వృత్తే విద్యగా ఉండాలి..కానీ..!

    మ‌న దేశ విద్యా వ్య‌వ‌స్థ‌లో ఏకైక లోపం మ‌న అవ‌సరాల‌కు త‌గ్గ‌ట్టు వృత్తి నిపుణుల‌ను త‌యారు చేసుకోలేక‌పోవ‌డం. ప్ర‌తీ ఏడాది ల‌క్ష‌ల సంఖ్య‌లో గ్రాడ్యుయేట్లు బ‌య‌ట‌కు వ‌స్తున్నా అందులో 90 శాతం మందికి కూడా స‌రైన వృత్తి నైపుణ్యాలు లేవ‌ని స‌ర్వే సంస్థ‌లు ఎప్పుడో స్ప‌ష్టం చేశాయి. అస‌లు లోపం ఎక్క‌డుంది. స్వాతంత్రం వ‌చ్చి ఇన్నేళ్లు అవుతున్నా ఇప్ప‌టికీ మ‌నకు పూర్తి స్థాయిలో నిపుణులు లేరంటే ఏమ‌నుకోవాలి? ఈ దుస్థికి కార‌ణాలేంటి? ఎవ‌రిని నిందించాలన్న ప్ర‌శ్న తలెత్తిన‌ప్పుడు ప్ర‌భుత్వాల‌తో పాటు మ‌న విద్యా వ్య‌వ‌స్థ‌ను కూడా వేలెత్తి చూపించాల్సి ఉంటుంది. ఎప్పుడో బ్రిటిష్ పాల‌న‌లో వారి అవ‌స‌రాల‌కు త‌గ్గ‌ట్టు లార్డ్  మెకాలే రూపొందించిన విద్యా విధానాన్నే ఇప్ప‌టికీ మ‌న ప్ర‌భుత్వాలు అమ‌లు చేస్తున్నాయి. వృత్తిలోనే విద్య నేర్చుకోవ‌డాన్నే వృత్తి విద్య అంటారు. అంతే కానీ విద్యలోకి వృత్తిని ప్ర‌వేశ‌పెడితే అనుకున్న ఫ‌లితాలు రావు. ప్ర‌స్తుతం మ‌నకు నాణ్య‌మైన వృత్తి నిపుణులు దొర‌క్క‌పోవ‌డానికి ఇదే ప్ర‌ధాన కార‌ణం. గ‌తంలో మ‌న దేశంలో గురుకుల వ్య‌వ‌స్థ ఉన్న‌ప్పుడు విద్యార్ధుల‌కు వృత్తినే నేర్పిస్తూ అందులోనే విద్య‌ను భాగంగా చేసేవారు. అందుకే ఆయా రంగాల‌కు ఎప్పుడూ నిపుణుల కొర‌త ఉండేది కాదు. మ‌న ప్రాచీన పద్ధతుల‌ను విడ‌నాడి బ్రిటిష్ విద్యా విధానాన్ని ఎప్ప‌టి నుంచి ప‌ట్టుకు వేళాడ‌టం మొద‌లు పెట్టామో అప్ప‌టి నుండే మ‌న‌కు స‌మ‌స్య‌లు మొద‌లయ్యాయి.  

