క‌లాం మ‌ళ్లీ పుట్టినా ఈ 'క‌డ‌'గండ్లు పోయేనా?

     ఏ దేశాభివృద్ధి అయినా నూత‌న ఆవిష్క‌ర‌ణ‌ల మీద‌నే ఆధారప‌డి ఉంటుంది. ప్ర‌పంచంలో ప్ర‌స్తుతం శ‌క్తివంత‌మైన ఆర్థిక వ్య‌వ‌స్థ‌లుగా ఉన్న దేశాల‌ను నిశితంగా గ‌మ‌నిస్తే కొత్త ఆవిష్క‌ర‌ణ‌లే ఆయా దేశాల‌ను ఆర్థికంగా బ‌ల‌ప‌ర్చాయ‌ని క్లియ‌ర్ గా అర్ధ‌మ‌వుతుంది. అగ్ర‌రాజ్యం అమెరికా ద‌గ్గ‌ర్నుంచి కొత్త ఆర్థిక శ‌క్తి చైనా వ‌ర‌కూ కొంగ్రొత్త ప్ర‌యోగాల‌తో స‌త్తా చాటుతున్నాయి. నిత్య నూత‌న టెక్నాల‌జీతో ప్ర‌పంచవ్యాప్తంగా శ‌క్తివంత‌మైన కంపెనీల‌ను నెల‌కొల్పి సంప‌ద‌ను సృష్టించుకుంటున్నాయి. అదే స‌మ‌యంలో మ‌న దేశం మాత్రం ఆవిష్క‌ర‌ణ‌ల్లో వెనుక‌బ‌డి ఇత‌ర దేశాల ఉత్ప‌త్తుల‌ను కొనుక్కోవ‌డానికే ప‌రిమిత‌మైపోతోంది. ఇండియాతో పాటే ప్ర‌యాణాన్ని ప్రారంభించిన చైనా మ‌న‌కు అంద‌నంత దూరంలో ఉంటే మ‌నం మాత్రం ఇంకా మొద‌లుపెట్టిన చోటనే ఉన్నాం. దేశ విద్యారంగంలో ఉన్న లోపాలే మ‌న ఆవిష్క‌ర‌ణ‌లు అధఃపాతాళంలో ఉండిపోవ‌డానికి ప్ర‌ధాన కార‌ణం. 

క్షేత్ర‌స్థాయిలో లోపాలే ఈ శాపాలు! 

     మ‌న దేశంలో దాదాపు 400 వ‌ర‌కూ యూనివ‌ర్సిటీలు ఉన్నాయి. ప్ర‌తీ యూనివ‌ర్సిటీ ఏడాదికి స‌గ‌టున 75 మంది ప‌రిశోధ‌నా ప‌త్రాల‌ను అంద‌జేస్తోంది. అంటే దాదాపు ప్ర‌తీ ఏడాది 30 వేల మంది వ‌ర‌కూ పీహెచ్ డీలు చేస్తున్నారు. అయితే వీళ్లు స‌మ‌ర్పిస్తున్న ప‌రిశోధ‌నా ప‌త్రాలు దేశాభివృద్ధికి ఎంత‌వ‌ర‌కూ ఉప‌యోగ‌ప‌డుతున్నాయంటే ఠ‌క్కున స‌మాధానం చెప్ప‌డం క‌ష్ట‌మే. తాజాగా యూనివ‌ర్సిటీ పీహెచ్ డీల‌పై విమ‌ర్శ‌లు చెల‌రేగాయి. అస‌లు క‌నీసం ఉప‌యోగం లేకుండా క‌ట్ పేస్ట్ పీహెచ్ డీలు చేస్తున్నారన్న‌ది ఆ విమ‌ర్శ‌ల సారాంశం. అయితే ఇక్క‌డ ముఖ్యంగా గ‌మ‌నించాల్సిన విష‌యం ఒక‌టుంది. యూనివ‌ర్సిటీల్లో స‌రైన మౌలిక వ‌సతులను ఏర్పాటు చేసి ఈ విమ‌ర్శలు చేస్తే ఉప‌యోగ‌ముండేది కానీ ఇప్పుడు మాత్రం ఈ విమ‌ర్శలు చ‌ర్చ‌కు నిలిచేవి కావు. కొంద‌రు అభ్య‌ర్ధులు సీరియ‌స్ నెస్ లేకుండా క‌ట్ పేస్ట్ పీహెచ్ డీలు చేస్తే చేసి ఉండ‌వ‌చ్చు. కానీ అధిక శాతం మంది మాత్రం వ‌స‌తులు లేక ప‌ర్య‌వేక్ష‌ణ లేక ప్రోత్సాహం లేక నీరుగారిపోయి పీహెచ్ డీల‌ను తూతూమంత్రంగా మ‌మ అనిపిస్తున్నార‌న్న‌ది అక్ష‌ర స‌త్యం. 

