క‌ర్ష‌కుల త‌యారీలో క్యాంప‌స్ లు

    ఐఐటీలు అన‌గానే మ‌న‌కు ముందుగా గుర్తుకువ‌చ్చేది అత్యున్న‌త టెక్నిక‌ల్ కోర్సులు. ఐఐటీలో కోర్సు పూర్తి కాగానే బ‌డా బ‌డా సంస్థ‌లు విద్యార్దుల‌ను భారీ మొత్తాల‌కు ఎగురేసుకుపోవ‌డం కూడా తెలిసిందే. అయితే ఇప్పుడు ఆస‌క్తిక‌రంగా ఐఐటీల్లో వ్య‌వ‌సాయ కోర్సులు ప్ర‌వేశ‌పెట్టాల‌నే డిమాండ్ ఊపందుకుంటోంది. వ్య‌వ‌సాయ ఆధారిత దేశ‌మైన ఇండియాలో ఇప్పుడు వ్య‌వ‌సాయం గ‌డ్డు ప‌రిస్థితుల‌ను ఎదుర్కొంటోంది. ఐఐటీల్లో కోర్సులు పెడితే వ్య‌వ‌సాయ రంగం బాగుప‌డుతుందా? ఒకవేళ ఐఐటీల్లో వ్య‌వ‌సాయ కోర్సులు ప్ర‌వేశ‌పెడితే అస‌లు విద్యార్ధులు జాయిన్ అవుతారా? 

       ఏ రంగ‌మైనా  అభివృద్ధి సాధించాలంటే ప‌రిశోధ‌న‌ల‌కు పెద్ద పీట వేయాలి. దుర‌దృష్ట‌వ‌శాత్తూ మ‌న‌దేశంలో ప‌రిశోధ‌న‌లు ఇప్ప‌టికీ బాల్య ద‌శ‌లోనే ఉన్నాయి. మ‌న ప‌క్క దేశం చైనాలో ప్ర‌తీ వెయ్యి మందికి ఒక న‌లుగురు ప‌రిశోధ‌కులు ఉంటే మ‌న దేశంలో 10 వేల మందికి న‌లుగురు ప‌రిశోధ‌కులు మాత్ర‌మే ఉన్నారు. ప‌రిశోధ‌న‌ల‌కు ఎవ‌రూ ముందుకు రాక‌పోవ‌డంతో సైంటిఫిక్ ఇండెక్స్ లో చైనా, జ‌పాన్ వంటి దేశాలు దేశాలు దూసుకుపోతుంటే మ‌న స్థానం మాత్రం ఎక్క‌డో చివ‌ర్న ఉంది.  

ప‌రిశోధ‌న‌లు లేకుండా ప్ర‌గ‌తి ఎలా సాధ్యం? 

      మ‌న దేశ ఆర్థిక వ్య‌వ‌స్థ‌లో సింహ భాగ‌మైనా మ‌న వ్య‌వ‌సాయ రంగం మాత్రం ఇప్ప‌టికీ బాలారిష్టాల‌ను దాట‌లేదు. ముఖ్యంగా వ్య‌వ‌సాయంలో ప‌రిశోధ‌న‌లు ఇప్ప‌టికీ ఎక్క‌డ వేసిన గొంగ‌డి అక్క‌డే అన్న చందంగా ఉన్నాయి. ఆ విష‌యంలో చైనా ముందుకు దూసుకువెళుతోంది. హ‌రి విప్ల‌వ పితామ‌హుడు, వ్య‌వ‌సాయ శాస్త్ర‌వేత స్వామినాథ‌న్ చెప్పిన ప్ర‌కారం వ్య‌వ‌సాయ ప‌రిశోధ‌న‌లు ఊపందుకోకుంటే ఎన్ని సంవత్స‌రాలు గ‌డిచినా మ‌నం అభివృద్ధిని సాధించ‌లేము. దేశ‌వ్యాప్తంగా ప్ర‌తీ జిల్లాకు ఒక పరిశోధ‌న‌నా కేంద్రాన్ని ఏర్పాటు చేసిన‌ప్పుడే మ‌నం ఐఐటీల్లో కోర్సులు పెట్టినా, డిగ్రీల్లో కోర్సుల్లో పెట్టినా స‌త్ఫ‌లితాలు వ‌స్తాయి. లేకుంటే వ్య‌వ‌సాయంలో అద్భుతాల‌ను ఆశించ‌డం అత్యాశే అవుతుంది. 

