ఏ 'డిగ్రీ'కి విలువెక్కువ?
గాలి, నీరు, వెలుతురు అనేవి సార్వజనీనమైన ప్రకృతి ప్రసాదాలు. ప్రతీ ఒక్కరికి ధారాళంగా అందుబాటులో ఉండే సార్వత్రిక గుణం వీటి సొంతం. వీటి స్పూర్తితోనే విద్యను కూడా అందరికీ అందుబాటులోకి తీసుకొచ్చేందుకు సార్వత్రిక విద్యను ప్రవేశపెట్టారు. కుల, మత, వర్గ , స్థాయీ భేధాలు లేకుండా అందరికి విద్యను చేరువ చేసేందుకు మన దేశంలో కూడా సార్వత్రిక విశ్వవిద్యాలయాలు ఆవిర్భవించాయి. 1982 లో ఆంధ్రప్రదేశ్ లో అంబేద్కర్ ఒపెన్ యూనివర్సిటీ ద్వారా మనదేశంలో సార్వత్రిక విద్యకు పునాదులు పడ్డాయి. వివిధ ఇబ్బందుల వలన చదువుకు దూరమవుతున్న వారికి విద్యను దగ్గర చేసేందుకు ఏర్పాటైన దూర విద్య...పర్యవేక్షణ లోపం, అర్ధం లేని అపోహలతో ఇప్పుడు విద్యార్ధులకు దూరమైపోతోంది. దీంతో సార్వత్రిక విశ్వవిద్యాలయాల ఏర్పాటు యొక్క లక్ష్యం దెబ్బతింటోంది.
మ‌నిషి మేధోప‌రంగా, ఆర్థికంగా, వ్య‌క్తిగ‌తంగా అభివృద్ధి సాధించాలంటే విద్య అవసరం. ఇప్ప‌టికీ వ‌ర్ధ‌మాన దేశంగానే మిగిలిపోయిన మన దేశంలో విద్య అనేది కొంద‌రికే అందుబాటులో ఉంటోంది. ఆర్థిక అస‌మాన‌త‌ల‌తో పేద‌వారు విద్యకు దూరంగా ఉండిపోతున్నారు. మ‌రికొంద‌రు చ‌దివేందుకు అవ‌స‌ర‌మైన డ‌బ్బు ఉన్నా స‌మ‌యం చిక్క‌క‌పోవ‌డంతో చదువుకు దూర‌మ‌వుతున్నారు. ఇలా కొంద‌రికి దూరమవుతున్న విద్యను దగ్గర చేసేందుకు ప్ర‌వేశ‌పెట్టిందే దూరవిద్య. పేరులో దూర‌మున్నా విద్యను దగ్గర చేయ‌డంలో ఇప్పుడు ఇది ప్ర‌ధాన పాత్ర పోషిస్తోంది. ఆస‌క్తి, ప‌ట్టుద‌ల ఉంటే ఏం ప‌ని చేస్తున్నా, ఏం స్థాయిలో ఉన్నా దూరవిద్యా విధానంతో జీవితాన్ని మార్చుకోవ‌చ్చు. రానున్న రోజుల్లో మన విద్యావిధానంలో దూర విద్య కీల‌క పాత్ర పోషిస్తుంద‌న్న‌ది విద్యావేత్త‌ల మాట. అయితే లక్ష్యం ఉన్నతమైనది అయినా ఆచరణ అస్తవ్యస్థమైతే పరిస్థితి ఎలా ఉంటుందో ఇప్పుడు డిస్టెన్స్ ఎడ్యుకేషన్ లో కూడా అదే పరిస్థితి దాపురించింది.
