాలి. అలాగే ఉద్యోగి ఈ కంపెనీకి ఎటువంటి రుణం లేడని ఒక 'నో అబ్జెక్షన్ సర్టిఫికేట్' కూడా తీసుకోవడం ముఖ్యం. మీరు కంపెనీలో మంచి ఉద్యోగిగా గుర్తింపు తెచ్చుకున్నప్పుడు ఇవన్నీ సదరు కంపెనీ అత్యంత భాధ్యతతో సమకూరుస్తుంది. అలాగే మీ పనితీరుపై , అనుభవంపై వాళ్లు ఇచ్చే 'ఎక్స్‌పీరియన్స్ సర్టిఫికేట్' మీకు చాలా విలువైనది. కంపెనీ పాలసీలు పాటించకుండా వేరే కంపెనీలో అధిక జీతం ఇస్తున్నారు. ఇక ఈ సంస్థకు పనిచేసేదేమిటి? వీళ్లకు చెప్పేదేమిటి? అనుకోవడం మొదటికే మోసం తెస్తుంది. ఇలా ఆలోచిస్తే మీరు కెరీర్ లో నష్టపోతారు. కంపెనీలు కూడా మీ వైఖరిని చాలా నిశితంగా పరిశీలిస్తాయి. మీ వైఖరికి అనుగుణంగానే వాళ్లు కూడా మిమ్మల్ని యూజ్ అండ్ త్రో అభ్యర్ధిగానే పరిగణిస్తారు. 

'రిలీవింగ్ లెటర్' అతిముఖ్యం! 

      కెరీర్ లో 'రిలీవింగ్ ఆర్డర్' కు ఉన్న ప్రాధాన్యత అంతా ఇంతా కాదు. అభ్యర్ధులు ఇక్కడ గమనించాల్సింది ఏంటంటే ఉద్యోగ జీవితంలో 'అప్పాయింట్‌మెంట్ లెటర్' తీసుకోవడం ఎంత ముఖ్యమో..సరైన రీతిలో 'రిలీవింగ్ లెటర్' తీసుకోవడం కూడా అంతే ముఖ్యం. ఎందుకంటే నీ ప్రస్తుత రిలీవింగ్ లెటరే తర్వాత నీకు అప్పాయింట్‌మెంట్ లెటర్ అవుతుంది. ఎందుకంటే వేరే కంపెనీ వాళ్లు మీ రిలీవింగ్ లెటర్ ఆధారంగానే మీకు మళ్లీ అప్పాయింట్‌మెంట్ లెటర్ ఇస్తారు. మీ ప్రవర్తన, వైఖరిపై మీ గత కంపెనీ ఇచ్చే రిలీవింగ్ లెటర్ ముఖ్యమని గుర్తించండి. మంచి నిబద్ధతతో పనిచేసి మీ కంపెనీ విశ్వాసాన్ని చూరగొన్నప్పుడే మీ రిలీవింగ్ లెటర్ మంచి నాణ్యతతో ఉంటుంది. అలా కాకుండా కంపెనీని వదిలేస్తున్నాం, వీళ్ల కోసం సరిగ్గా పనిచేయడమేంటి అని ఆలోచిస్తే మీరే నష్టపోతారు. ప్రస్తుతం కంపెనీలు అధిక వలసల కారణంగా ఉద్యోగి గత కంపెనీలో ఎలా పనిచేసాడు, అతని పని సామర్ధ్యం ఏంటి అన్నదానిపై థర్డ్ పార్టీల ద్వారా తెలుసుకుంటున్నాయి. కాబట్టి ఉద్యోగులు మరింత జాగ్రత్తగా వ్యవహరించాల్సిన అవసరముంది. కంపెనీ పాలసీలకు అనుగుణంగా పనిచేస్తూ, పనిని ప్రేమిస్తే కెరీర్ లో అత్యున్నత స్థాయికి చేరుకోవచ్చు. కాబట్టి అప్పాయింట్‌మెంట్ లెటరే కాదు రిలీవింగ్ లెటర్ పై కూడా దృష్టి సారించండి. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com