వాళ్లిద్దరి బంధాన్ని విడదీయడం సాధ్యం కాదు..!

   టెక్నాలజీ కొత్త పుంతలు తొక్కుతొంది. సూది తయారీ నుంచి రాకెట్ ప్రయోగాల వరకూ ప్రతీ విషయంలోనూ కొత్త సాంకేతిక పరిజ్జానం తన పరిధిని పెంచుకుంటూ పోతోంది. అయితే ఈ పరిణామం అపరిమిత ప్రయోజనాలతో పాటు కొన్ని ఇబ్బందులను కూడా తెచ్చిపెడుతోంది. ముఖ్యంగా సంప్రదాయ విధానానికి, టెక్నాలజీ వినియోగానికి మధ్య ఉన్న సన్నని గీత కొన్ని రంగాల్లో పెను ప్రమాదాన్ని తీసుకొస్తోంది. ముఖ్యంగా విద్యారంగంలో టెక్నాలజీ పరిధి పెరిగిపోయి టీచర్ పరిధి తగ్గిపోవడం పట్ల ఆందోళన వ్యక్తమవుతోంది. ఎంత సాంకేతికత పెరిగినా కొన్ని సంబంధాల్లో ఎలాగైతే ప్రకృతి ధర్మానికి విరుద్ధంగా ప్రవర్తించలేమో..అలానే స్టూడెంట్ , టీచర్ కు మధ్య సంబంధాన్ని మరే ఇతర టెక్నాలజీ కానీ పద్ధతి కానీ ఎట్టి పరిస్థితుల్లోనూ భర్తీ చేయలేవు. ప్రస్తుతం వస్తున్న కొత్త సాంకేతి పద్ధతులు భోధనను సులువు చేస్తాయి కానీ టీచర్ స్థానాన్ని భర్తీ చేస్తాయని ఊహించడం అసంబద్ధంగా ఉంటుంది. 

టెక్నాలజీ.. టీచర్ కు ప్రత్యామ్నాయం కాబోదు!

   ప్రపంచంలోని ఏ విద్యా విధానంలో అయినా టీచర్ కు విద్యార్ధికి మధ్య ఒక అవినాభావ సంబంధం ఉంటుంది. మన భారతీయ సంస్కృతిలో గురు శిష్య సంబంధానికి ఉన్న ప్రాముఖ్యత తెలిసిందే. ఆ ఇరువురి మధ్య ఉన్న ఆ సంబంధాన్ని అనుసరించే విద్యార్ధి విద్యను నేర్చుకుంటాడు. ఇప్పుడు కొత్తగా వస్తున్న సాంకేతిక పరిణామం టీచర్ కు విద్యార్ధికి ఉన్న సంబంధాన్ని తెంచే విధంగా తయారవుతోంది. సాంకేతికత టీచింగ్ ఎయిడ్ అవుతుంది కానీ టీచర్ కు ప్రత్యామ్నాయం కాదు. టీచింగ్ ఎయిడ్ అనేది చాక్ పీస్ కావొచ్చు , బ్లాక్ బోర్డు కావొచ్చు. ఇంకా క్లాస్ రూమ్ సబ్జెక్ట్ కావొచ్చు. ఇప్పుడు కొత్తగా బ్లాక్ బోర్డు స్థానంలో డిజిటల్ బోర్డులు వచ్చాయి. చాక్ పీస్ ల స్థానంలో డిజిటల్ పెన్ లు వచ్చాయి. డిజిటల్ క్లాస్ రూమ్ లు రంగ ప్రవేశం చేశాయి. ముందుగానే కంటెంట్ ను రెడీ చేసి డిజిటల్ క్లాస్ రూమ్ లో విద్యార్ధికి మరింత సులువుగా అర్ధం అయ్యేలా తయారు చేస్తున్నారు. ఈ పరిణామం మంచిదే. కానీ టీచర్ లేకుండానే లేదంటే టీచర్ స్థానాన్ని పరిమితం చేసో ఈ టెక్నాలజీతో విద్యా భోధన చేస్తామంటే మొదటికే మోసం వచ్చే ప్రమాదం ఉంది.  విద్యార్ధి టీచర్ సమక్షంలో మాత్రమే విద్యను గ్రహించగలడు. ఇది కూడా ఒక ప్రకృతి ధర్మమే. దీనికి విరుద్ధంగా ప్రవర్తించడం సరికాదు. డిజిటల్ కంటెంట్ భోధనను సులువు చేస్తుంది తప్పించి విద్యా భోధన చేయలేదు. అందులోని అసలు సారాన్ని ప్రత్యక్షంగా టీచర్ చెపితేనే విద్యార్ది అర్ధం చేసుకోగలుగుతాడు. 

