పిల్ల‌ల ప‌రీక్ష‌ల‌కు త‌ల్లిదండ్రులే స‌మాధానాలు!

    విద్యా సంవ‌త్స‌రం ముగిసింది. సంవ‌త్స‌ర‌మంతా చ‌దివిన చ‌దువుకు ఇప్పుడు క‌ఠిన ప‌రీక్ష ఎదురు కాబోతుంది. ఈ ప‌రీక్ష‌ల ర‌ణ‌రంగంలో విజేత‌లెవ‌రో, ప‌రాజితులెవ‌రో కొద్ది రోజుల్లో తేలిపోనుంది. ర‌ణ‌రంగంలో ప్ర‌త్య‌క్షంగా యుద్ధం చేసే విద్యార్ధులపై ఒత్తిడి అంతా ఇంతా కాదు. అయితే వీరితో పాటు వాస్త‌వంగా చెప్పాలంటే వారి కంటే ఎక్కువ టెన్ష‌న్ ప‌డేది. ఒత్తిడికి గుర‌య్యేది విద్యార్ధుల త‌ల్లిదండ్రులు. విద్యా సంవ‌త్స‌రం ముగిసి స‌మ‌యంలో విద్యార్ధుల‌కు ఒత్తిడి ఉంటే, విద్యా సంవ‌త్స‌రం ప్రారంభంలో తల్లిదండ్రులకు అస‌లైన ప‌రీక్ష మొద‌ల‌వుతుంది. త‌మ పిల్ల‌వాడ్ని ఏ స్కూల్ లో జాయిన్ చేయాలి, ఏ గ్రూప్ లో చేర్చాలి. టెక్ట్స్ బుక్ , నోట్ బుక్స్ అంటూ పేరెంట్స్ తీవ్ర ఒత్తిడికి గుర‌వుతున్నారు. 

ప్లానింగ్ లేక‌పోవ‌డం వ‌ల్ల‌నే ఒత్తిడి 

    త‌మ పిల్ల‌ల‌ను ఏ స్కూల్ లో జాయిన్ చేయాలి, ఏయే స‌బ్జెక్ట్స్ ను ఎంచుకోవాలి అన్న‌విష‌యాన్ని చాలా మంది త‌ల్లిదండ్రులు విద్యా సంవ‌త్స‌రం ముగిసాకే ఆలోచిస్తున్నారు. దీంతో విద్యా సంవ‌త్స‌రం ప్రారంభం కాగానే స‌రైన నిర్ణ‌యం తీసుకోలేక ఒత్తిడికి గుర‌వుతున్నారు. ఇది ఒక రకంగా పిల్ల‌ల‌పై కూడా ఒత్తిడిని పెంచుతోంది. అలా కాకుండా ప్రారంభం  నుంచే ఒక ప్ర‌ణాళికతో ముందుకు వెళ్తే విద్యా సంవ‌త్స‌రం ప్రారంభంలో గాబ‌రా నిర్ణ‌యాలు తీసుకునే త‌ప్పులు నుంచి బ‌య‌ట‌ప‌డే అవ‌కాశాలున్నాయి. దీనికి తోడు పిల్ల‌ల‌ను ఎంత‌సేపూ చ‌దువు చ‌దువు అంటూ వెంట‌ప‌డ‌టం వ‌ల‌న పిల్ల‌ల‌తో పాటు త‌ల్లిదండ్రులు కూడా ఒత్తిని అనుభ‌విస్తున్నారు. ఇది స‌రైన ప‌ద్ధ‌తి కాద‌ని నిపుణులు హెచ్చ‌రిస్తున్నారు. 

క‌ష్ట‌ప‌డి చ‌దువు అని చెప్పొద్దు!

    మ‌న విద్యా విధానంలో ఒక ప్ర‌ధాన‌మైన లోపం ఉంది. అది ఏంటి అంటే అటు స్కూల్ లో ఇటు ఇంట్లో ఎక్క‌డ విన్నా క‌ష్ట‌ప‌డి చ‌దువు అన్న ఒకే ఒక ముక్క వినిపిస్తూ ఉంటుంది. ప్ర‌తీ విద్యార్ధి వారి వారి సామ‌ర్ధ్యాల మేర‌కు కష్ట‌ప‌డే చ‌దువుతారు. అయినా ఒక‌టో త‌ర‌గ‌తి నుంచి ప‌దో త‌ర‌గ‌తి, ఆ త‌ర్వాత ఇంట‌ర్, డిగ్రీ, పీజీ ఇలా మొత్తం ప్ర‌యాణంలో విద్యార్థి వినే ఒకే ఒక్క మాట క‌ష్ట‌ప‌డి చ‌దువు అన్న‌దే. ఇలా చెప్ప‌డం విద్యార్ధుల‌పై ఒత్తిడిని పెంచే ప్ర‌మాదం ఉంది. చదువు అంటే చాలా కష్టమైన విషయం అని విద్యార్ధి భయపడే ప్రమాదం ఉంది. అలా కాకుండా మిగతా అన్ని విషయాల్లానే చదువును కూడా ఇష్టప‌డి చేస్తే అనూహ్య‌మైన ఫ‌లితాలు వ‌స్తాయి. విద్యార్థి చ‌దువును ఒత్తిడిలా, భారంలా భావించకుండా త‌న పూర్తి సామ‌ర్ద్యాన్ని వినియోగించి ఇష్ట‌ప‌డి చ‌దువుతాడు. త‌ల్లిదండ్రులు త‌మ పిల్ల‌ల‌కు  చ‌దువు యెక్క‌ ఉప‌యోగం చెప్పాలి కానీ చ‌దువు అటే ఒక బ్ర‌హ్మ ప‌దార్ధం అని భ‌య‌పెట్ట‌కూడ‌దు. 