దూరవిద్య ద్వారా చ‌దివేందుకు, అర్హ‌త‌లు పెంచుకునేందుకు ప్ర‌స్తుతం ఎన్నో మార్గాలున్నాయి. వీటి ద్వారా చాలా మంది తమ అర్హ‌త‌లు పెంచుకుని అభివృద్ధి సాధిస్తుండ‌గా, మ‌రికొంద‌రు అపోహలతో కాలం గ‌డిపేస్తున్నారు. దూర విద్య ద్వారా డిగ్రీలు చ‌దివితే ఉద్యోగాలు రావ‌న్న‌ది అందులో మొద‌టిది. అయితే ఇది పూర్తి స్థాయి వాస్త‌వం కాదు. అన్ని ప్ర‌భుత్వ ఉద్యోగాల‌కు దూరవిద్య ద్వారా చదివిన డిగ్రీలను అంగీక‌రిస్తున్నారు. అయితే యూజీసీ గుర్తింపు పొందిన యూనివ‌ర్సిటీల్లోనే దూర విద్య ద్వారా చ‌దివిన‌ప్పుడే ఇది సాధ్య‌మ‌వుతుంది. అలా కాకుండా స‌రైన గుర్తింపు లేని కాలేజీల్లో చ‌దివితే ఎటువంటి ప్ర‌యోజ‌నం ఉండ‌దు. యూజీసీ గుర్తింపు పొందిన యూనివ‌ర్సీటీలు అందించే కోర్సులు చదివి సివిల్స్ లో విజ‌యం సాధించిన విద్యార్ధులు కూడా ఉన్నారు. అయితే వీటి వలన ఉప‌యోగం లేద‌ని కేవ‌లం పదోన్నతులు పొంద‌డానికి మాత్రమే దూరవిద్య చదువు ఉప‌యోగ‌ప‌డుతుంద‌న్న ప్రచారం ఉంది. కానీ అది పూర్తిగా అవాస్తవం. దూర విద్య డిగ్రీల ద్వారా ఉద్యోగాలు పొందిన వారు, మంచి స్థాయిల్లో ఉన్న వారు చాలా మంది ఉన్నారు.
దూర విద్యను వ్యాపారంగా మార్చేసారు!
దూరవిద్య అనేది ఇప్పుడు కొందరి అత్యాశ వలన నాణ్యతా ప్రమాణాలను కోల్పోయి అప్రతిష్ట పాలవుతోంది. ముఖ్యంగా కొన్ని ప్రయివేట్ యూనివర్సిటీలకు డిస్టెన్స్ ఎడ్యుకేషన్ అనేది బంగారు గుడ్లు పెట్టే బాతులా తయారైంది. సర్టిఫికేట్లను విచ్చలవిడిగా ముద్రించడం, అక్రమాలకు పాల్పడటం, నాణ్యతకు పాతరేసి సర్టిఫికేట్లను అమ్మకానికి పెట్టడం. దీంతో పాటు మరో అడుగు ముందుకు వేసి వన్ సిట్టింగ్ డిగ్రీలు, హాఫ్ సిట్టింగ్ డిగ్రీలు పెట్టారు. వన్ సిట్టింగ్ డిగ్రీ అంటే 3 సంవత్సరాల వెనక్కి వెళ్లి విద్యార్ధికి అడ్మిషన్ ను క్రియేట్ చేయడం, విద్యా వ్యవస్థలో లొసుగులను ఆసరాగా తీసుకుని వీళ్లు ఇలాంటి అక్రమాలకు పాల్పడుతున్నారు., ఒక ఏడాది పరీక్ష రాయకపోయినా అన్ని పరీక్షలు ఒకేసారి రాసేలా చేస్తున్నారు. దీంట్లో మొదట్లో కంటిన్యూస్ ఎడ్యుకేషన్ అనే వారు. కంటిన్యూస్ ఎడ్యుకేషన్ అనేది పోయింది. వన్ సిట్టింగ్ డిగ్రీ వచ్చింది. వన్ సిట్టింగ్ డిగ్రీలు చెల్లవని యూజీసీ చెప్పిన తర్వాత మూడేళ్ల వెనక్కు వెళ్లి వాళ్లతో అడ్మిషన్ చేయించినట్టు చూపించి వాళ్లతో పరీక్షలు రాయిస్తున్నారు. దీని వల్ల దూర విద్య విద్యార్దులకు దూరమైపోతోంది. మరోవైపు దూరవిద్య అనగానే విచ్చలవిడి మాస్ కాపీయింగ్ లకు తెరలేపి అవేవో చూచిరాత పరీక్షలుగా కూడా మార్చేశాయి కొన్ని యూనివర్సిటీలు.