శాంతినికేత‌న్ మ‌న‌కు ఆద‌ర్శం కావాలి 

    ర‌వీంద్ర నాధ్ ఠాగూర్ క‌ల‌ల కొవెల శాంతినికేత‌న్ లో మ‌న ప్రాచీన విద్యా విధానాన్నే అమ‌లు చేసారు. ఒక విధంగా చెప్పాలంటే శాంతినికేత‌న్ లో అన్నీ వృత్తి విద్య‌లే. అక్క‌డ విద్యార్ధులు అన్ని విష‌యాల‌ను అనుభ‌వ పూర్వ‌కంగానే తెలుసుకుంటారు. భ‌వ‌న నిర్మాణ రంగంలోకి వెళ్లాలి అనుకునే వారు ప్ర‌తీ రోజూ శాంతినికేత‌న్ లో ఇల్లు క‌డుతూనే ఉంటారు. గోడ‌ల‌కు, గుమ్మాల‌కు మ‌ధ్య గ‌తిని అంచ‌నా వేస్తారు. మెకానిక్ కావాల‌నుకునే విద్యార్థి ప్ర‌తీ రోజూ కార్ల ఇంజిన్ల‌ను బిగిస్తాడు, విప్ప‌దీస్తాడు. అలా తాము ఎంచుకున్న వృత్తిని నేర్చుకుంటూనే విద్యార్ధులు విద్య కూడా నేర్చుకుంటారు. మ‌న ఆధునిక విద్యా విధానంలో  పాత ప‌ద్ధ‌తిని విడ‌నాడి  విద్య‌లోకి వృత్తిని ప్ర‌వేశ‌పెట్టారు. ఇక ఏ విధంగా విద్యార్ధి వృత్తి విద్య‌ను నేర్చుకోగ‌లుగుతాడు. ఈ విఫ‌ల ప్ర‌యోగ‌మే గ‌డిచిన కొన్నేళ్లుగా మ‌న విద్యా వ్య‌వ‌స్థ‌లో పాతుకు పోవ‌డం శాపంగా మారింది. ఫ‌లితంగా మ‌న వృత్తి విద్యా విధానం నాణ్య‌మైన నిపుణుల‌ను అందించ‌లేక‌పోతోంది. 

 అర‌కొర చ‌ర్య‌లు స‌త్ఫ‌లితాల‌నివ్వ‌వు! 

     స్కిల్ ఇండియా కార్యక్ర‌మ ఆలోచ‌న‌ల‌కు అనుగుణంగా ఇప్ప‌టికే కొన్ని రాష్ట్రాల్లోని పాఠ‌శాల‌ల్లో ఈ ప్ర‌యోగాత్మ‌క విద్య‌ను అమ‌లు చేస్తున్నారు. తెలంగాణాలోనూ ఇటువంటి ప్ర‌యోగాత్మ‌క కార్య‌క్ర‌మ‌మే ఒకటి చేపట్టారు. రాష్ట్రంలో దాదాపు 20 మోడ‌ల్ స్కూళ్ల‌లో కొన్ని వృత్తి విద్యా కోర్సుల‌ను ప్రారంభించారు. 9,10 వ త‌రుగతుల్లోనే  విద్యార్ధుల‌కు  వారు ఎంచుకున్న అంశాల్లో వృత్తి విద్య‌ను నేర్పిస్తారు. ఇప్ప‌టివ‌ర‌కూ 10 వ త‌ర‌గ‌తి పూర్త‌య్యాక కానీ వృత్తి విద్య‌ను అందించే వారు కాదు. కానీ ఇప్పుడు నేరుగా స్కూల్ స్థాయిలోనే వీటిని ప్ర‌వేశ‌పెట్టారు.  9, 10 త‌రగతుల్లో వృత్తి విద్య‌ను ఎంచుకున్న విద్యార్ధుల‌కు ఇంట‌ర్ లోనూ వాటిని కొన‌సాగించేందుకు అవ‌స‌ర‌మైన చ‌ర్య‌లు తీసుకుంటున్నారు. ప్ర‌స్తుతం తెలంగాణా రాష్ట్రంలో 20 మోడ‌ల్ స్కూళ్ల‌లో అమ‌ల‌వుతున్న వృత్తి విద్యా కోర్సుల‌ను మ‌రో 100 మోడ‌ల్ స్కూళ్ల‌లో కూడా ప్ర‌వేశ‌పెట్టేందుకు తెలంగాణా విద్యా శాఖ రెడీ అవుతోంది. ముందుగా ప్ర‌వేశ‌పెట్టిన 20 స్కూళ్ల‌లో అనుకున్న ఫ‌లితాలు రావ‌డంతో ఈ ప్ర‌ణాళిక‌ను మ‌రో 100 మోడ‌ల్ స్కూళ్ల‌లో ప్ర‌వేశ‌పెడ‌తామ‌ని విద్యా శాఖ చెపుతోంది. స్కూల్ స్థాయిలోనే విద్యార్ధుల‌కు వృత్తి విద్యా నైపుణ్యాల‌ను నేర్పించ‌డం వ‌ల‌న భ‌విష్య‌త్ లో వారు స్వ‌యం ఉపాధి పొందేందుకు అవ‌కాశం ఏర్ప‌డుతుంద‌ని అధికారులు అంటున్నారు. అయితే విద్య‌లోకి వృత్తిని ప్ర‌వేశ‌పెట్టినంత కాలం స‌రైన ఫ‌లితాల‌ను ఆశించ‌డం అత్యాశే అవుతుంది. 