ఐఐటీల్లో వ్యవ‌సాయ కోర్సులు స‌త్ఫ‌లితాల‌నిస్తాయా? 

       మ‌న దేశంలో ఐఐటీల‌కు అత్యున్న‌త విద్యా సంస్థ‌లుగా మంచి పేరు ఉంది. అయితే ఐఐటీలు ప్ర‌ధానంగా ఐటీ, టెక్నాల‌జీ ఆధారిత కోర్సుల‌కే పెద్ద పీట వేస్తున్నాయి. ఈ నేప‌థ్యంలో ఐఐటీల్లో వ్య‌వ‌సాయ ఆధారిత కోర్సులు ప్ర‌వేశ‌పెట్టాల‌న్న వాద‌న క్ర‌మంగా ఊపందుకుంటోంది. 21 వ శ‌తాబ్దంలోనూ పూర్తి స్థాయి సాంకేతిక‌ను అందిపుచ్చుకోవ‌డంలో మ‌న దేశ వ్య‌వ‌సాయ రంగం ఇంకా వెన‌క‌బ‌డే ఉంది. ఇప్ప‌టికీ అధిక శాతం వ్య‌వ‌సాయాన్ని రైతులు సంప్ర‌దాయ ప‌ద్ధ‌తిలోనే చేస్తున్నారు. దీంతో అనుకున్న స్థాయిలో దిగుబ‌డి రాక రైతులు తీవ్రంగా న‌ష్ట‌పోతున్నారు. మ‌రోవైపు మ‌న దేశంలో ఉన్న సాగు భూములు ఆధారంగా చూసుకుంటే అనుకున్నఆహారోత్ప‌త్తి జ‌ర‌గ‌టం లేద‌నే చెప్పాలి. దీనికి ప్ర‌ధాన కార‌ణం వ్య‌వ‌సాయ రంగంలో సాంకేతిక‌త‌ను వాడ‌కుండా ఇంకా మూస ప‌ద్ధ‌తుల్లోనే వ్య‌వ‌సాయం చేయ‌డ‌మే అన్న‌ది నిపుణుల మాట‌. 

ఐఐటీ నిపుణులు వ్య‌వ‌సాయాన్ని మార్చేస్తారా? 

        ఈ నేప‌థ్యంలో ఐఐటీల్లో ఆధునిక వ్య‌వ‌సాయ ప‌ద్ధ‌తుల‌పై కోర్సులు ప్ర‌వేశ‌పెట్టాల‌ని కొంద‌రు నిపుణులు సూచిస్తున్నారు. దీని వ‌ల‌న మ‌న వ్య‌వ‌సాయ రంగంలో ఆధునిక‌త పెరిగి స‌రైన దిగుబ‌డి సాధించేందుకు అవ‌కాశం ఏర్ప‌డుతుంద‌ని వారు చెపుతున్నారు. ఐఐటీ వంటి అత్యున్నత విద్యా సంస్థ‌ల్లో ఆధునిక వ్య‌వ‌సాయ కోర్సులు పెడితే ఎంతో మంది నిపుణులు బ‌య‌ట‌కు వ‌చ్చి మ‌న వ్య‌వ‌సాయ రంగాన్ని కొత్త పుంత‌లు తొక్కిస్తార‌ని వారు విశ్వాసం వ్య‌క్తం చేస్తున్నారు. నిపుణులు సూచ‌న మేర‌కు ఇప్ప‌టికే ఐఐటీ ఖ‌ర‌గ్ పూర్ లో వ్య‌వ‌సాయ కోర్సుల‌ను ప్రారంభించారు. ఈ కోర్సులకు విద్యార్ధుల నుంచి కూడా మంచి ఆద‌ర‌ణే ల‌భిస్తొంది. ఖ‌ర‌గ్ పూర్ స్ఫూర్తితో మ‌రిన్ని ఐఐటీలు, ట్రిపుల్ ఐటీలో వ్య‌వసాయ ఆధారిత కోర్సులు ప్ర‌వేశ‌పెట్టాల‌నే డిమాండ్లు అధిక‌మ‌వుతున్నాయి. 