వాస్తవంగా చెప్పాలంటే రెగ్యులర్ డిగ్రీల కంటే దూరవిద్య డిగ్రీలకే అధిక ప్రాధాన్యతనివ్వాలి. రెగ్యూలర్ గా డిగ్రీ చదివే విద్యార్ధి మూడు సంవత్సరాలకు కలిపి 18 సబ్జెక్టులు చదివి పరీక్షలు రాస్తే... డిస్టెన్స్ ఎడ్యుకేషన్ లో చదివిన విద్యార్ధి 20కి పైగా సబ్జెక్ట్ లు చదువుతాడు. దీంతో పాటు తరగతి గది, సదుపాయాలు, అధ్యాపకుడు ఇలా ఏమి లేకున్నా తన సొంత తెలివితేటలు ఉపయోగించి, చదివి, రాసి పాసవుతాడు. ఏదైనా ఒక రంగంలో ఉన్నత స్థితికి చేరిన వ్యక్తికి మన యూనివర్సిటీలు గౌరవ డాక్టరేట్లు ప్రధానం చేస్తున్నాయి. సదరు తన రంగంలో అద్భతమైన ప్రతిభ చూపి, పరిశోధన చేసి పీహెచ్ డీ చేసిన వ్యక్తితో సమానమైన తెలివితేటలు కలిగి ఉన్నాడని నిర్ణయిస్తున్నారు. అలా ప్రధానం చేసిన డాక్టరేట్ ఎంత విలువ ఉంది. అలానే సొంత తెలివితేటలతో దూరవిద్య ద్వారా చదువుకునే విద్యార్ధిని కూడా అదే విధంగా గౌరవించాలి. దూరవిద్యా విధానంలో సిలబస్ లు, రూపొందించే పరీక్షలు రెగ్యులర్ డిగ్రీల కంటే చాలా ఉన్నతమైన స్థితిలో ఉంటాయి. అలాంటి నాణ్యమైన సిలబస్ చదివిన వాడు సబ్జెక్ట్ పరంగా ఎప్పుడూ ఉన్నతంగానే ఉంటాడు. ఈ విషయాన్ని అందరూ గుర్తించాలి.
దూర విద్యకు దూరం జరగొద్దు
దూర విద్యలో చదివే విద్యార్ధులు విద్యకు దూరం కాలేదు. పాఠశాలకు దూరమయ్యారు. కళాశాలకు దూరమయ్యారు. విశ్వవిద్యాలయాలకు దూరమయ్యారు. వాళ్లు విద్యకు తమ స్థితికి మధ్య ఉన్న అంతరాన్ని తొలిగించుకునేందుకు డిగ్రీలను చదువుతున్నారు., ఈ డిగ్రీలను రెగ్యులర్ డిగ్రీలతో సమానంగా చూడాల్సిన అవసరం సంస్థలకు ఉంది. యూజీసీ ఏనాడు కూడా దూరవిద్యలో చదివిన డిగ్రీలు చెల్లుబాటు కావని, దూరవిద్యలో చదివిన వారికి ఉద్యోగాలు ఇవ్వొద్దని ఎన్నడూ చెప్పలేదు. ఈ అపొహను తొలిగించాలంటే దూరవిద్యా విధానం మీద పట్టు బాగా బిగించాలి. దూర విద్యలో ప్రమాణాలు పెంచేందుకు డిస్టెన్స్ ఎడ్యుకేషన్ కౌన్సిల్ మరిన్ని చర్యలు చేపడితే విద్య అందరికీ అందుబాటులోకి వస్తుంది. దూర విద్యలో చదివి కలెక్టర్లు అయిన వారు ఉన్నారు. పెద్ద పెద్ద కంపెనీల్లో ఉన్న స్థానాల్లో ఉన్నవారు ఉన్నారు. సంస్థలను నడుపుతున్న వ్యాపారవేత్తలు ఉన్నారు. చదువు దూరమైందని బాధపడకుండా దూర విద్య ద్వారా వీరు తమ కలలను సాకారం చేసుకున్నారు. ఇవాళ అందరూ దూరవిద్యను అందరూ తక్కువగా చూస్తున్నారు. అలా చూడకూడదు. ఆన్ లైన్ ఎడ్యుకేషన్ వచ్చింది. ఆన్ లైన్ డిగ్రీలు వచ్చాయి. డిస్టెన్స్ డిగ్రీలు చేస్తే ఉద్యోగాల్లో పదోన్నతులు కల్పిస్తామని చెప్పే సంస్థలున్నాయి. ఇప్పుడు ఐఐటీ, ఐఎస్ బీలలో కూడా ఎక్కడో దూరం నుంచే డిజిటల్ పద్ధతుల్లో పాఠాలను భోధిస్తున్నారు. అదే స్ఫూర్తితో దూర విద్యకు కూడా ప్రభుత్వాలు అధిక ప్రాధాన్యతను కల్పించాలి. విద్యను పేదవారికి, అట్టడుగు వర్గాలకు, అసంఘటిక కార్మికులకు ఎంత దగ్గర చేస్తే దేశం అంత త్వరగా అభివృద్ధి సాధిస్తుంది. అప్పుడు మాత్రమే గాలి, నీరు, వెలుతురు లా విద్య కూడా సార్వజనీనమైన నిజమైన 'సార్వత్రికం'కు అర్ధంలా మారుతుంది.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
ఈ ఫీచ‌ర్ పై గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.
97006 09135
Comments
Post a Comment