వృత్తి విద్య పూర్వ వైభవం సాధించాలంటే ఏం చేయాలి? 

   మ‌న దేశ విద్యా విధానంలో బూజు ప‌ట్టిన మెకాలే మోడ‌ల్ ను ఇప్ప‌టికీ అమ‌లు చేయ‌డం అతిపెద్ద లోపంగా మారింది. ఆ మోడ‌ల్ విద్యలో పాత్ర‌దారులు మాత్ర‌మే త‌యార‌వుతారు. ఇందులో సూత్ర‌దారులు ఎప్ప‌టికీ త‌యారు కారు. వృత్తి విద్యను స్కూళ్ల‌లోనూ, కాలేజీల్లోనూ, యూనివ‌ర్సీటీల్లో ప్ర‌వేశపెడితే ఫ‌లితాలు వ‌చ్చేయ‌వ‌న్న విష‌యాన్ని గుర్తించాలి. ఇందులో స్కిల్ లేని నేలబారు స్టూడెంట్స్ త‌యార‌వుతారు త‌ప్ప పూర్తి స్థాయిలో నైపుణ్యం సాధించిన విద్యార్ధులు ఎప్ప‌టికీ బ‌య‌ట‌కు రారు. కొన్ని స‌రికొత్త ఆలోచ‌న‌లు, విప్ల‌వాత్మ‌క చ‌ర్య‌లు తీసుకున్న‌ప్పుడే మ‌న‌కు అస‌లైన నైపుణ్యం ఉన్న నిపుణులు త‌యార‌వుతారు. వైద్య విద్య‌ను వైద్య క‌ళాశాల‌ల్లో చ‌దువుకోవ‌డం వ‌ల‌న అక్క‌డి రోగుల‌ను, ప‌రిస్థితుల‌ను అవ‌గాహ‌న చేసుకోవ‌డం వ‌ల‌న వైద్యులు ఎలా అయితే వృత్తిలో భాగంగా విద్య‌ను నేర్చుకుంటున్నారో అదే విధానాన్ని మిగ‌తా వాటిలోనూ ప్ర‌వేశ‌పెట్టాలి. హోట‌ల్ మేనేజ్ మెంట్ కాలేజీలు నెల‌కొల్పే అవ‌కాశం హోట‌ల్స్ కు ఇవ్వాలి. దీని వ‌లన‌ విద్యార్ధులు హోటల్ ప‌నిచేస్తూనే వారి నైపుణ్యాల‌ను మెరుగుప‌ర్చుకుంటారు. అదే విధంగా వెట‌ర్న‌రీ కాలేజీల‌ను జంతు ప్ర‌ద‌ర్శ‌న శాల‌ల్లో ఏర్పాటు చేయాలి. రోజువారీ విభిన్న జంతువుల‌కు చికిత్స చేయ‌డం వ‌ల‌న నాణ్య‌మైన వెట‌ర్న‌రీ డాక్ట‌ర్లు త‌యార‌వుతారు. భావి భార‌త ఇంజినీర్ల‌ను కాలేజీల్లో కాకుండా ఇంజినీరింగ్ ఇండ‌స్ట్రీస్ లో త‌యారు చేయాలి. ప‌రిశ్ర‌మ‌ల‌ను ఆయా కోర్సుల‌కు అనుసంధానం చేయాలి. పొలిటిక‌ల్ సైన్స్ చ‌దివే విద్యార్ధులు రాజ‌కీయ పార్టీల కార్యాల‌యంలో ప‌నిచేస్తూ చ‌దువుకుంటే ఫ‌లితాలు అద్భుతంగా ఉంటాయి. అదే విధంగా పోస్టాఫీస్ శాఖ‌ల్లో లాజిస్టిక్ కోర్సుల‌ను ప్ర‌వేశ‌పెట్ట‌డం వ‌ల‌ను విద్యార్ధులు లాజిస్టిక్ విష‌యాల‌ను ప‌రిశీలిస్తూ తెలుసుకునే వెసులుబాటు క‌లుగుతుంది. కార్ల కంపెనీల్లో ఆటోమొబైల్ కోర్సులు ప్ర‌వేశ‌పెట్ట‌డం వ‌ల‌న నాణ్య‌మైన ఆటోమొబైల్ ఇంజినీర్లు త‌యార‌వుతారు. రానున్న రోజుల్లో హోట‌ల్స్ లో బీహెచ్ ఎమ్ సీటీ, న్యూస్ పేప‌ర్ లో బీసీజే , సివిల్ ఇంజినీరింగ్ కంపెన‌ల్లో బీటెక్ సివిల్స్, స్కూల్స్ లో బీఈడీ, డీఈడీలు అదే విధంగా కాలేజీల్లో బీపీఈడీ, డీపీఈడీ, ఉద్యాన‌వ‌నాల్లో బీఎస్ ఈ హార్టిక‌ల్చ‌ర్, అడ‌వుల్లో బీఎస్ ఈ ఫారెస్ట్ వంటి వినూత్న కోర్సుల‌ను ప్ర‌వేశ‌పెడితే మ‌న విద్యా రంగంలో విప్ల‌వాత్మ‌క మార్పులు చోటుచేసుకుంటాయ‌న‌డంలో సందేహం లేదు.  మౌలిక వ‌స‌తులు కంపెనీలే సొంతంగా సివిల్ ఇంజినీరింగ్ కోర్సుల‌ను నిర్వ‌హించుకునే వీలు క‌ల్పించాలి. దీని వ‌ల‌న నాణ్య‌మైన సివిల్ ఇంజినీర్లు త‌యార‌వుతార‌న‌డంలో సందేహ‌మే లేదు. అన్ని రిటైల్ మాల్స్ లోనూ రిటైల్ మేనేజ్ మెంట్ కోర్సుల‌ను ప్ర‌వేశ‌పెట్ట‌డం వ‌ల‌న ఆశించిన ఫ‌లితాలు సాకార‌మ‌వుతాయి.