ఉపాధ్యాయుని స్థానం ఉన్నతమైనది

    మనం ఎంత ఉన్నతంగా ఎదిగినా, ఎంత అభివృద్ధి సాధించినా తల్లిదండ్రులకే గౌరవంతో నమస్కారం చేస్తాం. తాజాగా రోదసీలోకి 104 ఉపగ్రహాలను పంపే ముందు షార్ డైరెక్టర్ రాధాకృష్ణ తిరుమలలో దేవునికి మొక్కు చెల్లించుకున్నాడు. అతను నమ్మకంతో భగవంతుడికే నమస్కారం చేసాడు కానీ తన ల్యాబ్ లోని సాంకేతికతకు నమస్కారం చేయలేదు. ఎందుకంటే సంస్కృతిలో కొన్ని స్థానాలను ఎవరూ భర్తీ చేయలేరు. టెక్నాలజీ ఎంత అభివృద్ధి చెందినా భగవంతుని స్థానం భగవంతునిదే. మనం తల్లిదండ్రులకు, దేవునికి ఎటువంటి స్థానం ఇస్తున్నామో ఉపాధ్యాయునిది కూడా అటువంటి ఉన్నతమైన స్థానమే. మన భారతీయ సంస్కృతిలో చెప్పినట్టు గురు బ్రహ్మ, గురు విష్ణు, గురు సాక్షాత్ మహేశ్వర‌‌...గురువుకు త్రిమూర్తులతో సమానం. రోజువారీ జీవనంలో గురువుకు ఉన్నతమైన స్థానాన్ని ఇవ్వాలి. వారిని గౌరవంగా చూసుకోలేదంటే మనం ప్రకృతి ధర్మాలకు, మన సంప్రదాయాలకు విరుద్ధంగా ప్రవర్తిస్తున్నట్టే.

ఎక్కువ ఫీజులు కడితే ఎక్కువ చదువు వస్తుందా? 

    ప్రస్తుతం మన విద్యా వ్యవస్థలో ఏం జరుగుతోంది? డబ్బులు ఉంటేనే విద్య అందుబాటులోకి వస్తోంది. ఎంత ఎక్కువ ఖర్చు పెడితే పిల్లవానికి అంత ఎక్కువ చదువు వస్తుంది అన్న స్థాయికి మనల్ని తీసుకెళ్లిపోయారు. ఈ దుస్థితి దాపురించడానికి తల్లిదండ్రుల వైఖరి కూడా ముఖ్య కారణం. ఎక్కువ డబ్బులు ఖర్చు పెడితేనో లేక ఖరీదైన స్కూల్ చదివితేనో పిల్లలు మంచి విద్యార్ధులుగా తయారుకారు. మన దేశంలో చాలామంది రాజకీయ నాయకులు, విద్యావేత్తలు, శాస్త్రవేత్తలు ప్రభుత్వ పాఠశాలల్లోనే చదువుకుని ఉన్నతమైన స్థానాలకు చేరుకున్నారు. డిజిటల్ కంటెంట్ ఉన్న ఖరీదైన స్కూళ్లలో వాళ్లు చదువుకోలేదు కదా? మరి అంత ఉన్నత స్థితికి ఎలా చేరుకున్నారు. దానికి కారణం టీచర్. కంటెంట్ అనేది ఎప్పటికీ టీచర్ స్థానాన్ని భర్తీ చేయలేదు. ఇది కేవలం ఒక టీచింగ్ ఎయిడ్ మాత్రమే. టీచింగ్ ఎయిడ్ గా ఉండాల్సిన ఇలాంటి టెక్నాలజీ పరికరాలు ఇప్పుడు విద్యావ్యవస్థను తినేసే చెదపురుగుల్లా తయారవుతున్నాయి. ఎంత ఉపయోగకరమైనప్పటికీ కృత్రిమతకు కొన్ని పరిమితులు విధించకపోతే జరిగే పరిణామాలకు టీచింగ్ ఎయిడ్స్ ఒక ప్రత్యక్ష ఉదాహరణగా నిలుస్తున్నాయి.  

డిజిటల్ ఎడ్యుకేషన్ కు పరిమితులు పెట్టాల్సిందే!

    ఎంత సాంకేతికత పెరిగినా పుస్తకాలు, వార్తాపత్రికలు ఇంకా మనుగడ సాగిస్తున్నాయంటే అర్ధమేంటి? పుస్తకం చేతితో పట్టుకుని చదువుతున్నప్పుడే కలిగే అనుభూతిని డిజిటల్ బుక్ భర్తీ చేయలేదు. అలాగే తరగతి గదిలో విద్యార్ధికి ప్రత్యక్షంగా భోధించే టీచర్ కు డిజిటల్ కంటెంట్ ప్రత్యామ్నాయం కాదు. ఇది ఎప్పటికీ మారని సత్యం. ప్రస్తుతం చాలామంది టీచర్లు , టీచింగ్ ను వృత్తిగా స్వీకరిస్తున్నారు. అది సరైన పద్ధతి కాదు. టీచింగ్ అనేది చాలా భాధ్యతతో కూడిన కెరీర్.  అత్యంత ఆసక్తితో, అభిలాషతో చేయాల్సిన పని. టెక్ట్స్ బుక్స్ ను వల్లె వేసే విధంగా కాకుండా భోధనతో విద్యార్ధి భవిష్యత్ ను తీర్చిదిద్దాలి. విద్యార్ధికి టీచర్ కు మధ్య నిలిచి ఉండే అవినాభావ సంబంధానికి టెక్నాలజీ ఊతంగా ఉండాలి కానీ  ఆ సంబంధాన్ని తెంచేదిగా ఉండకూడదు. ప్రస్తుతం నడుస్తున్న వ్యవస్థను డిజిటల్ ఎడ్యుకేషన్ అనేకంటే టెక్నాలజీ ఎనేబుల్డ్ ఎడ్యుకేషన్ అంటే బాగుంటుంది. టెక్నాలజీ సర్వీసెస్ ను వినియోగించుకుంటున్న ఎడ్యుకేషన్ గా పరిగణించాలి. టెక్నాలజీని వినియోగించుకుని టీచర్ విద్యార్ధికి మరింత చేరువయ్యే విధంగా వ్యవస్థను రూపొందించాలి. అప్పుడే మన విద్యా వ్యవస్థ మూలాలను నాశనం చేసుకోకుండా సరైన దిశలో సాగుతుంది.  

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com