అయితే ఐఐటీ కోర్సు పూర్తికాగానే మంచి ఉద్యోగం సాధించాల‌ని భావిస్తే త‌క్ష‌ణ ఫ‌లితాలు రావ‌న్న‌ది సుస్ప‌ష్టం. వ్య‌వ‌సాయాన్ని ఒక వ్యాపారంగా మ‌లుచుకుని లాభాల‌ను గ‌డించాల‌నుకునే విద్యార్దుల ద్వారానే ఇది సాధ్య‌మ‌వుతుంది. ఐసీఏఆర్ లాంటి ప‌రిశోధ‌నా కేంద్రాలు నెల‌కొల్పి దాని ద్వారా ఆధునిక ప‌ద్ధ‌తుల్లో వ్య‌వ‌సాయం చేస్తేనే ఐఐటీ వ్య‌వ‌సాయం ఫ‌లితాల‌ను ఇస్తుంది. లేకుంటే ఇప్ప‌టికే బీఎస్సీ అగ్గిక‌ల్చ‌ర‌ల్, బీటెక్ అగ్రిక‌ల్చ‌ర‌ల్ కోర్సుల్లానే ఐఐటీ వ్య‌వ‌సాయ కోర్సులు కూడా నిరాద‌ర‌ణ‌కు గురికావ‌డం త‌థ్యం. 

ప్ర‌స్తుతం మ‌న దేశంలో ఐఐటీల్లో ఐటీ ఆధారిత కోర్సుల‌కు మంచి డిమాండ్ ఉంది. ఇటువంటి కోర్సులు చేసిన విద్యార్ధులకు బ‌డా కంపెనీలు భారీ జీతాల‌తో ఆహ్వానం ప‌ల‌క‌డంతో అధిక శాతం మంది వీటివైపే మొగ్గు చూపుతున్నారు. అయితే ఐఐటీ వంటి అత్యున్నత సంస్థ‌ల్లో మిగ‌తా కోర్సుల‌కు కూడా మంచి ఆద‌ర‌ణే ఉంది. ఐఐటీ ల్లో చ‌దివిన విద్యార్దుల‌కు ఇచ్చే నాణ్య‌మైన శిక్ష‌ణ వ‌ల్ల‌నే విద్యార్ధుల‌కు అంత డిమాండ్. ఇప్పుడు ఆధునిక వ్య‌వ‌సాయ ఆధారిత కోర్సులు ప్ర‌వేశ‌పెడితే మంచి ఫ‌లితాలు వ‌చ్చే అవ‌కాశాలు అయితే ఉన్నాయి. ఈ కోర్సులు చేసిన‌ విద్యార్ధులు విదేశాలు వెళ్లిపోతార‌న్న ఆందోళ‌న ఉండ‌దు. వాళ్లు కూడా దేశానికి సేవ చేస్తార‌ని, వ్య‌వ‌సాయ రంగంలో విప్ల‌వాత్మ‌క మార్పులు తీసుకొస్తార‌ని నిపుణులు అంచ‌నా వేస్తున్నారు. మంచి నిపుణుల ఆధ్వ‌ర్యంలో ప‌నిచేయ‌డం వ‌ల‌న రానున్న రోజుల్లో మ‌న వ్య‌వ‌సాయ రంగం కూడా ఆధునిక‌త‌ను, సాంకేతిక‌త‌ను సంత‌రించుకుని మంచి దిగుబ‌డులు వ‌స్తాయ‌ని వారు చెపుతున్నారు. 

      

ఇంజినీరింగ్ కు వ్య‌వ‌సాయాన్ని జోడిస్తే అద్భుతాలే! 

      వ్య‌వ‌సాయ శాస్త్ర‌వేత్త స్వామినాధ‌న్, దేశంలో శ్వేత విప్ల‌వానికి బీజం వేసిన కురియ‌న్ లు వ్య‌వ‌సాయాన్ని ఇంజినీరింగ్ కు జోడించాల‌ని తొలి నుంచి చెపుతూ వ‌స్తున్నారు. దీనికి ప‌రిశోధ‌న కేంద్రాల ఏర్పాటుతో తొలి అడుగు వేయాల‌ని సూచించారు. అయితే ఏ ప్ర‌భుత్వాలు వీరి సూచ‌న‌ల‌ను సీరియ‌స్ గా తీసుకోలేదు. మాజీ రాష్ట్రప‌తి , దివంగ‌త అబ్దుల్ క‌లామ్ కూడా వ్య‌వ‌సాయ రంగంలో ప‌రిశోధ‌న‌ల ఆవ‌శ్య‌క‌త‌ను ఎన్నో సంద‌ర్భాల్లో గుర్తు చేశారు. ఇంజినీరింగ్ వ్య‌వ‌సాయాన్ని జోడిస్తే అద్భుతాలు వ‌స్తాయ‌ని, విద్యార్ధులు ఉద్యోగం కోసం కాకుండా పారిశ్రామిక వేత్త‌లుగా మారేందుకు సిద్ధంగా ఉండాల‌ని ఆయ‌న చెప్పారు. మ‌న దేశ  ఎగుమ‌తుల్లో సింహ భాగం వ్య‌వ‌సాయ ఉత్ప‌త్తుల‌దే అయినా కీల‌క‌మైన ఆ రంగాన్ని నిర్ల‌క్ష్యం చేయ‌డం మ‌న పాల‌కుల‌కు అల‌వాటుగా మారిపోయింది.   