వృత్తిలోనే విద్య 

  వృత్తి విద్యా కోర్సుల్లో వృత్తి మిధ్య‌గా ఉంటోంది. ఇప్పుడు మ‌న‌కు కావాల్సింది వృత్తినే విద్య‌గా మ‌ల‌చ‌గ‌ల శిక్ష‌ణాల‌యాలు, శిక్ష‌కులు, పాల‌కులు..అంతేకానీ మోడ‌ల్ స్కూళ్ల‌లోనో, పాఠ‌శాల‌ల స్థాయిలోనో వృత్తి విద్య‌ను ప్ర‌వేశ‌పెడితే అనుకున్న ప్ర‌యోజ‌నాలు చేకూర‌వు. మ‌నం చ‌ర్చించుకున్న  ఇలాంటి ప్ర‌యోగాత్మ‌క విధానాన్ని మ‌న ప్ర‌భుత్వం అమ‌లు చేస్తే విద్యార్ధి కోర్సు పూర్తి చేసుకుని బ‌య‌ట‌కు వ‌చ్చేట‌ప్ప‌టికీ అస‌లు సిస‌లైన వృత్తి నిపుణుడిగా త‌యార‌వుతాడు. ఎందుకంటే అత‌ను వృత్తిలోనే విద్య‌ను నేర్చుకున్నాడు. అత‌నికి వృత్తే విద్య అవుతుంది. ఇలా జ‌రిగితేనే మ‌న దేశానికి వృత్తి నిపుణులు కొర‌త ఉండ‌దు. అలాగే నాణ్య‌మైన నిపుణులు అందుబాటులో ఉంటారు. లేకుంటే ఎప్ప‌టిలానే ఎన్ని ఇంజినీరింగ్ కాలేజీలు నెల‌కొల్పినా, స్కూళ్ల‌లో, కాలేజీల్లో, పాఠ‌శాల‌లో వృత్తి విద్యా కోర్సుల‌ను ప్ర‌వేశ‌పెట్టినా ఆశించిన ఫ‌లితాలు ఒన‌గూరే అవకాశం లేదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com