ఆవిష్క‌ర‌ణ‌ల ప్రాధాన్య‌త‌ను వివ‌రించే నాధుడేడి? 

     ప్ర‌స్తుతం యూనివ‌ర్సిటీల్లో పీహెచ్ డీలు ఏ తీరుగా జ‌రుగుతున్నాయ‌న్న విష‌యం చిన్న పిల్ల‌వాడిని అడిగినా చెపుతాడు. అడుగ‌డునా అవినీతి, అస్ప‌ష్ట విధానాలు వెర‌సి కొత్త ఆవిష్క‌ర‌ణ‌లు చేద్దామ‌నుకుంటున్న అభ్య‌ర్ధుల‌ను నీరుగారేలా చేస్తున్నాయి. అభ్య‌ర్ధి ఒక ఆవిష్క‌ర‌ణ‌ను ఎంపిక చేసుకున్న ద‌గ్గ‌ర నుంచి అది నిజ‌మైన ప్ర‌యోజ‌నాల‌ను అందించే వ‌ర‌కూ ప్ర‌తీ అంచెలోనూ దాన్ని వెన్నంటి న‌డిపించే ఒక ప‌ర్య‌వేక్ష‌కుడు కావాలి. ఇప్పుడు మ‌న దేశంలో స‌రిగ్గా ఇక్క‌డే ఆవిష్క‌ర‌ణ‌లు కుంటుప‌డుతున్నాయి. ప‌ర్య‌వేక్ష‌ణా లోపంతో అభ్య‌ర్ధులు నీరుగారిపోతున్నారు. ఏదో సాధిద్దామ‌ని ఉప‌యోగ‌ప‌డే విష‌యాన్ని క‌నుగొందామ‌ని వ‌చ్చిన వారు కాస్తా ఏదో ప‌ని కానిచ్చుకుని వెళ్లిపోతే స‌రిపోతుందిలే అనుకుంటున్నారు. ఆవిష్క‌ర‌ణ యొక్క గొప్ప‌త‌నం ఏమిటి?  దాని వ‌ల‌న ఎన్ని ప్ర‌యోజ‌నాలున్నాయి.ఆ ప్ర‌యోజ‌నాల‌తో ఎంత ఉన్న‌త స్థితికి వెళ్ల‌వచ్చ‌న్న దానిపై అభ్య‌ర్ధుల స్పూర్తినిచ్చే ఒక  స‌హ‌కారం క‌ర‌వ‌వుతోంది. పేటేంట్ , గుర్తింపు, దేశ భ‌క్తి ఇత్యాది విష‌యాల‌ను అభ్య‌ర్ధుల‌కు తెలిసిన విష‌యాలే అయినా  వీటిపై వాళ్ల‌ను ఎప్ప‌టిక‌ప్పుడు చైత‌న్యం చేసి వాళ్ల‌లో ఉత్సాహం నింపే చ‌ర్య‌లు శూన్యం.  ఒక ఆవిష్క‌ర‌ణ దేశాభివృద్ధికి ఎలా ఉప‌యోగ‌ప‌డుతుంది. అదే విధంగా దాని పేటెంట్ తో వ్య‌క్తిగ‌తంగా ఎటువంటి లాభం పొంద‌వ‌చ్చు. ఇలాంటి విష‌యాల‌ను వివ‌రించే అండ వాళ్ల‌కు క‌నిపించ‌డం లేదు. 

మౌలిక వ‌స‌తులు లేకుండా అద్భుతాలు సాధ్య‌మా? 