ప్ర‌భుత్వ చిత్త‌శుద్ధిపైనే సందేహాలు 

     ఐటీని వ్య‌వ‌సాయ రంగానికి అనుసంధానించి అద్భుత‌మైన ఫ‌లితాల‌ను సాధించ‌వ‌చ్చ‌ని ఇప్ప‌టికే ఎంద‌రో నిపుణులు ప్ర‌భుత్వాల‌కు విన్న‌వించారు. వ్య‌వ‌సాయ ఇంజినీరింగ్ ను కొత్త పుంతులు తొక్కించేందుకు తీసుకోవాల్సిన చ‌ర్య‌ల్లో భాగంగానే ఉన్నత విద్యా సంస్థ‌ల్లో వ్య‌వ‌సాయ సంబంధిత కోర్సుల‌ను ప్ర‌వేశ‌పెట్టాల‌ని సూచించారు. అయితే ఆ సూచ‌న‌లు ఇప్ప‌టి వ‌ర‌కూ పూర్తి స్థాయిలో అమ‌లు కాలేదు. వ్య‌వ‌సాయ రంగంలో స్వ‌యం స‌మృద్ధి సాధించాలంటే మ‌న విద్యా విధానంలో మార్పులు త‌ప్ప‌ని స‌రి. ఐఐటీల విష‌యం కాస్త ప‌క్క‌న పెడితే మామూలు విద్యాసంస్థ‌ల్లో వ్య‌వ‌సాయ కోర్సులు ప్ర‌వేశ‌పెట్టినా విద్యార్ధుల నుంచి స్పంద‌న అంతంత మాత్రంగానే ఉంటోంది. త‌ర్వాత స‌రైన ఉపాధి అవ‌కాశాలు ఉండ‌వేమోన‌న్న భావ‌న విద్యార్ధుల‌ను భ‌య‌పెడుతోంది. ఇప్పుడు ఐఐటీల్లో వ్య‌వ‌సాయ సంబంధిత కోర్సుల‌ను ప్ర‌వేశ‌పెట్టి ఇంజినీరింగ్ ను కొత్త పుంత‌లు తొక్కించి అవ‌కాశాల‌ను సృష్టిస్తే , విద్యార్ధులు క‌చ్చితంగా ఈ కోర్సుల్లో చేరేందుకు ఆస‌క్తిని చూపిస్తారు. ఈ విష‌యంలో ప్ర‌భుత్వాల చిత్త‌శుద్ధి ఎంత‌న్న‌దానిపైనే ఈ కోర్సులు విజ‌యవంత‌మ‌వుతాయా లేదా అన్న ఫ‌లితం ఆధార‌ప‌డి ఉంది. ఐఐటీ, యూనివ‌ర్సిటీలు, ట్రిపుల్ ఐటీల్లో వ్య‌వ‌సాయం కోర్సులు  క‌నుక విజ‌య‌వంత‌మైతే  మ‌న పాత త‌రం త‌ల‌పాగా రైతుల స్థానంలో కొత్త త‌రం ఐటీ రైతులు ప్ర‌తీ విద్యా ప్రాంగ‌ణంలో క‌ళ‌క‌ళ‌లాడే ప‌చ్చ‌ని ఆకుమ‌ళ్లు ఆవిష్కృత‌మ‌య్యి క్యాంప‌స్ ల‌ను మ‌న క‌ర్ష‌కులు క‌ల్టివేట్ చేస్తార‌న‌డంలో ఏ విధ‌మైన సందేహం లేదు. 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                       You can send your Educational related articles to  careertimes.online1@gmail.com