పిల్ల‌ల‌పై ఒక ముద్ర వేయ‌కండి 

     ప్ర‌స్తుతం  త‌ల్లిదండ్రులు, టీచ‌ర్లు  చేస్తున్న అతిపెద్ద  పొర‌పాటు. త‌మ పిల్ల‌ల‌పై ఒక ముద్ర వేసేయడం. వీడి సామ‌ర్ధ్యం ఇంతే ...వీడు ఇంత‌వ‌ర‌కే చ‌ద‌వ‌గ‌ల‌డు అని కొన్ని ప‌రిమితులు విధిస్తున్నారు. ఇది పిల్ల‌ల ఆత్మ‌విశ్వాసాన్ని తీవ్రంగా దెబ్బ‌తీస్తోంది. మ‌రోవైపు పాఠ‌శాల‌ల్లో కూడా ఏ గ్రేడ్ లు, బీ గ్రేడ్ లు అంటూ పిల్ల‌ల్ని విడ‌దీస్తున్నారు. టీచ‌ర్లు కూడా ఆయా గ్రేడ్ల‌కు త‌గిన‌ట్టుగానే విద్య‌ను నేర్పిస్తున్నారు. పిల్ల‌ల‌పై టీచ‌ర్లు, త‌ల్లిదండ్రులు పూర్తి న‌మ్మ‌కం ఉంచితే వాళ్లు మంచి ఫ‌లితాల‌ను సాధిస్తారు. ప్ర‌స్తుతం మ‌న విద్యా విధానంలో ఈ అంశం కొర‌వ‌డుతోంది. పిల్ల‌ల్లో ఒక్కొక్క‌రిలో ఒక్కో ప్ర‌త్యేకమైన ప్ర‌తిభా, సామ‌ర్ధ్యాలు ఉంటాయి. వాటిని గుర్తించి ప్రోత్సాహిస్తే వారు రాణిస్తారు. ప‌రీక్ష‌ల్లో వంద‌కు వంద వ‌స్తే సంపూర్ణ విద్య‌ను సాధించిన‌ట్టు భావిస్తున్నారు. ఆ కొల‌మానాన్ని నిర్దేశించే విధానం మారాలి. ఏకీకృత ప‌రీక్షా విధానం వంటి కొత్త త‌ర‌హా విధానాల‌తో విద్యార్దుల్లో అస‌లైన సామ‌ర్ధ్యాన్నిగుర్తించలేకపోతున్నారు. భిన్న సామర్ధ్యాలు ఉన్నవారికి భిన్న పరీక్షలు నిర్వహించి వారిలో ఆత్మవిశ్వాసాన్ని పెంచాలి.  

స‌రైన ప్ర‌ణాళిక ఉంటే మీదే విజ‌యం 

     ఈ ప‌రీక్షా కాలంలో స‌రైన‌ ప్ర‌ణాళిక‌దే స‌గం విజ‌యం. ప‌రీక్ష‌ల స‌మ‌యంలో రోజూ ఏం చేయాలి, కాలాన్ని ఎలా స‌ద్వినియోగం చేసుకోవాలి. బ‌ల‌హీన‌త‌ల్ని ఎలా అధిగ‌మించాల‌న్న దానిపై విద్యార్ధులు దృష్టి పెట్టాలి. ఇక త‌ల్లిదండ్రులు విద్యా సంవ‌త్స‌రం ప్రారంభం కాగానే హ‌డావుడి ప‌డ‌కుండా ముందుగానే త‌మ పిల్ల‌ల‌కు సంబంధించి ఒక ప్ర‌ణాళిక వేసుకోవ‌డం అత్య‌వ‌స‌రం. ఏ స్కూల్ లో జాయిన్ చేయాలి, ఏడాది అంతా త‌మ పిల్ల‌ల‌ను ఎలా చ‌దివించాలన్న‌దానిపై స్ప‌ష్ట‌త తెచ్చుకోవాలి. ఇలా చేస్తే విద్యా సంవ‌త్స‌రం చివ‌ర్లో విద్యార్ధులు, విద్యా సంవ‌త్స‌రం మొద‌ట్లో తల్లిదండ్రులు హైరానా ప‌డాల్సిన అవ‌స‌రముండ‌దు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com