        అమెరికా, చైనా లాంటి దేశాల్లో ప్ర‌యోగాల‌కే అగ్ర స్థానం. దీని కోసం అక్క‌డ యూనివ‌ర్సిటీల్లో ప్ర‌త్యేకంగా మౌలిక వ‌స‌తుల‌ను క‌ల్పించారు. అభ్య‌ర్ధి విష‌యాన్ని ఎంచుకున్న ద‌గ్గ‌ర్నెంచి పూర్త‌య్యే వ‌ర‌కూ అత‌నికి అన్ని విధాలా స‌హాయ స‌హ‌కారాలు అందిస్తారు. అటువంటి వ్య‌వ‌స్థ మ‌న‌దేశంలో క‌ల‌లో కూడా ఊహించలేం. ఇటువంటి ప‌రిస్థితుల్లో అభ్య‌ర్ధులు క‌ట్ పేస్ట్ పీహెచ్ డీలు చేయ‌డం మిన‌హా ఇంకేం చేస్తారు. ప‌లు అమెరికన్ కంపెనీలు ,చైనా, కొరియ‌న్ కంపెనీలు స‌రికొత్త ఉత్ప‌త్తుల‌తో దూసుకుపోతున్నాయి. అంత‌ర్జాతీయంగా అంత‌టి విదేశీ మార‌క ద్ర‌వ్యాన్ని సంపాదించి పెట్టే స‌రైన ఆవిష్క‌ర‌ణలు మ‌న ద‌గ్గ‌ర ఎందుకు కాన‌రావ‌డం లేదు. అప్పుడెప్పుడో క‌నిపెట్టిన కొన్ని విదేశీ వ‌స్తువులు  పెటెంట్ రూపంలో ఇప్ప‌టికీ భారీ మొత్తంలో డ‌బ్బును సంపాదిస్తున్నాయి. మ‌న ద‌గ్గ‌ర అలాంటి గొప్ప పేటెంట్ లు ఎందుకు లేవు?  కారణం వ్య‌వ‌స్థ‌లో లోపాలు, మౌలిక వ‌స‌తుల లోటు. స‌రైన స‌దుపాయాలు క‌ల్పించ‌కుండా అద్భుతాలు సాధించ‌డం ఎవ‌రి వ‌ల్ల కుద‌ర‌ని ప‌ని. వ‌స‌తులను, సౌక‌ర్యాల‌ను పెంచ‌డం మాని అభ్య‌ర్ధుల‌ను త‌ప్పుప‌డితే కొత్త ఆవిష్క‌ర‌ణ‌లు పుట్టుకొస్తాయా? స‌మ‌స్య మూలాల్లోకి వెళ్ల‌క‌పోవ‌డం వ‌ల‌న వ‌చ్చిన అపోహ‌లు ఇవి. 

ప్ర‌క్షాళ‌న లేకుంటే ప్ర‌గ‌తి శూన్యం! 

     కొత్త ఆవిష్క‌ర‌ణల విష‌యంలో చిన్న చిన్న దేశాల కంటే వెనుక‌బ‌డిపోయిన మ‌నం ఇప్ప‌టికైనా క‌ళ్లు తెర‌వ‌కుంటే ప‌రిస్థితి మ‌రింత దిగ‌జారుతుంది. స్వ‌యంసమృద్ధి , ఆర్థిక స్వావ‌లంబ‌న సాధించాలంటే ఆవిష్క‌ర‌ణ‌లే దిక్కు. లేకుంటే ఎప్ప‌టికీ వ‌ర్ధ‌మాన దేశం హోదాలోనే మ‌గ్గిపోవ‌డం ఖాయం. ఈ విష‌యంలో పాల‌కులు త‌క్ష‌ణం క‌ళ్లు తెరిచి ఆవిష్క‌ర‌ణ‌ల‌కు పెద్ద పీట వేసే చ‌ర్య‌లు చేప‌ట్టాలి. అలా కాకుండా అభ్య‌ర్ధుల‌ను క‌ట్ పేస్ట్ గాళ్లు, కాపీ రాయుళ్లు అని విమ‌ర్శిస్తూ కూర్చుంటే ఫ‌లితాలు రావు. పంట నుంచి స‌రైన దిగుబ‌డి ఆశించిన‌ప్పుడు భూమి ఎంత సార‌వంత‌మైన‌ది, సాగునీరు, ఎరువులు త‌గు మోతాదులో అందించా లేదా అన్న‌ది చూసుకోవాలి. సాగుపై శ్ర‌ద్ధ పెట్ట‌కుండా అధిక‌ దిగుబడిని ఆశించ‌డం అత్యాశే అవుతుంది. మ‌న పాల‌కులు, వ్య‌వ‌స్ధ యొక్క వైఖరి మాత్రం అచ్చం ఇలానే ఉంది. ఆవిష్కరణలే మన భవిష్యత్ ను నిర్దేశిస్తాయని చెప్పిన దివంగత భారత రత్నం అబ్దల్ కలాం మళ్లీ పుట్టినా ఈ వ్యవస్థను ప్రక్షాళన చేయడం సాధ్యం కాదేమో! 

ఈ ఫీచ‌ర్ పై  గైడెన్స్ కావాల్సిన వారు ఈ క్రింది నెంబ‌ర్ వాట్సాప్ గ్రూప్ లో చేర‌వ‌చ్చు.

97006 09135

                    You can send your Educational related articles to  careertimes.online1@gmail.com